திரு இரும்பை மாகாளம்

            

௨ 

திருஞானசம்பந்தர் சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திரு இரும்பை மாகாளம்
ஊர்	இரும்பை
நாடு	தொண்டை நாடு
ॐசுவாமி	மாகாளேஸ்வர்
ॐஅம்பிகை	குயில்மொழி அம்மை, மதுர சுந்தர நாயகி
பாடியவர்கள்	திருஞானசம்பந்தர் (1)         மண்டு கங்கை (2-117)
ஸ்தல மரம்	புன்னை  மரம்
தீர்த்தம்	மாகாள தீர்த்தம்
பண்	செவ்வழி
குறிப்புகள்	மாகாளர் வழிபட்டது.
பதிக பலன்	பழி நீங்கப் பெறுவர்
வரிசை எண்.	117                                                          32/32

திருச்சிற்றம்பலம்

            
மண்டுகங்கை சடையில்
          கரந்தும் மதிசூடிமான்
கொண்டகையாற் புரம் மூன்று 
          எரித்த குழகன் இடம்
எண் திசையும் புகழ்போய்
          விளங்கும் இரும்பைதன் உள்
வண்டுகீதம் முரல்பொழில்
          சுலாய்நின்ற மாகாளமே.  1  

வேதவித்தாய் வெள்ளைநீறு
          பூசி வினை ஆயின
கோதுவித்தா நீர் எழக்
          கொடிமா மதில் ஆயின
ஏதவித்தா யினதீர்க்கும் 
          இடம் இரும்பைதன் உள்
மாதவத்தோர் மறையோர்
          தொழநின்ற மாகாளமே.  2  

வெந்தநீறும் எலும்பும்
          அணிந்த விடை ஊர்தியான்
எந்தை பெம்மானிடம்எழில்கொள்
          சோலை இரும்பைதன் உள்
கந்தமாய பலவின்
          கனிகள் கமழும்பொழில்
மந்தி ஏறிக் கொணர்ந்து உண்டு 
          உகள்கின்ற மாகாளமே.  3  

நஞ்சு கண்டத்து அடக்கி
          நடுங்கும் மலையான்மகள்
அஞ்ச வேழம் உரித்த
          பெருமான் அமரும் இடம்
எஞ்சல் இல்லாப் புகழ்போய்
          விளங்கும் இரும்பைதன் உள்
மஞ்சில் ஒங்கும் பொழில்சூழ்ந்த
          அழகாய மாகாளமே.  4  

பூசுமாசில் பொடியான்
          விடையான் பொருப்பான்மகள்
கூசஆனை உரித்த
          பெருமான் குறைவெண்மதி
ஈசன் எங்கள் இறைவன்
          இடம்போல் இரும்பைதன் உள்
மாசிலோர்கண் மலர்கொண்டு 
          அணிகின்ற மாகாளமே.  5  

குறைவதாய குளிர்திங்கள்
          சூடிக் குனித்தான்வினை
பறைவதாக்கும் பரமன்
          பகவன் பரந்தசடை
இறைவன்எங்கள் பெருமான்
          இடம்போல் இரும்பைதன் உள்
மறைகள்வல்லார் வணங்கித்
          தொழுகின்ற மாகாளமே.  6  

பொங்குசெங்கண் அரவும்
          மதியும் புரிபுன்சடைத்
தங்கவைத்த பெருமான் என
          நின்றவர் தாழ்விடம்
எங்கும் இச்சை அமர்ந்தான்
          இடம்போல் இரும்பைதன் உள்
மங்குல்தோயும் பொழில்சூழ்ந்த
          அழகாய மாகாளமே.  7  

நட்டத்தோடு நரி ஆடு
          கானத்து எரி ஆடுவான்
அட்டமூர்த்தி அழல்போல்
          ஒருவன் அழகாகவே
இட்டமாக இருக்கும்
          இடம்போல் இரும்பைதன் உள்
வட்டஞ்சூழ்ந்து பணிவார்
          பிணிதீர்க்கும் மாகாளமே.  8  

அட்டகாலன் தனை
          வவ்வினான்அவ் வரக்கன்முடி
எட்டுமற்றும் இருபத்திரண்டும்
          இற ஊன்றினான்
இட்டமாக இருப்பான்
          அவன் போல் இரும்பை தன் உள்
மட்டுவார்ந்த பொழில்சூழ்ந்த
          எழிலாரு மாகாளமே.  9  

அரவம் ஆர்த்தன்று அனல் கங்கை
          ஏந்தி அடியும் முடி
பிரமன்மாலும் அறியாமை
          நின்ற பெரியோனிடம்
குரவமாரும் பொழிற் குயில்கள்
          சேரும் இரும்பைதன் உள்
மருவிவானோர் மறையோர்
          தொழுகின்ற மாகாளமே.  10  

எந்தை எம்மான் இடம் எழில்கொள்
          சோலை இரும்பைதன் உள்
மந்தமாயம் பொழில்சூழ்ந்து 
          அழகாரு மாகாளத்தில்
அந்தம் இல்லா அனல் ஆடுவானை
          அணி ஞானசம்
பந்தன்சொன்ன தமிழ்பாட
          வல்லார்பழி போகுமே.

திருச்சிற்றம்பலம்

திரு பாதிரிப்புலியூர்

  

௨ 

திருஞானசம்பந்தர்  சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திருப் பாதிரிப் புலியூர்
ஊர்	பாடலபுரம், கன்னிவனம், உத்த்ராபுரம் புலிசை, கடைஞாழல்
நாடு	நடு நாடு
ॐசுவாமி	பாடலேஸ்வரர், கரையேற்றும் பிரான்
ॐஅம்பிகை	பெரிய நாயகி, அருந்தவ நாயகி
பாடியவர்கள்	திருஞானசம்பந்தர் (1)         முன்னம் நின்ற (2-121) திருநாவுக்கரசர் (1),         ஈன்றாளுமாய்  (4-94)
ஸ்தல மரம்	பாதிரி  மரம்
தீர்த்தம்	கெடில நதி பிரம்ம தீர்த்தம்
பண்	செவ்வழி
குறிப்புகள்	கல்லை தெப்பமாக பிடித்து கரையேறிய பதி கடைஞாழல் என்ற பெயரே பின்னாளில் கடலூர் என பெயர் பெற்றது வியாக்ரபாதர், உபமன்யு, அகத்தியர் கங்கை அக்கினி மங்கன முனிவர் முதலியோர் வழிபட்டது.
பதிக பலன்	தீயன வந்து சேராது.
வரிசை எண்.	121                                                             18/22

திருச்சிற்றம்பலம்

முன்னம் நின்ற முடக்கால்
          முயற்கு அருள் செய்துநீள்
புன்னைநின்று கமழ்
          பாதிரிப்புலியூர் உளான்
தன்னைநின்று வணங்கும்
          தனைத் தவம் இல்லிகள்
பின்னைநின்ற பிணி
          யாக்கையைப்பெறு வார்களே.  1  

கொள்ளிநக்க பகுவாய
          பேய் கள் குழைந்து ஆடவே
முள்ளிலவம் முதுகாட்டு 
          உறையும்முதல்வன்னிடம்
புள் இனங்கள் பயிலும்
          பாதிரிப் புலியூர்தனை
உள்ள நம்மேல்
          வினை ஆயின ஒழியுங்களே.  2  

மருளின் அல்லார் வழிபாடு
          செய்யும் மழுவாளர்மேல்
பொருளின் அல்லார் பயில்
          பாதிரிப் புலியூர் உளான்
வெருளின்மானின்பிணை
          நோக்கல்செய்து வெறிசெய்தபின்
அருளிஆகத் திடைவைத்து 
          அதுவும் அழகாகவே.  3  

போதினாலும் புகையாலும்
          உய்த்தே அடியார்கள் தாம்
போதினாலே வழிபாடு
          செய்யப் புலியூர்தனுள்
ஆதிநாலும் அவலம்
          இலாதஅடி கள்மறை
ஓதிநாளும் இடும்பிச்சை
          ஏற்று உண்டு உணப்பாலதே.  4  

ஆகநல்லார் அமுது ஆக்க
          உண்டான் அழலைந்தலை
நாகநல்லார் பரவந்நயந்து 
          அங்கரை யார்த்தவன்
போகநல்லார் பயிலும்
          பாதிரிப் புலியூர்தனுள்
பாக நல்லாளொடும் நின்ற
          எம்பர மேட்டியே.  5  

மதியமொய்த்த கதிர்போல்
          ஒளிம் மணற் கானல்வாய்ப்
புதிய முத்தந்திகழ்
          பாதிரிப் புலியூர் எனும்
பதியில் வைக்கப் படும் எந்தை
          தன்பழந் தொண்டர்கள்
குதியுங்கொள்வர் விதியும்
          செய்வர் குழகாகவே.  6  

கொங்கரவப் படு வண்டு 
          அறைகுளிர் கானல்வாய்ச்
சங்கரவப் பறையின்
          ஓலி அவை சார்ந்து எழப்
பொங்கரவம் முயர்
          பாதிரிப் புலியூர்தனுள்
அங்கு அரவம் அரையில்
          அசைத்தானை அடைமினே.  7  

வீக்கம் எழும் இலங்கைக்கு
          இறை விலங்கல்லிடை
ஊக்கம் ஒழிந் தலறவ்
          விரலால் இறை ஊன்றினான்
பூக் கமழும் புனற்
          பாதிரிப் புலியூர்தனை
நோக்கமெ லிந்து அணுகா
          வினை நணுகுங்களே.  8  

அன்னந்தாவும் அணியார்
          பொழின்மணி யார் புன்னை
பொன்னந்தா துசொரி
          பாதிரிப் புலியூர்தனுள்
முன்னம் தாவி அடிமூன்று 
          அளந்தவன் நான்முகன்
தன்னம் தாளுற்று உணராதது 
          ஒர் தவநீதியே.  9  

உரிந்தகூறை உருவத்
          தொடுதெரு வத்து இடைத்
திரிந்து தின்னுஞ் சிறு
          நோன்பரும்பெருந் தேரரும்
எரிந்து சொன்ன இவ் உரைகொள்ளாதே
          எடுத்து ஏத்துமின்
புரிந்து வெண்ணீற்று அண்ணல்
          பாதிரிப் புலியூரையே.  10  

அந்தண்நல் லார் அகன்
          காழியுள் ஞான
சம்பந்தன்நல் லார்பயில்
          பாதிரிப் புலியூர்தனுள்
சந்தமாலைத் தமிழ்பத்து இவை
          தரித்தார் கள்மேல்
வந்துதீயவை  அடையாமையால் 
          வினை மாயுமே.

திருச்சிற்றம்பலம்

திருக்கேதாரம்

         

௨ 

திருஞானசம்பந்தர் சுவாமிகள் அருளிச்செய்த
இரண்டாம்   திருமுறை

தகவல் பலகை	விவரம்
தலம்	திரு கேதாரம்
ஊர் /வேறு பெயர்
நாடு	வட நாடு
ॐசுவாமி	கேதாரேஸ்வரர்
ॐஅம்பிகை	கேதார கெளரி
பாடியவர்கள்	திருஞானசம்பந்தர்(1),         தொண்டர் அஞ்சு (2-114) சுந்தரர் (1)         வாழ்வாது மாயம் இது (7-78)
ஸ்தல மரம்
தீர்த்தம்
பண்	செவ்வழி
குறிப்புகள்	6 மாதங்கள் தேவர்களும் 6 மாதங்கள் மனிதர்களும் வழிபடும் தலம் என சிறப்பு பெற்றது பிருங்கி முனிவர் வண்டு உரோம் தாங்கி ஈசனை மட்டும் வலம் வந்து வணங்கி போற்றிய நெறி கண்டு கேதார விரதம் அனுட்டி த்து உமையம்மை வழிபட்டது
பதிக பலன்	உயர் பதவி/ ஆட்சி பேறு கிடைக்கும்.
வரிசை எண்.	114                                                                  4/5

திருச்சிற்றம்பலம்

தொண்டர் அஞ்சு களிறும் அடக்கிச் சுரும்பார்மலர்
இண்டைகட்டி வழிபாடு செய்யும் இடம் என்பரால்
வண்டுபாட மயில் ஆல மான்கன்று துள்ளவரிக்
கெண்டைபாயச் சுனைநீல மொட்டு அலரும் கேதாரமே.  1  

பாதம் விண்ணோர் பலரும் பரவிப் பணிந்து ஏத்தவே
வேதநான்கும் பதினெட்டு ஆறும் விரித்தார்க்கு இடம்
தாதுவிண்டம்  மது உண்டு மிண்டிவரு வண்டினம்
கீதம்பாட மடமந்தி கேட்டுகளும் கேதாரமே.  2  

முந்திவந்து புரோதாய மூழ்கி முனிகள்பலர்
எந்தைபெம்மான் எனநின்று இறைஞ்சும் இடம் என்பரால்
மந்திபாயச் சரேலச் சொரிந்தும் முரிந்துக்கபூக்
கெந்தம்நாறக் கிளருஞ்சடைஎந்தை கேதாரமே.  3  

உள்ளமிக்கார் குதிரைம் முகத்தார் ஒருகாலர்கள்
எள்கல் இல்லா இமையோர்கள் சேரும் இடம் என்பரால்
பிள்ளைதுள்ளிக் கிளைபயில்வ கேட்டுப் பிரியாதுபோய்க்
கிள்ளையேனற் கதிர்கொணர்ந்து வாய்ப்பெய்யும் கேதாரமே.  4  

ஊழியூழி உணர்வார்கள் வேதத்தின் ஒண் பொருள்களால்
வாழி எந்தை எனவந்து இறைஞ்சும் இடம் என்பரால்
மேழிதாங்கி உழுவார்கள் போலவ்விரை தேரிய
கேழல்பூழ்தி கிளைக்க மணிசிந்துங் கேதாரமே.  5  

நீறுபூசி நிலத்துண்டு நீர்மூழ்கி நீள்வரை தன்மேல்
தேறுசிந்தை உடையார்கள் சேரும் இடம் என்பரால்
ஏறிமாவின் கனியும்பலா வின்இருஞ் சுளைகளும்
கீறிநாளும் முசுக்கிளையொடு உண்டு களுங் கேதாரமே.  6  

மடந்தைபாகத்து அடக்கி மறை ஓதி வானோர்தொழத்
தொடர்ந்த நம்மேல்வினை தீர்க்கநின்றார்க்கு இடம் என்பரால்
உடைந்தகாற்றுக்கு உ யர்வேங்கை பூத்துதிரக் கல்லறைகள்மேல்
கிடந்தவேங்கை சினமா முகஞ் செய்யும் கேதாரமே.  7  

அரவமுந்நீர் அணியிலங்கைக் கோனையரு வரைதனால்
வெருவ ஊன்றி விரலால் அடர்த்தார்க்கு இடம் என்பரால்
குரவம் கோங்கம் குளிர்பிண்டி ஞாழல் சுரபுன்னைமேல்
கிரமமாக வரிவண்டு பண்செய்யும் கேதாரமே.  8  

ஆழ்ந்துகாணார் உயர்ந்து எய்தகில்லார் அலமந்தவர்
தாழ்ந்து தந்தம் முடிசாய நின்றார்க்கு இடம் என்பரால்
வீழ்ந்துசெற்று நிழற்கு இறங்கும் வேழத்தின் வெண்மருப்பினைக்
கீழ்ந்துசிங்கம் குருகு உண்ண முத்து திருங் கேதாரமே.  9  

கடுக்கள் தின்று கழிமீன் கவர்வார்கள் மாசு உடம்பினர்
இடுக்கண் உய்ப்பார் அவர் எய்த ஒண்ணா இடம் என்பரால்
அடுக்க நின்ற இவ் அற உரைகள் கேட்டாங்கு அவர்வினைகளைக்
கெடுக்கநின்ற பெருமான் உறைகின்ற கேதாரமே.  10  

வாய்ந்த செந்நெல் விளைகழனி மல்கும்வயற் காழியான்
ஏய்ந்தநீர்க்கோட்கு இமையோர் உறைகின்ற கேதாரத்தை
ஆய்ந்துசொன்ன அருந்தமிழ்கள் பத்தும் இசை வல்லவர்
வேந்தராகி உலகு ஆண்டு வீடுகதி பெறுவரே.

திருச்சிற்றம்பலம்