3.10 திருவிசைப்பா - கருவூர்த் தேவர்

                      

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருவிடைமருதூர்
ஊர்/வேறுபெயர்	இடைமருது மத்தியார்சுனம்
நாடு	காவிரி தென்கரை
ॐசுவாமி	மகாலிங்கம், மருதவாணர்
ॐஅம்பிகை	பிரகத் சுந்தர குஜாம்பிகை, நன்முலை நாயகி
பாடியவர்கள்	திருஞானசம்பந்தர்(6)          ஓடேகலன் உண்பதும் (1:032)         தோடு ஓர் காதினன் (1:095)         மருந்தவன் வானவர் (1:110)         நடை மரு திருபுரம் (1:!21)         விரிதரு புலியுரி (1:122)         பொங்கு நூல் மார்பினீர் (2:56)          திருநாவுக்கரசர்(5)         காடுடைச் சுடலை (4:35)         பாசம் ஒன்றிலராய் (5:14)         சூலப் படையுடையார்  (6:17)         ஆறு சடைக்கு அணிவர் (6:18)          சுந்தரர்(1)         கழுதை குங்குமம்  ( 7:60) கருவூர்த் தேவர் (1)         வெய்ய செஞ்ச்சோதி  (9-3.10)
ஸ்தல மரம்	மருது (அர்சுனம்)
தீர்த்தம்	காவிரி
பண்	பஞ்சமம்
குறிப்புகள்	தலைமருது - ஸ்ரீ சைலம் மல்லிகார்ஜுனம்  கடை மருது - திருப்புடைமருதூர்  இது இடை மருது
பதிக பலன்	வினை தீர்க்கும் - தோஷ நிவர்த்தி தலம்
வரிசை எண்.	17                                     காவிரி (தெ) -30/127

திருச்சிற்றம்பலம்

வெய்யசெஞ் சோதி மண்டலம் பொலிய
          வீங்கிருள் நடு நல் யாமத்தோர்
பையசெம் பாந்தள் பருமணி உமிழ்ந்து
          பாவியேன் காதல்செய் காதில்
ஐயசெம் பொன் ஓட்டு அவிர்சடைமொழுப்பின்
          அழிவழ கியதிரு நீற்று
மையசெங் கண்டத்து அண்டவா னவர்கோன்
          மருவிடம் திருவிடை மருதே.  1  

இந்திர லோக முழுவதும் பணிகேட்டு
          இணையடி தொழுது எழத் தாம்போய்
ஐந்தலை நாகம் மேகலை அரையா
          அகந்தொறும் பலிதிரி அடிகள்
தந்திரி வீணை கீதமும் பாடச்
          சாதிகின் னரங்கலந்து ஒலிப்ப
மந்திர கீதம் தீங்குழல் எங்கும்
          மருவிடம் திருவிடை மருதே.  2  

பனிபடு மதியம் பயில்கொழுந்து அன்ன
          பல்லவம் வல்லி என்று இங்ஙன்
வினைபடு கனகம் போல யாவையுமாய்
          வீங்குலகு ஒழிவற நிறைந்து
துனிபடு கலவி மலைமகள் உடனாய்த்
          தூங்கிருள் நடுநல்யா மத்து என்
மனனிடை அணுகி நுணிகியுள் கலந்தோன்
          மருவிடம் திருவிடைமருதே.  3  

அணி உமிழ் சோதி மணியுனுள் கலந்து ஆங்கு
          அடியனேன் உள்கலந்து அடியேன்
பணிமகிழ்ந்து அருளும் அரிவைபா கத்தன்
          படர்சடை விடம்மிடற்று அடிகள்
துணி உமிழ் ஆடை அரையிலோர் ஆடை
          சுடர்உமிழ் தரஅதன் அருகே
மணி உமிழ் நாக மணி உமிழ்ந்து இமைப்ப
          மருவிடம் திருவிடைமருதே.  4  

பந்தமும் பிரிவும் தெரிபொருட் பனுவல்
          படிவழி சென்று சென்றேறிச்
சிந்தையும் தானும் கலந்ததோர் கலவி
          தெரியினும் தெரிவுறா வண்ணம்
எந்தையும் தாயும் யானும் என்று இங்ஙன்
          எண்ணில்பல் ஊழிகள் உடனாய்
வந்து அணுகாது நுணிகி உள் கலந்தோன்
          மருவிடம் திருவிடைமருதே.  5  

எரிதரு கரிகாட்டு இடுபிணம் நிணம் உண்டு
         ஏப்பமிட்டு இலங்க எயிற்று அழல்வாய்த்
துருகழல் நெடும்பேய்க் கணம்எழுந்து ஆடும்
         தூங்கிருள் நடுநல் யாமத்தே
அருள்புரி முறுவல் முகில்நிலா எறிப்ப
         அந்திபோன்று ஒளிர்திரு மேனி
வரியரவு ஆட ஆடும்எம் பெருமான்
         மருவிடம் திருவிடைமருதே.  6  

எழிலையாழ் செய்கைப் பசுங்கலன் விசும்பின்
          இன்துளி படநனைந்து உருகி
அழலையாழ் புருவம் புனலொடும் கிடந்து ஆங்கு
          ஆதனேன் மாதரார் கலவித்
தொழிலையாழ் நெஞ்சம் இடர்படா வண்ணம்
          தூங்கிருள் நடுநல்யா மத்தோர்
மழலை யாழ் சிலம்ப வந்தகம் புகுந்தோன்
          மருவிடம் திருவிடை மருதே.  7  

வையவாம் பெற்றம் பெற்றம் ஏறு உடையார்
          மாதவர் காதல்வைத்து என்னை
வெய்யவாம் செந்தீப் பட்டஇட் டிகைபோல்
          விழுமியோன் முன்பு பின்பு என்கோ
நொய்யவாறு என்ன வந்து உள் வீற்று இருந்த
          நூறுநூ றாயிர கோடி
மையவாங் கண்டத்து அண்டவா னவர்கோன்
          மருவிடம் திருவிடை மருதே.  8  

கலங்கலம் பொய்கைப் புனற்று ஒளி விடத்துக்
          கலந்தமண் ணிடைக்கிடந்து ஆங்கு
நலம் கலந்து அடியேன் சிந்தை உட் புகுந்த
          நம்பனே வம்பனே னுடைய
புலங்கலந் தவனே ! என்று நின்று உருகிப்
          புலம்புவார் அவம்புகார் அருவி
மலங்கலங் கண்ணிற் கண்மணி அனையான்
          மருவிடம் திருவிடைமருதே.  9  

ஒருங்கிருங் கண்ணின் எண்ணில்புன் மாக்கள்
          உறங்கு இருள் நடுநல்யா மத்தோர்
கருங்கண்நின்று இமைக்கும் செழுஞ்சுடர் விளக்கம்
          கலந்து எனக் கலந்து உணர் கருவூர்
தருங்கரும் பனைய தீந்தமிழ் மாலை
          தடம்பொழில் மருதயாழ் உதிப்ப
வரும் கருங் கண்டத்து அண்டவா னவர்கோன்
          மருவிடம் திருவிடைமருதே.

திருச்சிற்றம்பலம்

3.9 திருவிசைப்பா - கருவூர்த் தேவர்

                     

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திரு தஞ்சை இராசராசேச்சரம்
ஊர்
நாடு	சோழ நாடு காவிரி (தெ)
ॐசுவாமி	பெருவுடையார், பிரகதீசுவரர்
ॐஅம்பிகை	பெரிய நாயகி, பிரகந்நாயகி
பாடியவர்கள்	கருவூர்த் தேவர் (1),         உலகெலாம் தொழ (9-3.8)
ஸ்தல மரம்	வில்வம்
தீர்த்தம்	பிரம்ம தீர்த்தம்
பண்	பஞ்சமம்
குறிப்புகள்	சிற்ப வேலை நிறைந்த கோவில்  பெரிய கோவில் என போற்றப் படுகிறது  சிவ லிங்கம் பெரியது  பெரிய நந்தி ஒரே கல்லில் அமைந்தது.
பதிக பலன்	சிவபதம்  பெறுவர்.
வரிசை எண்.	3.9

திருச்சிற்றம்பலம்
உலகெலாம் தொழவந்து எழுகதிர்ப் பருதி
          ஒன்றுநூ றாயிர கோடி
அலகெலாம் பொதிந்த திரு உடம்பு அச்சோ !
          அங்ஙனே அழகிதோ, அரணம்
பலகுலாம் படைசெய் நெடுநிலை மாடம்
          பருவரை ஞாங்கர்வெண் திங்கள்
இலைகுலாம் பதணத்து இஞ்சிசூழ் தஞ்சை
          இராசரா சேச்சரத்து இவர்க்கே.  1  

நெற்றியிற் கண்என் கண்ணில்நின்று அகலா
          நெஞ்சினில் அம் சிலம்பு அலைக்கும்
பொற் திருவடி என் குடிமுழு தாளப்
          புகுந்தன போந்தன இல்லை
மற்று எனக்கு உறவேன் மறிதிரை வடவால்
          இடுபுனல் மதகில்வாழ் முதலை
ஏற்றிநீர்க் கிடங்கில் இஞ்சிசூழ் தஞ்சை
          இராசரா சேச்சரத்து இவர்க்கே.  2  

சடைகெழு மகுடம் தண்ணிலா விரிய
          வெண்ணிலா விரிதரு தரளக்
குடைநிழல் விடைமேற் கொண்டுலாப் போதும்
          குறிப்பெனோ கோங்கிணர் அனைய
குடைகெழு நிருபர் முடியொடு முடிதேய்ந்து
          உக்கசெஞ் சுடர்ப்படு குவை ஓங்கு
இடைகெழு மாடத்து இஞ்சிசூழ் தஞ்சை
          இராசரா சேச்சரத்து இவர்க்கே.  3  

வாழியம் போதத்து அருகுபாய் விடையம்
          வரிசையின் விளக்கலின் அடுத்த
சூழலம் பளிங்கின் பாசலர் ஆதிச்
          சுடர்விடு மண்டலம் பொலியக்
காழ் அகில் கமழும் மாளிகை மகளிர்
          கங்குல்வாய் அங்குலி கெழும
யாழ் ஒலி சிலம்பும் இஞ்சிசூழ் தஞ்சை
          இராசரா சேச்சரத்து இவர்க்கே..  4  

எவரும்மா மறைகள் எவையும் வானவர்கள்
          ஈட்டமும் தாட்டிருக் கமலத்து 
அவரும் மால் அவனும் அறிவரும் பெருமை
          அடல் அழல் உமிழ்தழற் பிழம்பர்
உவரிமா கடலின் ஒலிசெய்மா மறுகில்
          உறுகளிற்று அரசினது ஈட்டம்
இவருமால் வரைசெய் இஞ்சிசூழ் தஞ்சை
          இராசரா சேச்சரத்து இவர்க்கே.  5  

அருளுமாறு அருளி ஆளுமாறு ஆள
          அடிகள்தம் அழகிய விழியும்
குருளும்வார் காதும் காட்டியான் பெற்ற
          குயிலினை மயல்செய்வது அழகோ
தரளவான் குன்றில் தண்நிலா ஒளியும்
          தருகுவால் பெருகுவான் தெருவில்
இருள் எலாம் கிழியும் இஞ்சிசூழ் தஞ்சை
          இராசரா சேச்சரத்து இவர்க்கே.  6  

தனிப்பெருந் தாமே முழுதுறப் பிறப்பின்
          தளிர்இறப்பு இலைஉதிர்வு என்றால்
நினைப்பருந் தம்பால்சேறலின் றேனும்
          நெஞ்சிடிந்து உருகுவது என்னோ 
சுனைப்பெருங் கலங்கல் பொய்கை அம கழுநீர்ச்
          சூழல்மா ளிகைசுடர் வீசும்
எனைப்பெரு மணஞ்செய் இஞ்சிசூழ் தஞ்சை
          இராசரா சேச்சரத்து இவர்க்கே.  7  

பன்நெடுங் காலம் பணிசெய்து பழையோர்
          தாம்பலர் ஏம்பலித்து இருக்க
என்நெடுங் கோயில் நெஞ்சுவீற் று இருந்த
          எளிமையை என்றும் நான் மறக்கேன்
மின்நெடும் புருவத்து இளமயில் அனையார்
          விலங்கல்செய் நாடக சாலை
இன்நடம் பயிலும் இஞ்சிசூழ் தஞ்சை
          இராசரா சேச்சரத்து இவர்க்கே.  8  

மங்குல்சூழ் போதின் ஒழிவற நிறைந்து
          வஞ்சகர் நெஞ்சகத்து ஒளிப்பார்
அங்கழல் சுடராம் அவர்க்கு இள வேனல்
          அலர்கதிர் அனையர் வாழியரோ !
பொங்கு எழில் திருநீறு அழிபொசி வனப்பில்
          புனல்துளும்பு அவிர்சடை மொழுப்பர்
எங்களுக்கு இனியர் இஞ்சிசூழ் தஞ்சை
          இராசரா சேச்சரத்து இவர்க்கே.  9  

தனியர்எத் தனைஓ ராயிர வருமாம்
          தன்மையர் என்வயத் தினராம்
கனியரத் தருதீங் கரும்பர்வெண் புரிநூற்
          கட்டியர் அட்டஆ ரமிர்தர்
புனிதர்பொற் கழலர்புரி சடா மகுடர்
          புண்ணியர் பொய்யிலா மெய்யர்க்கு
இனியர்எத் தனையும் இஞ்சிசூழ் தஞ்சை
          இராசரா சேச்சரத்து இவர்க்கே.  10  

சரளமந் தார சண்பக வகுள
          சந்தன நந்தன வனத்தின்
இருள்விரி மொழுப்பின் இஞ்சிசூழ் தஞ்சை
          இராசரா சேச்சரத்து இவரை
அருமருந்து அருந்தி அல்லல்தீர் கருவூர்
          அறைந்தசொல் மாலை ஈர் ஐந்தின்
பொருள்மருந்து உடையோர் "சிவபதம்" என்னும்
          பொன்நெடுங் குன்றுடை யோரே.

திருச்சிற்றம்பலம்

3.8 திருவிசைப்பா - கருவூர்த் தேவர்

                    

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருசாட்டியக்குடி
ஊர்	ஏழிருக்கை
நாடு	பாண்டிய நாடு
ॐசுவாமி	வேதபுரீஸ்வரர்
ॐஅம்பிகை	வேதநாயகி
பாடியவர்கள்	கருவூர்த் தேவர் (1),         பெரியவா கருணை  (9-3.8)
ஸ்தல மரம்	வன்னி
தீர்த்தம்	வேத புஷ்கரணி, கொன்ன தீர்த்தம்
பண்	பஞ்சமம்
குறிப்புகள்	ஆறு ஆதாரங்களுக்கு மேலாக, நிராதாரமகிய சிறப்பு பெற்றதால் இக் கோவில் ஏழிருக்கை சாட்டியம்" என்ற சொல்லுக்கு வெப்ப நோய் என்று பொருள். வெப்ப நோய்களைத் தீர்க்கும் தலமாக நம்பப்படுகிறது குபேரனுக்கு காட்சி அளித்த தலம்  சுவாமி மேற்கு நோக்கிய சன்னதி
பதிக பலன்	சிவலோகப் பேறு கிடைக்கும்
வரிசை எண்.	3.8

திருச்சிற்றம்பலம்

பெரியவா கருணை இளநிலா எறிக்கும்
          பிறைதவழ் சடைமொழுப்பு அவிழ்ந்து
சரியுமா சுழியங் குழைமிளிர்ந்து இருபால்
          தாழ்ந்தவா காதுகள் கண்டம்
கரியவா தாமும் செய்யவாய் முறுவல்
          காட்டுமா சாட்டியக் குடியார்
இருகைகூம் பினகண்டு அலர்ந்தவா முகம்ஏழ்
          இருக்கையில் இருந்த ஈசனுக்கே.  1  

பாந்தள் பூணாரம் பரிகலம் கபாலம்
          பட்டவர்த் தனம் எருது அன்பர்
வார்ந்தகண் அருவி மஞ்சன சாலை
          மலைமகள் மகிழ்பெரும் தேவி
சாந்தமும் திருநீறு அருமறை கீதம்
          சடைமுடி சாட்டியக் குடியார்
ஏந்தெழில் இதயம் கோயில்மாளிகைஏழ்
          இருக்கையுள் இருந்தஈ சனுக்கே.  2  

தொழுதுபின் செல்வது அயன்முதற் கூட்டம்
          தொடர்வன மறைகள்நான்கு எனினும்
கழுதுறு கரிகாடு உறைவிடம் போர்வை
          கவந்திகை கரி உரி திரிந்து ஊண்
தழல் உமிழ் அரவம் கோவணம் பளிங்கு
          செபவடம் சாட்டியக் குடியார்
இழுதுநெய் சொரிந்து ஓம்பு அழல் ஒளி விளக்கு ஏழ்
          இருக்கையில் இருந்த ஈசனுக்கே.  3  

பதிகநான் மறைதும் புருவும்நா ரதரும்
          பரிவொடு பாடு காந் தர்ப்பர்
கதியெலாம் அரங்கம் பிணையல் மூவுலகில்
          கடி இருள் திருநடம் புரியும்
சதியிலார் கதியில் ஒலிசெயும் கையில்
          தமருகம் சாட்டியக் குடியார்
இதயமாம் கமலம் கமலவர்த் தனைஏழ்
          இருக்கையில் இருந்தஈ சனுக்கே.  4  

திருமகன் முருகன் தேவியேல் உமையாள்
          திருமகள் மருமகன் தாயாம்
மருமகன் மதனன் மாமனேல் இமவான்
          மலை உடை அரையர்தம் பாவை
தருமலி வளனாம் சிவபுரன் தோழன்
          தனபதி சாட்டியக் குடியார்
இருமுகம் கழல்மூன்று ஏழுகைத் தலம்ஏழ்
          இருக்கையில் இருந்தஈ சனுக்கே.  5  

அனலமே ! புனலே ! அனிலமே ! புவனி
          அம்பரா ! அம்பரத்து அளிக்கும்
கனகமே ! வெள்ளிக் குன்றமே என் தன்
          களைகணே, களைகண்மற் றில்லாத்
தனியனேன் உள்ளம் கோயில்கொண்டு அருளும்
          சைவனே சாட்டியக் குடியார்க்கு
இனியதீங் கனியாய் ஒழிவற நிறைந்துஏழ்
          இருக்கையில் இருந்தவாறு இயல்பே.  6  

செம்பொனே ! பவளக் குன்றமே ! நின்ற
          திசைமுகன் மால்முதற் கூட்டத்து
அன்பர் ஆனவர்கள் பருகும்ஆ ரமுதே !
          அத்தனே பித்தனேன் உடைய
சம்புவே அணுவே தாணுவே சிவனே !
          சங்கரா சாட்டியக் குடியார்க்கு
இன்பனே ! எங்கும் ஒழிவற நிறைந்து ஏழ்
          இருக்கையில் இருந்தவாறு இயம்பே.  7  

செங்கணா போற்றி ! திசைமுகா போற்றி !
          சிவபுர நகருள்வீற்று இருந்த
அங்கணா போற்றி ! அமரனே போற்றி !
          அமரர்கள் தலைவனே போற்றி !
தங்கள்நான் மறைநூல் சகலமும் கற்றோர்
          சாட்டியக் குடியிருந்து அருளும்
எங்கள்நா யகனே போற்றி ! ஏழ் இருக்கை
          இறைவனே ! போற்றியே போற்றி !  8  

சித்தனே ! அருளாய் ! செங்கணா ! அருளாய் !
          சிவபுர நகருள்வீற்று இருந்த
அத்தனே ! அருளாய் ! அமரனே ! அருளாய் !
          அமரர்கள் அதிபனே ! அருளாய்
தத்துநீர்ப் படுகர்த் தண்டலைச் சூழல்
          சாட்டியக் குடியுள்ஏழ் இருக்கை
முத்தனே ! அருளாய் ! முதல்வனே ! அருளாய் !
         முன்னவா துயர்கெடுத்து எனக்கே.  9  

தாட்டரும் பழனப் பைம்பொழிற் படுகர்த்
          தண்டலைச் சாட்டியக் குடியார்
ஈட்டிய பொருளாய் இருக்கும்ஏழ் இருக்கை
          இருந்தவன் திருவடி மலர்மேல்
காட்டிய பொருட்கலை பயில்கரு ஊரன்
          கழறுசொல் மாலைஈர் ஐந்தும்
மாட்டிய சிந்தை மைந்தருக்கு அன்றே
          வளரொளி விளங்குவான் உலகே.

.

திருச்சிற்றம்பலம்

3.7 திருவிசைப்பா - கருவூர்த் தேவர்

                   

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருப்பூவணம்
ஊர்/வேறுபெயர்
நாடு	பாண்டிய
ॐசுவாமி	பூவணநாதர், புஷ்பவநேஸ்வரர்
ॐஅம்பிகை	சௌந்தரநாயகி, அழகிய நாயகி
பாடியவர்கள்	திருஞானசம்பந்தர்(2)         அறையார் புனலும் (1:64)         மாதமர் மேனியனாகி  (3:20) திருநாவுக்கரசர்(1)         வடியேறு திருசூலம் (6:18) சுந்தரர்(1)         திருவுடையார் திருமால் (7:11) கருவூர் தேவர் (1)         திருவருள் புரிந்தாள் (9-3.7)
ஸ்தல மரம்	பலா
தீர்த்தம்
பண்	இந்தளம்
குறிப்புகள்	வைகை ஆற்றங்கரையில் உள்ள பிரம்மன் வழிபட்ட தலம்  ஈசன் நேரே நின்று திருவுருவம் கட்டி அருளிய தலம்  அதனால் தோன்றும் தோன்றும் என பதிகம் தோறும் இடம் பெற்றுள்ளது  "கொடிமாடம்நிலவு திருப்பூவணத்து கோயிலினுள்" என்ற பெரியபுராணம் (பாடல்:407) அருளிச் செய்துள்ளமை சிந்திக்க தக்கது
பதிக பலன்	சிவ பதவி கிட்டும் .
வரிசை எண்.	14                                                         11/14

திருச்சிற்றம்பலம்

திருவருள் புரிந்தாள் ஆண்டுகொண்டு இங்ஙன்
          சிறியனுக்கு இனியது காட்டிப்
பெரிதருள் புரிந்த ஆனந்தமே தரும்நின்
          பெருமையில்பெரியது ஒன்று உளதே
மருது அரசு இருங் கோங்கு அகில் மரம் சாடி
          வரைவளங் கவர்ந்திழி வைகைப்*
பொருதிரை மருங்கோங்கு ஆவண வீதிப்
          பூவணம் கோயில்கொண் டாயே. 1  

பாம்பணைத் துயின்றோன் அயன்முதல் தேவர்
          பன் நெடும்  காலம்நிற் காண்பான்
ஏம்பலித் திருக்க என் உளம் புகுந்த
          எளிமையை என்றும் நான் மறக்கேன்
தேம்புனற் பொய்கை வாளைவாய் மடுப்பத்
          தெளிதரு தேறல்பாய்ந்து ஒழுகும்
பூம்பணைச் சோலை ஆவண வீதிப்
          பூவணம் கோயில்கொண் டாயே.  2  

கரைகடல் ஒலியில் தமருகத்து அரையில்
          கையினிற் கட்டிய கயிற்றால்
இருதலை ஒருநா இயங்கவந்து ஒருநாள்
          இருந்திடாய் எங்கள்கண் முகப்பே;
விரிதிகழ் விழவின் பின்செல்வோர் பாடல்
          வேட்கையின் வீழ்ந்தபோது அவிழ்ந்த
புரிசடை துகுக்கும் ஆவண வீதிப்
          பூவணம் கோயில்கொண் டாயே.  3  

கண்ணியல் மணியின் சூழல்புக்கு அங்கே
          கலந்துபுக்கு ஒடுங்கினேற்கு அங்ஙன்
நுண்ணியை எனினும் நம்பநின் பெருமை
          நுண்ணிமை இறந்தமை அறிவன்
மண்ணியன் மரபில் தங்கிருள் மொழுப்பின்
          வண்டு இனம் பாடநின்று ஆடும்
புண்ணிய மகளிர் ஆவண வீதிப்
          பூவணம் கோயில்கொண் டாயே.  4  

கடுவினைப் பாசக் கடல்கடந்து ஐவர்
          கள்ளரை மெள்ளவே துரந்து உன்
அடியினை இரண்டும் அடையுமாறு அடைந்தேன்
          அருள் செய்வாய் அருள்செயாது ஒழிவாய்
நெடுநிலை மாடத்து இரவு இருள் கிழிக்க
          நிலைவிளக்கு அலகில்சா லேகம்
புடைகிடந்து இலங்கும் ஆவண வீதிப்
          பூவணம் கோயில் கொண் டாயே.  5  

செம்மனக் கிழவோர் அன்புதா என்று உன்
          சேவடி பார்த்திருந்து அலச
எம்மனம் குடிகொண் டிருப்பதற்கு யான் ஆர்
          என்னுடை அடிமைதான் யாதே
அம்மனம் குளிர்நாட் பலிக்கு எழுந்து அருள
          அரிவையர் அவிழ்குழல் சுரும்பு
பொம்மென முரலும் ஆவண வீதிப்
          பூவணம் கோயில்கொண் டாயே.  6  

சொன்னவில் முறைநான்கு ஆரணம் உணராச்
          சூழல்புக்கு ஒளித்தநீ இன்று
கன்னவில் மனத்து என் கண்வலைப் படும்இக்
          கருணையிற் பெரியது ஒன்று உளதே
மின்னவில் கனக மாளிகை வாய்தல்
          விளங்கு இளம் பிறைதவழ் மாடம்
பொன்னவில் புரிசை ஆவண வீதிப்
          பூவணம் கோயில்கொண் டாயே.  7  

பாடல் 8 & 9 கிடைக்கப்பெறவில்லை  

பூவணம்  கோயில் கொண்டு எனை ஆண்ட
          புனிதனை வனிதைபா கனை வெண்
கோவணங் கொண்டு வெண் தலை ஏந்தும்
          குழகனை அழகு எலாம் நிறைந்த
தீவணன் தன்னைச் செழுமறை தெரியும்
          திகழ்கரு வூரன் என  உரைத்த
பாவணத் தமிழ்கள் பத்தும்வல் லார்கள்
          பரமனது உருவமா குவரே.

திருச்சிற்றம்பலம்

3.6 திருவிசைப்பா - கருவூர்த் தேவர்

                  

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	கங்கை கொண்ட சோளேச்சரம்
ஊர்	கங்கை கொண்ட சோழபுரம்
நாடு	சோழ நாடு காவிரி (வ)
ॐசுவாமி	பெருவுடையார், பிரகதீசுவரர், கங்கை கொண்ட சோளீச்சரர்
ॐஅம்பிகை	பிரகன்நாயகி, பெரியநாயகி
பாடியவர்கள்	கருவூர்த் தேவர் (1),         அன்னமாய்  (9-3.6)
ஸ்தல மரம்
தீர்த்தம்
பண்	பஞ்சமம்
குறிப்புகள்	160 அடி உயரமுள்ள கோவில்  முன்பு கங்காபுரி, கங்கை மாநகர் கங்காபுரம் என புகழப்பட்ட இவ்வூர் அவ்வளவு வளம் இல்லாமல் உள்ளது   சேக்கிழார் திருத்தொண்டர் தொகை பாடுவதற்கு தூண்டுகோலாக இருந்த பதி.  முதலாம் இராஜ்ந்திரன் தஞ்சை பெருவுடையார் பெயரையே வைத்து வழங்கியதாக சொல்லபப்டுகிறது.  கோயிலின் சிறப்புகளை நூலில் படித்து விட்டு நேரில் காண செல்வோருக்கு ஏமாற்றம் தான் கிடைக்கும் என்று சொல்லும்படி உள்ளது.
பதிக பலன்	திருவடிப் பேறு  பெறுவர்.
வரிசை எண்.	3.6

திருச்சிற்றம்பலம்

அன்னமாய் விசும்பு பறந்தயன் தேட
          அங்ஙனே பெரியநீ சிறிய
என்னையாள் விரும்பி என்மனம் புகுந்த
          எளிமையை என்றும்நான் மறக்கேன்
முன்னம்மால் அறியா ஒருவனாம் இருவா
          முக்கணா நாற்பெருந் தடந்தோள்
கன்னலே தேனே அமுதமே கங்கை
          கொண்டசோ ளேச்சரத் தானே.  1  

உண் நெகிழ்ந்து உடலம் நெக்குமுக் கண்ணா !
          ஓலம் என்று ஓலமிட்டு ஒருநாள்
மண்ணினின்று அலறேன் வழிமொழி மாலை
          மழலையஞ் சிலம்படி முடிமேல்
பண்ணிநின்று உருகேன் பணிசெயேன் எனினும்
          பாவியேன் ஆவியுள் புகுந்து என்
கண்ணினின்று அகலான் என்கொலோ கங்கை
          கொண்டசோ ளேச்சரத் தானே.  2  

அற்புதத்தெய்வம் இதனின் மற்று உண்டே
          அன்பொடு தன்னைஅஞ் செழுத்தின்
சொற்பதத் துள் வைத்து உள்ளம் அள் ளூறும்
          தொண்டருக்கு எண் திசைக் கனகம்
பற்பதக் குவையும் பைம்பொன்மா ளிகையும்
          பவளவா யவர்பணை முலையும்
கற்பகப் பொழிலும் முழுதுமாம் கங்கை
          கொண்டசோ ளேச்சரத் தானே.  3  

ஐயபொட் டிட்ட அழகுவாள் நுதலும்
          அழகிய விழியும்வெண்ணீறும்
சைவம்விட் டிட்ட சடைகளும் சடைமேல்
          தரங்கமும் சதங்கையும் சிலம்பும்
மொய்கொள்எண் திக்கும் கண்டநின் தொண்டர்
          முகமலர்ந்து இருகணீர் அரும்பக்
கைகள்மொட் டிக்கும் என்கொலோ கங்கை
          கொண்டசோ ளேச்சரத் தானே !  4  

சுருதிவா னவனாம் திருநெடு மாலாம்
          சுந்தர விசும்பின்இந் திரனாம்
பருதிவா னவனாம் படர்சடை முக்கண்
          பகவனாம் அகஉயிர்க்கு அமுதாம்
எருதுவா கனனாம் எயில்கள் மூன்று எரித்த
          ஏறுசே வகனுமாம் பின்னும்
கருதுவார் கருதும் உருவமாம் கங்கை
          கொண்டசோ ளேச்சரத் தானே.  5  

அண்டமோர் அணுவாம் பெருமைகொண்டு அணுவோர்
          அண்டமாம் சிறுமைகொண்டு அடியேன்
உண்ட ஊண் உனக்காம் வகைஎனது உள்ளம்
          உள்கலந்து எழுபரஞ் சோதி
கொண்டநாண் பாம்பாம் பெருவரை வில்லில்
          குறுகலர் புரங்கள் மூன்று எரித்த
கண்டனே ! நீல கண்டனே ! கங்கை
          கொண்டசோ ளேச்சரத் தானே !  6  

மோதலைப் பட்ட கடல்வயிறு உதித்த
          முழுமணித் திரள்அமுது ஆங்கே
தாய்தலைப் பட்டங்கு உருகிஒன் றாய
          தன்மையில் என்னைமுன் ஈன்ற
நீதலைப் பட்டால் யானும் அவ்வகையே
          நிசிசரர் இருவரோடு ஒருவர்
காதலிற் பட்ட கருணையாய் கங்கை
          கொண்டசோ ளேச்சரத் தானே.  7  

தத்தையங் கனையார் தங்கள்மேல் வைத்த
          தயாவைநூ றாயிரங் கூறிட்டு
அத்திலங்கு ஒருகூறு உன்கண்வைத் தவருக்கு
          அமர் உலகு அளிக்கும்நின் பெருமை
பித்தன் என்று ஒருகால் பேசுவ ரேனும்
          பிழைத்தவை பொறுத்தருள் செய்யும்
கைத்தலம் அடியேன் சென்னிமேல்வைத்த கங்கை
          கொண்டசோ ளேச்சரத் தானே.  8  

பண்ணிய தழல்காய் பாலளா நீர்போல்
          பாவமுன் பறைந்துபா லனைய
புண்ணியம் பின்சென்று அறிவினுக்கு அறியப்
          புகுந்ததோர் யோகினில் பொலிந்து
நுண்ணியை எனினும் நம்பநின் பெருமை
          நுன்னிடை ஒடுங்கநீ வந்து என்
கண்ணினுள் மணியிற் கலந்தனை கங்கை
          கொண்டசோ ளேச்சரத் தானே.  9  

அங்கைகொண்டு அமரர் மலர்மழை பொழிய
          அடிச்சிலம்பு அலம்பவந்து ஒருநாள்
உங்கைகொண்டு அடியேன் சென்னிவைத்து என்னை
          உய்யக்கொண்டு அருளினை மருங்கில்
கொங்கைகொண்டு அனுங்கும் கொடியிடை காணில்
          கொடியள்என்று அவிர்சடை முடிமேல்
கங்கைகொண் டிருந்த கடவுளே ! கங்கை
          கொண்டசோ ளேச்சரத் தானே.  10  

மங்கையோடு இருந்தே யோகுசெய் வானை
          வளர்இளந் திங்களை முடிமேல்
கங்கையோடு அணியும் கடவுளைக் கங்கை
          கொண்டசோ ளேச்சரத் தானை
அங்கையோடு ஏந்திப் பலிதிரி கருவூர்
          அறைந்தசொல் மாலையால் ஆழிச்
செங்கையோடு உலகில் அரசுவீற் றிருந்து
          திளைப்பதும் சிவனருட் கடலே.

திருச்சிற்றம்பலம்

3.5 திருவிசைப்பா - கருவூர்த் தேவர்

                 

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திரைலோக்கிய சுந்தரம்
ஊர்	திருலோக்கி
நாடு	சோழ நாடு காவிரி (தெ)
ॐசுவாமி	சுந்தரேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	கருவூர்த் தேவர் (1),         நீரோங்கி வளர்  (9-3.5)
ஸ்தல மரம்	கொன்றை
தீர்த்தம்	இலக்குமி  தீர்த்தம்
பண்	காந்தாரம்
குறிப்புகள்	இந்த பதிகத்தில் முதல் 2 பாடல் தலைவியின் கூற்றாகவும்  3 முதல் 10 பாடல் தோழியின் கூற்றாகவும் அமைந்தது.  திருலோக்க்கி என சொல் வழக்கில் அழைக்கப்படுகிறது
பதிக பலன்	சிவகதி பெறுவர்.
வரிசை எண்.	3.5                                                    01/63

திருச்சிற்றம்பலம்

நீரோங்கி வளர்கமல 
          நீர்பொருந்தாந் தன்மை அன்றே
ஆரோங்கி முகமலர்ந்து ஆங்கு 
          அருவினையேன் திறம்மறந்து இன்று
ஊரோங்கும் பழிபாராது 
          உன்பாலே விழுந்து ஒழிந்தேன்
சீரோங்கும் பொழிற்கோடைத் 
          திரைலோக்கிய சுந்தரனே !  1  

நையாத மனத்தினனை 
          நைவிப்பான் இத்தெருவே
ஐயா !நீ உலாப்போந்த 
          அன்றுமுதல் இன்றுவரை
கையாரத் தொழுதுஅருவி 
          கண்ணாரச் சொரிந்தாலும்
செய்யாயோ அருள்கோடைத் 
          திரைலோக்கிய சுந்தரனே !  2  

அம்பளிங்கு பகலோன்பால் 
          அடைப்பு அற்றாய் இவள்மனத்தில்
முன்பு அளிந்த காதலும்நின் 
          முகத்தோன்ற விளங்கிற்றால்
வம்பளிந்த கனியே !
          என் மருந்தே ! நல் வளர்முக்கண்
செம்பளிங்கே ! பொழிற்கோடைத் 
          திரைலோக்கிய சுந்தரனே !  3  

மைஞ்ஞின்ற குழலாள்தன் 
          மனந்தரவும் வளைதாராது
இஞ்ஞின்ற கோவணவன் 
          இவன்செய்தது யார்செய்தார்
மெய்ஞ்ஞின்ற தமர்க்கு எல்லாம் 
          மெய்ஞ்ஞிற்கும் பண்பினுறு
செய்ஞ்ஞன்றி யிலன்கோடைத் 
          திரைலோக்கிய சுந்தரனே.  4  

நீ வாராது ஒழிந்தாலும் 
          நின்பாலே விழுந்தேழை
கோவாத மணிமுத்தும் 
          குவளைமலர் சொரிந்தனவால்;
ஆவா !என்று அருள் புரியாய் 
          அமரர்கணம் தொழுது ஏத்தும்
தேவா !தென் பொழிற்கோடைத் 
          திரைலோக்கிய சுந்தரனே.  5  

முழுவதும்நீ ஆயினும் இம் 
          மொய்குழலாள் மெய்ம்முழுதும்
பழுது எனவே நினைந்தோராள் 
          பயில்வதும்நின் ஒரு நாமம்
அழுவதும்நின் திறம்நினைந்தே 
          அதுவன்றோ பெறும்பேறு
செழுமதில்சூழ் பொழிற்கோடைத் 
          திரைலோக்கிய சுந்தரனே.  6  

தன்சோதி எழுமேனித் 
          தபனியப்பூஞ் சாய்க்காட்டாய்
உன்சோதி எழில்காண்பான் 
          ஒலிடவும் உருக்காட்டாய்
துஞ்சாகண் இவளுடைய 
          துயர் தீருமாறு உரையாய்
செஞ்சாலி வயற்கோடைத் 
          திரைலோக்கிய சுந்தரனே.  7  

அரும்பேதைக்கு அருள்புரியாது
          ஒழிந்தாய்நின் அவிர்சடைமேல்
நிரம்பாத பிறைதூவும் 
          நெருப்பொடுநின் கையிலியாழ்
நரம்பாலும் உயிர்ஈர்ந்தாய் 
          நளிர்புரிசைக் குளிர்வனம்பா
திரம்போது சொரிகோடைத் 
          திரைலோக்கிய சுந்தரனே.  8  

ஆறாத பேரன்பின் 
          அவர் உள்ளம் குடிகொண்டு
வேறாகப் பலர்சூழ 
          வீற்றிருத்தி அதுகொண்டு
வீறாடி இவள்உன்னைப் 
          பொதுநீப்பான் விரைந்தின்னம்
தேறாள்தென் பொழிற்கோடைத் 
          திரைலோக்கிய சுந்தரனே.  9  

சரிந்த துகில் தளர்ந்த  இடை 
          அவிழ்ந்த குழல் இளந்தெரிவை
இருந்தபரிசு ஒருநாள்கண்டு
          இரங்காய்எம் பெருமானே !
முரிந்தநடை மடந்தையர் தம் 
          முழங்கு ஒலியும் வழங்கு ஒலியும்
திருந்துவிழவு அணிகோடைத் 
          திரைலோக்கிய சுந்தரனே.  10  

ஆரணத்தேன் பருகிஅருந் 
          தமிழ்மாலை கமழவரும்
காரணத்தின் நிலைபெற்ற 
          கருவூரன் தமிழ்மாலை
பூரணத்தால் ஈர் ஐந்தும் 
          போற்றிசைப்பார் காந்தாரம்
சீரணைத்த பொழிற்கோடைத் 
          திரைலோக்கிய சுந்தரனே.

திருச்சிற்றம்பலம்