திரு கழிப்பாலை

                                                                                      ௨ 

திருநாவுக்கரசர்  அருளிச்செய்த
நான்காம்  திருமுறை

தகவல் பலகை	விவரம்
தலம்	திருக்கழிப்பாலை
ஊர்/வேறு பெயர்
நாடு	சோழ (காவிரி வட)
ॐசுவாமி	பால் வண்ண நாதர்
ॐஅம்பிகை	வேத நாயகி
பாடியவர்கள்	சம்பந்தர் (2)     புனல் ஆடியபுன் (2-21)     வெந்த குங்குலியப் புகை (3-44)     அப்பர் (5)     வனபவள வாய் திறந்து (4-006)     நங்கையைப் பாகம் வைத்தார் (4-30)     நெய்தற் குருகுதன் பிள்ளை (4-106)     வண்ணமும் வடிவும் சென்று (5-40)     ஊன் உடுத்தி ஒன்பது வாசல் (6-12) சுந்தரர் (1)         செடியேன் தீவினையில் தடுமாற(7-23)
ஸ்தல மரம்	வில்வம்
தீர்த்தம்	கொள்ளிடம்
பண்	காந்தாரம்
குறிப்புகள்	வால்மீகி முனிவர் வழிபட்டு பேறு பெற்றது
பதிக பலன்	திருவருள் சித்திக்கும்.
வரிசை எண்.	06                                                                   4/63

திருச்சிற்றம்பலம்

வனபவள வாய்திறந்து வானவர்க்கும் 

          தான் அவனே என்கின் றாளாற்

சினபவளத் திண்டோ ள்மேற் சேர்ந்து இலங்கு 

          வெண்ணீற்றன் என்கின் றாளால்

அனபவள மேகலையோடு அப்பாலைக் 

          கப்பாலான் என்கின் றாளால்

கனபவளம் சிந்தும் கழிப்பாலைச் 

          சேர்வானைக் கண்டாள் கொல்லோ.  1

வண்டு உலவு கொன்றை வளர்புன் 

          சடையானே என்கின் றாளால்

விண்டலர்ந்து நாறுவதோர் வெள்ளெருக்க 

          நாண்மலர் உண்டு என்கின் றாளால்

உண்டயலே தோன்றுவதோர் உத்தரியப் 

          பட்டு உடையன் என்கின் றாளால்

கண்டயலே தோன்றும் கழிப்பாலைச் 

          சேர்வானைக் கண்டாள் கொல்லோ.  2

பிறந்திளைய திங்கள் எம் பெம்மான் 

          முடிமேலது என்கின் றாளால்

நிறங்கிளருங் குங்குமத்தின் மேனி 

          அவன்நிறமே என்கின் றாளால்

மறங்கிளர்வேற் கண்ணாள் மணிசேர் 

          மிடற்றவனே என்கின் றாளால்

கறங்கோத மல்கும் கழிப்பாலைச் 

          சேர்வானைக் கண்டாள் கொல்லோ.  3

இரும்பார்ந்த சூலத்தன் ஏந்தியோர் 

          வெண்மழுவன் என்கின் றாளால்

சுரும்பார் மலர்க்கொன்றைச் சுண்ண

          வெண்ணீற்றவனே என்கின் றாளால்

பெரும்பாலன் ஆகியோர் பிஞ்ஞக 

          வேடத்தன் என்கின் றாளால்

கரும்பானல் பூக்கும் கழிப்பாலைச் 

          சேர்வானைக் கண்டாள் கொல்லோ.  4

பழியிலான் புகழுடையன் பால்நீற்றன் 

          ஆனேற்றன் என்கின் றாளால்

விழியுலாம் பெருந்தடங்கண் இரண்டல்ல 

          மூன்று உளவே என்கின் றாளால்

சுழியுலாம் வருகங்கை தோய்ந்த 

          சடையவனே என்கின் றாளாற்

கழியுலாஞ் சூழ்ந்த கழிப்பாலைச் 

          சேர்வானைக் கண்டாள் கொல்லோ.  5

பண்ணார்ந்த வீணை பயின்ற 

          விரலவனே என்கின் றாளால்

எண்ணார் புரம் எரித்த எந்தை 

          பெருமானே என்கின் றாளால்

பண்ணார் முழவதிரப் பாடலொடு 

          ஆடலனே என்கின் றாளால்

கண்ணார் பூஞ்சோலைக் கழிப்பாலைச் 

          சேர்வானைக் கண்டாள் கொல்லோ.  6

முதிரும் சடைமுடிமேல் மூழ்கும் 

          இளநாகம் என்கின் றாளால்

அதுகண்டு அதன் அருகே தோன்றும் 

          இளமதியம் என்கின் றாளால்

சதுர்வெண் பளிக்குக் குழைகாதின் 

          மின்னிடுமே என்கின் றாளால்

கதிர்முத்தம் சிந்தும் கழிப்பாலைச் 

          சேர்வானைக் கண்டாள் கொல்லோ.  7

ஓரோதம் ஓதி உலகம் 

          பலிதிரிவான் என்கின் றாளால்

நீரோதம் ஏற நிமிர்புன் 

          சடையானே என்கின் றாளால்

பாரோத மேனிப் பவளம் 

          அவன் நிறமே என்கின் றாளால்

காரோத மல்கும் கழிப்பாலைச் 

          சேர்வானைக் கண்டாள் கொல்லோ.  8

வானுலாம் திங்கள் வளர்புன் 

          சடையானே என்கின் றாளால்

ஊனுலாம் வெண்தலைகொண்டு ஊரூர் 

          பலிதிரிவான் என்கின் றாளால்

தேனுலாம்  கொன்றை திளைக்கும்

          திருமார்பன் என்கின் றாளால்

கானுலாம் சூழ்ந்த கழிப்பாலைச் 

          சேர்வானைக் கண்டாள் கொல்லோ.  9

அடர்ப்பரிய இராவணனை அருவரைக்கீழ் 

          அடர்த்தவனே என்கின் றாளால்

சுடர்ப்பெரிய திருமேனிச் சுண்ண

          வெண்ணீற்றவனே என்கின் றாளால்

மடற்பெரிய ஆலின்கீழ் அறம்நால்வர்க்கு

          அன்று உரைத்தான் என்கின் றாளால்

கடற்கருவி சூழ்ந்த கழிப்பாலைச் 

          சேர்வானைக் கண்டாள் கொல்லோ.  10

திருச்சிற்றம்பலம்

திரு வெண்காடு

                                                                                           ௨ 

திருஞானசம்பந்தர்  சுவாமிகள்  அருளிச்செய்த
இரண்டாம் திருமுறை

தகவல் பலகை	விவரம்
தலம்	திருவெண்காடு
ஊர்/வேறு பெயர்
நாடு	சோழ (காவிரி வட)
ॐசுவாமி	சுவேதாரண்யேஸ்வரர்
ॐஅம்பிகை	பிரம்ம வித்யா நாயகி
பாடியவர்கள்	சம்பந்தர்   (3)         கண் காட்டும் நுதலானும்(2-48)         உண்டாய் நஞ்சை (2-61)         மந்திர மறையவை (3-15) அப்பர் (2)         பண் காட்டிப்படி (5-49)         தூண்டு சுடர்மேனி(6-35) சுந்தரர் (1)         படம் கொள் நாகம் (7-06)
ஸ்தல மரம்	வட ஆலமரம்
தீர்த்தம்	முகுளம்
பண்	சீகாமரம்
குறிப்புகள்	இந்திரன், ஐராவதம் வழிபட்டது  தீர்த்தம் மகிமை உடையது  பிள்ளைப் பேறு வாய்க்கும் தலம் என்று பெயர் பெற்றது
பதிக பலன்	வினை நீங்கும்,
வரிசை எண்.	61                                                          11/63

திருச்சிற்றம்பலம்

உண்டாய் நஞ்சை உமையோர்

          பங்கா என்று உள்கித்

தொண்டாய்த் திரியும் அடியார்

          தங்கள் துயரங்கள்

அண்டா வண்ணம் அறுப்பான்

          எந்தை ஊர்போலும்

வெண் தாமரை மேல் கருவண்டு 

          யாழ்செய் வெண்காடே.  1

நாதன் நம்மை ஆள்வான்

          என்று நவின்று ஏத்திப்

பாதம் பன்னாள் பணியும்

          அடியார் தங்கள்மேல்

ஏதம் தீர இருந்தான்

          வாழும் ஊர்போலும்

வேதத் தொலியால் கிளிசொல்

          பயிலும் வெண்காடே.  2

தண்முத்து அரும்பத் தடமூன்று 

          உடையான் தனை உன்னிக்

கண்முத்து அரும்பக் கழல் 

          சேவடிகை தொழுவார்கள்

உண்முத்து அரும்ப உவகை

          தருவான் ஊர்போலும்

வெண்முத்து  அரும்பிப்  புனல்வந்து 

          அலைக்கும் வெண்காடே.  3

நரையார் மூப்பினை குறிக்கும் நரை முடி வந்து நாளும்

          குறுகி நணுகாமுன்

உரையால் வேறா 

          உள்குவார்கள் உள்ளத்தே

கரையா வண்ணம் கண்டான்

          மேவும் ஊர்போலும்

விரையார் கமலத்து அன்னம்

          மருவும் வெண்காடே.  4

பிள்ளைப் பிறையும் புனலும்

          சூடும் பெம்மான் என்று 

உள்ளத்து உள்ளித் தொழுவார்

          தங்கள் உறுநோய்கள்

தள்ளிப் போக அருளும்

          தலைவன் ஊர்போலும்

வெள்ளைச் சுரிசங்கு உலவித்

          திரியும் வெண்காடே.  5

ஒளிகொள் மேனி உடையாய்

          உம்ப ராளீ என்று

அளிய ராகி அழுதுற்று 

          ஊறும் அடியார்கட்கு

எளியான் அமரர்க்கு அரியான்

          வாழும் ஊர்போலும்

வெளிய உருவத்து ஆனை

          வணங்கும் வெண்காடே.  6

கோள்வித் தனைய கூற்றம்

          தன்னைக் குறிப்பினால்

மாள்வித்தவனை மகிழ்ந்து அங்கு

          ஏத்த மாணிக்காய்

ஆள்வித்து அமரர் உலகம்

          அளிப்பான் ஊர்போலும்

வேள்விப் புகையால் வானம்

          இருள்கூர் வெண்காடே.  7

வளையார் முன்கை மலையாள்

          வெருவ வரை ஊன்றி

முளையார் மதியம் சூடி

          என்று முப்போதும்

இளையாது ஏத்த இருந்தான்

          எந்தை ஊர்போலும்

விளையார் கழனிப் பழனம்

          சூழ்ந்த வெண்காடே.  8

கரியா னோடு கமல

          மலரான் காணாமை

எரியாய் நிமிர்ந்த எங்கள்

          பெருமான் என்பார்கட்கு

உரியான் அமரர்க்கு அரியான்

          வாழும் ஊர்போலும்

விரியார் பொழிலின் வண்டு

          பாடும் வெண்காடே.  9

பாடும் அடியார் பாடும் அடியார்- ஓதுவார் மூர்த்திகள் பலரும்

          கூடிப் பரிந்து ஏத்த

ஆடும் அரவம் அசைத்த

          பெருமான் அறிவின்றி

மூடம் உடைய சமண்

          சாக்கியர்கள் உணராத

வேடம் உடைய பெருமான்

          பதியாம் வெண்காடே.  10

விடையார் கொடியான் மேவி

          உறையும் வெண்காட்டைக்

கடையார் மாடங் கலந்து

          தோன்றும் காழியான்

நடையார் இன்சொல் ஞான

          சம்பந்தன் தமிழ்வல்லார்க்கு

அடையா வினைகள் அமர

          லோகம் ஆள்வாரே.  11

திருச்சிற்றம்பலம்

திருக் கடம்பூர்

                                                                           ௨ 

திருஞானசம்பந்தர் அருளிச்செய்த
இரண்டாம் திருமுறை

தகவல் பலகை	விவரம்
தலம்	திரு கடம்பூர்
ஊர்/வேறு பெயர்	மேலக் கடம்பூர், கரக் கோயில்
நாடு	சோழ (காவிரி வட)
ॐசுவாமி	அமிர்தகடேஸ்வரர்
ॐஅம்பிகை	சோதி மின்னம்மை , வித்யுஜோதி நாயகி
பாடியவர்கள்	சம்பந்தர் (1)         வானமர் திங்களும் நீரும்(2-68) அப்பர் (2)          மருட்டுவர் தீரவன் (4-107)         தளரும் கோளரவ (5-19)         ஒருவராய் இரு மூவாரம் (5-20)
ஸ்தல மரம்	கடம்பு
தீர்த்தம்	சக்தி தீர்த்தம்
பண்	காந்தாரம்
குறிப்புகள்	முருகப் பெருமான் இந்திரன் வழிபட்டது .
பதிக பலன்	பழியும் பாவமும் நீங்கும்.
வரிசை எண்.	204                                                               34/63

திருச்சிற்றம்பலம்

வானமர் திங்களும் நீரும்
          மருவிய வார்சடை யானைத்
தேனமர் கொன்றையி னானைத்
          தேவர் தொழப்படு வானைக்
கானம ரும்பிணை புல்கிக்
          கலை¹பயி லுங்கடம் பூரில்
தானமர் கொள்கையி னானைத்
          தாள்தொழ வீடு எளி தாமே.  1

அரவினொடு ஆமையும் பூண்டு
          அந்துகில் வேங்கை அதளும்
விரவும் திருமுடி தன்மேல்
          வெண்திங்கள் சூடி விரும்பிப்
பரவுன் தனிக்கடம் பூரில்
          பைங்கண்வெள் ளேற்று அண்ணல் பாதம்
இரவும் பகலும் பணிய
           இன்பம் நமக்கு அது வாமே.  2

இளி²படும் இன்சொலி னார்கள்
          இருங்குழல் மேல் இசைந் தேறத்
தெளிபடு கொள்கை கலந்த
          தீத்தொழி லார் கடம் பூரில்
ஒளிதரு வெண்பிறை சூடி
          ஒண்ணுத லோடு உடனாகிப்
புலி அதள் ஆடை புனைந்தான்
          பொற்கழல் போற்றுதும் நாமே.  3

பறையொடு சங்கம் இயம்பப்
          பல்கொடி சேர்நெடு மாடம்
கறையுடை வேல்வரிக் கண்ணார்
          கலை ஒலி சேர்கடம் பூரில்
மறை ஒலி கூடிய பாடல்
          மருவிநின்று ஆடல் மகிழும்
பிறையுடை வார்சடை யானைப்
          பேணவல் லார்பெரி யோரே.  4

தீவிரி யக்கழ் ஆர்ப்பச்
          சேயெரி கொண்டு இடு காட்டில்
நாவிரி கூந்தல்நற் பேய்கள்
          நகைசெய்ய நட்டம் நவின்றோன்
காவிரி கொன்றை கலந்த
          கண்ணுத லான்கடம் பூரில்
பாவிரி பாடல் பயில்வார்
          பழியொடு பாவம் இலாரே.  5

தண்புனல் நீள்வயல் தோறும்
          தாமரை மேல் அனம் வைகக்
கண்புணர் காவில்வண்டு ஏறக் 
          கள்ளவிழுங்கடம் பூரில்
பெண்புனை கூறுடை யானைப்
          பின்னு சடைப்பெரு மானைப்
பண்புனை பாடல் பயில்வார்
          பாவம் இலாதவர் தாமே.  6

பலி³கெழு செம்மலர் சாரப்
          பாடலொடு ஆடல் அறாத
கலிகெழு வீதி கலந்த
          கார்வயல் சூழ்கடம் பூரில்
ஒலிதிகழ் கங்கை கரந்தான்
          ஒண்ணுத லாள்உமை கேள்வன்
புலி அதள் ஆடையி னான் தன்
          புனைகழல் போற்றல் பொருளே.  7

பூம்படு கிற்கயல் பாயப்
          புள்ளிரியப் புறங் காட்டில்
காம்படு⁴ தோளியர் நாளும்
          கண்கவ ரும் கடம் பூரில்
மேம்படு தேவியோர் பாகம்
          மேவி எம் மான் என வாழ்த்தித்
தேம்படு மாமலர் தூவித்
          திசைதொழத் தீய கெடுமே.  8

திருமரு மார்பில் அவனும்
          திகழ்தரு மாமல ரோனும்
இருவரு மாய் அறி வொண்ணா
          எரியுரு வாகிய ஈசன்
கருவரை காலில் அடர்த்த
          கண்ணுத லான்கடம் பூரில்
மருவிய பாடல் பயில்வார்
          வானுல கம்பெறு வாரே.  9

ஆடை தவிர்த்து அறம்காட்டும்
          அவர்களும் அம் துவர் ஆடைச்
சோடைகள் நன்னெறி சொல்லார்
          சொல்லினும் சொல்லல கண்டீர்
வேடம் பலபல காட்டும்
          விகிர்தன்நம் வேத முதல்வன்
காடு அதனில் நடமாடும்
          கண்ணுத லான்கடம் பூரே.  10

விடைநவி லுங்கொடி யானை
          வெண்கொடி சேர்நெடு மாடம்
கடைநவி லுங்கடம் பூரில்
          காதல னைக்கடற் காழி
நடைநவில் ஞானசம் பந்தன்
          நன்மையால் ஏத்திய பத்தும்
படைநவில் பாடல் பயில்வார்
          பழியொடு பாவம் இலாரே.  11

திருச்சிற்றம்பலம்

திரு பெரும்புலியூர்

        

௨ 

திருஞானசம்பந்தர்  சுவாமிகள்   அருளிச்செய்த
இரண்டாம் திருமுறை 

தகவல் பலகை	விவரம்
தலம்	திரு பெரும்புலியூர்
பிற பெயர்கள்
நாடு	சோழ நாடு (வ)
ॐசுவாமி	வியாக்ரபுரீஸ்வரர்
ॐஅம்பிகை	சௌந்தர நாயகி
பாடியவர்கள்	சம்பந்தர் (1)          மண்ணும் ஓர் பாகம் (2-67)
ஸ்தல மரம்
தீர்த்தம்
பண்	காந்தாரம்
குறிப்புகள்	பெரும் பற்றப் புலியூர்  என்பது சிதம்பரம். இது பெரும்புலியூர் . இது வேறு. புலிக்கால் முனிவர் பூசித்தது.
பதிக பலன்	துயர் நீங்கி நிறைவான மகிழ்ச்சியுடன் வாழலாம்.
வரிசை எண்.	67                                                     53/63

திருச்சிற்றம்பலம் 

மண்ணும் ஓர் பாகம் உடையார்
          மாலும் ஓர் பாகம் உடையார்
விண்ணும் ஓர் பாகம் உடையார்
          வேதம் உடைய விமலர்
கண்ணுமோர் பாகம் உடையார்
          கங்கை சடையிற் கரந்தார்
பெண்ணுமோர் பாகம் உடையார்
          பெரும்புலி யூர்பிரி யாரே.  1

துன்னு கடற்பவ ளம் சேர் 
          தூயன நீண்ட திண் தோள்கள்
மின்னு சுடர்க்கொடி போலும்
          மேனியி னாள் ஒரு கங்கைக்
கன்னிக ளின்புனை யோடு
          கலைமதி மாலை கலந்த
பின்னு சடைப்பெரு மானார்
          பெரும்புலி யூர்பிரி யாரே.  2

கள்ள மதித்த கபாலம்
          கைதனி லேமிக ஏந்தித்
துள்ள மிதித்துநின்று ஆடும்
          தொழிலர் எழில்மிகு செல்வர்
வெள்ள நகுதலை மாலை
          விரிசடை மேல்மிளிர் கின்ற
பிள்ளை மதிப்பெரு மானார்
          பெரும்புலி யூர்பிரி யாரே.  3

ஆடல் இலையம் உடையார்
          அருமறை தாங்கிஆ றங்கம்
பாடல் இலையம் உடையார்
          பன்மை ஒருமைசெய்து அஞ்சும்
ஊடல் இலையம் உடையார்
          யோகு எனும் பேரொளி தாங்கி
பீடல் இலையம் உடையார்
          பெரும்புலி யூர்பிரி யாரே.  4

தோடுடை யார்குழைக் காதில்
          சுடுபொடி யார் அனல் ஆடக்
காடுடை யார் எரி வீசும்
          கையுடை யார்கடல் சூழ்ந்த
நாடுடை யார்பொருள் இன்ப
          நல்லவை நாளு நயந்த
பீடுடை யார்பெரு மானார்
          பெரும்புலி யூர் பிரி யாரே.  5

கற்றது உறப்பணி செய்து
          காண்டும் என்பார்  அவர் தங்கண்
முற்றிது அரிதும் என்பார்கள்
          முதலியர் வேதபு ராணர்
மற்றிது அறிதும் என் பார்கள்
          மனத்திடை யார்பணி செய்யப்
பெற்றி பெரிதும் உகப்பார்
          பெரும்புலி யூர்பிரி யாரே.  6

மறையுடை யார் ஒலி பாடல்
          மாமலர்ச் சேவடி சேர்வார்
குறையுடை யார் குறை தீர்ப்பார்
          குழகர் அழகர் நம் செல்வர்
கறையுடை யார்திகழ் கண்டங்
          கங்கை சடையிற் கரந்தார்
பிறையுடை யார்சென்னி தன்மேல் 
          பெரும்புலி யூர்பிரி யாரே.  7

உறவியும் இன்புறு சீரும்
          ஓங்குதல் வீடு எளிதாகித்
துறவியும்  கூட்டமும்  காட்டித்
          துன்பமும் இன்பமும்  தோற்றி
மறவி என் சிந்தனை மாற்றி
          வாழவல் லார் தமக்கு என்றும்
பிறவி அ றுக்கும் பிரானார்
          பெரும்புலி யூர்பிரி யாரே.  8

சீருடை யார் அடியார்கள்
          சேடர் ஒ ப்பார் சடை சேரும்
நீருடையார் பொடிப் பூசு
          நினைப்புடையார் விரி கொன்றைத்
தாருடை யார்விடை ஊர்வார்
          தலைவரைந் நூற்றுப்பத் தாய
பேருடை யார்பெரு மானார்
          பெரும்புலி யூர்பிரி யாரே.  9

உரிமை யுடை அடியார்கள்
          உள்ளுற உள்க வல்லார்கட்கு
அருமை உடை என காட்டி
          அருள்செயும் ஆதி முதல்வர்
கருமை உடைநெடு மாலும்
          கடிமலர் அண்ணலும்  காணாப்
பெருமை உடைப் பெருமானார்
          பெரும்புலி யூர்பிரி யாரே.  10

பிறைவள ரும்முடிச் சென்னிப்
          பெரும்புலி யூர்ப்பெரு மானை
நறைவள ரும் பொழிற் காழி
          நற்றமிழ் ஞானசம் பந்தன்
மறை வளரும் தமிழ் மாலை
          வல்லவர் தம் துயர் நீங்கி
நிறைவளர் நெஞ்சினர் ஆகி
          நீடு உலகத்து இருப்பாரே.

திருச்சிற்றம்பலம்

திரு ஆணைக்காவல்

 

௨ 

சுந்தர மூர்த்தி  சுவாமிகள்   அருளிச்செய்த
ஏழாம் திருமுறை 

தகவல் பலகை	விவரம்
தலம்	திரு ஆனைக்கா
பிற பெயர்கள்
நாடு	சோழ நாடு (வ)
ॐசுவாமி	ஜம்புநாதர், அப்புலிங்கேஸ்வரர்
ॐஅம்பிகை	அகிலாண்டேஸ்வரி
பாடியவர்கள்	சம்பந்தர் (3)         மழையார் மிடறா(2-23)         வானைகாவில் வெண்மதி (3-53)         மண்ணது உண்டரி (3-109) அப்பர் (3)         கோனைக்காவி (5-31)         எத்தாயார் எத்தந்தை(6-62)         முன்னானை தோள் போர்த்த (6-63) சுந்தரர் (1)          மறைகள் ஆயின நான்கும். (7-75)
ஸ்தல மரம்	வெண் நாவல்
தீர்த்தம்	காவிரி
பண்	காந்தாரம்
குறிப்புகள்	யானையும் சிலந்தியும் வழிபட்ட தலம்  பஞ்ச பூத தலங்களில் இது அப்பு தலம். .  அம்பிகை, அஷ்ட வசுக்கள், பிரமன் பராசரர், கோச்செங்கட் சோழன் முதலியோர் வழிபட்ட தலம்  முதலில் பூசித்த சிலந்தி மறுபிறப்பில் கோச்செங்கட் சோழனாகப் பிறந்தது என்பது வரலாறு
பதிக பலன்	பிறவி அகலும்
வரிசை எண்.	75                                                      60/63

திருச்சிற்றம்பலம்          

மறைகள் ஆயின நான்கும்
          மற்றுள பொருள்களும் எல்லாம்
துறையும்  தோத்திரத்து இறையும்
          தொன்மையும் நன்மையும் ஆய
அறையும் பூம்புனல் ஆனைக்
          காவுடை ஆதியை நாளும்
இறைவன் என்று அடி சேர்வார்
          எம்மையும் ஆளுடை யாரே.  1

வங்கம் மேவிய வேலை
          நஞ்சு எழ வஞ்சர்கள் கூடித்
தங்கள் மேல்அட ராமை
          உண்ணென உண்டு இருள் கண்டன்
அங்கம் ஓதிய ஆனைக்
          காவுடை ஆதியை நாளும்
எங்கள் ஈசன் என்பார்கள்
          எம்மையும் ஆளுடை யாரே.  2

நீல வண்டறை கொன்றை
          நேரிழை மங்கையோர் திங்கள்
சால வாளர வங்கள்
          தங்கிய செஞ்சடை எந்தை
ஆல நீழலுள் ஆனைக்
          காவுடை ஆதியை நாளும்
ஏலு மாறு வல்லார்கள்
          எம்மையும் ஆளுடை யாரே.  3

தந்தை தாய் உலகுக்கு ஓர்
          தத்துவன் மெய்த்தவத் தோர்க்குப்
பந்தம் ஆயின பெருமான்
          பரிசுடை யவர்திரு வடிகள்
அந்தண் பூம்புனல் ஆனைக்
          காவுடை ஆதியை நாளும்
எந்தை என்று அடி சேர்வார்
          எம்மையும் ஆளுடை யாரே.  4

கணைசெந் தீ அரவம் நாண்
          கல்வளையும் சிலை யாகத்
துணைசெய் மும்மதில் மூன்றும்
          சுட்டவ னே உலகு உய்ய
அணையும் பூம்புனல் ஆனைக்
          காவுடை ஆதியை நாளும்
இணைகொள் சேவடி சேர்வார்
          எம்மையும் ஆளுடை யாரே.  5

விண்ணின் மாமதி சூடி
          விலையிலி கலன்அணி விமலன்
பண்ணின் நேர்மொழி மங்கை
          பங்கினன் பசு உகந்து ஏறி
அண்ண லாகிய ஆனைக்
          காவுடை ஆதியை நாளும்
எண்ணு மாறுவல் லார்கள்
          எம்மையும் ஆளுடை யாரே.  6

தார மாகிய பொன்னித்
          தண்டுறை ஆடி விழுத்தும்
நீரில் நின்று அடி போற்றி
          நின்மலா கொள் என ஆங்கே
ஆரம் கொண்ட எம்மானைக்
          காவுடை ஆதியை நாளும்
ஈரம் உள்ளவர் நாளும்
          எம்மையும் ஆளுடை யாரே.  7

உரவம் உள்ளதோர் உழையின்
          உரிபுலி அதளுடை யானை
விரைகொள் கொன்றையி னானை
          விரிசடை மேற்பிறை யானை
அரவம் வீக்கிய ஆனைக்
          காவுடை ஆதியை நாளும்
இரவும் எல்லியும் பகலும்
          ஏத்துவார் எமையுடை யாரே.  8

வலங்கொள் வாரவர் தங்கள்
          வல்வினை தீர்க்கும் மருந்து
கலங்கக் காலனைக் காலாற்
          காமனைக் கண்சிவப் பானை
அலங்கல் நீர்பொரும் ஆனைக்
          காவுடை ஆதியை நாளும்
இலங்கு சேவடி சேர்வார்
          எம்மையும் ஆளுடை யாரே.  9

ஆழி யாற்கு அருள் ஆனைக்
          காவுடை ஆதிபொன்னடியின்
நீழலே சர ணாக
          நின்று அருள் கூர நினைந்து
வாழ வல்ல வன்தொண்டன்
          வண் தமிழ் மாலைவல் லார்போய்
ஏழு மாபிறப் பற்று
          எம்மையும் ஆளுடை யாரே.

திருச்சிற்றம்பலம்

திரு கச்சி ஏகம்பம்

௨ 

திருநாவுக்கரசு சுவாமிகள் அருளிச்செய்த
நான்காம்  திருமுறை 

தகவல் பலகை	விவரம்
தலம்	திரு கச்சி ஏகம்பம்
ஊர்	காஞ்சிபுரம், காமபீடம், மும்மூர்த்தி வாசம், சிவபுரம், விண்டுபுரம், தபோமயம், துண்டீரபுரம், பிரமபுரம், பூலோக கயிலாயம், தேவபுரம், சகலசித்திபுரம், புவனசாரம், ஆதிபீடம், கன்னிகாப்பு, கலிசித்து, கச்சி
நாடு	தொண்டை நாடு
ॐசுவாமி	ஏகாம்பர நாதர், திருவேகம்பர்
ॐஅம்பிகை	ஏலவார் குழலி, காமாட்சி அம்மை
பாடியவர்கள்	சம்பந்தர் (4)         வெந்த வெண் பொடி பூசு  (1-133)         மறையானை மாசிலா (2-12)         கருவா கச்சி திருவேகம்பம் (3-41)         பாயுமால் விடை (3-114) அப்பர் (7)         கரவாடும் வன்னம்(4-07)         நம்பனை நகர மூன்றும் (4-44)          ஓதுவித்தாய் முன் (4-99)         பண்டு செய்த பழ வினை (5-047)         பூ மேலானும் பூமகள் (5-48)         கூற்றுவன் காண் கூற்றுவனை (6-64)         உரித்தவன் காண் உரக்களிற்றை (6-65) சுந்தரர்   (1)         ஆலம் தான் உகந்து அமுது (7-61)
ஸ்தல மரம்	மாமரம்
தீர்த்தம்	கம்பாநதி, சர்வ தீர்த்தம், சிவகங்கை
பண்	காந்தாரம்
குறிப்புகள்	காமாட்சி அம்மை 32 அறங்கள் செய்த தலம்  பஞ்ச பூத தலங்களில் ஒன்று (மண்) கந்தபுராணம் பாடிய கச்சியப்ப சிவாச்சாரியார் வாழ்ந்த தலம்  திருக்குறள் உரை ஆசிரியர் பரிமேலழகர் வாழ்ந்த தலம்  ஐயடிகள் காடவர்கோன், சாக்கிய நாயனார், திருக்குறிப்புத் தொண்டர் பேறு பெற்ற தலம்  சுந்தரமூர்த்தி சுவாமிகள் இடக் கண் பெற்ற தலம்  வேதம் மாமரமாக - தல மரமாக விளங்குவது.  இங்குள்ள மாமரம் சுமார் 3500 ஆண்டுகள் பழமையானது  கம்பாநதி பூமிக்கடியில் கண்களுக்கு புலப்படாதவாறு ஓடுவதாக வரலாறு  நல்ல கம்பன், கள்ளக் கம்பன், வெள்ளக் கம்பன் ஆகிய மூர்த்தங்கள் உள்ள திருத்தலம். முத்தி பேறு தரவல்ல தளமாக போற்றப் படுகிறது .
பதிக பலன்	நிலைத்த புகழுடன் வாழ்வார்கள்
வரிசை எண்.	133                                                       1/32

திருச்சிற்றம்பலம்          

கரவாடும் வன் நெஞ்சர்க்கு
          அரியானைக் கரவார்பால்
விரவாடும் பெருமானை
          விடை ஏறும் வித்தகனை
அரவாடச் சடைதாழ
          அங்கையினில் அனல் ஏந்தி
இரவாடும் பெருமானை
          என்மனத்தே வைத்தேனே.  1  

தேனோக்கும் கிளிமழலை
          உமைகேள்வன் செழும்பவளம்
தானோக்கும் திருமேனி
          தழல் உருவாம் சங்கரனை
வானோக்கும் வளர்மதிசேர்
          சடையானை வானோர்க்கும்
ஏனோர்க்கும் பெருமானை
          என்மனத்தே வைத்தேனே.  2  

கைப்போது மலர்தூவிக்
          காதலித்து வானோர்கள்
முப்போதும் முடிசாய்த்துத்
          தொழநின்ற முதல்வனை
அப்போது மலர்தூவி
          ஐம்புலனும் அகத்து அடக்கி
எப்போதும் இனியானை
          என்மனத்தே வைத்தேனே.  3  

அண்டமாய் ஆதியாய்
          அருமறையோடு ஐம்பூதப்
பிண்டமாய் உலகுக்கு ஒர்
          பெய்பொருளாம் பிஞ்ஞகனைத்
தொண்டர்தாம் மலர்தூவிச்
          சொன்மாலை புனைகின்ற
இண்டைசேர் சடையானை
          என்மனத்தே வைத்தேனே.  4  

ஆறேறு சடையானை
          ஆயிரம்பேர் அம்மானைப்
பாறேறு படுதலையில்
          பலிகொள்ளும் பரம்பரனை
நீறு ஏறு திருமேனி
          நின்மலனை நெடுந்தூவி
ஏறு ஏறும் பெருமானை
          என்மனத்தே வைத்தேனே.  5  

தேசனைத் தேசங்கள்
          தொழநின்ற திருமாலால்
பூசனைப் பூசனைகள்
          உகப்பானைப் பூவின்கண்
வாசனை மலைநிலநீர்
          தீ வளி ஆகாசமாம்
ஈசனை எம்மானை
          என்மனத்தே வைத்தேனே.  6  

நல்லானை நல்லான
          நான்மறையோடு ஆறு அங்கம்
வல்லானை வல்லார்கள்
          மனத்து உறையும் மைந்தனைச்
சொல்லானைச் சொல்லார்ந்த
          பொருளானைத் துகளேதும்
இல்லானை எம்மானை
          என்மனத்தே வைத்தேனே.  7  

விரித்தானை நால்வர்க்கு
          வெவ்வேறு வேதங்கள்
புரித்தானைப் பதஞ்சந்திப்
          பொருளுருவாம் புண்ணியனைத்
தரித்தானைக் கங்கைநீர்
          தாழ்சடைமேல் மதில்மூன்றும்
எரித்தானை எம்மானை
          என்மனத்தே வைத்தேனே.  8  

ஆகம்பத் தரவணையான்
          அயன்அறிதற்கு அரியானைப்
பாகம்பெண் ஆண்பாகமாய்
          நின்ற பசுபதியை
மாகம்ப மறை ஓதும்
          இறையானை மதிற்கச்சி
ஏகம்ப மேயானை
          என்மனத்தே வைத்தேனே.  9  

அடுத்தானை உரித்தானை
          அருச்சுனற்குப் பாசுபதம்
கொடுத்தானைக் குலவரையே
          சிலையாகக் கூர் அம்பு
தொடுத்தானைப் புரம் எரியச்
          சுனைமல்கு கயிலாயம்
எடுத்தானைத் தடுத்தானை
          என்மனத்தே வைத்தேனே.

திருச்சிற்றம்பலம்

திரு பாச்சூர்

                       

௨ 

திருஞானசம்பந்தர் சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திரு பாச்சூர்
ஊர்
நாடு	தொண்டை நாடு
ॐசுவாமி	பாச்சூர் நாதர்,
ॐஅம்பிகை	மோகனாம்பாள்
பாடியவர்கள்	சுந்தரர் (1)          சிந்தை இடையார் (2-60) அப்பர் (2)         முந்தி மூ எயில் எய்த (5-25)         விண் ஆகி நிலன் ஆகி (6-83)
ஸ்தல மரம்	மூங்கில்
தீர்த்தம்	சோம தீர்த்தம், மங்கள தீர்த்தம்
பண்	காந்தாரம்
குறிப்புகள்	அம்பிகை, திருமால், சந்திரன் வழிபட்ட தலம்
பதிக பலன்	இம்மைப் பயனும் மறுமைப் பயனும் கிட்டும்.
வரிசை எண்.	60                                                         16/32

திருச்சிற்றம்பலம்

          

சிந்தை இடையார் தலையின்

          மிசையார் செஞ்சொல்லார்

வந்து மாலை வைகும்

          போழ்து என் மனத்து உள்ளார்

மைந்தர் மணாள என்ன

          மகிழ்வார் ஊர்போலும்

பைந்தண் மாதவி சோலை

          சூழ்ந்த பாசூரே.  1  

பேரும் பொழுதும் பெயரும்

          பொழுதும் பெம்மான் என்று 

ஆருந் தனையும் அடியார்

          ஏத்த அருள்செய்வார்

ஊரும் அரவம் உடையார்

          வாழும் ஊர்போலும்.

பாரின் மிசையார் பாடல்

          ஓவாப் பாசூரே.  2  

கையால் தொழுது தலைசாய்த்து

          உள்ளம் கசிவார்கண்

மெய்யார் குறையும் துயரும்

          தீர்க்கும் விகிர்தனார் 

நெய்யாடுதல் அஞ்சு உடையார்

          நிலாவும் ஊர்போலும்

பைவாய் நாகம் கோடல்

          ஈனும் பாசூரே.  3  

பொங்காடு அரவும் புனலும்

          சடைமேல் பொலிவு எய்தக்

கொங்கார் கொன்றை சூடி என்

          உள்ளம் குளிர்வித்தார்

தங்காது அலியும் தாமும்

          வாழும் ஊர்போலும்

பைங்கான் முல்லை பல்லரும்

          பீனும் பாசூரே.  4  

ஆடல் புரியும் ஐவாய்

          அரவு ஒன்று அரைச்சாத்தும்

சேடச் செல்வர் சிந்தையுள்

          என்றும் பிரியாதார்

வாடல் தலையில் பலிதேர்

          கையார் ஊர்போலும்

பாடற் குயில்கள் பயில்பூஞ்

          சோலைப் பாசூரே.  5  

கால் நின்று அதிரக் கனல்வாய்

          நாகம் கச்சாகத்

தோல் ஒன்று உடையார் விடையார்

          தம்மைத் தொழுவார்கள்

மால் கொண்டு ஓட மையல்

          தீர்ப்பார் ஊர்போலும்

பால்வெண் மதிதோய்

          மாடஞ்சூழ்ந்த பாசூரே.  6  

கண்ணின் அயலே கண் ஒன்று 

          உடையார் கழல் உன்னி

எண்ணுந் தனையும் அடியார்

          ஏத்த அருள்செய்வார்

உள் நின்று உருக உவகை

          தருவார் ஊர்போலும்

பண்ணின் மொழியார் பாடல்

          ஓவாப் பாசூரே.  7  

தேசு குன்றாத் தெண்ணீர்

          இலங்கைக் கோமானைக்

கூச அடர்த்துக் கூர்வாள்

          கொடுப்பார் தம்மையே

பேசிப் பிதற்றப் பெருமை

          தருவார் ஊர்போலும்

பாசித் தடமும் வயலும்

          சூழ்ந்த பாசூரே.  8  

நகுவாய் மலர்மேல் அயனும்

          நாகத்து அணையானும்

புகுவாய்அறியார் புறம்நின்று 

          ஓரார் போற்றோவார்

செகுவாய் உகுபல் தலைசேர்

          கையார் ஊர்போலும்

பகுவாய் நாரை ஆரல்

          வாரும் பாசூரே.  9  

தூய வெயில் நின்று உழல்வார்

          துவர்தோய் ஆடையர்

நாவில் வெய்ய சொல்லித்

          திரிவார் நயம் இல்லார்

காவல் வேவக் கணை ஒன்று 

          எய்தார் ஊர்போலும்

பாவைக் குரவம் பயில்பூஞ்

          சோலைப் பாசூரே.  10  

ஞானம் உணர்வான் காழி

  ஞான சம்பந்தன்

தேனும் வண்டும் இன்னிசை

  பாடும் திருப்பாசூர்க்

கானம் முறைவார் கழல்சேர்

  பாடல் இவைவல்லார்

ஊனம் இலராய் உம்பர்

  வானத் துறைவாரே.

திருச்சிற்றம்பலம்