திரு கழிப்பாலை

                                                                                     ௨ 

திருஞானசம்பந்தர் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருக்கழிப்பாலை
ஊர்/வேறு பெயர்
நாடு	சோழ (காவிரி வட)
ॐசுவாமி	பால் வண்ண நாதர்
ॐஅம்பிகை	வேத நாயகி
பாடியவர்கள்	சம்பந்தர் (2)     புனல் ஆடியபுன் (2-21)     வெந்த குங்குலியப் புகை (3-44)     அப்பர் (5)     வனபவள வாய் திறந்து (4-006)     நங்கையைப் பாகம் வைத்தார் (4-30)     நெய்தற் குருகுதன் பிள்ளை (4-106)     வண்ணமும் வடிவும் சென்று (5-40)     ஊன் உடுத்தி ஒன்பது வாசல் (6-12) சுந்தரர் (1)         செடியேன் தீவினையில் தடுமாற(7-23)
ஸ்தல மரம்	வில்வம்
தீர்த்தம்	கொள்ளிடம்
பண்	கௌசிகம்
குறிப்புகள்	வால்மீகி முனிவர் வழிபட்டு பேறு பெற்றது
பதிக பலன்	வான்  உலகை ஆள்வர்
வரிசை எண்.	44                                                                   4/63

திருச்சிற்றம்பலம்

வெந்த குங்கிலியப்புகை விம்மவே

கந்தம் நின்று உலவும் கழிப் பாலையார்

அந்தமும் அளவும் அறியாததோர்

சந்த மாலவர்மேவிய சாந்தமே.  1

வான் இலங்க விளங்கும் இளம்பிறை

தான் அலங்கல் உகந்த தலைவனார்

கான் இலங்க வரும் கழிப் பாலையார்

மான லம்மடநோக்குடை யாளொடே.  2

கொடிகொள் ஏற்றினர்கூற்றை உதைத்தனர்

பொடிகொள் மார்பினிற்பூண்டதொர் ஆமையர்

கடிகொள் பூம்பொழில்சூழ்கழிப் பாலையுள்

அடிகள் செய்வன  ஆர்க்கு அறி வொண்ணுமே.  3

பண்ண லம்படவண்டறை கொன்றையின்

தண்ண லங்கல் உகந்த தலைவனார்

கண்ண லங்கவருங்கழிப் பாலையுள்

அண்ணல் எம் கடவுள் அவன் நல்லனே.  4

ஏரி னார் உலகத்திமை யோரொடும்

பாரி னார் உடனேபர வப்படும்

காரி னார்பொழில்சூழ்கழிப் பாலை எம்

சீரி னார் கழலே சிந்தை செய்ம்மினே.  5

துள்ளும் மான்மறி அங்கையில் ஏந்தியூர்

கொள்வ னாரிடு வெண்தலை யிற்பலி

கள்வ னார் உறையுன் கழிப் பாலையை

உள்ளு வார்வினையாயின ஓயுமே.  6

மண்ணி னார்மலிசெல்வமும் வானமும்

எண்ணி நீர் இனிது ஏத்துமின் பாகமும்

பெண்ணி னார்பிறை நெற்றியொடு உற்றமுக்

கண்ணி னார் உறையும் கழிப் பாலையே.  7

இலங்கை மன்னனை  ஈரைந்து இரட்டிதோள்

துலங்க ஊன்றிய தூமழு வாளினார்

கலங்கள் வந்துலவும் கழிப் பாலையை

வலங் கொள்வார் வினை ஆயின மாயுமே.  8

ஆட்சி யால்அலரானொடு மாலுமாய்த்

தாட்சி யால் அறியாது தளர்ந்தனர்

காட்சி யால் அறியான் கழிப் பாலையை

மாட்சி யால் தொழுவார் வினை மாயுமே.  9

செய்ய நுண்துவர் ஆடையி னாரொடு

மெய்யின் மாசுபிறக்கிய வீறிலாக்

கையர் கேண்மை யெனோ கழிப்பாலை எம்

ஐயன் சேவடியே அடைந்து உய்ம்மினே.  10

அந்தண் காழி  அருமறை ஞானசம்

பந்தன் பாய்புனல் சூழ் கழிப் பாலையைச்

சிந்தை யால் சொன்ன செந்தமிழ் வல்லவர்

முந்தி வான் உலகு ஆடல் முறைமையே.  11

திருச்சிற்றம்பலம்

திரு மழபாடி

     

௨ 

திருஞானசம்பந்தர் சுவாமிகள்   அருளிச்செய்த
மூன்றாம் திருமுறை 

தகவல் பலகை	விவரம்
தலம்	திரு மழபாடி
பிற பெயர்கள்
நாடு	சோழ நாடு (வ)
ॐசுவாமி	வைத்தியநாதர், மழுவாட்டீஸ்வரர், வச்சிரதம்பேஸ்வரர்,
ॐஅம்பிகை	அழகம்மை, சுந்தராம்பிகை
பாடியவர்கள்	சம்பந்தர் (3)         களையும் வல்வினை  (2-09)         காளையார் வண்டு இனம் (3-028)         அங்கையார் அழல் அன்ன (3-048) அப்பர் (2)         நீறேறு மேனி உடையான் (6-039)         அலையடுத்த பெருங்கடல் (6-040) சுந்தரர் (1)         பொன்னார் மேனியனே (7-24)
ஸ்தல மரம்	பனை மரம்
தீர்த்தம்	இலக்குமி  தீர்த்தம்., கொள்ளிடம்
பண்	கௌசிகம்
குறிப்புகள்	மார்க்கண்டேயரின் பொருட்டு இறைவன் மழு ஏந்தி நடம் புரிந்த தலம்  திருமால், இந்திரன் வழிபட்ட தலம்  நந்தி தேவர் மணம் முடித்த திருத்தலம்  மழபாடிக்கு வர மறந்தனையோ என அழைத்த திருத்தலம்
பதிக பலன்	பாவம் விலகும். துன்பம் அற்ற வாழ்வு கிட்டும்
வரிசை எண்.	48                                                      54/63

திருச்சிற்றம்பலம் 

அங்கை யார் அழலன் அழகார்சடைக்
கங்கை யான்கடவுள் இடம்  மேவிய
மங்கை யான் உறையும்மழ பாடியைத்
தம் கை யால் தொழுவார் தகவாளரே.  1

விதியு மாம்விளை வாம் ஒளி யார்ந்ததோர்
கதியு மாம் கசி வாம் வசியாற்றமா
மதியு மாம் வலியாம் மழ பாடியுள்
நதியந் தோய்சடை நாதன்நற் பாதமே.  2

முழவி னான்முதுகாடு உறை பேய்க்கணக்
குழுவி னான்குலவுங்கையில் ஏந்திய
மழுவி னான் உறையும்மழ பாடியைத்
தொழுமின் உம் துயர் ஆனவை தீரவே.  3

கலையி னான்மறையான்கதி யாகிய
மலையி னான்மருவார்புரம்  மூன்று எய்த
சிலையி னான்சேர் திருமழ பாடியைத்
தலையி னால் வணங்கத் தவம் ஆகுமே.  4

நல்வி னைப் பயன் நான்மறையின் பொருள்
கல்வி யாய கருத்தன் உருத்திரன்
செல்வன் மேய திருமழ பாடியைப்
புல்கி ஏத்தும் அது புகழ் ஆகுமே.  5

நீடி னார் உலகுக்கு உயிராய் நின்றான்
ஆடினான் எரி கானிடை மாநடம்
பாடினார் இசை மாமழ பாடியை
நாடி னார்க்கு இல்லை நல்குரவு ஆனவே.  6

மின்னி னார் இடையாள் ஒரு பாகமாய்
மன்னினான் உறை மாமழ பாடியைப்
பன்னினார் இசையால் வழிபாடுசெய்
துன்னி னார்வினையாயின ஓயுமே.  7

தென் இலங்கையர் மன்னன் செழுவரை
தன்னில் அங்கு அடர்த்து அருள் செய்தவன்
மன்னி லங்கியமாமழ பாடியை
உன்னில் அங்க உறு பிணி இல்லையே.  8

திருவின் நாயகனும் செழுந் தாமரை
மருவினானும் தொழத் தழல் மாண்பமர்
உருவினான் உறையும் மழ பாடியைப்
பரவி னார் வினைப் பற்று அறுப்பார்களே.  9

நலியும் நன்று அறியாச் சமண் சாக்கியர்
வலிய சொல்லினும் மாமழ பாடியுள்
ஒலி செய்வார் கழலான் திறம் உள்கவே
மெலியும் நம்முடன் மேல்வினை ஆனவே.  10

மந்தம் உந்து பொழில்மழ பாடியுள்
எந்தை சந்தம் இனிது உகந்து ஏத்துவான்
கந்த மார் கடற்காழியுள் ஞானசம்
பந்தன் மாலை வல்லார்க்கு இல்லை பாவமே.

திருச்சிற்றம்பலம்

பொது: காதலாகி கசிந்து

    

௨ 

திருஞானசம்பந்தர் சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	பொது
பாடியவர்கள்	திருஞானசம்பந்தர்(1)        காதல் ஆகி  (3-049)
பண்	கௌசிகம்
குறிப்புகள்	இது பஞ்சாக்கர - நமசிவாய பதிகம்   என போற்றப் படுகிறது  தினசரி படனத்திற்குரியது.
பதிக பலன்	பந்த பாசம் அறுக்க வல்லவர் ஆவர்
வரிசை எண்.	049

திருச்சிற்றம்பலம்

காதல் ஆகிக் கசிந்து கண்ணீர் மல்கி
ஓதுவார் தமை நன்னெறிக்கு உய்ப்பது
வேதம் நான்கினும் மெய்ப்பொருல் ஆவது
நாதன் நாமம் நமச்சி வாயவே.  1  

நம்புவார் அவர் நாவின் நவிற்றினால்
வம்பு நாண்மலர் வார்மது ஒப்பது
செம்பொனார் திலகம் உலகுக்கு எலாம்
நம்பன் நாமம் நமச்சி வாயவே.  2  

நெக்குள் ஆர்வம்  மிகப்பெருகிந் நினைந்து
அக்கு மாலை கொடு அம் கையில் எண்ணுவார்
தக்க வானவராத் தகுவிப்பது
நக்கன் நாமம் நமச்சி வாயவே.  3  

இயமன் தூதரும் அஞ்சுவர் இன்சொலால்
நயம் வந்து ஒதவல்லார்தமை நண்ணினால்
நியமம்  தான் நினை வார்க்கு இனியான் நெற்றி
நயனன், நாமம் நமச்சி வாயவே.  4  

கொல்வாரேனும் குணம்பல நன்மைகள்
இல்லாரேனும் இயம்புவர் ஆயிடின்
எல்லாத் தீங்கையும் நீங்குவர் என்பரால்
நல்லார் நாமம் நமச்சி வாயவே.  5  

மந்தரம் ஆன பாவங்கள் மேவிய
பந்தனை அவர் தாமும் பகர்வரேல்
சிந்தும் வல்வினை செல்வமும் மல்குமால்
நந்தி நாமம் நமச்சி வாயவே.  6  

நரகம் ஏழ்புக நாடினர் ஆயினும்
உரைசெய் வாயினர் ஆயின் உருத்திரர்
விரவியே புகுவித்திடும் என்பரால்
வரதன் நாமம்  நமச்சி வாயவே.  7  

இலங்கை மன்னன் எடுத்த அடுக்கல்மேல்
தலம் கொள் கால்விரல் சங்கரன் ஊன்றலும்
மலங்கி வாய்மொழி செய்தவன் உய்வகை
நலம் கொள் நாமம் நமச்சி வாயவே.  8  

போதன் போதன கண்ணனும் அண்ணல்தன்
பாதம் தான்முடி நேடிய பண்பராய்
யாதும் காண்பது அரிதாகி அலந்தவர்
ஓதும் நாமம் நமச்சி வாயவே.  9  

கஞ்சி மண்டையர் கையில் உண்கையர்கள்
வெஞ்சொல் மிண்டர் விரவிலர் என்பரால்
விஞ்சை அண்டர்கள் வேண்ட அமுதுசெய்
நஞ்சு உண் கண்டன் நமச்சி வாயவே.  10  

நந்தி நாமம் நமச்சிவாய எனும்
சந்தையால் தமிழ் ஞான சம்பந்தன் சொல்
சிந்தையால் மகிழ்ந்து ஏத்த வல்லார் எலாம்
பந்த பாசம் அறுக்க வல்லார்களே.  11

திருச்சிற்றம்பலம்

திரு ஆலவாய்

                 

௨ 

திருஞானசம்பந்தர்  சுவாமிகள் அருளிச்செய்த
மூன்றாம்   திருமுறை

தகவல் பலகை	விவரம்
தலம்	திருஆலவாய்
ஊர்/வேறுபெயர்	மதுரை, கூடல் நகர், கடம்ப வனம், சிவராசதானி
நாடு	பாண்டிய
ॐசுவாமி	சோமசுந்தரக்கடவுள், சொக்கநாதர்
ॐஅம்பிகை	மீனாட்சி, அங்கயர்கன்னி
பாடியவர்கள்	திருஞானசம்பந்தர்(9)         நீலமாமிடற் (1:94)         மந்திரமாவது நீறு (2:66)         மானின் நேர் விழி (3:39)         காட்டுமாவது (3:47)         செய்யனே திருஆலவாய் (3:51)         வீடல் ஆலவாய் (3:52)         வேத வேள்வியை (3:108)         ஆல நீழல் உகந்த (3:115)         மங்கையர்க்கரசி (3:120)          திருநாவுக்கரசர்(2)         வேதியா வேத கீதா(4:62)         முளைத்தானை முன்னே(6:19)
ஸ்தல மரம்	கடம்பு
தீர்த்தம்	பொற்றாமரைக்குளம்
பண்	கௌசிகம்
குறிப்புகள்	பாணபத்திரர் வாயிலாக சேரமான் பெருமாளுக்கு திருமுகப்பாசுரம்  அளித்த பதி. சமணர்களை வாதம் செய்து, திருஞானசம்பந்தர் சைவத்தை நிலைநாட்டிய திருத்தலம்  பஞ்ச சபைகளுள் ஒன்று. இது வெள்ளி அம்பலம்.   பாண்டிய மன்னனுக்காக கால் மாறி ஆடிய தலம்  பூலோக கைலாசம் என போற்றப் பெறும் தலம்   பாண்டியனின் வெப்பு நோய் நீங்க பெற்றதும் திருமுன் வணங்கி ஏத்தி அருளிய பதிகம்
பதிகப் பலன்	தீயவை யாவும் நீங்கப் பெறுவர்
வரிசை எண்.	52                                     1/14

திருச்சிற்றம்பலம்

வீடல் ஆலவாயிலாய் விழுமியார்கள் நின்கழல்
பாடல் ஆல வாயிலாய் பரவநின்ற பண்பனே
காடல் ஆல வாயிலாய் கபாலிநீள் கடிம்மதில்
கூடல் ஆல வாயிலாய் குலாயதென்ன கொள்கையே.  1  

பட்டிசைந்த அல்குலாள் பாவையாள் ஓர் பாகமா
ஒட்டிசைந்தது அதன்றியும் உச்சியாள் ஒருத்தியாக்
கொட்டிசைந்த ஆடலாய் கூடல்ஆல வாயிலாய்
எட்டிசைந்த மூர்த்தியாய் இருந்தவாறு இது  என்னையே.  2  

குற்றம்நீ குணங்கள்நீ கூடல்ஆல வாயிலாய்
சுற்றம்நீ பிரானும்நீ தொடர்ந்து இலங்கு சோதிநீ
கற்றநூற் கருத்தும்நீ அருத்தம் இன்பம் என்று இவை
முற்றும்நீ புகழ்ந்து முன் உரைப்பது என் முகம்மனே.  3  

முதிருநீர்ச் சடைமுடிமுதல்வநீ முழங்கழல்
அதிரவீசி ஆடுவாய் அழகன்நீ புயங்கன்நீ
மதுரன்நீ மணாளன்நீ மதுரை ஆலவாயிலாய்
சதுரன்நீ சதுர்முகன் கபாலம் ஏந்து சம்புவே.  4  

கோலமாய நீள்மதிற் கூடல்ஆல வாயிலாய்
பாலனாய தொண்டுசெய்து பண்டும் இன்றும் உன்னையே
நீலமாய கண்டனே நின்னை அன்றி நித்தலும்
சீலமாய சிந்தையில் தேர்வதில்லை தேவரே.  5  

பொன்தயங்கு இலங்கு ஒளிந்நலங்குளிர்ந்த புன்சடை
பின்தயங்க ஆடுவாய் பிஞ்ஞகா பிறப்பிலி
கொன்றையம் முடியினாய்கூடல்ஆல வாயிலாய்
நின் தயங்கி ஆடலே நினைப்பதே நியமமே.  6  

ஆதி அந்தம் ஆயினாய் ஆலவாயில் அண்ணலே
சோதி அந்தம் ஆயினாய் சோதியுள் ஓர் சோதியாய்
கீதம்வந்த வாய்மையால் கிளர்தருக்கி னார்க்கு அல்லால்
ஓதிவந்த வாய்மையால் உணர்ந்து உரைக்கல் ஆகுமே.  7  

கறை இலங்கு கண்டனேகருத்திலாக் கருங்கடல்
துறை இலங்கை மன்னனைத் தோள் அடர ஊன்றினாய்
மறை இலங்கு பாடலாய் மதுரை ஆல வாயிலாய்
நிறை இலங்கு நெஞ்சினால் நினைப்பதே நியமமே.  8  

தாவண அவ் விடையினாய் தலைமையாக நாள் தொறும்
கோவணவ் உடையினாய் கூடல் ஆலவாயிலாய்
தீவணம் மலர்மிசைத் திசைமுகனும் மாலும்நின்
தூவணம் அளக்கிலார் துளக்கம் எய்து வார்களே.  9  

தேற்றமில் வினைத்தொழில் தேரரும்சமணரும்
போற்றி இசைத்து நின்கழற் புகழ்ந்துபுண்ணியங்கொளார்
கூற்று உதைத்த தாளினாய் கூடல் ஆலவாயிலாய்
நால் திசைக்கும் மூர்த்தி ஆகி நின்றதென்ன நன்மையே.  10  

போயநீர் வளங்கொளும் பொருபுனற் புகலியான்
பாயகேள்வி ஞானசம்பந்தன்நல்ல பண்பினால்
ஆயசொல்லின் மாலைகொண்ட ஆலவாயில் அண்ணலைத்
தீயதீர எண்ணுவார்கள் சிந்தையாவர் தேவரே.

திருச்சிற்றம்பலம்

திரு ஆலவாய்

                 

௨ 

திருஞானசம்பந்தர்  சுவாமிகள் அருளிச்செய்த
மூன்றாம்   திருமுறை

தகவல் பலகை	விவரம்
தலம்	திருஆலவாய்
ஊர்/வேறுபெயர்	மதுரை, கூடல் நகர், கடம்ப வனம், சிவராசதானி
நாடு	பாண்டிய
ॐசுவாமி	சோமசுந்தரக்கடவுள், சொக்கநாதர்
ॐஅம்பிகை	மீனாட்சி, அங்கயர்கன்னி
பாடியவர்கள்	திருஞானசம்பந்தர்(9)         நீலமாமிடற் (1:94)         மந்திரமாவது நீறு (2:66)         மானின் நேர் விழி (3:39)         காட்டுமாவது (3:47)         செய்யனே திருஆலவாய் (3:51)         வீடல் ஆலவாய் (3:52)         வேத வேள்வியை (3:108)         ஆல நீழல் உகந்த (3:115)         மங்கையர்க்கரசி (3:120)          திருநாவுக்கரசர்(2)         வேதியா வேத கீதா(4:62)         முளைத்தானை முன்னே(6:19)
ஸ்தல மரம்	கடம்பு
தீர்த்தம்	பொற்றாமரைக்குளம்
பண்	கௌசிகம்
குறிப்புகள்	பாணபத்திரர் வாயிலாக சேரமான் பெருமாளுக்கு திருமுகப்பாசுரம்  அளித்த பதி. சமணர்களை வாதம் செய்து, திருஞானசம்பந்தர் சைவத்தை நிலைநாட்டிய திருத்தலம்  பஞ்ச சபைகளுள் ஒன்று. இது வெள்ளி அம்பலம்.   பாண்டிய மன்னனுக்காக கால் மாறி ஆடிய தலம்  பூலோக கைலாசம் என போற்றப் பெறும் தலம்
	கடன் தொல்லை நீங்க
வரிசை எண்.	51                                     30/127

திருச்சிற்றம்பலம்

செய்ய னேதிரு ஆலவாய் மேவிய
ஐயனே அஞ்சல் என்று அருள் செய் எனைப்
பொய்யராம் அமணர் கொளுவும் சுடர்
பையவே சென்று பாண்டியற்கு ஆகவே.  1  

சித்தனே திரு ஆலவாய் மேவிய
அத்தனே அஞ்சல் என்று  அருள் செய் எனை
எத்தராம் அமணர் கொளுவும் சுடர்
பத்திமன் தென்னன் பாண்டியற்கு ஆகவே.  2  

தக்கன் வேள்வி தகர்த்து அருள் ஆலவாய்ச்
சொக்கனே அஞ்சல் என்று அருள் செய் எனை
எக்கராம் அமணர் கொளுவும் சுடர்
பக்கமே சென்று பாண்டியற்கு ஆகவே.  3  

சிட்டனே திரு ஆலவாய் மேவிய
அட்டமூர்த்தியனே அஞ்சல் என்று அருள்
துட்டராம் அமணர் கொளுவும் சுடர்
பட்டிமன் தென்னன் பாண்டியற்கு ஆகவே.  4  

நண்ணலார் புரம் மூன்று எரி ஆலவாய்
அண்ணலே அஞ்சல் என்று அருள் செய் எனை
எண்ணிலா அமணர் கொளுவும் சுடர்
பண்ணியல் தமிழ்ப் பாண்டியற்கு ஆகவே.  5  

தஞ்சம் என்று உன் சரண் புகுந்தேனையும்
அஞ்சல் என்று அருள் ஆலவாய் அண்ணலே
வஞ்சம் செய்து  அமணர் கொளுவும் சுடர்
பஞ்சவன் தென்னன் பாண்டியற்கு ஆகவே.  6  

செங்கண் வெள்விடையாய் திரு ஆலவாய்
அங்கணா அஞ்சல் என்று அருள் செய் எனைக்
கங்குலார் அமண் கையர் இடும் கனல்
பங்கமில் தென்னன் பாண்டியற்கு ஆகவே.  7  

தூர்த்தன் வீரம் தொலைத்து அருள் ஆலவாய்
ஆத்தனே அஞ்சல் என்று அருள் செய் எனை
ஏத்திலா அமணர் கொளுவும் சுடர்
பார்த்திவன் தென்னன் பாண்டியற்கு ஆகவே.  8  

தாவினான் அயன்தான் அறியா வகை
மேவினாய் திரு ஆலவா யாய் அருள்
தூவிலா அமணர் கொளுவும் சுடர்
பாவினான் தென்னன் பாண்டியற்கு ஆகவே.  9  

எண் திசைக்கு எழில் ஆலவாய் மேவிய
அண்டனே அஞ்சல் என்று அருள் செய் எனைக்
குண்டராம் அமணர் கொளுவும்  சுடர்
பண்டிமன் தென்னன் பாண்டியற்கு ஆகவே.  10  

அப்பன் ஆலவாய் ஆதி அருளினால்
வெப்பம்  தென்னவன் மேலுற மேதினிக்கு
ஒப்ப ஞானசம்பந்தன் உரை பத்தும்
செப்ப வல்லவர் தீது இலாச் செல்வரே.

திருச்சிற்றம்பலம்

திரு ஆலவாய்

                

௨ 

திருஞானசம்பந்தர்  சுவாமிகள் அருளிச்செய்த
மூன்றாம்   திருமுறை

தகவல் பலகை	விவரம்
தலம்	திருஆலவாய்
ஊர்/வேறுபெயர்	மதுரை, கூடல் நகர், கடம்ப வனம், சிவராசதானி
நாடு	பாண்டிய
ॐசுவாமி	சோமசுந்தரக்கடவுள், சொக்கநாதர்
ॐஅம்பிகை	மீனாட்சி, அங்கயர்கன்னி
பாடியவர்கள்	திருஞானசம்பந்தர்(9)         நீலமாமிடற் (1:94)         மந்திரமாவது நீறு (2:66)         மானின் நேர் விழி (3:39)         காட்டுமாவது (3:47)         செய்யனே திருஆலவாய் (3:51)         வீடல் ஆலவாய் (3:52)         வேத வேள்வியை (3:108)         ஆல நீழல் உகந்த (3:115)         மங்கையர்க்கரசி (3:120)          திருநாவுக்கரசர்(2)         வேதியா வேத கீதா(4:62)         முளைத்தானை முன்னே(6:19)
ஸ்தல மரம்	கடம்பு
தீர்த்தம்	பொற்றாமரைக்குளம்
பண்	கௌசிகம்
குறிப்புகள்	பாணபத்திரர் வாயிலாக சேரமான் பெருமாளுக்கு திருமுகப்பாசுரம்  அளித்த பதி. சமணர்களை வாதம் செய்து, திருஞானசம்பந்தர் சைவத்தை நிலைநாட்டிய திருத்தலம்  பஞ்ச சபைகளுள் ஒன்று. இது வெள்ளி அம்பலம்.   பாண்டிய மன்னனுக்காக கால் மாறி ஆடிய தலம்  பூலோக கைலாசம் என போற்றப் பெறும் தலம்
	பழி நீங்கப் பெறலாம்
வரிசை எண்.	47                                     30/127

திருச்சிற்றம்பலம்

காட்டு மாவது உரித்து  உரி போர்த்துடல்
நாட்ட மூன்றுடையாயுரை செய்வனான்
வேட்டு வேள்வி செய்யா அமண் கையரை
ஓட்டி வாது செயத் திரு உள்ளமே.  1  

மத்த யானையின் ஈருரி மூடிய
அத்த னேயணி ஆலவா யாய்பணி
பொய்த்த வன்றவ வேடத்த ராஞ்சமண்
சித்த ரையழிக் கத்திரு உள்ளமே.  2  

மண்ணகத்திலும் வானிலும் எங்குமாம் 
திண்ண கத்திரு ஆலவா யாய் அருள்
பெண்ண கத்து எழிற் சாக்கியப் பேய் அமண்
தெண்ணர் கற்பழிக்கத் திரு உள்ளமே.  3  

ஓதி ஓத்து அறியா அமண் ஆதரை
வாதில் வென்று அழிக்கத் திரு உள்ளமே
ஆதியே திரு ஆலவாய் அண்ணலே
நீதி யாக நினைந்து அருள் செய்திடே.  4  

வைய மார் புகழாய் அடியார் தொழும்
செய்கையார் திரு ஆலவாயாய் செப்பாய்
கையில் உண்டு உழலும் அமண் கையரைப்
பைய வாது செயத் திரு உள்ளமே.  5  

நாறு சேர்வயல் தண்டலை மிண்டிய
தேறலார் திரு ஆலவாயாய் செப்பாய்
வீறிலாத் தவமோட்டு அமண் வேடரைச்
சீறி வாது செயத் திரு உள்ளமே.  6  

பண்டு அடித்தவத்தார்பயில் வாற்தொழும் 
தொண்ட ருக்கு எளியாய் திரு ஆலவாய்
அண்ட னே அமண் கையரை வாதினில்
செண்டு அடித்து உளறத் திரு உள்ளமே.  7  

அரக்கன் தான் கிரியேற்றவன் தன்முடிச்
செருக்கினைத் தவிர்த்தாய் திரு ஆலவாய்ப்
பரக்கும் மாண்புடை யாய் அமண் பாவரைக்
கரக்க வாது செயத் திரு உள்ளமே.  8  

மாலும் நான்முகனும் அறி யாநெறி
ஆல வாய் உறையும் அண்ணலே பணி
மேலை வீடு உணரா வெற்ற ரையரைச்
சால வாது செயத்திரு உள்ளமே.  9  .

கழிக்க ரைப்படு மீன்கவர் வாரமண்
அழிப்ப ரை அழிக்கத் திரு உள்ளமே
தெழிக்கும் பூம்புனல் சூழ்திரு ஆலவாய்
மழுப்ப டை உடை மைந்தனே நல்கிடே.  10  

செந்து எனா முரலும் திரு ஆலவாய்
மைந்த னே என்று வல் அமண் ஆசு அறச்
சந்த மார்தமிழ் கேட்ட மெய்ஞ்ஞான 
சம்பந்தன் சொற் பகரும் பழி நீங்கவே.

திருச்சிற்றம்பலம்