திரு ஆணைக்காவல்

௨ 

திரு நாவுக்கரசு சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	திரு ஆனைக்கா
பிற பெயர்கள்
நாடு	சோழ நாடு (வ)
ॐசுவாமி	ஜம்புநாதர், அப்புலிங்கேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	சம்பந்தர் (3)         மழையார் மிடறா(2-23)         வானைகாவில் வெண்மதி (3-53)         மண்ணது உண்டரி (3-109) அப்பர் (3)         கோனைக்காவி (5-31)         எத்தாயார் எத்தந்தை(6-62)         முன்னானை தோள் போர்த்த (6-63) சுந்தரர் (1)          மறைகள் ஆயின நான்கும். (7-75)
ஸ்தல மரம்	வெண் நாவல்
தீர்த்தம்	காவிரி
பண்	திருத்தாண்டகம்
குறிப்புகள்	யானையும் சிலந்தியும் வழிபட்ட தலம்  பஞ்ச பூத தலங்களில் இது அப்பு தலம். .  அம்பிகை, அஷ்ட வசுக்கள், பிரமன் பராசரர், கோச்செங்கட் சோழன் முதலியோர் வழிபட்ட தலம்  முதலில் பூசித்த சிலந்தி மறுபிறப்பில் கோச்செங்கட் சோழனாகப் பிறந்தது என்பது வரலாறு
பதிக பலன்	பிறவிப் பயனைப் பெறுவர்
வரிசை எண்.	62                                                      60/63

திருச்சிற்றம்பலம்          

எத்தாயர் எத்தந்தை எச்சுற் றத்தார்
எம்மாடு சும்மாடாம் ஏவர் நல்லார்
செத்தால் வந்து உதவுவார் ஒருவர் இல்லை
சிறுவிறகால் தீமூட்டிச் செல்லா நிற்பர்
சித்தாய வேடத்தாய் நீடு பொன்னித் 
திருவானைக் காவுடைய செல்வா என்றன்
அத்தா உன் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  1

ஊனாகி உயிராகி அதனுள் நின்ற 
உணர்வாகிப் பிறஅனைத்தும் நீயாய் நின்றாய்
நான் ஏதும் அறியாமே என்னுள் வந்து
நல்லனவும் தீயனவும் காட்டா நின்றாய்
தேனாரும் கொன்றையனே நின்றி யூராய்
திருவானைக் காவில் உறை சிவனே ஞானம்
ஆனாய் உன் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  2

ஒப்பா இவ் உலகத்தோடு ஒட்டி வாழ்வான்
ஒன்றலாத் தவத்தாரோடு உடனே நின்று
துப்பாரும்  குறை அடிசில் துற்றி நற்றுன் 
திறம் மறந்து திரிவேனைக் காத்து நீ வந்து 
எப்பாலும் நுண் உணர்வே யாக்கி என்னை 
ஆண்டவனே எழிலானைக் காவா வானோர்
அப்பா உன் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  3

நினைத்தவர்கள் நெஞ்சுளாய் வஞ்சக் கள்வா
நிறைமதியம் சடைவைத்தாய் அடையாது உன்பால்
முனைத்தவர்கள் புரம் மூன்று எரியச் செற்றாய்
முன்னானைத் தோல்போர்த்த முதல்வா என்றும்
கனைத்துவரும் எருது ஏறும்  காள கண்டா
கயிலாய மலையாநின் கழலே சேர்ந்தேன்
அனைத்து உலகும் ஆள்வானே ஆனைக் காவா
அல்லகண்டம் கொண்டு அடியேன் என் செய்கேனே.  4

இம் மாயப்பிறப்பு என்னும் கடலாம் துன்பத்து 
இடைச் சுழிப்பட்டு இளைப்பேனை இளையா வண்ணம்
கைம்மான மனத்து உதவிக் கருணை செய்து
காதலருள் அவை வைத்தாய் காண நில்லாய்
வெம்மான மத கரியின் உரிவை போர்த்த 
வேதியனே தென் ஆனைக்காவுள் மேய
அம்மான் நின் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  5

உரையாரும் புகழானே ஒற்றி யூராய்
கச்சியே ஏகம்பனே காரோ ணத்தாய்
விரையாரும் மலர்தூவி வணங்கு வார்பால்
மிக்கானே அக்கு அரவம் ஆரம் பூண்டாய்
திரையாரும் புனற்பொன்னித் தீர்த்தம் மல்கு 
திருவானைக் காவில் உறை தேனே வானோர்
அரையா உன் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  6

மையாரும் மணிமிடற்றாய் மாதோர் கூறாய்
மான்மறியும்  மாமழுவும் அனலும் ஏந்தும்
கையானே காலன் உடல் மாளச் செற்ற 
கங்காளா முன்கோளும் விளைவும் ஆனாய்
செய்யானே திருமேனி உரியாய் தேவர்
குலக்கொழுந்தே தென் ஆனைக்காவுள் மேய
ஐயா உன் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  7

இலையாரும் சூலத்தாய் எண்தோ ளானே
எவ்விடத்தும் நீ அல்லாது இல்லை என்று
தலையாரக் கும்பிடுவார் தன்மை யானே
தழல்மடுத்த மாமேரு கையில் வைத்த
சிலையானே திரு ஆனைக் காவுள் மேய 
தீயாடீ சிறுநோயால் நலிவுண்டு உள்ளம்
அலையாதே நின்னடியே அடையப் பெற்றால்
அல்லகண்டம் கொண்டு அடியேன் என் செய்கேனே.  8

விண்ணாரும் புனல்பொதிசெஞ் சடையாய் வேத
நெறியானே எறிகடலின் நஞ்சம் உண்டாய்
எண்ணாரும் புகழானே உன்னை எம்மான்
என்று என்றே நாவினில் எப்பொழுதும் உன்னிக்
கண்ணாரக் கண்டு இருக்கக் களித்து எப்போதும்
கடிபொழில்சூழ் தென் ஆனைக் காவுள் மேய
அண்ணா நின் பொற்பாதம் அடையப் பெற்றால்
அல்லகண்டம் கொண்டு அடியேன் என் செய்கேனே.  9

கொடியேயும் வெள் ஏற்றாய் கூளி பாடக்
குறட்பூதம் கூத்தாட நீயும் ஆடி
வடிவேயும் மங்கைதனை வைத்த மைந்தா
மதில் ஆனைக்காவுள் உளாய் மாகா ளத்தாய்
படியேயும் கடல் இலங்கைக் கோமான் தன்னைப் 
பருமுடியும் திரள்தோளும் அடர்த்து உகந்த
அடியேவந்து அடைந்து அடிமை யாகப் பெற்றால்
அல்லகண்டம் கொண்டு அடியேன் என் செய்கேனே.

திருச்சிற்றம்பலம்

திரு ஆனைக்கா

        

௨ 

திரு ஞானசம்பந்தர் சுவாமிகள்   அருளிச்செய்த
இரண்டாம் திருமுறை 

தகவல் பலகை	விவரம்
தலம்	திரு ஆனைக்கா
பிற பெயர்கள்
நாடு	சோழ நாடு (வ)
ॐசுவாமி	ஜம்புநாதர், அப்புளிங்கேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	சம்பந்தர் (3)         மழையார் மிடறா(2-23)         வானைகாவில் வெண்மதி (3-53)         மண்ணது உண்டரி (3-109) அப்பர் (3)         கோனைக்காவி (5-31)         எத்தாயார் எத்தந்தை(6-62)         முன்னானை தோள் போர்த்த (6-63) சுந்தரர் (1)          மறைகள் ஆயின நான்கும். (7-75)
ஸ்தல மரம்	வெண் நாவல்
தீர்த்தம்	காவிரி
பண்	இந்தளம்
குறிப்புகள்	யானையும் சிலந்தியும் வழிபட்ட தலம்  பஞ்ச பூத தலங்களில் இது அப்பு தலம். .  அம்பிகை, அஷ்ட வசுக்கள், பிரமன் பராசரர், கோச்செங்கட் சோழன் முதலியோர் வழிபட்ட தலம்  முதலில் பூசித்த சிலந்தி மறுபிறப்பில் கோச்செங்கட் சோழனாகப் பிறந்தது என்பது வரலாறு
பதிக பலன்	பிறவிப் பயனைப் பெறுவர்
வரிசை எண்.	23                                                      60/63

திருச்சிற்றம்பலம்          

மழையார் மிடறா மழுவாள் உடையாய்
உழையார் கரவா உமையாள் கணவா
விழவா ரும் வெண் நாவலின் மேவிய எம்
அழகா எனும்ஆயிழையாள் அவளே.  1

கொலையார் கரியின் உரி மூடியனே
மலையார் சிலையாவளைவித் தவனே
விலையால் எனை ஆளும் வெண்நாவல் உளாய்
நிலையா அருளாய் எனும்நே ரிழையே.  2

காலால் உயிர் காலனை வீடு செய்தாய்
பாலோடு நெய் ஆடிய பால் வணனே
வேலாடு கையா எம் வெண்நாவல் உளாய்
ஆலார் நிழலாய் எனும்ஆ யிழையே.  3

சுறவக் கொடிகொண்டவன் நீறது வாய்
உறநெற் றிவிழித்த எம் உத் தமனே
விறல் மிக்க கரிக்கு அருள் செய்தவனே
அறமிக்க அது என்னும் என் ஆயிழையே.  4

செங்கட் பெயர்கொண்டவன்செம் பியர்கோன்
அங்கட் கருணை பெரிதாயவனே
வெங்கண் விடையா எம் வெண்நாவல் உளாய்
அங்கத்து அயர்வாயினள் ஆயிழையே.  5

குன்றே அமர் வாய் கொலையார் புலியின்
தன்தோல் உடையாய் சடையாய் பிறையாய்
வென்றாய் புரமூன்றை வெண்நாவல் உளே
நின்றாய் அருளாய் எனும் நேரிழையே.  6

மலை அன்று எடுத்த அரக்கன் முடிதோள்
தொலை அவ்விரல் ஊன்றியதூ மழுவா
விலையால் எனை ஆளும் வெண்நா வல் உளாய்
அலசா மல்நல்காய் எனும்ஆ யிழையே.  8

திருவார் தருநாரணன்நான் முகனும்
மருவா வெருவாஅழலாய் நிமிர்ந்தாய்
விரையா ரும் வெண்நாவல் உள்மே வியஎம்
அரவா எனும்ஆயிழையா ளவளே.  9

புத்தர் பலரோடு அமண் பொய்த் தவர்கள்
ஒத்த இவ் உரைசொல் இவை ஓரகிலார்
மெய்த் தேவர் வணங்கும் வெண்நாவல் உளாய்
அத்தா அருளாய் எனும்ஆ யிழையே.  10

வெண்நாவல் அமர்ந்து உறை வேதியனைக்
கண்ணார் கமழ்காழியர் தம் தலைவன்
பண்ணோடு இவை பாடிய பத்தும்வல்லார்
விண்ணோ ரவரேத்தவிரும் புவரே.

இப்பதிகத்தில் 7 ம் பாடல் கிடைக்கப்பெறவில்லை

திருச்சிற்றம்பலம்

திரு ஆணைக்காவல்

       

௨ 

திரு ஞானசம்பந்தர் சுவாமிகள்   அருளிச்செய்த
மூன்றாம் திருமுறை 

தகவல் பலகை	விவரம்
தலம்	திரு ஆனைக்கா
பிற பெயர்கள்
நாடு	சோழ நாடு (வ)
ॐசுவாமி	ஜம்புநாதர், அப்புளிங்கேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	சம்பந்தர் (3)         மழையார் மிடறா(2-23)         வானைகாவில் வெண்மதி (3-53)         மண்ணது உண்டரி (3-109) அப்பர் (3)         கோனைக்காவி (5-31)         எத்தாயார் எத்தந்தை(6-62)         முன்னானை தோள் போர்த்த (6-63) சுந்தரர் (1)          மறைகள் ஆயின நான்கும். (7-75)
ஸ்தல மரம்	வெண் நாவல்
தீர்த்தம்	காவிரி
பண்	பழம் பஞ்சுரம்
குறிப்புகள்	யானையும் சிலந்தியும் வழிபட்ட தலம்  பஞ்ச பூத தலங்களில் இது அப்பு தலம். .  அம்பிகை, அஷ்ட வசுக்கள், பிரமன் பராசரர், கோச்செங்கட் சோழன் முதலியோர் வழிபட்ட தலம்  முதலில் பூசித்த சிலந்தி மறுபிறப்பில் கோச்செங்கட் சோழனாகப் பிறந்தது என்பது வரலாறு
பதிக பலன்	பிறவிப் பயனைப் பெறுவர்
வரிசை எண்.	109                                                      60/63

திருச்சிற்றம்பலம்          

மண்ணது உண்டரி மலரோன்காணா
வெண்நாவல் விரும்பும் மயேந்திரரும்
கண்ணது ஓங்கிய கயிலையாரும்
அண்ணல் ஆரூர் ஆதி ஆனைக்காவே.  1

வந்து மால் அயனவர் காண்பரியார்
வெந்தவெண்ணீறு அணி மயேந்திரமும்
கந்தவார் சடையுடைக் கயிலையாரும்
அந்தண்ஆரூர் ஆதி ஆனைக்காவே.  2

மால் அயன் தேடிய மயேந்திரரும்
காலனை உயிர்கொண்ட கயிலையாரும்
வேலையது ஓங்கும்வெண் ணாவலாரும்
ஆலை ஆரூர் ஆதி ஆனைக்காவே.  3

கருடனை யேறு அரி  அயனோர் காணார்
வெருள்விடை யேறிய மயேந்திரரும் 
கருள் திரு  கண்டத்து எம் கயிலையாரும்
அருளன் ஆரூர் ஆதி ஆனைக்காவே.  4

மதுசூதனன் நான்முகன் வணங்கரியார்
மதியது சொல்லிய மயேந்திரரும்
கதிர்முலை புல்கிய கயிலையாரும்
அதியன் ஆரூர் ஆதி ஆனைக்காவே.  5

சக்கரம் வேண்டுமால் பிரமன்காணா
மிக்கவர் கயிலை மயேந்திரரும் 
தக்கனைத் தலையரி தழல் உருவர்
அக்கணி அவர் ஆரூர் ஆனைக்காவே.  6

கண்ணனும் நான்முகன் காண்பரியார்
வெண்ணாவல் விரும்பு மயேந்திரரும்
கண்ணப்பர்க்கு அருள்செய்த கயிலை எங்கள்
அண்ணல்ஆரூர் ஆதி ஆனைக்காவே.  7

கடல்வண்ணன் நான்முகன் காண்பரியார்
தடவரை அரக்கனைத் தலைநெரித்தார்
விடம் அது உண்ட எம் மயேந்திரரும்
அடல் விடை ஆரூர் ஆதி ஆனைக்காவே  8

ஆதிமால் அயனவர் காண்பரியார்
வேதங்கள் துதிசெயும் மயேந்திரரும் 
காதில் ஓர் குழையுடைக் கயிலையாரும்
ஆதிஆ ரூர் எந்தை ஆனைக்காவே.  9

அறிவில் அமண்புத்தர் அறிவுகொள்ளேல்
வெறியமான் கரத்து ஆரூர் மயேந்திரரும்
மறி கடலோன் அயன் தேடத் தானும்
அறிவரு கயிலையோன் ஆனைக்காவே.  10

ஏன மால் அயனவர் காண்பரியார்
கானமார் கயிலை நன் மயேந்திரரும்
ஆனஆரூர் ஆதி ஆனைக்காவை
ஞானசம் பந்தன தமிழ்சொல்லுமே.

திருச்சிற்றம்பலம்

திரு ஆணைக்காவல்

      

௨ 

திரு ஞானசம்பந்தர் சுவாமிகள்   அருளிச்செய்த
மூன்றாம் திருமுறை 

தகவல் பலகை	விவரம்
தலம்	திரு ஆனைக்கா
பிற பெயர்கள்
நாடு	சோழ நாடு (வ)
ॐசுவாமி	ஜம்புநாதர், அப்புளிங்கேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	சம்பந்தர் (3)         மழையார் மிடறா(2-23)         வானைகாவில் வெண்மதி (3-53)         மண்ணது உண்டரி (3-109) அப்பர் (3)         கோனைக்காவி (5-31)         எத்தாயார் எத்தந்தை(6-62)         முன்னானை தோள் போர்த்த (6-63) சுந்தரர் (1)          மறைகள் ஆயின நான்கும். (7-75)
ஸ்தல மரம்	வெண் நாவல்
தீர்த்தம்	காவிரி
பண்	இந்தளம்
குறிப்புகள்	யானையும் சிலந்தியும் வழிபட்ட தலம்  பஞ்ச பூத தலங்களில் இது அப்பு தலம். .  அம்பிகை, அஷ்ட வசுக்கள், பிரமன் பராசரர், கோச்செங்கட் சோழன் முதலியோர் வழிபட்ட தலம்  முதலில் பூசித்த சிலந்தி மறுபிறப்பில் கோச்செங்கட் சோழனாகப் பிறந்தது என்பது வரலாறு
பதிக பலன்	கொடிய வினைகள் மாயும்.
வரிசை எண்.	53                                                      60/63

திருச்சிற்றம்பலம்          

வானைக்காவில் வெண்மதி
          மல்குபுல்கு வார்சடைத்
தேனைக்காவில் இன்மொழித்
          தேவிபாகம் ஆயினான்
ஆனைக்காவில் அண்ணலை
          அபயமாக வாழ்பவர்
ஏனைக்காவல் வேண்டுவார்க்கு 
          ஏதும்ஏதம் இல்லையே.  1  

சேறுபட்ட தண்வயல்
          சென்றுசென்று சேண் உலா
ஆறுபட்ட நுண் துறை
          ஆனைக்காவில் அண்ணலார்
நீறுபட்ட மேனியார்
          நிகரில்பாதம் ஏத்துவார்
வேறுபட்ட சிந்தையார்
          விண்ணில் எண்ண வல்லரே.  2  

தாரமாய மாதராள்
          தான் ஓர்பாகம் ஆயினான்
ஈரமாய புன்சடை
          ஏற்றதிங்கள் சூடினான்
ஆரமாய மார்புடை
          ஆனைக்காவில் அண்ணலை
வாரமாய் வணங்குவார்
          வல்வினைகள் மாயுமே.  3  

விண்ணில் நண்ணு புல்கிய
          வீரமாய மால்விடைச்
சுண்ணவெண்நீறு ஆடினான்
          சூலம் ஏந்து கையினான்
அண்ணல்கண் ஓர் மூன்றினான்
          ஆனைக்காவு கைதொழ
எண்ணும்வண்ணம் வல்லவர்க்கு
          ஏதம் ஒன்றும் இல்லையே.  4  

வெய்ய பாவம் கைவிட
          வேண்டுவீர்கள் ஆண்டசீர்
மைகொள்கண்டன் வெய்யதீ
          மாலையாடு காதலான்
கொய்யவிண்ட நாண்மலர்க்
          கொன்றைதுன்று சென்னி எம்
ஐயன்மேய பொய்கைசூழ்
          ஆனைக்காவு சேர்மினே.  5  

நாணும் ஓர்வு சார்வுமுன்
          நகையும் உட்கு நன்மையும்
பேணுறாத செல்வமும்
          பேசநின்ற பெற்றியான்
ஆணும்பெண்ணு ஆகிய
          ஆனைக்காவில் அண்ணலார்
காணும் கண்ணு மூன்றுடைக்
          கறைகொள் மிடறன் அல்லனே.  6  

கூருமாலை நண்பகல்
          கூடிவல்ல தொண்டர்கள்
பேரு ஊரும் செல்வமும்
          பேசநின்ற பெற்றியான்
பாரும்விண்ணும் கைதொழப்
          பாயும் கங்கை செஞ்சடை
ஆரநீரோடு ஏந்தினான்
          ஆனைக்காவு சேர்மினே.  7  

பொன்னமல்கு தாமரைப்
          போதுதாது வண்டு இனம்
அன்னமல்கு தண்டுறை
          ஆனைக்காவில் அண்ணலைப்
பன்னவல்ல நான்மறை
          பாடவல்ல தன்மையோர்
முன்னவல்லர் மொய்கழல்
          துன்னவல்லர் விண்ணையே.  8  

ஊனொடு உண்டல் நன்று என
          ஊனொடு உண்டல் தீது என
ஆனதொண்டர் அன்பினால்
          பேசநின்ற தன்மையான்
வானொறு ஒன்று சூடினான்
          வாய்மையாக மன்னிநின்
ஆனொடு அஞ்சும் ஆடினான்
          ஆனைக்காவு சேர்மினே.  9  

கையில் உண்ணும் கையரும்
          கடுக்கள் தின் கழுக்களும்
மெய்யைப்போர்க்கும் பொய்யரும்
          வேதநெறியை அறிகிலார்
தையல்பாகம் ஆயினான்
          தழல் அது உருவத் தான் எங்கள்
ஐயன்மேய பொய்கைசூழ்
          ஆனைக்காவு சேர்மினே.  10  

ஊழியூழி வையகத்து 
          துயிர்கள்தோற்று வானொடும்
ஆழியானும் காண்கிலா
          ஆனைக்காவில் அண்ணலைக்
காழி ஞான சம்பந்தன்
          கருதிச்சொன்ன பத்து இவை
வாழியாகக் கற்பவர்
          வல்வினைகள் மாயுமே.

திருச்சிற்றம்பலம்

திருப்புகலூர்

     

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	திரு புகலூர்
பிற பெயர்கள்
நாடு	சோழ நாடு (தெ )
ॐசுவாமி	அக்னிபுரீஸ்வரர்
ॐஅம்பிகை	சூளிகாம்பாள்
பாடியவர்கள்	அப்பர் (1)         எண்ணுகேன் (6-99)
ஸ்தல மரம்	புன்னை
தீர்த்தம்	அக்னி தீர்த்தம்
பண்	திருத்தாண்டகம்
குறிப்புகள்	சுந்தரருக்கு செங்கல்லை பொன்னாக்கி தந்த திருத்தலம்  அப்பர் சுவாமிகள் பேறு பெற்ற பெருமை உடைய தலம். முருக நாயனார் திரு அவதார தலம்  அக்னி தேவன், பரத்வாச முனிவர் முதலியோர் வழிபட்ட திருத்தலம்.
பதிக பலன்	திருவடி பேறு கிடைக்கப் பெறுவார்கள்.
வரிசை எண்.	99                                                      75/127

திருச்சிற்றம்பலம்          

எண்ணுகேன் என்சொல்லி எண்ணு கேனோ
எம்பெருமான் திருவடியே எண்ணின் அல்லால்
கண்ணிலேன் மற்றோர் களைகண் இல்லேன்
கழல் அடியே கைதொழுது காணின் அல்லால்
ஒண்ணுளே ஒன்பது வாசல் வைத்தாய்
ஒக்க அடைக்கும்போது உணர மாட்டேன்
புண்ணியா உன் அடிக்கே போது கின்றேன்
பூம்புகலூர் மேவிய புண்ணி யனே.  1  

அங்கமே பூண்டாய் அனல் ஆடினாய்
ஆதிரையாய் ஆல்நிழலாய் ஆன் ஏறு ஊந்தாய்
பங்கம் ஒன்று இல்லாத படர்ச டையினாய்
பாம்பொடு திங்கள் பகைதீர்த்து ஆண்டாய்
சங்கை ஒன்று இன்றியே தேவர் வேண்டச்
சமுத்திரத்தின் நஞ்சு உண்டு சாவா மூவாச்
சிங்கமே உன்னடிக்கே போது கின்றேன்
திருப்புகலூர் மேவிய தேவ தேவே.  2  

பையரவக் கச்சையாய் பால்வெண் நீற்றாய்
பளிக்கும் குழையினாய் பண்ணார் இன்சொல்
மைவிரவு கண்ணாளைப் பாகம் கொண்டாய்
மான்மறிகை ஏந்தினாய் வஞ்சக் கள்வர்
ஐவரையும் என்மேல் தரவு அறுத்தாய்
அவர்வேண்டும் காரியம் இங்கு ஆவது இல்லை
பொய் உரையாது உன் அடிக்கே போது கின்றேன்
பூம்புகலூர் மேவிய புண்ணி யனே.  3  

தெருளாதார் மூவெயிலும்  தீயில் வேவச்
சிலைவளைத்துச் செங்கணையால் செற்ற தேவே
மருளாதார் தம்மனத்தில் வாட்டம் தீர்ப்பாய்
மருந்தாய்ப் பிணிதீர்ப்பாய் வானோர்க்கு என்றும்
அருளாகி ஆதியாய் வேத மாகி
அலர்மேலான் நீர்மேலான் ஆய்ந்துங் காணாப்
பொருளாவாய் உன் அடிக்கே போது கின்றேன்
பூம்புகலூர் மேவிய புண்ணி யனே.  4  

நீரேறு செஞ்சடைமேல் நிலாவெண் திங்கள்
நீங்காமை வைத்து உகந்த நீதி யானே
பாரேறு படுதலையில் பலிகொள் வானே
பண்டனங்கற் காய்ந்தானே பாவ நாசா
காரேறு முகில் அனைய கண்டத் தானே
கருங்கைக் களிற்று உரிவை கதறப் போர்த்த
போரேறே உன்னடிக்கே போது கின்றேன்
பூம்புகலூர் மேவிய புண்ணி யனே.  5  

விரிசடையாய் வேதியனே வேத கீதா
விரிபொழில்சூழ் வெண்காட்டாய் மீயச் சூராய்
திரிபுரங்கள் எரி செய்த தேவ தேவே
திருவாரூர்த் திருமூலட் டான மேயாய்
மருவினியார் மனத்துளாய் மாகா ளத்தாய்
வலஞ்சுழியாய் மாமறைக்காட்டு எந்தாய் என்றும்
புரிசடையாய் உன் அடிக்கே போது கின்றேன்
பூம்புகலூர் மேவிய புண்ணி யனே.  6  

தேவார்ந்த தேவனைத் தேவர் எல்லாம்
திருவடிமேல் அலரிட்டுத் தேடி நின்று
நாவார்ந்த மறைபாடி நட்டம் ஆடி
நான்முகனும் இந்திரனும் மாலும் போற்றக்
காவார்ந்த பொழிற்சோலைக் கானப் பேராய்
கழுக்குன்றத் து உச்சியாய் கடவு ளே நின்
பூவார்ந்த பொன்னடிக்கே போது கின்றேன்
பூம்புகலூர் மேவிய புண்ணி யனே.  7  

நெய்யாடி நின்மலனே நீல கண்டா
நிறை உடையாய் மறைவல்லாய் நீதி யானே
மையாடு கண்மடவாள் பாகத் தானே
மான் தோல் உடையாய் மகிழ்ந்து நின்றாய்
கொய்யாடு கூவிளம் கொன்றை மாலை
கொண்டு அடியேன் நான் இட்டுக் கூறி நின்று
பொய்யாத சேவடிக்கே போது கின்றேன்
பூம்புகலூர் மேவிய புண்ணி யனே.  8  

துன்னஞ்சேர் கோவணத்தாய் தூய நீற்றாய்
துதைந்து இலங்கு வெண்மழுவாள் கையில் ஏந்தித்
தன்னனையும் தண்மதியும் பாம்பும் நீரும்
சடைமுடிமேல் வைத்து உகந்த தன்மை யானே
அன்ன நடைமடவாள் பாகத் தானே
அக்கு ஆரம் பூண்டானே ஆதி யானே
பொன்னங் கழலடிக்கே போது கின்றேன்
பூம்புகலூர் மேவிய புண்ணி யனே.  9  

ஒருவனையும் அல்லாது உணராது உள்ளம்
உணர்ச்சித் தடுமாற்றத் துள்ளே நின்ற
இருவரையும் மூவரையும் என்மேல் ஏவி
இல்லாத தரவறுத்தாய்க் கில்லேன் ஏலக்
கருவரை சூழ்கானல் இலங்கை வேந்தன்
கடுந்தேர் மீது ஓடாமைக் காலாற் செற்ற
பொருவரையாய் உன்னடிக்கே போது கின்றேன்
பூம்புகலூர் மேவிய புண்ணி யனே.

திருச்சிற்றம்பலம்

பொது

     

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	பொது
பாடியவர்கள்	அப்பர் (1)       நாமார்க்கும் குடியல்லோம். (6-98)
பண்	திருத்தாண்டகம்
குறிப்புகள்	இது மறுமாற்று திருத்தாண்டகம் என போற்றப் படுகிறது.  சமண சமயத்தில் நீங்கி சைவம் சார்ந்து பின் அரசனின் ஆணைக்கு மறு மொழியாக பாடியது.
பதிக பலன்	மன தைரியம் ஏற்படும். நம்பிக்கை வளரும்.
வரிசை எண்.	98

திருச்சிற்றம்பலம்          
நாமார்க்கும் குடியல்லோம் நமனை அஞ்சோம்
நரகத்தில்  இடர்ப்படோம் நடலை இல்லோம்
ஏமாப்போம் பிணி அறியோம் பணிவோம அல்லோம்
இன்பமே எந்நாளும் துன்பம் இல்லை
தாமார்க்கும் குடியல்லாத் தன்மை யான
சங்கர நற் சங்கவெண் குழையோர் காதில்
கோமாற்கே நாம் என்றும் மீளா ஆளாய்க்
கொய்ம்மலர்ச் சேவடி இணையே குறுகி னோமே.  1  

அகலிடமே இடமாக ஊர்கள் தோறும்
அட்டு உண்பார் இட்டு உண்பார் விலக்கார் ஐயம்
புகலிடமாம் அம்பலங்கள் பூமி தேவி
உடன்கிடந்தாற் புரட்டாள்பொய் அன்று மெய்யே
இகலுடைய விடை உடையான் ஏன்று கொண்டான்
இனியேதும் குறைவிலோம் இடர்கள் தீர்ந்தோம் 
துகில் உடுத்துப் பொன்பூண்டு திரிவார் சொல்லும்
சொற்கேட்கக் கடவோமோ துரிசு அற்றோமே.  2  

வாராண்ட கொங்கையர்சேர் மனையில் சேரோம்
மாதேவா மாதேவா என்று வாழ்த்தி
நீராண்ட புரோதாயம் ஆடப் பெற்றோம்
நீறு அணியும் கோலமே நிகழப் பெற்றோம்
காராண்ட மழைபோலக் கண்ணீர் சோரக்
கன்மனமே நன்மனமாக் கரையப் பெற்றோம்
பாராண்டு பகடேறி வருவார் சொல்லும்
பணிகேட்கக் கடவோமோ பற்று அற் றோமே.  3  

உறவாவார் உருத்திரபல் கணத்தி னோர்கள்
உடுப்பன கோவணத்தொடு தீளுளவாம் அன்றே
செறுவாரும் செறமாட்டார் தீமை தானும்
நன்மையாய்ச் சிறப்பதே பிறப்பிற் செல்லோம்
நறவார்பொன் இதழிநறுந் தாரோன் சீரார்
நமச்சிவா யச் சொல்ல வல்லோம் நாவால்
சுறவாருங் கொடியானைப் பொடியாக் கண்ட
சுடர்நயனச் சோதியையே தொடர்வுற் றோமே.  4  

என்றும்நாம் யாவர்க்கும் இடைவோ மல்லோம்
இருநிலத்தில் எமக்கு எதிர் ஆவாரும் இல்லை
சென்றுநாம் சிறுதெய்வம் சேர்வோம் அல்லோம்
சிவபெருமான் திருவடியே சேரப் பெற்றோம்
ஒன்றினால் குறையுடையோம் அல்லோம் அன்றே
உறு பிணியார் செறலொழிந்திட்டு ஓடிப் போனார்
பொன்றினார் தலைமாலை அணிந்த சென்னிப்
புண்ணியனை நண்ணிய புண்ணியத்து உளோமே.  5

  மூவுருவின் முதல் உருவாய் இருநான் கான
மூர்த்தியே என்றுமுப் பத்து மூவர்
தேவர்களும் மிக்கோரும் சிறந்து வாழ்த்தும்
செம்பவளத் திருமேனிச் சிவனே என்னும்
நாவுடையார் நமை ஆள உடையார் அன்றே
நாவலந் தீவகத்தினுக்கு நாத ரான
காவலரே ஏவி விடுத்தாரேனும்
கடவமலோம்  கடுமையொடு களவு அற்றோமே.  6  

நிற்பனவும் நடப்பனவும் நிலனும் நீரும்
நெருப்பினொடு காற்றாகி நெடுவா னாகி
அற்பமொடு பெருமையுமாய் அருமை யாகி
அன்புடையார்க்குக் எளிமை அதாய் அளக்க லாகாத்
தற்பரமாய்ச் சதாசிவமாய்த் தானும் யானும்
ஆகின்ற தன்மையனை நன்மை யோடும்
பொற்புடைய பேசக் கடவோம் பேயர்
பேசுவன பேசுதுமோ பிழை அற்றோமே.  7  

ஈசனை எவ்வுலகினுக்கும் இறைவன் தன்னை
இமையவர்தம் பெருமானை எரியாய் மிக்க
தேசனைச் செம்மேனி வெண் நீற் றானைச்
சிலம்பரையன் பொற்பாவை நலம் செய் கின்ற
நேசனை நித்தலும் நினையப் பெற்றோம்
நின்று உண்பார் எம்மை நினையச் சொன்ன
வாசகம் எல்லாம் மறந்தோம் அன்றே
வந்தீரார் மன்னவனா வான்றா னாரே.  8  

சடை உடையான் சங்கக் குழையோர் காதன்
சாம்பலும் பாம்பும் அணிந்த மேனி
விடையுடையான் வேங்கையதள்மே லாடை
வெள்ளிபோற் புள்ளி உழை மான் தோல் சார்ந்த
உடை உடையான் நம்மை உடையான் கண்டீர்
உம்மோடு மற்றும் உளராய் நின்ற
படையுடையான் பணிகேட்கும் பணியோம் அல்லோம்
பாசமற வீசும் படியோம் நாமே.  9  

நாவார நம்பனையே பாடப் பெற்றோம்
நாணற்றார் நள்ளாமே விள்ளப் பெற்றோம்
ஆவா என்று எமை ஆள்வான் அமரர் நாதன்
அயனொடு மாற்கு அறிவரிய அனலாய் நீண்ட
தேவாதி தேவன் சிவன் என் சிந்தை
சேர்ந்து இருந்தான் தென் திசைக்கோன் தானே வந்து
கோவாடிக் குற்றேவல் செய்க என் றாலும்
குணமாகக் கொள்ளோம் எண் குணத்து உளோமே.  10

 

திருச்சிற்றம்பலம்

பொது

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	பொது
பாடியவர்கள்	அப்பர் (1)        அண்டம் கடந்த சுவடு (6-97)
பண்	திருத்தாண்டகம்
குறிப்புகள்	வினா திருத்தாண்டகம் என போற்றப்படுகிறது.  இறைவனுடைய அடையாளங்களை குறிப்பிட்டு வினா வழியில் அரிய செய்வதால் வினா திருத்தாண்டகம் ஆயிற்று
பதிக பலன்	மன அமைதி கிடைக்கும்.
வரிசை எண்.	97

திருச்சிற்றம்பலம்          

அண்டம்  கடந்த சுவடும் உண்டோ 
அனல் அங்கை ஏந்திய ஆடல் உண்டோ 
பண்டை எழுவர் படியும் உண்டோ 
பாரிடங்கள் பலசூழப் போந்தது உண்டோ 
கண்ட மிறையே கறுத்தது உண்டோ 
கண்ணின்மேல்  கண் ஒன்று கண்டது உண்டோ 
தொண்டர்கள் சூழத் தொடர்ச்சி உண்டோ 
சொல்லீர் எம் பிரானாரைக் கண்ட வாறே.  1  

எரிகின்ற இளஞாயிறு அன்ன மேனி
இலங்கு இழையோர் பால் உண்டோ வெள் ஏறு உண்டோ 
விரிகின்ற பொறி அரவத் தழலும் உண்டோ 
வேழத்தின் உரி உண்டோ வெண் நூல் உண்டோ 
வரிநின்ற பொறி அரவச் சடையும் உண்டோ 
அச்சடைமேல் இளமதியம் வைத்தது உண்டோ 
சொரிகின்ற புனல் உண்டோ சூலம் உண்டோ 
சொல்லீர் எம் பிரானாரைக் கண்ட வாறே.  2  

நிலாமாலை செஞ்சடைமேல் வைத்தது உண்டோ 
நெற்றிமேல் கண் உண்டோ நீறு சாந்தோ
புலால் நாறு வெள் எலும்பு பூண்டது உண்டோ 
பூதந்தற் சூழ்ந்தனவோ போரேறு உண்டோ 
கலாமாலை வேற்கண்ணாள் பாகத்து உண்டோ 
கார்க்கொன்றை மாலை கலந்தது உண்டோ 
சுலாமாலை ஆடரவம்  தோள் மேல் உண்டோ 
சொல்லீர் எம் பிரானாரைக் கண்ட வாறே.  3  

பண்ணார்ந்த வீணை பயின்றது உண்டோ 
பாரிடங்கள் பலசூழப் போந்தது உண்டோ 
உண்ணா வருநஞ்சம் உண்டது உண்டோ 
ஊழித்தீ யன்ன ஒளிதான் உண்டோ 
கண்ணார் கழற்காலல்  செற்றது உண்டோ 
காமனையும் கண் அ ழலால் காய்ந்தது உண்டோ 
எண்ணார் திரிபுரங்கள் எய்தது உண்டோ 
எவ்வகை எம் பிரானாரைக் கண்ட வாறே.  4  

நீறுடைய திருமேனி பாகம் உண்டோ 
நெற்றிமேல் ஒற்றைக்கண் முற்றும் உண்டோ 
கூறுடைய கொடுமழுவாள் கையில் உண்டோ 
கொல்புலித்தோல் உடை உண்டோ கொண்ட வேடம்
ஆறுடைய சடை உண்டோ அரவம் உண்டோ 
அதனருகே பிறை உண்டோ அளவிலாத
ஏறுடைய கொடி உண்டோ இலயம் உண்டோ 
எவ்வகை எம் பிரானாரைக் கண்ட வாறே.  5  

பட்டமும் தோடும் ஓர் பாகம் கண்டேன்
பார்திகழப் பலிதிரிந்து போதக் கண்டேன்
கொட்டிநின்று இலயங்கள் ஆடக் கண்டேன்
குழைகாதில் பிறைசென்னி இலங்கக் கண்டேன்
கட்டங்கக் கொடி திண்தோள் ஆடக் கண்டேன்
கனமழுவாள் வலங்கையில் இலங்கக் கண்டேன்
சிட்டனைத் திரு ஆலவாயில் கண்டேன்
தேவனைக் கனவில்நான் கண்ட வாறே.  6  

அலைத்தோடு புனல் கங்கை சடையில் கண்டேன்
அலர் கொன்றைத்தார் அணிந்த வாறு கண்டேன்
பலிக்கோடித் திரிவார் கைப் பாம்பு கண்டேன்
பழனம் புகுவாரைப் பகலே கண்டேன்
கலிக்கச்சி மேற்றளியே இருக்கக் கண்டேன்
கறை மிடறும் கண்டேன் கனலும்கண்டேன்
வலித்து உடுத்த மான் தோல் அரையில் கண்டேன்
மறைவல்ல மாதவனைக் கண்ட வாறே.  7  

நீறேறு திருமேனி நிகழக் கண்டேன்
நீள்சடைமேல் நிறைகங்கை ஏறக் கண்டேன்
கூறேறு கொடுமழுவாள் கொள்ளக் கண்டேன்
கொடுகொட்டி கை அலகு கையில்  கண்டேன்
ஆறேறு சென்னி அணி மதியும் கண்டேன்
அடியார்கட்கு ஆரமுதம் ஆகக் கண்டேன்
ஏறேறி இந்நெறியே போதக் கண்டேன்
இவ்வகை எம் பெருமானைக் கண்ட வாறே.  8  

விரை உண்ட வெண் நீறு தானும் உண்டு
வெண் தலை கை உண்டு ஒருகை வீணை உண்டு
சுரை உண்டு சூடும் பிறை ஒன்று உண்டு
சூலமும்  தண்டும்  சுமந்தது உண்டு
அரை உண்ட கோவண ஆடை உண்டு
வலிக்கோலும் தோலும் அழகா உண்டு
இரை உண்டு அறியாத பாம்பும் உண்டு
இமையோர் பெருமான் இலாதது என்னே.  9  

மைப்படிந்த கண்ணாளும்  தானும் கச்சி
மயானத்தான் வார்சடையான் என்னின் அல்லான்
ஒப்புடையன் அல்லன் ஒருவன் அல்லன்
ஓர் ஊரன் அல்லன் ஓர் உருவம் இல்லி
அப்படியும் அந்நிறமும் அவ்வண் ணமும்
அவன் அருளே கண்ணாகக் காணின் அல்லால்
இப்படியன் இந்நிறத்தன் இவ்வண்ணத்தன்
இவன் இறைவன் என்று எழுதிக் காட்ட ஒண்ணாதே.  10 

 பொன்னொத்த மேனிமேல் பொடியும் கண்டேன்
புலித்தோல் உடை கண்டேன் புணரத் தன்மேல்
மின்னொத்த நுண் இடையாள் பாகம் கண்டேன்
மிளிர்வது ஒரு பாம்பும் அரைமேல்கண்டேன்
அன்னத் தேர் ஊர்ந்த அரக்கன் தன்னை
அலற அடர்த்திட்ட அடியும் கண்டேன்
சின்ன மலர்க்கொன்றைக் கண்ணி கண்டேன்
சிவனைநான் சிந்தையுள்  கண்ட வாறே.  11 

திருச்சிற்றம்பலம்