திரு வேள்விக்குடி

                                                                                                    ௨ 

திருஞானசம்பந்தர்  சுவாமிகள்  அருளிச்செய்த
மூன்றாம்  திருமுறை

தகவல் பலகை	விவரம்
தலம்	திரு வேள்விக்குடி
ஊர்/வேறு பெயர்
நாடு	சோழ (காவிரி வட)
ॐசுவாமி	மனவாலேஸ்வரர், கௌதகேஸ்வரர், கல்யாண சுந்தரேஸ்வரர்
ॐஅம்பிகை	பரிமள சுகந்த நாயகி, நறுஞ்சாந்தநாயகி
பாடியவர்கள்	சம்பந்தர் (1)     ஓங்கி மேல் உழி தரும் (3-90)     சுந்தரர்  (1)         மூப்பதும் இல்லை பிறப்பதும் (7-18)
ஸ்தல மரம்
தீர்த்தம்	கெளதகாபந்தன தீர்த்தம்
பண்	சாதாரி
குறிப்புகள்	சிவபெருமான் திருமண வேள்வி நடைபெற்ற தலம்.  திருத்துருத்தியும், திருவேல்விக்குடியும் அடுத்தடுத்து உள்ள தலங்கள்.   பகற்காலத்தில் திருத்துருத்தியிலும், இரவு காலத்தில் திரு வேல்விக்குடியிலும் ஈசன் எழுந்தருளி இருப்பதாக பதிக குறிப்பு உள்ளது. இரு திருத்தலத்தையும் இணைத்து செய்த பதிகம் இது.
பதிக பலன்	பழி பவம் இல்லாதவர்கள்.
வரிசை எண்.	90                                                           23/63

திருச்சிற்றம்பலம்

ஓங்கிமேல் உழிதரும் ஒலிபுனற்
          கங்கையை ஒருசடைமேல்
தாங்கினார் இடுபலி
          தலைகலனாக்கொண்ட தம்மடிகள்
பாங்கினால் உமையொடும் பகலிடம்
          புகலிடம் பைம்பொழில்சூழ்
வீங்குநீர்த் துருத்தியார் இரவிடத்து
          உறைவர்வேள் விக்குடியே.  1

தூறுசேர் சுடலையிற் சுடர் எரி
          ஆடுவர் துளங்கொளிசேர்
நீறுசாந்து என உவுகந்து அணிவர் வெண்
          பிறைமல்கு சடைமுடியார்
நாறுசாந்து இளமுல இத்தலத்து இறைவியின் பெயர் ை அரிவையோடு 
          ஒருபகல் அமர்ந்தபிரான்
வீறுசேர் துருத்தியார் இரவிடத்து 
          உறைவர்வேள் விக்குடியே.  2

மழைவளர் இளமதி மலரொடு
          தலைபுல்கு வார்சடைமேல்
கழைவளர் புனல்புகக் கண்டு எம்
          கண்ணுதற் கபாலியார்தாம்
இழைவளர் துகில் அல்குல் அரிவையோடு
          ஒருபகல் அமர்ந்தபிரான்
விழைவளர் துருத்தியார் இரவிடத்து 
          உறைவர்வேள் விக்குடியே.  3

கரும்பன வரிசிலைப் பெருந்தகைக்
          காமனைக் கவின் அழித்த
சுரும்பொடு தேன்மல்கு தூமலர்க்
          கொன்றையஞ் சுடர்ச்சடையார்
அரும்பன வனமுலை அரிவையோடு
          ஒருபகல் அமர்ந்தபிரான்
விரும்பிடந் துருத்தியார் இரவிடத்து 
          உறைவர்வேள் விக்குடியே.  4

வளங்கிளர் மதியமும் பொன்மலர்க்
          கொன்றையும் வாள் அரவும்
களங்கொளச் சடையிடை வைத்தஎம்
          கண்ணுதற் கபாலியார்தாம்
துளங்குநூல் மார்பினர் அரிவையோடு
          ஒருபகல் அமர்ந்தபிரான்
விளங்குநீர்த் துருத்தியார் இரவிடத்து
          உறைவர்வேள் விக்குடியே.  5

பொறியுலாம் அடுபுலி உரிவையர்
          வரியராப் பூண்டு இலங்கும்
நெறியுலாம் பலிகொளும் நீர்மையர்
          சீர்மையை நினைப்பரியார்
மறியுலாங் கையினர் மங்கையோடு 
          ஒருபகல் அமர்ந்தபிரான்
வெறியுலாம் துருத்தியார் இரவிடத்து
          உறைவர்வேள் விக்குடியே.  6

புரிதரு சடையினர் புலி உரி
          அரையினர் பொடி அணிந்து
திரிதரும் இயல்பினர் திரிபுர
          மூன்றையும் தீவளைத்தார்
வரிதரு வனமுலை மங்கையோடு 
          ஒருபகல் அமர்ந்தபிரான்
விரிதரு துருத்தியார் இரவிடத்து
          உறைவர்வேள் விக்குடியே.  7

நீண்டு இலங்கு அவிர் ஒளி நெடுமுடி
          அரக்கன்இந் நீள்வரையைக்
கீண்டி இடம்  திடுவன் என்று எழுந்தவன்
          ஆள்வினைக் கீழ்ப்படுத்தார்
பூண்டநூல் மார்பினர் அரிவையோடு
          ஒருபகல் அமர்ந்தபிரான்
வேண்டிடந் துருத்தியார் இரவிடத்து
          உறைவர்வேள் விக்குடியே.  8

கரைகடல் அரவணைக் கடவுளும்
          தாமரை நான்முகனும்
குரைகழல், அடிதொழக் கூர் எரி
          என நிறங் கொண்டபிரான்
வரைகெழு மகளொடும் பகலிடம்
          புகலிடம் வண்பொழில்சூழ்
விரைகமழ் துருத்தியார் இரவிடத்து 
          உறைவர்வேள் விக்குடியே.  9

அயமுக அயம்- இரும்பு வெயில் நிலை அமணரும்
          குண்டரும் சாக்கியரும்
நயமுக உரையினர் நகுவன
          சரிதைகள் செய்து உழல்வார்
கயலன வரிநெடுங் கண்ணியோடு
          ஒருபகல் அமர்ந்தபிரான்
வியனகர்த் துருத்தியார் இரவிடத்து
          உறைவர்வேள் விக்குடியே.  10

விண்ணுலாம் விரிபொழில் விரைமணல்
          துருத்திவேள் விக்குடியும்
ஒண்ணுலாம் ஒலிகழல் ஆடுவார்
          அரிவையோடு உறைபதியை
நண்ணுலாம் புகலியுள் அருமறை
          ஞானசம் பந்தன்சொன்ன
பண்ணுலாம் அருந்தமிழ் பாடுவார்
          ஆடுவார் பழி இலரே.  11

திருச்சிற்றம்பலம்

திரு இன்னம்பர்

            

௨ 

திருஞானசம்பந்தர் சுவாமிகள் அருளிச்செய்த
மூன்றாம்   திருமுறை

தகவல் பலகை	விவரம்
தலம்	திரு இன்னம்பர்
ஊர்	இன்னம்பூர்
நாடு	சோழ (காவிரி வட)
ॐசுவாமி	தான் தோன்றி ஈசர், எழுத்தறிநாதர்
ॐஅம்பிகை	சுகுந்த குந்தாளாம்பிகை & நித்தியகல்யாணி
பாடியவர்கள்	திருஞானசம்பந்தர் (1)         எண் திசைக்கும் புகழ் (3-095) திருநாவுக்கரசர்(4)         விண்ணவர் மகுடகோடி (4-072)         மண்ணும் மலைமகள் (4-100)         என்னில் ஆரும் (5-021)         அல்லிமலர் நாற்றத்து (6-089)
ஸ்தல மரம்	பலா, செண்பகம்
தீர்த்தம்	ஐராவாத தீர்த்தம்
பண்	சாதாரி
குறிப்புகள்	அகத்தியர் வழிபட்டது ஐராவதம் பூசித்த தலம்.
பதிக பலன்	துயர் நீங்கும்.
வரிசை எண்.	95                                                             45/63

திருச்சிற்றம்பலம்

எண் திசைக்கும் புகழ் இன்னம்பர் மேவிய
வண்டு இசைக்கும்  சடையீரே
வண்டு இசைக் கும் சடையீர் உமை வாழ்த்துவார்
தொண்டு இசைக்கும் தொழிலோரே.  1

யாழ்நரம் பின் இசை இன்னம்பர் மேவிய
தாழ்தரு சடைமுடி யீரே
தாழ்தரு சடைமுடியீர் உமைச் சார்பவர்
ஆழ்துயர் அருவினை இலரே.  2

இளமதி நுதலியோடு இன்னம்பர் மேவிய
வளமதி வளர்சடை யீரே
வளமதி வளர்சடையீர் உமை வாழ்த்துவார்
உளமதி மிகவுடை யோரே.  3

இடிகுரல் இசைமுரல் இன்னம்பர் மேவிய
கடிகமழ் சடைமுடி யீரே
கடிகமழ் சடைமுடியீர் உம கழல்தொழும்
அடியவர் அருவினை இலரே.  4

இமையவர் தொழுது எழும் இன்னம்பர் மேவிய
உமை ஒரு கூறுடை யீரே
உமை ஒரு கூறுடையீர் உமை உள்குவார்
அமைகிலர் ஆகிலர் அன்பே.  5

எண்ணரும் புகழுடை இன்னம்பர் மேவிய
தண்ணரும் சடைமுடி யீரே
தண்ணரும் சடைமுடியீர் உமைச் சார்பவர்
விண்ணவர் அடைவுடை யோரே.  6

எழில் திகழும் பொழில் இன்னம்பர் மேவிய
நிழல்திகழ் மேனியி னீரே
நிழல்திகழ் மேனியினீர் உமை நினைபவர்
குழறிய கொடுவினை யிலரே.  7

ஏத்தரும் புகழணி இன்னம்பர் மேவிய
தூர்த்தனைத் தொலைவு செய்தீரே
தூர்த்தனைத் தொலைவுசெய்தீர் உமைத் தொழுபவர்
கூர்த்த நற்குணமுடை யோரே.  8

இயலுளோர் தொழுது எழும் இன்னம்பர் மேவிய
அயனுமால் அறிவரி யீரே
அயனுமால் அறிவரியீர் உமது அடி தொழும்
இயலுளார் மறுபிறப்பிலரே.  9

ஏரமர் பொழிலணி இன்னம்பர் மேவிய
தேரமண் சிதைவுசெய் தீரே
தேரமண் சிதைவு செய்தீர் உமைச் சேர்பவர்
ஆர்துயர் அருவினை யிலரே.  10

ஏடமர் பொழிலணி இன்னம்பர் ஈசனை
நாடமர் ஞானசம் பந்தன்
நாடமர் ஞானசம் பந்தன நற்றமிழ்
பாடவல்லார் பழி இலரே.

திருச்சிற்றம்பலம்

திரு வைகாவூர்

     

௨ 

திருஞானசம்பந்தர்  சுவாமிகள்   அருளிச்செய்த
மூன்றாம்  திருமுறை 

தகவல் பலகை	விவரம்
தலம்	திரு வைகாவூர்
பிற பெயர்கள்	வில்வ வனம்
நாடு	சோழ நாடு (வ)
ॐசுவாமி	வில்வவனேஸ்வரர், வில்வவனனாதர்
ॐஅம்பிகை	வளைக்கை நாயகி, சர்வ ஜனரட்ஷகி
பாடியவர்கள்	சம்பந்தர் (1)       கோழை மிடறு ஆக  (3-71)
ஸ்தல மரம்	வில்வ மரம்
தீர்த்தம்	எம தீர்த்தம்
பண்	சாதாரி
குறிப்புகள்	சிவராத்திரி அன்றுவேடன் ஒருவன் மரத்தில் இருந்து வில்வ இதழை பறித்துப் போட பெருமான் அருள் புரிந்த திருத்தலம்.  வில்வ வனம் என பெயர் பெற்றது.
பதிக பலன்	இம்மையில் நலமுடன் வாழந்து  பின் சிவலோக பதவி கிடைக்கும்.
வரிசை எண்.	71                                                     48/63

திருச்சிற்றம்பலம் 

கோழைமிடறு ஆக கவி கோளும் 
          இல வாகஇசை கூடும்வகையால்    
ஏழை அடியார் அவர்கள் யாவைசொன
          சொல்மகிழும் ஈசன் இடமாம்    
தாழை இள நீர்முதிய காய்கமுகின்
          வீழநிரை தாறுசிதறி    
வாழை உதிர் வீழ்கனிகள் ஊறிவயல்
          சேறுசெயும் வைகாவிலே.  1

அண்டம் உறு மேருவரை அங்கிகணை
          நாண் அரவு அதாக எழிலார்    
விண்டவர்தம்  முப்புரம் எரித்த
          விகிர்தன் அவன் விரும்பும் இடமாம்    
புண்டரிக மாமலர்கள் புக்கு
          விளையாடுவயல் சூழ்தடமெலாம்    
வண்டின் இசை பாடஅழ கார் குயில்மிழற்று
          பொழில் வைகாவிலே.  2

ஊனமிலர் ஆகி உயர் நற்றவமெய்
          கற்றவை உணர்ந்தஅடியார்    
ஞானமிக நின்று தொழ நாளும் அருள்
          செய்யவல நாதன் இடமாம்    
ஆனவயல் சூழ்தருமல் சூழி அருகே
          பொழில்கள் தோறும் அழகார்    
வானமதி யோடுமழை நீள்முகில்கள்
          வந்தணவும் வைகாவிலே.  3

இன்னவுரு இன்னநிறம் என்று 
          அறிவதேல் அரிது நீதிபலவும்    
தன்ன உரு வாம் என மிகுத்தவன்
          நீதியொடு தான் அமர்விடம்    
முன்னை வினை போய் வகையினால்
          முழுது உணர்ந்து முயல்கின்ற முனிவர்    
மன்ன இரு போதும் அருவித்தொழுது
          சேரும்வயல் வைகாவிலே.  4

வேதமொடு வேள்விபல வாயின
          மிகுத்துவிதி ஆறுசமயம்    
ஓதியும் உணர்ந்தும் உள தேவர்தொழ
          நின்று அருள் செய் ஒருவன் இடமாம்    
மேதகைய கேதகைகள் புன்னையொடு
          ஞாழல் அவை மிக்கஅழகால்    
மாதவி மணம் கமழ வண்டு பல
          பாடு பொழில் வைகாவிலே.  5

நஞ்சு அமுது செய்தமணி கண்டன்
          நமை ஆளுடைய ஞானமுதல்வன்    
செஞ்சடையிடைப் புனல் கரந்த 
          சிவலோகன்அமர் கின்ற இடமாம்    
அஞ்சுடரொ ஆறுபதம் ஏழின் இசை
          எண்ணரிய வண்ணம் உளவாய்    
மைஞ்சரொடு மாதர்பலரும் தொழுது
          சேரும்வயல் வைகாவிலே.  6

நாளுமிகு பாடலொடு ஞானமிகு
          நல்லமலர் வல்லவகையால்    
தோளினொடு கை குளிரவே தொழும்
          வர்க்கு அருள்செய் சோதியிடமாம்    
நீளவளர் சோலைதொறும் நாளிபல
          துன்றுகனி நின்றதுதிர    
வாளைகுதி கொள்ளமது நாறமலர்
          விரியும்வயல் வைகாவிலே.  7

கை இருபதோடு மெய்கலங்கிட
          விலங்கலை எடுத்த கடியோன்    
ஐயிரு சிரங்களை ஒருங்குடன்
          நெரித்த அழகன் தன் இடமாம்    
கையின்மலர் கொண்டுநல காலையொடு
          மாலை கருதிப் பலவிதம்    
வையகம் எலாம் மருவி நின்றுதொழுது
          ஏத்தும் எழில் வைகாவிலே.  8

அந்தமுதல் ஆதிபெருமான் அமரர்
          கோனை அயன் மாலும் இவர்கள்    
எந்தை பெருமான் இறைவன் என்று தொழ
          நின்று அருள் செய் ஈசன் இடமாம்    
சிந்தைசெய்து பாடும்அடியார்பொடி
          மெய் பூசி எழு தொண்டர் அவர்கள்    
வந்துபல சந்தமலர் முந்தியணையும்
          பதிநல் வைகாவிலே.  9

ஈசன் எமை ஆளுடைய எந்தை
          பெருமான் இறைவன் என்று தனையே    
பேசுதல் செயா அமணர் புத்தர் அவர்
          சித்தம் அணையா அவனிடம்    
தேசமது எலாம் மருவி நின்று
          பரவித் திகழ நின்ற புகழோன்    
வாச மலரான பல தூவி
          அணையும் பதி நல் வைகாவிலே.  10

முற்றுநமை ஆளுடைய முக்கண்
          முதல்வன் திரு வைகாவில் அதனைச்    
செற்றமலி னார் சிரபுரத் தலைவன்
          ஞானசம் பந்தன்உரைசெய்    
உற்றதமிழ் மாலை ஈர் ஐந்தும் இவை
          வல்லவர் உருத்திரர் எனப்    
பெற்று அமரலோகம் மிக வாழ்வர்
          பிரியார் அவர் பெரும் புகழொடே.

திருச்சிற்றம்பலம்

திரு வட குரங்காடுதுறை

    

௨ 

திருஞானசம்பந்தர்  சுவாமிகள்   அருளிச்செய்த
மூன்றாம்  திருமுறை 

தகவல் பலகை	விவரம்
தலம்	திரு வடகுரங்காடுதுறை
பிற பெயர்கள்	ஆடுதுறை பெருமான் கோயில்
நாடு	சோழ நாடு (வ)
ॐசுவாமி	தயாநிதீஸ்வரர் , வாளினாதர், சிட்டிளிங்கனாதர், அழகு சடை முடிநாதர்
ॐஅம்பிகை	அழகு சடை முடியம்மை
பாடியவர்கள்	சம்பந்தர் (1)       கோங்கமே குரவமே (1-91)
ஸ்தல மரம்	தென்னை
தீர்த்தம்	காவிரி,
பண்	சாதாரி
குறிப்புகள்	வாலி வழிபட்டு பேறு பெற்ற தலம்  தென்னங்குலையை வளைத்து கர்ப்பிணி பெண் ஒருத்தியின் தாகத்தை தீர்த்தவர்  சிட்டுக் குருவி பூசித்த தலம்.  இத்தலத்தில் நடராச பெருமான் சிவகாமி அம்மையுடன் மூலவராக கட்சி அளிக்கும் சிறப்பு உடையது.
பதிக பலன்	உயர்வான பதவி கிடைக்கும்.
வரிசை எண்.	91                                                     49/63

திருச்சிற்றம்பலம் 

கோங்கமே குரவமே கொழுமலர்ப்
          புன்னையே கொகுடிமுல்லை
வேங்கையே ஞாழலே விம்மு
          பாதிரிகளே விரவி எங்கும்
ஓங்குமா காவிரி வடகரை
          அடைகுரங் காடுதுறை
வீங்குநீர்ச் சடைமுடி அடிகளார்
          இடம் என விரும்பினாரே.  1

மந்த மாயிழி மதக் களிற்றின
          மருப்பொடு பொருப்பின்நல்ல
சந்தமார் அகிலொடு சாதிக்காய் யின்
          பலங்களுந் தகையமோதி
உந்துமா காவிரி வடகரை
          அடைகுரங் காடுதுறை
எந்தையார் இணையடி இமையவர்
          தொழுது எழும் இயல்பினாரே.  2

முத்துமா மணியொடு முழைவளர்
          ஆரமும் முகந்துநுந்தி
எத்துமா காவிரி வடகரை
          அடைகுரங் காடுதுறை
மத்தமா மலரொடு மதிபொதி
          சடைமுடி அடிகள்தம்மேல்
சித்தமாம் அடியவர் "சிவகதி
          பெறுவது திண்ணம்" அன்றே.  3

கறியுமா மிளகொடு கதலியின்
          பலங்களுங் கலந்துநுந்தி
எறியுமா காவிரி வடகரை
          அடைகுரங் காடுதுறை
மறியுலாங் கையினர் மலர் அடி
          தொழுது எழ மருவும் உள்ளக்
குறியினார் அவர்மிகக் கூடுவார்
          நீடுவான் உலகினூடே.  4

கோடிடைச் சொரிந்த தேன் அதனொடும்
          கொண்டல்வாய் விண்டமுன்னீர்
காடுடைப் பீலியும் கடறுடைப்
          பண்டமும் கலந்துநுந்தி
ஓடுடைக் காவிரி வடகரை
          அடைகுரங் காடுதுறை
பீடுடைச் சடைமுடி அடிகளார்
          இடம் எனப் பேணினாரே.  5

கோலமா மலரொடு தூபமும்
          சாந்தமும் கொண்டுபோற்றி
வாலியார் வழிபடப் பொருந்தினார்
          திருந்துமாங் கனிகள் உந்தி
ஆலுமா காவிரி வடகரை
          அடைகுரங் காடுதுறை
நீலமா மணிமிடற்று அடிகளை
          நினையவல் வினைகள்வீடே.  6

நீலமா மணிநிறத்து அரக்கனை
          இருபது கரத்தொடு ஒல்க
வாலினாற் கட்டிய வாலியார்
          வழிபட மன்னுகோயில்
ஏலமோடு இலை இலவங்கமே
          இஞ்சியே மஞ்சள் உந்தி
ஆலியா வருபுனல் வடகரை
          அடை குரங்காடுதுறையே.  8

பொருந்திறல் பெருங்கைமா உரித்து உமை
          அஞ்சவே ஒருங்குநோக்கிப்
பெருந்திறத்து அநங்கனை அநங்கமா
          விழித்ததும் பெருமைபோலும்
வருந்திறற் காவிரி வடகரை
          அடைகுரங் காடுதுறை
அருந்திறத்து இருவரை அல்லல்கண்டு 
          ஓங்கிய அடிகளாரே.  9

கட்டு அமண் தேரரும் கடுக்கள் தின்
          கழுக்களும் கசி ஒன்றில்லாப்
பிட்டர்தம் அறவுரை கொள்ளலும்
          பெருவரைப் பண்டமுந்தி
எட்டுமா காவிரி வடகரை
          அடைகுரங் காடுதுறைச்
சிட்டனார் அடி தொழச்  "சிவகதி
          பெறுவது திண்ணம்" ஆமே.  10

தாழ் இளம் காவிரி வடகரை
          அடைகுரங் காடுதுறைப்
போழ் இள மதிபொதி புரிதரு
          சடைமுடிப் புண்ணியனைக்
காழியான் அருமறை ஞான 
          சம்பந்தன கருதுபாடல்
கோழையா அழைப்பினும் கூடுவார்
          நீடு வான் உ லகின் ஊடே.

திருச்சிற்றம்பலம்

இப்பதிகத்தில் 7-ம் பாடல் கிடைக்கப்பெறவில்லை.  7

திரு மாகறல்

                                  

௨ 

திருஞானசம்பந்தர்   சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திருமாகறல்
ஊர்
நாடு	தொண்டை நாடு
ॐசுவாமி	திருமாகறலீஸ்வரர் , அடைக்கலம் காத்த நாதர்
ॐஅம்பிகை	திரிபுவன நாயகி
பாடியவர்கள்	ஞானசம்பந்தர்  (1)         விங்கு விலை கழனி (3-72)
ஸ்தல மரம்	எலுமிச்சை
தீர்த்தம்	அக்கினி தீர்த்தம்,  (சேயாறு
பண்	சாதாரி
குறிப்புகள்	இந்திரன் வழிபட்ட தலம்  மாகறன், மலையன் என்னும் அசுரர்கள் வழிபட்டது.  பிரார்த்தனை தளமாக வழக்கத்தில் உள்ளது
பதிக பலன்	தொல் வினை நீக்கம் பெறலாம்
வரிசை எண்.	72                                                        7/32

திருச்சிற்றம்பலம்          

விங்குவிளை கழனிமிகு கடைசியர்கள்

          பாடல்விளை யாடல் அரவம்

மங்குலொடு நீள்கொடிகள் மாடமலி

          நீடுபொழில் மாகறல் உளான்

கொங்குவிரி கொன்றையொடு கங்கைவளர்

          திங்கள் அணி செஞ்சடையினான்

செங்கண்விடை அண்ணல் அடி சேர்பவர்கள்

          தீவினைகள் தீரும் உடனே.  1  

கலையினொலி மங்கையர்கள் பாடல் ஒலி

          ஆடல்கவின் எய்தி அழகார்

மலையின்நிகர் மாடம் உயர் நீள்கொடிகள்

          வீசு மலி மாகறல் உளான்

இலையின்மலி வேல்நுனைய சூலம்வலன்

          ஏந்தி எரி புன்சடையினுள்

அலைகொள் புனல் ஏந்து பெருமான் அடியை

          ஏத்தவினை அகலுமிகவே.  2 

காலையொடு துந்துபிகள் சங்குகுழல்

          யாழ்முழவு காமருவுசீர்

மாலை வழிபாடு செய்து மாதவர்கள்

          ஏத்திமகிழ் மாகறல் உளான்

தோலை உடை பேணி அதன்மேல் ஒர்சுடர்

          நாகம் அசையா அழகிதாப்

பாலையன நீறுபுனை வானடியை

          ஏத்தவினை பறையுமுடனே.  3  

இங்குகதிர் முத்தினொடு பொன்மணிகள்

          உந்தி எழில் மெய்யுள் உடனே

மங்கையரும் மைந்தர்களும் மன்னுபுனல்

          ஆடி மகிழ் மாகறல் உளான்

கொங்குவளர் கொன்றை குளிர் திங்கள் அணி

          செஞ்சடையினான் அடியையே

நுங்கள் வினை தீர மிக ஏத்தி

          வழிபாடுநுக ரா எழுமினே.  4  

துஞ்சுநறு நீலம் இருள் நீங்க ஒளி

          தோன்றும் அதுவார் கழனிவாய்

மஞ்சுமலி பூம்பொழிலின் மயில்கள் நடம்

          ஆடல்மலி மாகறல் உளான்

வஞ்ச மத யானை உரி போர்த்துமகிழ்

          வானொர்மழு வாளன்வளரும்

நஞ்சம் இருள் கண்டமுடை நாதன்

          அடியாரைநலி யாவினைகளே.  5  

மன்னுமறை யோர்களொடு பல்படிம

          மாதவர்கள் கூடி உடனாய்

இன்னவகை யால் இனிது இறைஞ்சி

         இமையோரில் எழு மாகறல் உளான்

மின்னைவிரி புன்சடையின் மேன்மலர்கள்

        கங்கையொடு திங்கள் எனவே

உன்னும் அவர் தொல்வினைகள் ஒல்க உயர்

        வான் உலகம் ஏறல் எளிதே.  6  

வெய்யவினை நெறிகள்செல வந்தணையும்

          மேல்வினைகள் வீட்டல் உறுவீர்

மைகொள்விரி கானல்மது வார்கழனி

          மாகறல் உளான்எழிலதார்

கையகரி கால்வரையின் மேலதுரி

          தோலுடைய மேனி அழகார்

ஐயன் அடி சேர்பவரை அஞ்சி

          அடையாவினைகள் அகலுமிகவே.  7  

தூசுதுகில் நீள்கொடிகள் மேகமொடு

          தோய்வனபொன் மாடமிசையே

மாசுபடு செய்கைமிக மாதவர்கள்

          ஓதிமலி மாகறல் உளான்

பாசுபத விச்சைவரி நச்சரவு

          கச்சை உடை பேணி அழகார்

பூசுபொடி ஈசன் என ஏத்தவினை

          நிற்றலில்  போகும் உடனே.  8  

தூயவிரி தாமரைகள் நெய்தல் கழுநீர்

          குவளை தோன்ற மது உண்

பாயவரி வண்டுபல பண்முரலும்

          ஓசைபயில் மாகறலுளான்

சாயவிரல் ஊன்றிய இராவணன

          தன்மைகெட நின்றபெருமான்

ஆய புகழ் ஏத்தும்அடி யார்கள்வினை

          ஆயினவும் அகல்வது எளிதே.  9  

காலின்நல பைங்கழல்கள் நீள்முடியின்

          மேல் உணர்வு காமுறவினார்

மாலும் மலரானும் அறியாமை எரி

          எரியாகிய உயர் மாகறல் உளான்

நாலும் எரி தோலும் உரி மாமணிய

          நாகமொடு கூடியுடனாய்

ஆலும்விடை ஊர்தியுடை அடிகள்

          அடியாரை அடையா வினைகளே.  10  

கடைகொள்நெடு மாடமிக ஓங்குகமழ்

          வீதிமலி காழியவர் கோன்

அடையும்வகை யால் பரவி அரனையடி

          கூடுசம் பந்தன்உரையான்

மடைகொள்புன லோடுவயல் கூடுபொழில்

          மாகறல் உளான்அடியையே

உடையதமிழ் பத்தும் உணர் வாரவர்கள்

          தொல்வினைகள் ஒல்கும் உடனே.

திருச்சிற்றம்பலம்

திரு நெல்வெண்ணெய்

          

   

௨ 

திருஞானசம்பந்தர்  சுவாமிகள் அருளிச்செய்த
,மூன்றாம்  திருமுறை

தகவல் பலகை	விவரம்
தலம்	திரு நெல்வெண்ணெய்
ஊர்
நாடு	நடு நாடு
ॐசுவாமி	ஸ்வர்ண கடேஸ்வரர்  வெண்ணையப்பர்
ॐஅம்பிகை	நீலமலர்க் கண்ணி , பெரிய நாயகி,
பாடியவர்கள்	திருஞானசம்பந்தர் (1)         நல்வெணய்  விழுது  (3-96)
ஸ்தல மரம்	புன்னை
தீர்த்தம்	பெண்ணை ஆறு
பண்	சாதாரி
குறிப்புகள்	சனகாதி முனிவர் வழிபட்ட தலம்
பதிக பலன்	துயர் நீங்கும்.
வரிசை எண்.	96                                                             10/22

திருச்சிற்றம்பலம்

நெல்வெணெய் விழுதுபெய்து ஆடுதிர் நாள்தொறும்
நெல்வெணெய் மேவிய நீரே    
நெல்வெணெய் மேவிய நீர் உமை நாள்தொறும்
சொல்வணம் இடுவது சொல்லே.  1  

நிச்சலும் அடியவர் தொழுது எழு நெல்வெணெய்க்    
கச்சிள அரவு அசைத் தீரே    
கச்சிள அரவு அசைத் தீர் உமைக் காண்பவர்    
அச்சமொடு அருவினை இலரே.  2  

நிரைவிரி தொல்புகழ் நெல்வெணெய் மேவிய    
அரைவிரி கோவணத் தீரே    
அரைவிரி கோவணத் தீர் உமை அலர்கொடு    
உரைவிரிப் போர் உயர்ந் தோரே.  3  

நீர்மல்கு தொல்புகழ் நெல்வெணெய் மேவிய    
ஊர்மல்கி உறையவல் லீரே    
ஊர்மல்கி உறையவல் லீர் உமை உள்குதல்    
பார்மல்கு புகழவர் பண்பே.  4  

நீடு இளம் பொழில் அணி நெல்வெணெய் மேவிய    
ஆடிளம் பாப்பு அசைத் தீரே    
ஆடிளம் பாப்பசைத் தீருமை அன்பொடு    
பாடுளம் உடையவர் பண்பே.  5  

நெற்றி ஓர் கண்ணுடை நெல்வெணெய் மேவிய    
பெற்றிகொள் பிறைநுத லீரே    
பெற்றிகொள் பிறைநுத லீர் உமைப் பேணுதல்    
கற்று அறி வோர்கள்தம் கடனே.  6  

நிறை அவர் தொழுது எழு நெல்வெணெய் மேவிய    
கறை அணி மிடறு உடை யீரே    
கறை அணி மிடறு உடையீர் உமைக் காண்பவர்    
உறைவதும் உம் அடிக் கீழே.  7  

நெருக்கிய பொழில் அணி நெல்வெணெய் மேவியன்    
அரக்கனை அசைவுசெய் தீரே    
அரக்கனை அசைவுசெய் தீர் உமை அன்புசெய்    
திருக்கவல் லார் இடர் இலரே.  8  

நிரைவிரி சடைமுடி நெல்வெணெய் மேவியன்    
இருவரை இடர்கள்செய் தீரே    
இருவரை இடர்கள்செய் தீர் உருமை இசைவொடு    
பரவ வல்லார் பழி இலரே.  9  

நீக்கிய புனல் அணி நெல்வெணெய் மேவிய    
சாக்கியச் சமண்கெடுத் தீரே    
சாக்கியச் சமண்கெடுத் தீர் உமைச் சார்வது    
பாக்கியம் உடையவர் பண்பே.  10  

நிலமல்கு தொல்புகழ் நெல்வெணெய் ஈசனை    
நலமல்கு ஞானசம் பந்தன்    
நலமல்கு ஞானசம் பந்தன செந்தமிழ்    
சொலமல்கு வார் துயர் இலரே.

திருச்சிற்றம்பலம்

திரு மாணிக்குழி

    

   

௨ 

திருஞானசம்பந்தர்  சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருமாணிகுழி
ஊர்	வாமனபுரி, இந்திர லோகம்
நாடு	நடு நாடு
ॐசுவாமி	வாமனபுரீஸ்வரர் உதவி நாயகர், மாணிக்கவரதர்
ॐஅம்பிகை	அம்புஜாட்சி, உதவி நாயகி, மாணிக்கவல்லி
பாடியவர்கள்	திருஞானசம்பந்தர் (1)         பொன்னியல் பொருப்பரையன் (3-77)
ஸ்தல மரம்	கொன்றை
தீர்த்தம்	கெடில நதி சுவேத தீர்த்தம்
பண்	சாதாரி
குறிப்புகள்	திருமால் வாமன அவதாரத்தின் போது மாவலி சக்கரவர்த்தியிடம் 3 அடி மண் பெற்று அம்மண்ணை அழித்த பழி தீர பூசித்த தலம்
பதிக பலன்	இம்மைப் பயனும், மறுமைப் பயனும் கிட்டும்.
வரிசை எண்.	77                                                             17/22

திருச்சிற்றம்பலம்

பொன்னியல் பொருப்பரையன் மங்கை ஒரு
          பங்கர்புனல் தங்குசடைமேல்
வன்னியொடு மத்தமலர் வைத்தவிறல்
          வித்தகர் மகிழ்ந்துறைவிடம்
கன்னி இள வாளைகுதி கொள்ள இள
          வள்ளைபடர் அள்ளல்வயல்வாய்
மன்னியிள மேதிகள் படிந்துமனை
          சேர் உதவி மாணிகுழியே.  1  

சோதிமிகு நீறதுமெய் பூசி ஒரு
          தோலுடை புனைந்துதெருவே
மாதர்மனை தோறும்இசை பாடிவசி
          பேசும்அர னார் மகிழ்விடம்
தாதுமலி தாமரைம ணம் கமழ
          வண்டுமுரல் தண்பழனமிக்கு 
ஓதமலி வேலைபுடை சூழ் உலகில்
          நீடு உதவி மாணிகுழியே.  2  

அம்பனைய கண் உமை மடந்தை அவள்
          அஞ்சி வெரு வச் சினம் உடைக்
கம்பமத யானை உரி செய்த
          அரனார்கருதி மேய இடமாம்
வம்புமலி சோலைபுடை சூழமணி
          மாடம் அது நீடி அழகார்
உம்பர் அவர் கோன்நகரம் என்னமிக
          மன் உதவி மாணிகுழியே.  3  

நித்த நியமத் தொழிலன் ஆகி 
          நெடுமால் குறளன் ஆகி மிகவும்
சித்தம் அது ஒருக்கி வழி பாடு செய
          நின்றசிவ லோகன் இடமாம் 
கொத்தலர் மலர்ப்பொழிலின் நீடுகுல
          மஞ்ஞைநடம் ஆடல் அதுகண்டு 
ஒத்தவரி வண்டுகள் உலாவி இசை
      பாடு உதவி மாணிகுழியே.  4  

மாசில்மதி சூடுசடை மாமுடியர்
          வல் அசுரர் தொன்னகரமுன்
நாசம் அது செய்துநல வானவர்களுக்கு
          அருள் செய் நம்பன் இடமாம்
வாசமலி மென்குழல் மடந்தையர்கள்
          மாளிகையில் மன்னி அழகார்
ஊசல்மிசை ஏறி இனிதாக இசை
          பாடு உதவி மாணிகுழியே.  5  

மந்தமலர் கொண்டுவழி பாடுசெயு
          மாணி உயிர் வவ்வமனமாய்
வந்த ஒரு காலன் உயிர் மாள உதை
          செய்த மணிகண்டன் இடமாம்
சந்தினொடு கார் அகில் சுமந்துதட
          மாமலர்கள் கொண்டு கெடிலம்
உந்துபுனல் வந்துவயல் பாயுமண
          மார் உதவி மாணிகுழியே.  6  

எண்பெரிய வானவர்கள் நின்றுதுதி
          செய்யஇறை யேகருணையாய்
உண்பு அரிய நஞ்சு அதனை உண்டு உலகம்
          உய்யஅருள் உத்தமனிடம்
பண்பயிலும் வண்டுபல கெண்டி மது
          உண்டுநிறை பைம்பொழிலின்வாய்
ஒண்பலவின் இன்கனி சொரிந்துமணம்
          நாறு உதவி மாணிகுழியே.  7  

எண்ணம் அது இன்றி எழிலார் கைலை
          மாமலை எடுத்த திறலார்
திண்ணிய அரக்கனை நெரித்து அருள்
          புரிந்தசிவ லோகன் இடமாம்
பண் அமரும் மென்மொழியி னார்பணை
          முலைப்பவள வாய் அழகதார்
ஒண்ணுதல் மடந்தையர் குடைந்துபுனல்
          ஆடு உதவி மாணிகுழியே.  8  

நேடும் அயனோடு திருமாலும்உணரா
          வகை நிமிர்ந்துமுடிமேல்
ஏடுலவு திங்கள்மத மத்தம் இதழிச்
          சடை எம் ஈசனிடமாம்
மாடுலவு மல்லிகை குருந்துகொடி
          மாதவி செருந்தி குரவின்
ஊடுலவு புன்னைவிரி தாதுமலி
          சேர் உதவி மாணிகுழியே  9  

மொட்டை அமண் ஆதர்முது தேரர் மதி
          இல்லிகள் முயன்றனபடும்
முட்டைகண் மொழிந்தமொழி கொண்டு அருள்
          செய்யாத முதல்வன் தன் இடமாம்
மட்டைமலி தாழை இள நீர்முதிய
          வாழையில் விழுந்தஅதரில்
ஒட்டமலி பூகம்நிரை தாறுதிர
          வேறுத உதவி மாணிகுழியே.  10  

உந்திவரு தண்கெடிலமோடு புனல்
          சூழ் உதவி மாணிகுழிமேல்
அந்திமதி சூடியஎம் மானை அடி
          சேரும் அணி காழிநகரான்
சந்தம்நிறை தண் தமிழ் தெரிந்து உணரும்
          ஞானசம் பந்தனதுசொல்
முந்தி இசை செய்துமொழி வார்கள்
          உடையார்கள் நெடு வான நிலனே.

திருச்சிற்றம்பலம்

திருநெல்வேலி

                 

௨ 

திருஞானசம்பந்தர் சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருநெல்வேலி
ஊர் /வேறு பெயர்	நெல்லை/ வேணுவனம், சாலிநகர், தாருகாவனம்
நாடு	பாண்டிய நாடு
ॐசுவாமி	நெல்லையப்பர்
ॐஅம்பிகை	காந்திமதி அம்மை
பாடியவர்கள்	திருஞானசம்பந்தர் (1)         மருந்தவை மந்திரம் (3-092)
ஸ்தல மரம்	மா மரம்
தீர்த்தம்	தாமிரபரணி, சிந்து பூந்துறை
பண்	சாதாரி
குறிப்புகள்	அகத்திய முனிவருக்கு ஈசன் மணக் கோலம் காட்டி அருளிய தலம்
பதிக பலன்	கொடிய வினை மாயும்.
வரிசை எண்.	92                                                                14/14

திருச்சிற்றம்பலம்

மருந்து அவை மந்திரம் மறுமை
          நன்னெறி அவை மற்றும் எல்லாம்
அருந் துயர் கெடும் அவர் நாமமே
          சிந்தை செய் நன்நெஞ்சமே
பொருந்துதண் புறவினில் கொன்றைபொன்
          சொரி தர துன்று பைம்பூம்
செருந்திசெம் பொன்மலர் திருநெல்வேலி
          உறை செல்வர்தாமே.  1  

என்றும் ஓர் இயல்பினர் என
          நினைவு அரியவர் ஏறு அது ஏறிச்
சென்றுதாம்  செடிச்சியர் மனைதொறும்
          பலிகொளும் இயல்பதுவே
துன்றுதண் பொழில்நுழைந்து எழுவிய
          கேதகைப் போதளைந்து
தென்றல் வந்து உலவிய திருநெல்வேலி
          உறை செல்வர்தாமே.  2  

பொறிகிளர் அரவமும் போழிள
          மதியமும் கங்கை என்னும்
நெறிபடு குழலியைச் சடைமிசைச்
          சுலவி வெண் நீறு பூசிக்
கிறிபட நடந்து நற் கிளிமொழி
          அவர்மனம் கவர்வர்போலும்
செறிபொழில் தழுவிய திருநெல்வேலி
          உறை செல்வர்தாமே.  3  

காண் தகு மலைமகள் கதிர்நிலா
          முறுவல் செய்து அருளவேயும்
பூண்ட நாகம் புறங் காடு அரங்
          காநடம் ஆடல்பேணி
ஈண்டுமா மாடங்கள் மாளிகை
          மீது எழு கொடி மதியம்
தீண்டிவந்து உலவிய திருநெல்வேலி
          உறை செல்வர்தாமே.  4  

ஏனவெண் கொம்பொடும் எழில்திகழ்
          மத்தமும் இளஅரவும்
கூனல்வெண் பிறை தவழ் சடையினர்
          கொல்புலித் தோல் உடையார்
ஆனின் நல் ஐந்து உகந்து ஆடுவர்
          பாடுவர் அருமறைகள்
தேனில் வண்டு அமர் பொழில் திருநெல்வேலி
          உறை செல்வர்தாமே.  5  

வெடிதரு தலையினர் வேனல்வெள்
          ஏறு  ஏற்றினர் விரிசடையர்
பொடி அணி மார்பினர் புலியதள்
          ஆடையர் பொங்கரவர்
வடிவுடை மங்கையோர் பங்கினர்
          மாதரை மையல்செய்வார்
செடிபடு பொழில் அணி திருநெல்வேலி
          உறை செல்வர்தாமே.  6  

அக்கு உலாம் அரையினர் திரையுலாம்
          முடியினர் அடிகள் என்று
தக்கனார் வேள்வியைச் சாடிய
          சதுரனார் கதிர்கொள்செம்மை
புக்கதோர் புரிவினர் வரிதரு
          வண்டுபண் முரலும் சோலைத்
திக்கு எலாம் புகழுறும் திருநெல்வேலி
          உறை செல்வர்தாமே.  7  

முந்திமா விலங்கலல் அன்று  எடுத்தவன்
          முடிகள்தோள் நெரிதரவே
உந்திமா மலரடி யொருவிரல்
          உகிர்நுதி யால் அடர்த்தார்
கந்தமார் தருபொழில் மந்திகள்
          பாய்தர மதுத்திவலை
சிந்துபூந் துறைகமழ் திருநெல்வேலி
          உறை செல்வர்தாமே.  8  

பைங்கண்வாள் அரவணை அவனொடு
          பனிமல ரோனும் காணா
அங்கணா அருள் என அவரவர்
          முறைமுறை இறைஞ்ச நின்றார்
சங்கநான் மறையவர் நிறைதர
          அரிவையர் ஆடல்பேணத்
திங்கள் நாள் விழ மல்கு திருநெல்வேலி
          உறை செல்வர்தாமே.  9  

துவர் உறு விரிதுகில் ஆடையர்
          வேடமில் சமணர் என்னும்
அவர் உறு சிறுசொலை அவம் என
          நினையும் எம் அண்ணலார்தாம்
கவருறு கொடி மல்கு மாளிகைச்
          சூளிகை மயில்கள் ஆலத்
திவருறு மதிதவழ் திருநெல்வேலி
          உறை செல்வர்தாமே.  10  

பெருந்தண்மா மலர்மிசை அயனவன்
          அனையவர் பேணுகல்வித்
திருந்துமா மறையவர் திருநெல்வேலி
          உறை செல்வர்தம்மைப்
பொருந்துநீர்த் தடமல்கு புகலியுள்
          ஞானசம் பந்தன்சொன்ன
அருந்தமிழ் மாலைகள் பாடி
          ஆடக்கெடும் அருவினையே.

        

திருச்சிற்றம்பலம்