திரு நெல்வெண்ணெய்

          

   

௨ 

திருஞானசம்பந்தர்  சுவாமிகள் அருளிச்செய்த
,மூன்றாம்  திருமுறை

தகவல் பலகை	விவரம்
தலம்	திரு நெல்வெண்ணெய்
ஊர்
நாடு	நடு நாடு
ॐசுவாமி	ஸ்வர்ண கடேஸ்வரர்  வெண்ணையப்பர்
ॐஅம்பிகை	நீலமலர்க் கண்ணி , பெரிய நாயகி,
பாடியவர்கள்	திருஞானசம்பந்தர் (1)         நல்வெணய்  விழுது  (3-96)
ஸ்தல மரம்	புன்னை
தீர்த்தம்	பெண்ணை ஆறு
பண்	சாதாரி
குறிப்புகள்	சனகாதி முனிவர் வழிபட்ட தலம்
பதிக பலன்	துயர் நீங்கும்.
வரிசை எண்.	96                                                             10/22

திருச்சிற்றம்பலம்

நெல்வெணெய் விழுதுபெய்து ஆடுதிர் நாள்தொறும்
நெல்வெணெய் மேவிய நீரே    
நெல்வெணெய் மேவிய நீர் உமை நாள்தொறும்
சொல்வணம் இடுவது சொல்லே.  1  

நிச்சலும் அடியவர் தொழுது எழு நெல்வெணெய்க்    
கச்சிள அரவு அசைத் தீரே    
கச்சிள அரவு அசைத் தீர் உமைக் காண்பவர்    
அச்சமொடு அருவினை இலரே.  2  

நிரைவிரி தொல்புகழ் நெல்வெணெய் மேவிய    
அரைவிரி கோவணத் தீரே    
அரைவிரி கோவணத் தீர் உமை அலர்கொடு    
உரைவிரிப் போர் உயர்ந் தோரே.  3  

நீர்மல்கு தொல்புகழ் நெல்வெணெய் மேவிய    
ஊர்மல்கி உறையவல் லீரே    
ஊர்மல்கி உறையவல் லீர் உமை உள்குதல்    
பார்மல்கு புகழவர் பண்பே.  4  

நீடு இளம் பொழில் அணி நெல்வெணெய் மேவிய    
ஆடிளம் பாப்பு அசைத் தீரே    
ஆடிளம் பாப்பசைத் தீருமை அன்பொடு    
பாடுளம் உடையவர் பண்பே.  5  

நெற்றி ஓர் கண்ணுடை நெல்வெணெய் மேவிய    
பெற்றிகொள் பிறைநுத லீரே    
பெற்றிகொள் பிறைநுத லீர் உமைப் பேணுதல்    
கற்று அறி வோர்கள்தம் கடனே.  6  

நிறை அவர் தொழுது எழு நெல்வெணெய் மேவிய    
கறை அணி மிடறு உடை யீரே    
கறை அணி மிடறு உடையீர் உமைக் காண்பவர்    
உறைவதும் உம் அடிக் கீழே.  7  

நெருக்கிய பொழில் அணி நெல்வெணெய் மேவியன்    
அரக்கனை அசைவுசெய் தீரே    
அரக்கனை அசைவுசெய் தீர் உமை அன்புசெய்    
திருக்கவல் லார் இடர் இலரே.  8  

நிரைவிரி சடைமுடி நெல்வெணெய் மேவியன்    
இருவரை இடர்கள்செய் தீரே    
இருவரை இடர்கள்செய் தீர் உருமை இசைவொடு    
பரவ வல்லார் பழி இலரே.  9  

நீக்கிய புனல் அணி நெல்வெணெய் மேவிய    
சாக்கியச் சமண்கெடுத் தீரே    
சாக்கியச் சமண்கெடுத் தீர் உமைச் சார்வது    
பாக்கியம் உடையவர் பண்பே.  10  

நிலமல்கு தொல்புகழ் நெல்வெணெய் ஈசனை    
நலமல்கு ஞானசம் பந்தன்    
நலமல்கு ஞானசம் பந்தன செந்தமிழ்    
சொலமல்கு வார் துயர் இலரே.

திருச்சிற்றம்பலம்

திருக் கோவலூர் வீரட்டம்

          

   

௨ 

திருநாவுக்கரசர்  சுவாமிகள் அருளிச்செய்த
நான்காம் திருமுறை

தகவல் பலகை	விவரம்
தலம்	திருகோவலூர் வீரட்டம்
ஊர்
நாடு	நடு நாடு
ॐசுவாமி	வீரட்டேஸ்வரம்
ॐஅம்பிகை	சிவானந்தவல்லி, பெரிய நாயகி,
பாடியவர்கள்	திருஞானசம்பந்தர் (1)         படை கொள் கூற்றம் (2-100) திருநாவுக்கரசர்         செத்தையேன் சிதம்ப (4-69)
ஸ்தல மரம்	வில்வம்
தீர்த்தம்	பெண்ணை ஆறு
பண்	நட்டராகம்
குறிப்புகள்	அந்தஹாசுரனை சம்ஹரித்த அட்ட வீரட்டத் தலங்களுள் ஒன்று இராசராச சோழன் பிறந்த பெருமை வாய்ந்தது மெய்ப்பொருள் நாயனார் ஆண்ட பதி ஒளவையார் விநாயகரை பூசித்து கயிலாயம் சென்ற பதி
பதிக பலன்	பாவங்கள் நாசமாகும்
வரிசை எண்.	69                                                          11/22

திருச்சிற்றம்பலம்

செத்தையேன் சிதம்ப நாயேன் 
          செடியனேன் அழுக்குப் பாயும்
பொத்தையே போற்றி நாளும் 
          புகலிடம் அறிய மாட்டேன்
எத்தைநான் பற்றி நிற்கேன் 
          இருளற நோக்க மாட்டாக்
கொத்தையேன் செய்வ தென்னே 
          கோவல்வீ ரட்ட னீரே.  1  

தலைசுமந்து இருகை நாற்றித் 
          தரணிக்கே பொறைய தாகி
நிலையிலா நெஞ்சம் தன்னுள் 
          நித்தலும் ஐவர் வேண்டும்
விலைகொடுத்து அறுக்க மாட்டேன் 
          வேண்டிற்றே வேண்டி எய்த்தேன்
குலைகொள்மாங் கனிகள் சிந்தும் 
          கோவல்வீ ரட்ட னீரே.  2  

வழித்தலைப் படவு மாட்டேன் 
          வைகலுந் தூய்மை செய்து
பழித்திலேன் பாசம் அற்றுப் 
          பரமநான் பரவ மாட்டேன்
இழித்திலேன் பிறவி தன்னை 
          என் நினைந்து இருக்க மாட்டேன்
கொழித்துவந் தலைக்குந் தெண்ணீர்க் 
          கோவல்வீ ரட்ட னீரே.  3  

சாற்றுவர் ஐவர் வந்து 
          சந்தித்த குடிமை வேண்டிக்
காற்றுவர் கனலப் பேசிக் 
          கண்செவி மூக்கு வாயுள்
ஆற்றுவர் அலந்து போனேன் 
          ஆதியை அறிவொன்றி நின்றிக்
கூற்றுவர் வாயிற் பட்டேன் 
          கோவல்வீ ரட்ட னீரே.  4  

தடுத்திலேன் ஐவர் தம்மைத் 
          தத்துவத் துயர்வு நீர்மைப்
படுத்திலேன் பரப்பு நோக்கிப் 
          பன்மலர்ப் பாதம் உற்ற
அடுத்திலேன் சிந்தை யார 
          ஆர்வலித்து அன்பு திண்ணம்
கொடுத்திலேன் கொடிய வாநான் 
          கோவல்வீ ரட்ட னீரே.  5  

மாச்செய்த குரம்பை தன்னை 
          மண்ணிடை மயக்கம் எய்து
நாச்செய்து நாலும் ஐந்தும் 
          நல்லன வாய்தல் வைத்துக்
காச்செய்த காயம் தன்னுள் 
          நித்தலும் ஐவர் வந்து
கோச்செய்து குமைக்க ஆற்றேன் 
          கோவல்வீ ரட்ட னீரே.  6  

படைகள்போல் வினைகள் வந்து 
          பற்றி என் பக்கல் நின்றும்
விடகி ஆத லாலே 
          விகிர்தனை விரும்பி ஏத்தும்
இடையிலேன் என்செய் கேன்நான் 
          இரப்பவர் தங்கட்கு என்றும்
கொடையிலேன் கொள்வ தேநான் 
      கோவல்வீ ரட்ட னீரே.  7  

பிச்சிலேன் பிறவி தன்னைப் 
          பேதையேன் பிணக்கம் என்னும்
துச்சுளே அழுந்தி வீழ்ந்து 
          துயரமே இடும்பை தன்னுள்
அச்சனாய் ஆதி மூர்த்திக்கு 
          அன்பனாய் வாழ மாட்டாக்
கொச்சையேன் செய்வது என்னே 
          கோவல்வீ ரட்ட னீரே.  8  

நிணத்திடை யாக்கை பேணி 
          நியமஞ்செய்து இருக்க மாட்டேன்
மணத்திடை ஆட்டம் பேசி 
          மக்களே சுற்றம் என்னும்
கணத்திடை ஆட்டப் பட்டுக் 
          காதலால் உன்னைப் பேணும்
குணத்திடை வாழ மாட்டேன் 
          கோவல்வீ ரட்ட னீரே.  9  

விரிகடல் இலங்கைக் கோனை 
          வியன்கயி லாயத் தின்கீழ்
இருபது தோளும் பத்துச் 
          சிரங்களும் நெரிய ஊன்றிப்
பரவிய பாடல் கேட்டுப் 
          படைகொடுத்து அருளிச் செய்தார்
குரவொடு கோங்கு சூழ்ந்த 
          கோவல்வீ ரட்ட னாரே.

திருச்சிற்றம்பலம்

திருக்கோவலூர் வீரட்டம்

         

   

௨ 

திருஞானசம்பந்தர்  சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திருகோவலூர் வீரட்டம்
ஊர்
நாடு	நடு நாடு
ॐசுவாமி	வீரட்டேஸ்வரம்
ॐஅம்பிகை	சிவானந்தவல்லி, பெரிய நாயகி,
பாடியவர்கள்	திருஞானசம்பந்தர் (1)         படை கொள் கூற்றம் (2-100) திருநாவுக்கரசர்         செத்தையேன் சிதம்ப (4-69)
ஸ்தல மரம்	வில்வம்
தீர்த்தம்	பெண்ணை ஆறு
பண்	நட்டராகம்
குறிப்புகள்	அந்தஹாசுரனை சம்ஹரித்த அட்ட வீரட்டத் தலங்களுள் ஒன்று இராசராச சோழன் பிறந்த பெருமை வாய்ந்தது மெய்ப்பொருள் நாயனார் ஆண்ட பதி ஒளவையார் விநாயகரை பூசித்து கயிலாயம் சென்ற பதி
பதிக பலன்	பாவங்கள் நாசமாகும்
வரிசை எண்.	100                                                             11/22

திருச்சிற்றம்பலம்

படைகொள் கூற்றம் வந்துமெய்ப்
          பாசம்விட்ட போதின்கண்
இடைகொள்வார் எமக்கு இலை
          எழுகபோது நெஞ்சமே!
குடைகொள்வேந்தன் மூதாதை
          குழகன் கோவலூர் தன் உள்
விடையது ஏறும் கொடியினான்
          வீரட்டானம் சேர்துமே.  1  

கரவலாளர் தம்மனைக் 
          கடைகள்தோறும்  கால்நிமிர்த்து
இரவலாழி நெஞ்சமே இனியது எய்த
          வேண்டில் நீ
குரவம் ஏறி வண்டினம்
          குழல் ஓடியாழ்செய் கோவலூர்
விரவிநாறு கொன்றையான்
          வீரட்டானம் சேர்துமே.  2  

உள்ளத்தீரே போதுமின்
          உறுதியாவது அறிதிரேல்
அள்ளற்சேற்றில்  கால் இ ட்டு இங்கு 
          அவலத்துள் அழுந்தாதே
கொள்ளப்பாடு கீதத்தான்
          குழகன்கோவ லூர்தன் உள்
வெள்ளந்தாங்கு சடையினான்
          வீரட்டானம் சேர்துமே.  3  

கனைகொள் இருமல் சூலைநோய்
          கம்பதாளி குன்மமும்
இனையபலவும் மூப்பினோடு 
          எய்திவந்து நலியாமுன்
பனைகள் உலவு பைம்பொழில்
          பழனம் சூழ்ந்த கோவலூர்
வினையை வென்ற வேடத்தான்
          வீரட்டானம்  சேர்துமே.  4  

உளங்கொள் போகம் உய்த்திடார்
          உடம்பு இழந்த போதின்கண்
துளங்கிநின்று நாள்தொறும்
          துயரலாழி நெஞ்சமே
வளங்கொள்பெண்ணை வந்துலா
          வயல்கள்சூழ்ந்த கோவலூர்
விளங்குகோவ ணத்தினான்
          வீரட்டானம் சேர்துமே.  5  

கேடுமூப்புச் சாக்காடு
          கெழுமிவந்து நாள்தொறும்
ஆடுபோல நரைகளாய்
          யாக்கைபோக்கது அன்றியும்
கூடிநின்று பைம்பொழில்
          குழகன்கோவ லூர்தன் உள்
வீடுகாட்டு நெறியினான்
          வீரட்டானம் சேர்துமே.  6  

உரையும் பாட்டும் தளர்வு எய்தி
          உடம்பு மூத்த போதின்கண்
நரையும் திரையும் கண்டு எள்கி
          நகுவர்நமர்கள் ஆதலால்
வரைகொள் பெண்ணை வந்துலா
          வயல்கள்சூழ்ந்த கோவலூர்
விரைகொள்சீர் வெண் ணீற்றினான்
          வீரட்டானம் சேர்துமே.  7  

ஏதமிக்க மூப்பினோடு
          இருமல்ஈளை என்றிவை
ஊதல் யாக்கை ஓம்புவீர்
          உறுதியாவது அறிதிரேல்
போதில்வண்டு பண்செயும்
          பூந்தண்கோவ லூர்தன் உள்
வேதம் ஓது நெறியினான்
          வீரட்டானம் சேர்துமே.  8  

ஆறுபட்ட புன்சடை
          அழகன்ஆயி ழைக்கொரு
கூறுபட்ட மேனியான்
          குழகன்கோவ லூர்தன் உள்
நீறுபட்ட கோலத்தான்
          நீலகண்டன் இருவர்க்கும்
வேறுபட்ட சிந்தையான்
          வீரட்டானம் சேர்துமே.  9  

குறிகொள் ஆழி நெஞ்சமே கூறை
          துவர் இட் டார்களும்
அறிவிலாத அமணர்சொல்
          அவத்தமாவது அறிதியேல்
பொறிகொள்வண்டு பண்செயும்
          பூந்தண்கோவ லூர்தன் உள்
வெறிகொள்கங்கை தாங்கினான்
          வீரட்டானம்சேர்துமே.  10  

கழியொடுலவு கானல்சூழ் காழி
          ஞான சம்பந்தன்
பழிகள்தீரச் சொன்னசொல்
          பாவநாசம் ஆதலால்
அழிவிலீர்கொண்டு ஏத்துமின்
          அந்தண்கோவ லூர்தன் உள்
விழிகொள்பூதப் படையினான்
          வீரட்டானம் சேர்துமே.

திருச்சிற்றம்பலம்

திரு அறையணி நல்லூர்

        

   

௨ 

திருஞானசம்பந்தர்  சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திருஅறையணி நல்லூர்
ஊர்	அரகண்ட நல்லூர்
நாடு	நடு நாடு
ॐசுவாமி	அறையணி நாதர், அதுல்ய நாதேஸ்வரர்
ॐஅம்பிகை	அருள் நாயகி, அழகிய பொன்னம்மை
பாடியவர்கள்	திருஞானசம்பந்தர் (1)         பீடினாற் பெரியோர்களும் (2-77)
ஸ்தல மரம்	....... (குறிப்புகள் இல்லை)
தீர்த்தம்	தென்பெண்ணை ஆறு
பண்	காந்தாரம்
குறிப்புகள்	நீல கண்ட முனிவர், கபிலர், பாண்டவர்கள் வழிபட்டது.
பதிக பலன்	சிவலோகம் சார்ந்து இருப்பர்.
வரிசை எண்.	77                                                             12/22

திருச்சிற்றம்பலம்

பீடினாற்பெரி யோர்களும்
          பேதைமை கெடத் தீதிலா
வீடினால் உயர்ந் தார்களும்
          வீடிலார் இள வெண்மதி
சூடினார்மறை பாடினார்
          சுடலைநீறு அணிந்தார் அழல்
ஆடினார் அறையணி
          நல்லூர் அங்கையால்தொழுவார்களே.  1  

இலையினார்சூலம் ஏறு உகந்து
          ஏறியே இமையோர் தொழ
நிலையினால் ஒரு காலுறச்
          சிலையினால்மதில் எய்தவன்
அலையினார்புனல்சூடிய அண்ணலார்
          அறையணிநல்லூர்
தலையினால்தொழுது ஓங்குவார்
          நீங்குவார்தடு மாற்றமே.  2  

என்பினார்கனல் சூலத்தார்
          இலங்குமாமதி உச்சியான்
பின்பினாற்பிறங் கும் சடைப்
          பிஞ்ஞகன்பிறப் பிலி என்று
முன்பினார்மூவர் தாம்தொழு
          முக்கண்மூர்த்திதன் தாள்களுக்கு
அன்பினார்அறை யணிநல்லூர்
          அங்கையால்தொழு வார்களே.  3  

விரவுநீறுபொன் மார்பினில்
          விளங்கப்பூசிய வேதியன்
உரவுநஞ்சு அமுதாக உண்டு
          உறுதி பேணுவது அன்றியும்
அரவுநீள்சடைக் கண்ணியார்
          அண்ணலார் அறை யணிநல்லூர்
பரவுவார்பழி நீங்கிடப்
          பறையும் தாம் செய்த பாவமே.  4  

தீயினார்திகழ் மேனியாய்
          தேவர்தாம்தொழும் தேவன்நீ
ஆயினாய் கொன்றை யாய்அனல்
          அங்கையாய்  அறையணிநல்லூர்
மேயினார்தம தொல்வினை
          வீட்டினாய்வெய்ய காலனைப்
பாயினாயதிர் கழலினாய்
          பரமனே அடி பணிவனே.  5  

விரையினார் கொன்றை சூடியும்
          வேகநாகமும் வீக்கிய
அரையினார் அறை யணிநல்லூர்
          அண்ணலார் அழகாயதோர்
நரையினார்விடை ஊர்தியார்
          நக்கனார் நறும்போதுசேர்
உரையினால் உயர்ந் தார்களும்
          உரையினால் உயர்ந் தார்களே.  6  

வீரமாகிய வேதியர்
          வேகமாகளி யானையின்
ஈரமாகிய உரிவைபோர்த்த
          அரிவைமேற்சென்ற எம் இறை
ஆரமாகிய பாம்பினார்
          அண்ணலார் அறை யணிநல்லூர்
வாரமாய்நினைப் பார்கள்தம்
          வல்வினையவை மாயுமே.  7  

தக்கனார்பெரு வேள்வியைத்
          தகர்த்து உகந்தவன் தாழ்சடை
முக்கணான்மறை பாடிய
          முறைமையான் முனி வர்தொழ
அக்கினோ எழில் ஆமைபூண்
          அண்ணலார் அறை யணிநல்லூர்
நக்கனாரவர் சார்வலால்
          நல்குசார்விலோம் நாங்களே.  8  

வெய்யநோயிலர் தீதிலர்
          வெறியராய்ப்பிறர் பின்செலார்
செய்வதே அலங் காரமாம்
          இவையிவை தேறி இன்புறில்
ஐயம் ஏற்று உணும் தொழிலராம்
          அண்ணலார் அறையணிநல்லூர்ச்
சைவனார் அவர் சார்வலால்யா
          துஞ்சார்விலோம் நாங்களே.  9  

வாக்கியம் சொல்லி யாரொடும்
          வகையலாவகை செய்யன்மின்
சாக்கியம் சமன் என்று இவை
          சாரேலும்மர ணம்பொடி
ஆக்கியம்மழு வாட்படை
          அண்ணலார் அறை யணிநல்லூர்ப்
பாக்கியம் குறை யுடையீரேற்
          பறையுமாஞ்செய்த பாவமே.  10  

கழியுலாம் கடற் கானல்சூழ்
          கழுமலம்அமர் தொல்பதிப்
பழியிலாமறை ஞானசம்
          பந்தன்நல்லதோர் பண்பினார்
மொழியினால் அறை யணிநல்லூர்
          முக்கண்மூர்த்திகள் தாள்தொழக்
கெழுவினார் அவர் தம்மொடும்
          கேடில்வாழ்பதி பெறுவரே.

திருச்சிற்றம்பலம்

திருவிடையாறு

       

   

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருவிடையாறு
ஊர்
நாடு	நடு நாடு
ॐசுவாமி	இடையாற்று நாதர்
ॐஅம்பிகை	சிற்றிடை நாயகி
பாடியவர்கள்	சுந்தரர் (1)         முந்தை முதுகுன்றம் (7-31)
ஸ்தல மரம்	மருத
தீர்த்தம்	சிற்றிடை  தீர்த்தம்
பண்	கொல்லி
குறிப்புகள்	சுகர் முனிவர், அகத்தியர், மறைஞான சம்பந்தர் ஆகியோர் வழிபட்டது. மருதந்துறை நாயனார் என இறைவனை குறித்துள்ளது
பதிக பலன்	வினை துன்பம் நீங்கும்
வரிசை எண்.	31                                                             14/22

திருச்சிற்றம்பலம்

முந்தையூர் முதுகுன்றம்
          குரங்கணில் முட்டம்
சிந்தையூர் நன்றுசென்று 
          அடைவான் திருவாரூர்
பந்தையூர் பழையாறு
          பழனம் பைஞ்ஞீலி
எந்தையூர் எய்தமான்
          இடையாறு இடைமருதே.  1  

சுற்றும் ஊர் சுழியல்
          திருச்சோ புரம் தொண்டர்
ஒற்றும் ஊர் ஒற்றியூர்
          திருவூறல் ஒழியாப்
பெற்றம் ஏறிப் பெண்
          பாதியிடம்பெண்ணைத் தெண்ணீர்
எற்றும் ஊர் எய்தமான்
          இடையாறு இடைமருதே.

கடங்களூர் திருக்காரிக்கரை 
          கயி லாயம்
விடங்களூர் திருவெண்ணி
          அண்ணா மலை எய்ய
படங்களூர் கின்றபாம்பு
       அரையான் பரஞ்சோதி
இடங்கொளூர் எய்தமான்
          இடையாறு இடைமருதே.  3  

கச்சையூர் காவங்
          கழுக்குன்றம் காரோணம்
பிச்சையூர் திரிவான்
          கடவூர் வடபேறூர்
கச்சியூர் கச்சிசிக்கல்
          நெய்த்தானம் மிழலை
இச்சையூர் எய்தமான்
          இடையாறு இடைமருதே.  4  

நிறையனூர் நின்றியூர்
          கொடுங்குன்றம் அமர்ந்த
பிறையனூர் பெருமூர்
          பெரும்பற்றப் புலியூர்
மறையனூர் மறைக்காடு
          வலஞ்சுழி வாய்த்த
இறைவனூர் எய்தமான்
          இடையாறு இடைமருதே.  5  

திங்களூர் திருவா
          திரையான் பட்டினமூர்
நங்களூர் நறையூர்
          நனிநால் இசைநாலூர்
தங்களூர் தமிழான்
          என்றுபா விக்கவல்ல
எங்களூர் எய்தமான்
          இடையாறு இடைமருதே.  6  

கருக்கநஞ்சு அமுது உண்ட
          கல்லாலன் கொல் ஏற்றன்
தருக்கருக் கனைச்செற்று 
          உகந்தான் தன் முடிமேல்
எருக்கநாண் மலர் இண்டையும் 
          மத்த மும் சூடி
இருக்கும் ஊர் எய்தமான்
          இடையாறு இடைமருதே.  7  

தேசனூர் வினைதேய
          நின்றான் திருவாக்கூர்
பாசனூர் பரமேட்டி
          பவித்திர பாவ
நாசனூர் நனிபள்ளி
          நள்ளாற்றை அமர்ந்த
ஈசனூர் எய்தமான்
          இடையாறு இடைமருதே.  8  

பேறனூர் பிறைச்சென்னி
          இயினான் பெருவேளூர்
தேறனூர் திருமா
          மகள்கோன் திருமாலோர்
கூறனூர் குரங்காடு
          துறைதிருக் கோவல்
ஏறனூர் எய்தமான்
          இடையாறு இடைமருதே.  9  

ஊறிவா யினநாடிய
          வன்தொண்டன் ஊரன்
தேறுவார் சிந்தைதேறும்
          இடம் செங்கண் வெள் 
ஏறுவார் எய்தமான்
          இடையாறு இடைமருதைக்
கூறுவார் வினை எவ்விட
          மெய் குளிர்வாரே.

திருச்சிற்றம்பலம்

திருத்துறையூர்

      

   

௨ 

திருஞானசம்பந்தர்  சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திருத்துறையூர்
ஊர்	திருத்தளூர்
நாடு	நடு நாடு
ॐசுவாமி	துறையூர் நாதர், தவநெறியப்பர்
ॐஅம்பிகை	பூங்கோதை நாயகி, சிவலோக நாயகி
பாடியவர்கள்	சுந்தரர் (1)         மலையார் அருவி (7-13)
ஸ்தல மரம்	கொன்றை
தீர்த்தம்	சூரிய   தீர்த்தம்
பண்	தக்க ராகம்
குறிப்புகள்	தவ நெறி தந்து அருள வேண்டிய பதிகம்
பதிக பலன்	தவ நெறி பெறுவர்
வரிசை எண்.	13                                                             15/22

திருச்சிற்றம்பலம்

மலையார் அருவித்
          திரள்மா மணிஉந்திக்
குலையாரக் கொணர்ந்து எற்றி
          ஓர்பெண்ணை வடபால்
கலையார் அல்குல் கன்னியர்
          ஆடும்துறையூர்த்
தலைவா உனைவேண்டிக்
          கொள்வேன் தவநெறியே.  1  

மத்தம் மதயானையின்
          வெண் மருப்புந்தி
முத்தங் கொணர்ந்து எற்றி
          ஓர்பெண்ணை வடபால்
பத்தர் பயின்று ஏத்திப்
          பரவும் துறையூர்
அத்தா உனைவேண்டிக்
          கொள்வேன் தவநெறியே.  2  

கந்தம் கமழ்கார் அகில் 
          சந்தனம் உந்திச்
செந்தண் புனல்வந்து 
          இழிபெண்ணை வடபால்
மந்தி பலமா
          நடம் ஆடும் துறையூர்
எந்தாய் உனைவேண்டிக்
          கொள்வேன் தவநெறியே.  3  

அரும்பார்ந்தன
          மல்லிகை சண்பகம்  சாடிச்
சுரும்பாரக் கொணர்ந்து எற்றி
          ஓர்  பெண்ணை வடபால்
கரும்பார் மொழிக்
          கன்னியர்ஆடும்  துறையூர்
விரும்பா உனைவேண்டிக்
          கொள்வேன் தவநெறியே.  4  

பாடார்ந் தன மாவும்
          பலாக்க ளும் சாடி
நாடார வந்து எற்றி
          ஓர்பெண்ணை வடபால்
மாடார்ந் தனமாளி
          கைசூழுந் துறையூர்
வேடா உனைவேண்டிக்
          கொள்வேன் தவநெறியே.  5  

மட்டார் மலர்க் கொன்றையும் 
          வன்னி யும்  சாடி
மொட்டாரக் கொணர்ந்து எற்றி
          ஓர்பெண்ணை வடபால்
கொட்டாட் டொடுபாட்டு 
          ஒலிஓவாத் துறையூர்ச்
சிட்டா உனைவேண்டிக்
          கொள்வேன் தவநெறியே.  6  

மாதார் மயிற்பீலியும் 
          வெண் ணுரைஉந்தித்
தாதாரக் கொணர்ந்து எற்றி
          ஓர்பெண்ணை வடபால்
போதார்ந்தன பொய்கைகள்
          சூழுந் துறையூர்
நாதா உனைவேண்டிக்
          கொள்வேன் தவநெறியே.  7  

கொய்யா மலர்க் கோங்கு 
          கொடு வேங்கையும் சாடிச்
செய்யாரக் கொணர்ந்து எற்றி
          ஓர்பெண்ணை வடபால்
மையார் தடங்கண்ணி யர் 
          ஆடும் துறையூர்
ஐயா ! உனைவேண்டிக்
          கொள்வேன் தவநெறியே.  8  

விண்ணார்ந்தன மேகங்கள்
          நின்றுபொழிய
மண்ணாரக் கொணர்ந்து எற்றி
          ஓர்பெண்ணை வடபால்
பண்ணார் மொழிப்
          பாவையர் ஆடும்துறையூர்
அண்ணா உனைவேண்டிக்
          கொள்வேன் தவநெறியே.  9  

மாவாய்ப் பிளந்தானும்
          மலர்மிசை யானும்
ஆவா அவர்தேடித்
          திரிந்து அலமந்தார்
பூவார்ந்தன பொய்கைகள்
          சூழும்துறையூர்த்
தேவா உனைவேண்டிக்
          கொள்வேன் தவநெறியே.  10  

செய்யார் கமல மலர்
          நாவலூர் மன்னன்
கையால் தொழுது ஏத்தப்
          படுந்துறை ஊர்மேல்
பொய்யாத் தமிழ்ஊரன்
          உரைத்தன வல்லார்
மெய்யே பெறுவார்கள்
          தவநெறி தானே.

திருச்சிற்றம்பலம்

திருவடுகூர்

     

   

௨ 

திருஞானசம்பந்தர்  சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திருவடுகூர்
ஊர்	திருவாண்டார் கோயில்
நாடு	நடு நாடு
ॐசுவாமி	வடுக நாதர்
ॐஅம்பிகை	வடுக வகிர்கண்ணி, திரிபுர சுந்தரி
பாடியவர்கள்	திருஞானசம்பந்தர் (1)         சுடுகூர் எரிமாலை (1-87)
ஸ்தல மரம்	வன்னி
தீர்த்தம்	வாமதேவ  தீர்த்தம்
பண்	குறிஞ்சி
குறிப்புகள்	வடுக பைரவர் முண்டகன் என்னும் அசுரனை கொன்ற பழி தீர்த்த தலம். இறைவனின் 64 வடிவங்களுள் எட்டு வடுக பைரவ கோலம் அவை: அசிதாங்க பைரவர் குருபைரவர் சண்ட பைரவர் குரோத பைரவர் உன்மத்த பைரவர் காபாலி பைரவர் பிஷன பைரவர் சம்மார பைரவர் (வடுக பைரவர்)
பதிக பலன்	முத்தி நலம் பெறுவர்
வரிசை எண்.	87                                                             16/22

திருச்சிற்றம்பலம்

சுடுகூர் எரிமாலை அணிவர் சுடர்வேலர்
கொடுகூர் மழுவாள் ஒன்று உடையார் விடையூர்வர்
கடுகூர் பசிகாமங் கவலை பிணியில்லார்
வடுகூர் புனல்சூழ்ந்த வடுகூர் அடிகளே.  1  

பாலும் நறு நெய்யும் தயிரும் பயின்று ஆடி
ஏலும் சுடு நீறும் என்பும் ஒளிமல்கக்
கோலம் பொழில் சோலைக் கூடி மடஅன்னம்
ஆலும் வடுகூரில் ஆடும் அடிகளே.  2  

சூடும் இளந்திங்கள் சுடர்பொற் சடைதன்மேல்
ஓடுங் களியானை உரிபோர்த்து உமை அஞ்ச
ஏடு மலர்மோந்து அங்கு எழிலார் வரிவண்டு
பாடும் வடுகூரில் ஆடும் அடிகளே.  3  

துவரும் புரிசையும் துதைந்த மணிமாடம்
கவர எரி ஓட்டிக் கடிய மதில் எய்தார்
கவரு மணிகொல்லைக் கடிய முலைநல்லார்
பவரும் வடுகூரில் ஆடும் அடிகளே.  4  

துணியார் உடை ஆடை துன்னி  அரைதன்மேல்
தணியா அழல்நாகம்  தரியா வகைவைத்தார்
பணியார் அடியார்கள் பலரும் பயின்று ஏத்த
அணியார் வடுகூரில் ஆடும் அடிகளே.  5  

தளருங் கொடியன்னாள் தன்னோ டு உடனாகிக்
கிளரும் அரவார்த்துக்  கிளரு முடிமேலோர்
வளரும் பிறைசூடி வரி வண்டு இசைபாட
ஒளிரும் வடுகூரில் ஆடும் அடிகளே.  6  

நெடியர் சிறிதாய நிரம்பா மதிசூடும்
முடியர் விடை ஊர்வர் கொடியர் மொழி கொள்ளார்
கடிய தொழிற்காலன் மடிய வுதைகொண்ட
அடியர் வடுகூரில் ஆடும் அடிகளே.   7  

பிறையும் நெடுநீரும் பிரியா முடியினார்
மறையும் பலபாடி மயானத்து உறைவாரும்
பறையும் அதிர்குழலும் போலப் பலவண்டு ஆங்கு 
அறையும் வடுகூரில் ஆடும் அடிகளே.  8  

சந்தம் மலர்வேய்ந்த சடையின் இடைவிம்மு
கந்தம் மிகுதிங்கள் சிந்து கதிர்மாலை
வந்து நயந்து எம்மை நன்றும் அருள்செய்வார்
அந்தண் வடுகூரில் ஆடும் அடிகளே.  9  

திருமால் அடிவீழத் திசைநான் முகனாய
பெருமான் உணர்கில்லாப் பெருமான் நெடுமுடிசேர்
செருமால் விடை ஊரும்  செம்மான் திசைவில்லா
அருமா வடுகூரில் ஆடும் அடிகளே.  10  

படிநோன்பு அவையாவர் பழியில் புகழான
கடி நாள் நிகழ்சோலை கமழும் வடுகூரைப்
படியான சிந்தை மொழியார் சம்பந்தன்
அடிஞானம் வல்லார்  அடிசேர் வார்களே.

திருச்சிற்றம்பலம்

திரு மாணிக்குழி

    

   

௨ 

திருஞானசம்பந்தர்  சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருமாணிகுழி
ஊர்	வாமனபுரி, இந்திர லோகம்
நாடு	நடு நாடு
ॐசுவாமி	வாமனபுரீஸ்வரர் உதவி நாயகர், மாணிக்கவரதர்
ॐஅம்பிகை	அம்புஜாட்சி, உதவி நாயகி, மாணிக்கவல்லி
பாடியவர்கள்	திருஞானசம்பந்தர் (1)         பொன்னியல் பொருப்பரையன் (3-77)
ஸ்தல மரம்	கொன்றை
தீர்த்தம்	கெடில நதி சுவேத தீர்த்தம்
பண்	சாதாரி
குறிப்புகள்	திருமால் வாமன அவதாரத்தின் போது மாவலி சக்கரவர்த்தியிடம் 3 அடி மண் பெற்று அம்மண்ணை அழித்த பழி தீர பூசித்த தலம்
பதிக பலன்	இம்மைப் பயனும், மறுமைப் பயனும் கிட்டும்.
வரிசை எண்.	77                                                             17/22

திருச்சிற்றம்பலம்

பொன்னியல் பொருப்பரையன் மங்கை ஒரு
          பங்கர்புனல் தங்குசடைமேல்
வன்னியொடு மத்தமலர் வைத்தவிறல்
          வித்தகர் மகிழ்ந்துறைவிடம்
கன்னி இள வாளைகுதி கொள்ள இள
          வள்ளைபடர் அள்ளல்வயல்வாய்
மன்னியிள மேதிகள் படிந்துமனை
          சேர் உதவி மாணிகுழியே.  1  

சோதிமிகு நீறதுமெய் பூசி ஒரு
          தோலுடை புனைந்துதெருவே
மாதர்மனை தோறும்இசை பாடிவசி
          பேசும்அர னார் மகிழ்விடம்
தாதுமலி தாமரைம ணம் கமழ
          வண்டுமுரல் தண்பழனமிக்கு 
ஓதமலி வேலைபுடை சூழ் உலகில்
          நீடு உதவி மாணிகுழியே.  2  

அம்பனைய கண் உமை மடந்தை அவள்
          அஞ்சி வெரு வச் சினம் உடைக்
கம்பமத யானை உரி செய்த
          அரனார்கருதி மேய இடமாம்
வம்புமலி சோலைபுடை சூழமணி
          மாடம் அது நீடி அழகார்
உம்பர் அவர் கோன்நகரம் என்னமிக
          மன் உதவி மாணிகுழியே.  3  

நித்த நியமத் தொழிலன் ஆகி 
          நெடுமால் குறளன் ஆகி மிகவும்
சித்தம் அது ஒருக்கி வழி பாடு செய
          நின்றசிவ லோகன் இடமாம் 
கொத்தலர் மலர்ப்பொழிலின் நீடுகுல
          மஞ்ஞைநடம் ஆடல் அதுகண்டு 
ஒத்தவரி வண்டுகள் உலாவி இசை
      பாடு உதவி மாணிகுழியே.  4  

மாசில்மதி சூடுசடை மாமுடியர்
          வல் அசுரர் தொன்னகரமுன்
நாசம் அது செய்துநல வானவர்களுக்கு
          அருள் செய் நம்பன் இடமாம்
வாசமலி மென்குழல் மடந்தையர்கள்
          மாளிகையில் மன்னி அழகார்
ஊசல்மிசை ஏறி இனிதாக இசை
          பாடு உதவி மாணிகுழியே.  5  

மந்தமலர் கொண்டுவழி பாடுசெயு
          மாணி உயிர் வவ்வமனமாய்
வந்த ஒரு காலன் உயிர் மாள உதை
          செய்த மணிகண்டன் இடமாம்
சந்தினொடு கார் அகில் சுமந்துதட
          மாமலர்கள் கொண்டு கெடிலம்
உந்துபுனல் வந்துவயல் பாயுமண
          மார் உதவி மாணிகுழியே.  6  

எண்பெரிய வானவர்கள் நின்றுதுதி
          செய்யஇறை யேகருணையாய்
உண்பு அரிய நஞ்சு அதனை உண்டு உலகம்
          உய்யஅருள் உத்தமனிடம்
பண்பயிலும் வண்டுபல கெண்டி மது
          உண்டுநிறை பைம்பொழிலின்வாய்
ஒண்பலவின் இன்கனி சொரிந்துமணம்
          நாறு உதவி மாணிகுழியே.  7  

எண்ணம் அது இன்றி எழிலார் கைலை
          மாமலை எடுத்த திறலார்
திண்ணிய அரக்கனை நெரித்து அருள்
          புரிந்தசிவ லோகன் இடமாம்
பண் அமரும் மென்மொழியி னார்பணை
          முலைப்பவள வாய் அழகதார்
ஒண்ணுதல் மடந்தையர் குடைந்துபுனல்
          ஆடு உதவி மாணிகுழியே.  8  

நேடும் அயனோடு திருமாலும்உணரா
          வகை நிமிர்ந்துமுடிமேல்
ஏடுலவு திங்கள்மத மத்தம் இதழிச்
          சடை எம் ஈசனிடமாம்
மாடுலவு மல்லிகை குருந்துகொடி
          மாதவி செருந்தி குரவின்
ஊடுலவு புன்னைவிரி தாதுமலி
          சேர் உதவி மாணிகுழியே  9  

மொட்டை அமண் ஆதர்முது தேரர் மதி
          இல்லிகள் முயன்றனபடும்
முட்டைகண் மொழிந்தமொழி கொண்டு அருள்
          செய்யாத முதல்வன் தன் இடமாம்
மட்டைமலி தாழை இள நீர்முதிய
          வாழையில் விழுந்தஅதரில்
ஒட்டமலி பூகம்நிரை தாறுதிர
          வேறுத உதவி மாணிகுழியே.  10  

உந்திவரு தண்கெடிலமோடு புனல்
          சூழ் உதவி மாணிகுழிமேல்
அந்திமதி சூடியஎம் மானை அடி
          சேரும் அணி காழிநகரான்
சந்தம்நிறை தண் தமிழ் தெரிந்து உணரும்
          ஞானசம் பந்தனதுசொல்
முந்தி இசை செய்துமொழி வார்கள்
          உடையார்கள் நெடு வான நிலனே.

திருச்சிற்றம்பலம்