திரு காழிப்பாலை

                                                                                          ௨ 

திருநாவுக்கரசர்  அருளிச்செய்த

ஆறாம் திருமுறை

தகவல் பலகை	விவரம்
தலம்	திருக்கழிப்பாலை
ஊர்/வேறு பெயர்
நாடு	சோழ (காவிரி வட)
ॐசுவாமி	பால் வண்ண நாதர்
ॐஅம்பிகை	வேத நாயகி
பாடியவர்கள்	சம்பந்தர் (2)     புனல் ஆடியபுன் (2-21)     வெந்த குங்குலியப் புகை (3-44)     அப்பர் (5)     வனபவள வாய் திறந்து (4-006)     நங்கையைப் பாகம் வைத்தார் (4-30)     நெய்தற் குருகுதன் பிள்ளை (4-106)     வண்ணமும் வடிவும் சென்று (5-40)     ஊன் உடுத்தி ஒன்பது வாசல் (6-12) சுந்தரர் (1)         செடியேன் தீவினையில் தடுமாற(7-23)
ஸ்தல மரம்	வில்வம்
தீர்த்தம்	கொள்ளிடம்
பண்	திரு தாண்டகம்
குறிப்புகள்	வால்மீகி முனிவர் வழிபட்டு பேறு பெற்றது
பதிக பலன்	திருவருள் சித்திக்கும்.
வரிசை எண்.	12                                                                  4/63

திருச்சிற்றம்பலம்

ஊன் உடுத்தி என்பது வாசல் வைத்து 

ஒள் எலும்பு தூணா உரோமம்  மேய்ந்து

தாம் எடுத்த கூரை தவிரப் போவார்

தயக்கம் பலபடைத்தார் தாம ரையினார்

கானெடுத்து மாமயில்க ளாலும் சோலைக் 

கழிப்பாலை மேய கபாலப் பனார்

வான் இடத்தை ஊடறுத்து வல்லைச் செல்லும் 

வழிவைத்தார்க்கு இவ்வழியே போதும் நாமே.  1

முறையார்ந்த மும்மதிலும் பொடியாச் செற்று

முன்னுமாய்ப் பின்னுமாய் முக்கண் எந்தை

பிறையார்ந்த சடைமுடிமேற் பாம்பு கங்கை

பிணக்கந்தீர்த் துடன்வைத்தார் பெரிய நஞ்சுக்

கறையார்ந்த மிடற்று அடங்கக் கண்ட எந்தை

கழிப்பாலை மேய கபாலப் பனார்

மறையார்ந்த வாய்மொழியான் மாய யாக்கை

வழிவைத்தார்க்கு இவ்வழியே போதும் நாமே.  2

நெளிவுண்டாக் கருதாதே நிமலன் தன்னை 

நினைமின்கள் நித்தலும்நே ரிழையா ளாய

ஒளிவண்டார் கருங்குழலி உமையாள் தன்னை 

ஒருபாகத் தமர்ந்தடியா ருள்கி யேத்தக்

களிவண்டார் கரும்பொழில்சூழ் கண்டல் வேலிக் 

கழிப்பாலை மேய கபாலப் பனார்

வளியுண்டார் மாயக் குரம்பை நீங்க 

வழிவைத்தார்க்கு அவ்வழியே போதும் நாமே.  3

பொடிநாறு மேனியர் பூதிப் பையர்

புலித்தோலர் பொங்கரவர் பூண நூலர்

அடிநூறு கமலத்தர் ஆரூ ராதி

ஆனஞ்சும் ஆடுமா திரையி னார்தாங்

கடிநாறு பூஞ்சோலை கமழ்ந்து நாறுங் 

கழிப்பாலை மேய கபாலப் பனார்

மடிநாறு மேனி இம் மாயம் நீங்க 

வழிவைத்தார்க்கு அவ்வழியே போதும் நாமே.  4

விண்ணானாய் விண்ணவர்கள் விரும்பி வந்து

வேதத்தாய் கீதத்தாய் விரவி எங்கும்

எண்ணானாய் எழுத்தானாய் கடலே ழானாய்

இறையானாய் எம் இறையே என்று நிற்கும்

கண்ணானாய் காரானாய் பாரு மானாய்

கழிப்பாலை உள்ளுறையும் கபாலப் பனார்

மண்ணானாய் மாயக் குரம்பை நீங்க 

வழிவைத்தார்க்கு அவ்வழியே போதும் நாமே.  5

விண்ணப்ப விச்சா தரர்கள் ஏத்த

விரிகதிரோன் எரிசுடரான் விண்ணு மாகிப்

பண்ணப்பன் பத்தர் மனத்து ளேயும் 

பசுபதி பாசுபதன் தேச மூர்த்தி

கண்ணப்பன் கண்ணப்பக் கண்டு கந்தார்

கழிப்பாலை மேய கபாலப் பனார்

வண்ணப் பிணிமாய யாக்கை நீங்க 

வழிவைத்தார்க்கு அவ்வழியே போதும் நாமே.  6

பிணம்புல்கு பீறற் குரம்பை மெய்யாப் 

பேதப் படுகின்ற பேதை மீர்காள்

நிணம்புல்கு சூலத்தர் நீல கண்டர்

எண்டோ ளர் எண் நிறைந்த குணத்தி னாலே

கணம்புல்லன் கருத்துகந்தார் காஞ்சி உள்ளார்

கழிப்பாலை மேய கபாலப் பனார்

மணம்புல்கு மாயக் குரம்பை நீங்க

வழிவைத்தார்க்கு அவ்வழியே போதும் நாமே.  7

இயல்பாய ஈசனை எந்தை தந்தை

என்சிந்தை மேவி உறைகின் றானை

முயல்வானை மூர்த்தியைத் தீர்த்த மான 

தியம்பகன் திரிசூலத் தன்ன கையன்

கயல்பாயுங் கண்டல்சூழ் வுண்ட வேலிக் 

கழிப்பாலை மேய கபாலப் பனார்

மயலாய மாயக் குரம்பை நீங்க 

வழிவைத்தார்க்கு அவ்வழியே போதும் நாமே.  8

செற்றதோர் மனமொழிந்து சிந்தை செய்து

சிவமூர்த்தி என்றெழுவார் சிந்தை உள்ளால்

உற்றதோர் நோய்களைந்து இவ் வுலகம் எல்லாம்

காட்டுவான் உத்தமன்றா னோதாது எல்லாம் 

கற்றதோர் நூலினன் களிறு செற்றான்

கழிப்பாலை மேய கபாலப் பனார்

மற்றிதோர் மாயக் குரம்பை நீங்க 

வழிவைத்தார்க்கு அவ்வழியே போதும் நாமே.  9

பொருதலங்கல் நீண்முடியான் போர் அரக்கன்

புட்பகந்தான் பொருப்பின் மீதோடா தாக

இருநிலங்கள் நடுக்கு எய்த எடுத்தி டுதலும்

ஏந்திழையாள் தான்வெருவ இறைவன் நோக்கிக்

கரதலங்கள் கதிர்முடியாற் அஞ்சி னோடு 

கால்விரலால் ஊன்று கழிப்பா லையார்

வருதலங்க மாயக் குரம்பை நீங்க 

வழிவைத்தார்க்கு அவ்வழியே போதும் நாமே.  10

திருச்சிற்றம்பலம்

திரு சாய்க்காடு

                                                                                   ௨ 

திருநாவுக்கரசு  சுவாமிகள்  அருளிச்செய்த
ஆறாம் திருமுறை

தகவல் பலகை	விவரம்
தலம்	திரு சாய்க்காடு
ஊர்/வேறு பெயர்	சாயாவனம்
நாடு	சோழ (காவிரி வட)
ॐசுவாமி	சாயாவனேஸ்வரர்
ॐஅம்பிகை	குயிலினும் நன்மொழியம்மை
பாடியவர்கள்	சம்பந்தர்   (2)         நித்தலும் நியமம் செய்து (2-38)         மண் புகார் வான் புகுவர் (2-41) அப்பர் (2)         தோடுலா மலர்கள் தூவி (4-65)         வானத்து இள மதியம் (6-82)
ஸ்தல மரம்	பைஞ்சாய், (கோரைப் புல்)
தீர்த்தம்	காவிரி, ஐராவத தீர்த்தம்
பண்	திருத்தாண்டகம்
குறிப்புகள்	கோச்செங்கட் சோழன் கட்டிய மாடக் கோயில். உபமன்யு முனிவர், இந்திரன், ஐராவதம் வழிபட்டது.  இயற்பகை நாயனார் வழிபட்ட தலம்  காசிக்கு சமமான சிறப்பு சொல்லப்படும் தலங்கள் ஆறு;  அதில் அவற்றில் ஒன்று இது
பதிக பலன்	இப்பூலகில் புகழுடன் எல்லா வளமும் பெற்று வாழ்வர்
வரிசை எண்.	82                                                           9/63

திருச்சிற்றம்பலம்

வானத்து இளமதியும் பாம்பும் தம்மில்

வளர்சடைமேல் ஆதரிப்ப வைத்தார் போலும்

தேனைத் திளைத்துண்டு வண்டு பாடும்

தில்லை நடமாடும் தேவர் போலும்

ஞானத்தின் ஒண்சுடராய் நின்றார் போலும்

நன்மையும் தீமையும் ஆனார் போலும்

தேன் ஒத்து அடியார்க்கு இனியார் போலும்

திருச்சாய்க்காட்டில் இனிது உறையும் செல்வர் தாமே.  1

விண்ணோர் பரவநஞ் சுண்டார் போலும்

வியன்துருத்தி வேள்விக் குடியார் போலும்

அண்ணா மலை உறையும் அண்ணல் போலும்

அதியரைய மங்கை அமர்ந்தார் போலும்

பண்ணார் களிவண்டு பாடி ஆடும்

பராய்த்துறையுள் மேய பரமர் போலும் 

திண்ணார் புகார்முத் தலைக்கும்  தெண்ணீர்த்

திருச்சாய்க்காட்டில் இனிது உறையும் செல்வர் தாமே.  2

கானிரிய வேழ முரித்தார் போலும் 

காவிரிப்பூம் பட்டினத்து உள்ளார் போலும்

வானிரிய வருபுரமூன்று எரித்தார் போலும்

வடகயிலை மலையது தம் மிருக்கை போலும்

ஊனிரியத் தலைகலனா வுடையார் போலும்

உயர்தோணி புரத்துறையும் ஒருவர் போலும் 

தேனிரிய மீன்பாயும்  தெண்ணீர்ப் பொய்கைத்

திருச்சாய்க்காட்டில் இனிது உறையும் செல்வர் தாமே.  3

ஊனுற்ற வெண்டலைசேர் கையர் போலும்

ஊழி பலகண்டு இருந்தார் போலும்

மான் உற்ற கரதலம் ஒன்று உடையார் போலும்

மறைக்காட்டுக் கோடி மகிழ்ந்தார் போலும் 

கானுற்ற ஆடல் அமர்ந்தார் போலும் 

காமனையும்  கண்ணழலாற் காய்ந்தார் போலும் 

தேனுற்ற சோலை திகழ்ந்து தோன்றும் 

திருச்சாய்க்காட்டில் இனிது உறையும் செல்வர் தாமே.  4

கார்மல்கு கொன்றையந் தாரார் போலும் 

காலனையும் ஓருதையாற் கண்டார் போலும்

பார்மல்கி ஏத்தப் படுவார் போலும்

பருப்பதத்தே பல் ஊழி நின்றார் போலும்

ஊர்மல்கு பிச்சைக் குழன்றார் போலும்

ஓத்தூர் ஒருநாளும் நீங்கார் போலும் 

சீர்மல்கு பாடல் உகந்தார் போலும் 

திருச்சாய்க்காட்டில் இனிது உறையும் செல்வர் தாமே.  5

மாவாய்ப் பிளந்து உகந்த மாலும்  செய்ய

மலர் அவனும்  தாமேயாய் நின்றார் போலும்

மூவாத மேனி முதல்வர் போலும்

முதுகுன்ற மூதூர் உடையார் போலும் 

கோவாய முனிதன்மேல் வந்த கூற்றைக்

குரைகழலால் அன்று குமைத்தார் போலும் 

தேவாதி தேவர்க்கு அரியார் போலும் 

திருச்சாய்க்காட்டில் இனிது உறையும் செல்வர் தாமே.  6

கடுவெளியோடு ஒர் ஐந்தும் ஆனார் போலும் 

காரோணத்து என்றும் இருப்பார் போலும்

இடிகுரல்வாய்ப் பூதப் படையார் போலும்

ஏகம்பம் மேவி இருந்தார் போலும்

படியொருவர் இல்லாப் படியார் போலும்

பாண்டிக் கொடுமுடியும்  தம்மூர் போலும் 

செடிபடுநோய் அடியாரைத் தீர்ப்பார் போலும் 

திருச்சாய்க்காட்டில் இனிது உறையும் செல்வர் தாமே.  7

விலையிலா ஆரம்  சேர் மார்பர் போலும்

வெண்ணீறு மெய்க்கு அணிந்த விகிர்தர் போலும்

மலையினார் மங்கை மணாளர் போலும்

மாற்பேறு காப்பாய் மகிழ்ந்தார் போலும் 

தொலைவிலார் புரம் மூன்றும்  தொலைத்தார் போலும் 

சோற்றுத் துறை துருத்தி உள்ளார் போலும் 

சிலையினார் செங்க ணர் அவர் போலும் 

திருச்சாய்க்காட்டில் இனிது உறையும் செல்வர் தாமே.  8

அல்லல் அடியார்க்கு அறுப்பார் போலும்

அமர் உலகம்  தம் அடைந்தார்க் காட்சி போலும்

நல்லமும் நல்லூரும் மேயார் போலும்

நள்ளாறு நாளும் பிரியார் போலும்

முல்லை முகைநகையாள் பாகர் போலும்

முன்னமே தோன்றி முளைத்தார் போலும் 

தில்லை நடமாடும்  தேவர் போலும் 

திருச்சாய்க்காட்டில் இனிது உறையும் செல்வர் தாமே.  9

உறைப்புடைய இராவணன்பொன் மலையைக் கையால்

ஊக்கம் செய் தெடுத்தலுமே உமையா ளஞ்ச

நிறைப்பெருந்தோள் இருபதும்பொன் முடிகள் பத்தும்

நிலஞ்சேர விரல்வைத்த நிமலர் போலும்

பிறைப்பிளவு சடைக்கணிந்த பெம்மான் போலும்

பெண்ணா ணுருவாகி நின்றார் போலுஞ்

சிறப்புடைய அடியார்கட் கினியார் போலுந்

        திருச்சாய்க்காட்டில் இனிது உறையும் செல்வர் தாமே  10

திருச்சிற்றம்பலம்

திரு வெண்காடு

                                                                                              ௨ 

திருநாவுக்கரசு சுவாமிகள்  அருளிச்செய்த
ஆறாம்  திருமுறை

தகவல் பலகை	விவரம்
தலம்	திருவெண்காடு
ஊர்/வேறு பெயர்
நாடு	சோழ (காவிரி வட)
ॐசுவாமி	சுவேதாரண்யேஸ்வரர்
ॐஅம்பிகை	பிரம்ம வித்யா நாயகி
பாடியவர்கள்	சம்பந்தர்   (3)         கண் காட்டும் நுதலானும்(2-48)         உண்டாய் நஞ்சை (2-61)         மந்திர மறையவை (3-15) அப்பர் (2)         பண் காட்டிப்படி (5-49)         தூண்டு சுடர்மேனி(6-35) சுந்தரர் (1)         படம் கொள் நாகம் (7-06)
ஸ்தல மரம்	வட ஆலமரம்
தீர்த்தம்	முகுளம்
பண்	திருத்தாண்டகம்
குறிப்புகள்	இந்திரன், ஐராவதம் வழிபட்டது  தீர்த்தம் மகிமை உடையது  பிள்ளைப் பேறு வாய்க்கும் தலம் என்று பெயர் பெற்றது
பதிக பலன்	வாழ்வில் உய்தி பெற
வரிசை எண்.	35                                                          11/63

திருச்சிற்றம்பலம்

தூண்டு சுடர்மேனித் தூநீ றாடிச்

சூலங்கை ஏந்தியோர் சுழல்வாய் நாகம்

பூண்டு பொறியரவம்  காதிற் பெய்து

பொற்சடைகள் அவைதாழப் புரிவெண் ணூலர்

நீண்டு கிடந்து இலங்கு திங்கள் சூடி

நெடுந்தெருவே வந்து எனது நெஞ்சம் கொண்டார்

வேண்டு நடைநடக்கும் வெள்ளேறு ஏறி

வெண்காடு மேவிய விகிர்த னாரே.  1

பாதம் தரிப்பார்மேல் வைத்த பாதர்

பாதாள மேழ் உருவப் பாய்ந்த பாதர்

ஏதம் படாவண்ணம் நின்ற பாதர்

ஏழ் உலகு மாய்நின்ற ஏக பாதர்

ஓதத் தொலிமடங்கி ஊருண் டேறி

ஒத்துலகம் எல்லாம் ஒடுங்கி யபின்

வேதத்து ஒலிகொண்டு வீணை கேட்பார்

வெண்காடு மேவிய விகிர்த னாரே.  2

நென்னலை ஓர் ஓடு ஏந்திப் பிச்சைக்கு என்று 

வந்தார்க்கு வந்தேன் என்றில்லே புக்கேன்

அந்நிலையே நிற்கின்றார் ஐயங் கொள்ளார்

அருகே வருவார் போல் நோக்கு கின்றார்

நுந்நிலைமை ஏதோநும் மூர்தா னேதோ

என்று எனுக்கு ஒன்றாகச் சொல்ல மாட்டார்

மென்முலையார் கூடி விரும்பி யாடும் 

வெண்காடு மேவிய விகிர்த னாரே.  3

ஆகத்து உமை அடக்கி ஆறு சூடி

ஐவா யரவசைத்து அங்கானே றேறிப்

போகம் பலவுடைத்தாய்ப் பூதஞ் சூழப்

புலித்தோல் உடையாப் புகுந்து நின்றார்

பாகிடுவான் சென்றேனைப் பற்றி நோக்கிப்

பரிசு அழித்து என் வளைகவர்ந்தார் பாவி யேனை

மேக முகில் உரிஞ்சு சோலை சூழ்ந்த 

வெண்காடு மேவிய விகிர்த னாரே.  4

கொள்ளைக் குழைக்காதிற் குண்டைப் பூதங் 

கொடுகொட்டி கொட்டிக் குனித்துப் பாட

உள்ளங் கவர்ந்திட்டுப் போவார் போல 

உழிதருவர் நான்தெரிய மாட்டேன் மீண்டேன்

கள்ள விழிவிழிப்பார் காணாக் கண்ணாற்

கண்ணுளார் போலே கரந்து நிற்பர்

வெள்ளச் சடைமுடியர் வேத நாவர்

வெண்காடு மேவிய விகிர்த னாரே.  5

தொட்டிலங்கு சூலத்தர் மழுவாள் ஏந்திச்

சுடர்க்கொன்றைத் தாரணிந்து சுவைகள் பேசிப்

பட்டிவெள் ளேறு ஏறிப் பலியுங் கொள்ளார்

பார்ப்பாரைப் பரிசு அழிப்பார் ஒக்கின் றாராற்

கட்டிலங்கு வெண்ணீற்றர் கனலப் பேசிக் 

கருத்து அழித்து வளைகவர்ந்தார் காலை மாலை

விட்டிலங்கு சடைமுடியர் வேத நாவர்

வெண்காடு மேவிய விகிர்த னாரே.  6

பெண்பால் ஒரு பாகம் பேணா வாழ்க்கைக்

கோள்நாகம் பூண்பனவும் நாணாம் சொல்லார்

உண்பார் உறங்குவார் ஒவ்வா நங்காய்

உண்பதுவும் நஞ்சன்றே ஓவி  உண்ணார்

பண்பால் விரிசடையர் பற்றி நோக்கிப்

பாலைப் பரிசழியப் பேசு கின்றார்

விண்பால் மதிசூடி வேதம் ஓதி

வெண்காடு மேவிய விகிர்த னாரே.  7

மருதங்க ளாம் எரிவர் மங்கை யோடு

வானவரும் மால் அயனும்  கூடித் தங்கள்

சுருதங்க ளாற்று தித்துத் தூநீ ராட்டித்

தோத்திரங்கள் பலசொல்லித் தூபம் காட்டிக்

கருதுங்கொல் எம்பெருமான் செய்குற்று ஏவல்

என்பார்க்கு வேண்டும் வரம் கொடுத்து

விகிர்தங்க ளாநடப்பர் வெள்ளேறு ஏறி

வெண்காடு மேவிய விகிர்த னாரே.  8

புள்ளானும் நான்முகனும் புக்கும் போந்தும் 

காணார் பொறி அழலாய் நின்றான் தன்னை

உள்ளானை ஒன்றல்லா உருவி னானை

உலகுக்கு ஒரு விளக்காய் நின்றான் தன்னைக்

கள்ளேந்து கொன்றை தூய்க் காலை மூன்றும் 

ஓவாமே நின்று தவங்கள் செய்த

வெள்ளானை வேண்டும் வரம் கொடுப்பார்

வெண்காடு மேவிய விகிர்த னாரே.  9

மாக்குன்று எடுத்தோன்தன் மைந்த னாகி 

மாவேழம் வில்லா மதித்தான் தன்னை

நோக்கும்  துணைத்தேவர் எல்லாம் நிற்க

நொடிவரையில் நோவ விழித்தான் தன்னைக்

காக்கும்  கடல் இலங்கைக் கோமான் தன்னைக் 

கதிர்முடியும்  கண்ணும் பிதுங்க ஊன்றி

வீக்கந் தவிர்த்த விரலார் போலும்

வெண்காடு மேவிய விகிர்த னாரே.  10

திருச்சிற்றம்பலம்

திரு புள் இருக்கு வேளூர்

                                                                                      ௨ 

திருநாவுக்கரசு   சுவாமிகள்  அருளிச்செய்த
ஆறாம்   திருமுறை

தகவல் பலகை	விவரம்
தலம்	திரு புள் இருக்கு வேளூர்
ஊர்/வேறு பெயர்	வைத்தீஸ்வரன் கோயில்
நாடு	சோழ (காவிரி வட)
ॐசுவாமி	வைத்தியநாதர்
ॐஅம்பிகை	தையல் நாயகி
பாடியவர்கள்	சம்பந்தர்   (1)       கள்ளார்ந்த பூங்கொன்றை (2-43) அப்பர் (2)         வெள்ளெருக்கு அரவம் (5-79)         ஆண்டானை அடியேனை (6-54)
ஸ்தல மரம்	வேம்பு - வேப்பமரம்
தீர்த்தம்	சித்தாமிர்த தீர்த்தம்
பண்	திருத்தாண்டகம்
குறிப்புகள்	சடாயு, வேதம், முருகன் சூரியன் வழிபட்டது  இத்திருத்தலத்திற்கு சடாயுபுரி, வேதபுரி, கந்தபுரி, பரிதிபுரி, அன்காரபுரம், அம்பிகாபுரம் என்ற சிறப்பு பெயர்கள் உண்டு  அம்பிகை, அங்காகன் ராமர், இலக்குவர் பூசித்த தலம். செவ்வாய் கிரகம் சாப விமோச்சனம் பெற்ற தலம்  இது பிணி தீர்க்கும் தளமாக வழிபாடு செயப்படுகிறது.
பதிக பலன்	பாவம் விலகும்
வரிசை எண்.	54                                                           16/63

திருச்சிற்றம்பலம்

ஆண்டானை அடியேனை ஆளாக் கொண்டு
அடியோடு முடி அயன் மால் அறியா வண்ணம்
நீண்டானை நெடுங்களமா நகரான் தன்னை
நேமிவான் படையால்நீ ளுரவோன் ஆகங்
கீண்டானைக் கேதாரம் மேவி னானைக்
கேடிலியைக் கிளர்பொறிவாள் அரவோடு என்பு
பூண்டானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  1

சீர்த்தானைச் சிறந்தடியேன் சிந்தை உள்ளே 
திகழ்ந்தானைச் சிவன் தன்னைத் தேவ தேவைக்
கூர்த்தானைக் கொடுநெடுவேற் கூற்றம் தன்னைக் 
குரைகழலாற் குமைத்துமுனி கொண்ட அச்சம்
பேர்த்தானைப் பிறப்பு இலியை இறப்பு ஒன்று இல்லாப் 
பெம்மானைக் கைம்மாவின் உரிவை பேணிப்
போர்த்தானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  2

பத்திமையால் பணிந்து அடியேன் தன்னைப் பன்னாள்
பாமாலை பாடப் பயில்வித் தானை
எத்தேவும் ஏத்தும் இறைவன் தன்னை
எம்மானை என்னுள்ளத்து உள்ளே ஊறும்
அத்தேனை அமுதத்தை ஆவின் பாலை
அண்ணிக்குந் தீங்கரும்பை அரனை ஆதிப்
புத்தேளைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  3

இருளாய உள்ளத்தின் இருளை நீக்கி
இடர்பாவங் கெடுத்தேழை யேனை உய்யத்
தெருளாத சிந்தைதனைத் தெருட்டித் தன்போற்
சிவலோக நெறி அறியச் சிந்தை தந்த
அருளானை ஆதிமா தவத்து உளானை
ஆறங்கம் நால்வேதத்து அப்பால் நின்ற
பொருளானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  4

மின்னுருவை விண்ணகத்தில் ஒன்றாய் மிக்கு 
வீசுங்கால் தன்னகத்தில் இரண்டாய்ச் செந்தீத்
தன்னுருவின் மூன்றாய்த்தாழ் புனலின் நான்காய்த்
தரணிதலத்து அஞ்சாகி  எஞ்சாத் தஞ்ச
மன்னுருவை வான்பவளக் கொழுந்தை முத்தை
வளரொளியை வயிரத்தை மாசு ஒன்று இல்லாப்
பொன்னுருவைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  5

அறையார்பொற் கழலார்ப்ப அணியார் தில்லை 
அம்பலத்துள் நடமாடும் அழகன் தன்னைக்
கறையார்மூ விலைநெடுவேற் கடவுள் தன்னைக்
கடல்நாகைக் காரோணம் கருதி னானை
இறையானை என் உள்ளத்துள்ளே விள்ளா 
திருந்தானை ஏழ்பொழிலும் தாங்கி நின்ற
பொறையானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  6

நெருப்பனைய திருமேனி வெண்ணீற் றானை
நீங்காது என் உள்ளத்தின் உள்ளே நின்ற
விருப்பவனை வேதியனை வேத வித்தை
வெண்காடும் வியன்துருத்தி நகரும் மேவி
இருப்பவனை இடைமருதோடு ஈங்கோய் நீங்கா 
இறையவனை எனையாளும் கயிலை என்னும்
பொருப்பவனைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  7

பேரா யிரம்பரவி வானோர் ஏத்தும் 
பெம்மானைப் பிரிவிலா அடியார்க்கு என்றும்
வாராத செல்வம் வருவிப் பானை
மந்திரமும் தந்திரமும் மருந்தும் ஆகித்
தீராநோய் தீர்த்து அருள வல்லான் தன்னைத்
திரிபுரங்கள் தீயெழத்திண் சிலைகைக் கொண்ட
போரானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  8

பண்ணியனைப் பைங்கொடியாள் பாகன் தன்னைப்
படர்சடைமேற் புனல்கரந்த படிறன் தன்னை
நண்ணியனை என்னாக்கித் தன்னான் ஆனை
நான்மறையின் நற்பொருளை நளிர்வெண் டிங்கள்
கண்ணியனைக் கடியநடை விடை ஒன்றேறும்
காரணனை நாரணனைக் கமலத்து ஓங்கும்
புண்ணியனைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  9

இறுத்தானை இலங்கையர்கோன் சிரங்கள் பத்தும்
எழுநரம்பின் இன்னிசைகேட்டு இன்புற் றானை
அறுத்தானை அடியார்தம் அருநோய் பாவம்
அலைகடலில் ஆலாலம் உண்டு கண்டம்
கறுத்தானைக் கண்ணழலாற் காமன் ஆகங்
காய்ந்தானைக் கனன்மழுவுங் கலையு மங்கை
பொறுத்தானைப் புள்ளிருக்கு வேளூ ரானைப்
போற்றாதே ஆற்றநாள் போக்கி னேனே.  10

திருச்சிற்றம்பலம்

நீடூர்

                                                                           ௨ 

திருநாவுக்கரசு  சுவாமிகள்  அருளிச்செய்த
ஐந்தாம் திருமுறை

தகவல் பலகை	விவரம்
தலம்	திரு நீடூர்
ஊர்/வேறு பெயர்
நாடு	சோழ (காவிரி வட)
ॐசுவாமி	அருட் சோமனாதேஸ்வரர்
ॐஅம்பிகை	வேதநாயகி, வேயுறு தோளி அம்மை
பாடியவர்கள்	அப்பர்  (1)     பிறவாதே தோன்றிய (6-11) சுந்தரர்  (1)         ஊர்வதோர் விடை (7-56)
ஸ்தல மரம்	மகிழ மரம்
தீர்த்தம்
பண்	திருத்தாண்டகம்
குறிப்புகள்	இந்திரன், சூரியன், சந்திரன், காளி, நண்டு ஆகியோர் வழிபட்ட தலம்  முனையடுவார் நாயனார் திருத் தோடு புரிந்து முத்தி அடைந்த தலம்.
பதிக பலன்	இறையருள் கிட்டும்.
வரிசை எண்.	11                                                           21/63

திருச்சிற்றம்பலம்

பிறவாதே தோன்றிய பெம்மான் தன்னைப்
பேணாதார் அவர்தம்மைப் பேணா தானைத்
துறவாதே கட்டறுத்த சோதி யானைத்
தூநெறிக்கும் தூநெறியாய் நின்றான் தன்னைத்
திறமாய எத்திசையும்  தானே ஆகித் 
திருப்புன்கூர் மேவிய சிவலோ கனை
நிறமா மொளியானை நீடூ ரானை
நீதனேன் என்னே நான் நினையா வாறே.  1

பின் தானும் முன் தானும் ஆனான் தன்னைப்
பித்தர்க்குப் பித்தனாய் நின்றான் தன்னை
நன்றாங்கு  அறிந்தவர்க்குந் தானே ஆகி 
நல்வினையும் தீவினையும் ஆனான் தன்னைச்
சென்று ஓங்கி விண்ணளவும் தீயா னானைத்
திருப்புன்கூர் மேவிய சிவலோ கனை
நின்றாய நீடூர் நிலாவி னானை
நீதனேன் என்னே! நான் நினையா வாறே.  2

இல்லானை எவ்விடத்தும் உள்ளான் தன்னை
இனியநினை யாதார்க்குக் இன்னா தானை
வல்லானை வல்லடைந்தார்க்கு அருளும் வண்ணம்
மாட்டாதார்க்கு எத்திறத்தும் மாட்டா தானைச்
செல்லாத செந்நெறிக்கே செல்விப் பானைத்
திருப்புன்கூர் மேவிய சிவலோ கனை
நெல்லால் விளைகழனி நீடூ ரானை
நீதனேன் என்னே நான் நினையா வாறே.  3

கலைஞானம் கல்லாமே கற்பித் தானைக்
கடுநரகம்  சாராமே காப்பான் தன்னைப்
பலவாய வேடங்கள் தானே ஆகிப்
பணிவார்கட்கு அங்கங்கே பற்றா னானைச்
சிலையாற் புரம் எரித்த தீயா டியைத்
திருப்புன்கூர் மேவிய சிவலோ கனை
நிலையார் மணிமாட நீடூ ரானை
நீதனேன் என்னேநான் நினையா வாறே.  4

நோக்காதே எவ்வளவும் நோக்கி னானை
நுணுகாதே யாது ஒன்றும் நுணுகி னானை
ஆக்காதே யாது ஒன்றும் ஆக்கி னானை
அணுகாதார் அவர்தம்மை அணுகா தானைத்
தேக்காதே தெண்கடல்நஞ் சுண்டான் தன்னைத்
திருப்புன்கூர் மேவிய சிவலோ கனை
நீக்காத பேரொளிசேர் நீடு ரானை
நீதனேன் என்னேநான் நினையா வாறே.  5

பூணலாப் பூணானைப் பூசாச் சாந்தம்  
உடையானை முடைநாறும் புன்க லத்தில்
ஊணலா ஊணானை ஒருவர் காணா 
உத்தமனை ஒளிதிகழும் மேனி யானைச்
சேணுலாம் செழும்பவளக் குன்று ஒப் பானைத்
திருப்புன்கூர் மேவிய சிவலோ கனை
நீணுலா மலர்க்கழனி நீடூ ரானை
நீதனேன் என்னேநான் நினையா வாறே.  6

உரையார் பொருளுக்கு உலப்பி லானை
ஒழியாமே எவ்வுயிரும் ஆனான் தன்னைப்
புரையாய்க் கனமாயாழ்ந் தாழா தானைப்
புதியனவுமாய் மிகவும் பழையான் தன்னைத்
திரையார் புனல்சேர் மகுடத் தானைத்
திருப்புன்கூர் மேவிய சிவலோ கனை
நிரையார் மணிமாட நீடூ ரானை
நீதனேன் என்னேநான் நினையா வாறே.  7

கூர் அரவத் தணையானும் குளிர்தண் பொய்கை 
மலரவனும் கூடிச்சென்று அறிய மாட்டார்
ஆரொருவர் அவர்தன்மை அறிவார் தேவர்
அறிவோம் என்பார்க்கு எல்லாம் அறிய லாகாச்
சீரரவக் கழலானை நிழலார் சோலைத் 
திருப்புன்கூர் மேவிய சிவலோ கனை
நீரரவத் தண்கழனி நீடூ ரானை
நீதனேன் என்னேநான் நினையா வாறே.  8

கையெலாம் நெய்பாயக் கழுத்தே கிட்டக்
கால்நிமிர்த்து நின்று உண்ணும் கையர் சொன்ன
பொய்யெலாம் மெய் என்று கருதிப் புக்குப் 
புள்ளுவரால் அகப்படாது உய்யப் போந்தேன்
செய்யெலாம் செழுங்கமலப் பழன வேலித் 
திருப்புன்கூர் மேவிய சிவலோ கனை
நெய்தல்வாய்ப் புனற்படப்பை நீடூ ரானை
நீதனேன் என்னேநான் நினையா வாறே.  9

இகழுமாறு எங்ஙனே ஏழை நெஞ்சே
இகழாது பரந்து ஒன்றாய் நின்றான் தன்னை
நகழமால் வரைக் கீழிட்ட அரக்கர் கோனை 
நலன் அழித்து நன்கு அருளிச் செய்தான் தன்னைத்
திகழுமா மதகரியின் உரிபோர்த் தானைத்
திருப்புன்கூர் மேவிய சிவலோ கனை
நிகழுமா வல்லானை நீடூ ரானை
நீதனேன் என்னேநான் நினையா வாறே.  10

திருச்சிற்றம்பலம்

திரு ஒமாம்புலியூர்

                                                                                     ௨ 

திருநாவுக்கரசு   சுவாமிகள்  அருளிச்செய்த
ஆறாம் திருமுறை

தகவல் பலகை	விவரம்
தலம்	திரு ஒமாம்புலியூர்
ஊர்/வேறு பெயர்
நாடு	சோழ (காவிரி வட)
ॐசுவாமி	துயர் தீர்த்த நாதர்
ॐஅம்பிகை	பூங்கொடி நாயகி
பாடியவர்கள்	சம்பந்தர்  (1)         பூங்கொடி மடவாள் (3-122) அப்பர் (1)         ஆராரம் மூவிலைமேல் (6-88)
ஸ்தல மரம்	இலந்தை மரம்
தீர்த்தம்	கெளரி தீர்த்தம், கொள்ளிடம்
பண்	புற நீர்மை
குறிப்புகள்	வியாக்கிரபாதர் வழிப்பட்ட தலம்  அம்பிகைக்குக் பிரணவப் பொருளை உபதேசித்து அருளிய தலம்
பதிக பலன்	திருவருள் கிட்டும்
வரிசை எண்.	88                                                           31/63

திருச்சிற்றம்பலம்

ஆராரும் மூவிலைவேல் அங்கை யானை
அலைகடல்நஞ் சயின்றானை அமரர் ஏத்தும்
ஏராரும் மதிபொதியும் சடையி னானை
எழுபிறப்பும் எனை ஆளா உடையான் தன்னை
ஊராரும் படநாகம் ஆட்டு வானை
உயர்புகழ்சேர் தரும் ஓமாம் புலியூர் மன்னும்
சீராரும் வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  1

ஆதியான் அரிஅயன் என்று அறிய ஒண்ணா
அமரர்தொழும் கழலானை அமலன் தன்னைச்
சோதிமதி கலைதொலையத் தக்கன் எச்சன்
சுடர் இரவி அயில் எயிறு தொலைவித் தானை
ஓதிமிக அந்தணர்கள் எரிமூன்று ஓம்பும்
உயர்புகழார் தரும் ஓமாம் புலியூர் மன்னும்
தீதில் திரு வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  2

வருமிக்க மதயானை உரித்தான் தன்னை
வானவர்கோன் தோள் அனைத்தும் மடிவித் தானைத்
தருமிக்க குழல் உமையாள் பாகன் தன்னைச்
சங்கரன் எம் பெருமானைத் தரணி தன்மேல்
உருமிக்க மணிமாடம் நிலாவு வீதி
உத்தமர்வாழ் தரும் ஓமாம் புலியூர் மன்னும்
திருமிக்க வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  3

அன்றினவர் புரம் மூன்றும் பொடியாய் வேவ
அழல்விழித்த கண்ணானை அமரர் கோனை
வென்றிமிகு காலன் உயிர் பொன்றி வீழ
விளங்குதிரு வடி எடுத்த விகிர்தன் தன்னை
ஒன்றியசீர் இருபிறப்பர் முத்தீ ஓம்பும்
உயர்புகழ்நான் மறை ஓமாம் புலியூர் நாளும்
தென்றல்மலி வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  4

பாங்குடைய எழில் அங்கி அருச்சனைமுன் விரும்பப்
பரிந்தவனுக்கு அருள்செய்த பரமன் தன்னைப்
பாங்கிலா நரகதனில் தொண்ட ரானார்
பாராத வகைபண்ண வல்லான் தன்னை
ஓங்குமதிற் புடைதழுவும் எழில் ஓமாம் புலியூர்
உயர்புகழந் தணர் ஏத்த உலகர்க்கு என்றும்
தீங்கில்திரு வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  5

அருந்தவத்தோர் தொழுது ஏத்தும் அம்மான் தன்னை
ஆராத இன் அமுதை அடியார் தம்மேல்
வருந்துயரம் தவிர்ப்பானை உமையாள் நங்கை
மணவாள நம்பியை என் மருந்து தன்னைப்
பொருந்துபுனல் தழுவுவயல் நிலவு துங்கப்
பொழில்கெழுவு தரும் ஓமாம் புலியூர் நாளும்
திருந்துதிரு வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  6

மலையானை வருமலையன் உரிசெய் தானை
மறையானை மறையாலும் அறிய ஒண்ணாக்
கலையானைக் கலையாரும் கையி னானைக்
கடிவானை அடியார்கள் துயரம் எல்லாம்
உலையாத அந்தணர்கள் வாழும் ஓமாம்
புலியூர் எம் உத்தமனைப் புரம் மூன்று எய்த
சிலையானை வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  7

சேர்ந்தோடு மணிக்கங்கை சூடி னானைச்
செழுமதியும் படஅரவும் உடன்வைத் தானைச்
சார்ந்தோர்கட்கு இனியானைத் தன் ஒப்பில்லாத்
தழல் உருவைத் தலைமகனைத் தகைநால் வேதம்
ஓர்ந்து ஓதிப் பயில்வார்வாழ் தரும் ஓமாம் புலியூர்
உள்ளானைக் கள்ளாத அடியார் நெஞ்சில்
சேர்ந்தானை வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  8

வார்கெழுவு முலை உமையாள் வெருவ அன்று
மலை எடுத்த வாள் அரக்கன் தோளும் தாளும்
ஏர்கெழுவு சிரம்பத்தும் இறுத்து மீண்டே
இன்னிசை கேட்டு இருந்தானை இமையோர் கோனைப்
பார்கெழுவு புகழ்மறையோர் பயிலும் மாடப்
பைம்பொழில்சேர் தரும் ஓமாம் புலியூர் மன்னும்
சீர்கெழுவு வடதளி எம் செல்வன் தன்னைச்
சேராதே திகைத்துநாள் செலுத்தி னேனே.  10

திருச்சிற்றம்பலம்

இப்பதிகத்தில் 9-ம் பாடல் கிடைக்கப்பெறவில்லை.  

திரு நாரையூர்

                                                                                  ௨ 

திருநாவுக்கரசு  சுவாமிகள்  அருளிச்செய்த
ஐந்தாம் திருமுறை

தகவல் பலகை	விவரம்
தலம்	திரு நாரையூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சௌந்தரநாதர்
ॐஅம்பிகை	திரிபுரசுந்தரி
பாடியவர்கள்	சம்பந்தர் (3)         உரையினில் வந்த (2-86)         காம்பினை வென்ற (3-102)         கடலிடை வெங்கடு (3-107) அப்பர் (2)          வீறு தானுடை வெற்பன் (5-55)         சொல்லானை பொருளானை (6-74) நம்பியாண்டார் நம்பி  (1)         திருநாரையூர் திரு இரட்டை மணிமாலை (11-32)
ஸ்தல மரம்	புன்னாகம்
தீர்த்தம்	காருண்ய தீர்த்தம்
பண்	திருத்தாண்டகம்
குறிப்புகள்	நாரை வழிபட்டது .  பொல்லாப் பிள்ளையார்  சிறப்புடையது  இவர் உணர்த்தியவாறு நம்பியாண்டார் நம்பிகள் தில்லையில் சேமித்து வைத்திருந்த தேவாரத் திருமுறைகளை உலகிற்கு வெளிப்படுத்தினார்
பதிக பலன்	திருவருள் கிட்டும்
வரிசை எண்.	74                                                            33/63

திருச்சிற்றம்பலம்

சொல்லானைப் பொருளானைச் சுருதி யானைச்
சுடராழி நெடுமாலுக்கு அருள்செய் தானை
அல்லானைப் பகலானை அரியான் தன்னை
அடியார்கட்கு எளியானை அரண் மூன்று எய்த
வில்லானைச் சரம்விசயற்கு அருள்செய் தானை
வெங்கதிரோன் மாமுனிவர் விரும்பி ஏத்தும்
நல்லானைத் தீயாடு நம்பன் தன்னை
நாரையூர் நன்னகரில் கண்டேன் நானே.  1

பஞ்சுண்ட மெல்லடியாள் பங்கன் தன்னைப்
பாரொடுநீர் சுடர்படர்காற் றாயி னானை
மஞ்சுண்ட வானாகி வானந் தன்னில்
மதியாகி மதிசடைமேல் வைத்தான் தன்னை
நெஞ்சுண்டென் நினைவாகி நின்றான் தன்னை
நெடுங்கடலைக் கடைந்தவர்போய் நீங்க ஓங்கும்
நஞ்சுண்டு தேவர்களுக்கு அமுது ஈந் தானை
நாரையூர் நன்னகரில் கண்டேன் நானே.  2

மூவாதி ஆவர்க்கும் மூத்தான் தன்னை
முடியாதே முதல்நடுவு முடிவானானைத்
தேவாதி தேவர்கட்குந் தேவன் தன்னைத்
திசைமுகன் தன் சிரம் ஒன்று சிதைத்தான் தன்னை
ஆவாத அடலேறு ஒன்றுடையான் தன்னை
அடியேற்கு நினைதோறும் அண்ணிக் கின்ற
நாவானை நாவினில்நல் லுரையா னானை
நாரையூர் நன்னகரில் கண்டேன் நானே.  3

செம்பொன்னை நன்பவளந் திகழும்  முத்தைச்
செழுமணியைத் தொழும் அவர் தம் சித்தத் தானை
வம்பவிழும் மலர்க்கணைவேள் உலக்க நோக்கி
மகிழ்ந்தானை மதிற்கச்சி மன்னு கின்ற
கம்பனை எம் கயிலாய மலையான் தன்னைக்
கழுகினொடு காகுத்தன் கருதி ஏத்தும்
நம்பனை எம் பெருமானை நாதன் தன்னை
நாரையூர் நன்னகரில் கண்டேன் நானே.  4

புரையுடைய கரி உரிவைப் போர்வை யானைப்
புரிசடைமேற் புனல் அடைத்த புனிதன் தன்னை
விரையுடைய வெள்ளெருக்கங் கண்ணி யானை
வெண்ணீறு செம்மேனி விரவி னானை
வரையுடைய மகள்தவம் செய் மணாளன் தன்னை
வருபிணிநோய் பிரிவிக்கும் மருந்து தன்னை
நரைவிடை நற் கொடி உடைய நாதன் தன்னை
நாரையூர் நன்னகரில் கண்டேன் நானே.  5

பிறவாதும் இறவாதும் பெருகி னானைப்
பேய்பாட நடமாடும் பித்தன் தன்னை
மறவாத மனத்தகத்து மன்னி னானை
மலையானைக் கடலானை வனத்து ளானை
உறவானைப் பகையானை உயிரா னானை
உள்ளானைப் புறத்தானை ஓசை யானை
நறவாரும் பூங்கொன்றை சூடி னானை
நாரையூர் நன்னகரில் கண்டேன் நானே.  6

தக்கனது வேள்விகெடச் சாடி னானைத்
தலைகலனாப் பலியேற்ற தலைவன் தன்னைக்
கொக்கரைசச் சரிவீணைப் பாணி யானைக்
கோ நாகம் பூணாகக் கொண்டான் தன்னை
அக்கினொடும் என்பணிந்த அழகன் தன்னை
அறுமுகனோடு ஆனை முகற்கு அப்பன் தன்னை
நக்கனைவக் கரையானை நள்ளாற் றானை
நாரையூர் நன்னகரில் கண்டேன் நானே.  7

அரி பிரமர் தொழுது ஏத்தும் அத்தன் தன்னை
அந்தகனுக்கு அந்தகனை அளக்க லாகா
எரிபுரியும் இலிங்கபுரா ணத்து ளானை
எண்ணாகிப் பண்ணார் எழுத்தா னானைத்
திரிபுரம் செற் றொருமூவர்க்கு அருள்செய் தானைச்
சிலந்திக்கும் அரசளித்த செல்வன் தன்னை
நரிவிரவு காட்ட கத்தில் ஆடலானை
நாரையூர் நன்னகரில் கண்டேன் நானே.  8

ஆலாலம்  மிடற்றணியா அடக்கி னானை
ஆலதன்கீழ் அறம்நால்வர்க்கு அருள்செய் தானைப்
பாலாகித் தேனாகிப் பழமும் ஆகிப்
பைங்கரும்பா யங்கருந்துஞ் சுவையா னானை
மேலாய வேதியர்க்கு வேள்வி யாகி
வேள்வியினின் பயனாய விமலன் தன்னை
நாலாய மறைக்கு இறைவ னாயி னானை
நாரையூர் நன்னகரில் கண்டேன் நானே.  9

மீளாத ஆளென்னை உடையான் தன்னை
வெளிசெய்த வழிபாடு மேவி னானை
மாளாமை மறையவனுக்கு உயிரும் வைத்து
வன்கூற்றின் உயிர்மாள உதைத்தான் தன்னைத்
தோளாண்மை கருதிவரை எடுத்த தூர்த்தன்
தோள்வலியும் தாள்வலியும் தொலைவித்து ஆங்கே
நாளோடு வாள்கொடுத்த நம்பன் தன்னை
நாரையூர் நன்னகரில் கண்டேன் நானே.  10

திருச்சிற்றம்பலம்

திரு கோடிக்கா

                                                                             ௨ 

திருநாவுக்கரசு சுவாமிகள் அருளிச்செய்த
ஐந்தாம் திருமுறை

தகவல் பலகை	விவரம்
தலம்	திரு கோடிக்கா
ஊர்
நாடு	சோழ (காவிரி வட)
ॐசுவாமி	கோடீஸ்வரர்
ॐஅம்பிகை	திரிபுரசுந்தரி, வடிவாம்பிகை
பாடியவர்கள்	சம்பந்தர் (1)         இன்று நன்று நாளை நன்று (2-99) அப்பர் (1)          நெற்றி மேல் கண்ணினான் (4-51)         சங்குலா முன்கை (5-78)         கண்டலஞ்ச்சேர் நெற்றிஇளம் (6-81)
ஸ்தல மரம்
தீர்த்தம்
பண்	திருத்தாண்டகம்
குறிப்புகள்
பதிக பலன்	வினை தீரும்
வரிசை எண்.	81                                                               37/63

திருச்சிற்றம்பலம்

கண்டலஞ்சேர் நெற்றி இளங் காளை கண்டாய்
கன்மதில்சூழ் கந்தமா தனத்தான் கண்டாய்
மண்டலஞ்சேர் மயக்கறுக்கும் மருந்து கண்டாய் 
மதிற்கச்சி யேகம்ப மேயான் கண்டாய்
விண்டலஞ்சேர் விளக்கொளியாய் நின்றான் கண்டாய்
மீயச்சூர் பிரியாத விகிர்தன் கண்டாய்
கொண்டலஞ்சேர் கண்டத்து எம் கூத்தன் கண்டாய்
கோடிகா அமர்ந்து உறையும் குழகன் தானே.  1

வண்டாடு பூங்குழலாள் பாகன் கண்டாய்
மறைக்காட் டு உறையும் மணாளன் கண்டாய்
பண்டாடு பழவினைநோய் தீர்ப்பான் கண்டாய்
பரலோக நெறிகாட்டும் பரமன் கண்டாய்
செண்டாடி அவுணர்புரம் செற்றான் கண்டாய்
திருவாரூர்த் திருமூலதட்டானன் கண்டாய்
கொண்டாடும் அடியவர்தம் மனத்தான் கண்டாய்
கோடிகா அமர்ந்து உறையும் குழகன் தானே.  2

அலையார்ந்த புனற்கங்கைச் சடையான் கண்டாய்
அடியார்கட்கு ஆரமுதம் ஆனான் கண்டாய்
மலையார்ந்த மடமங்கை பங்கன் கண்டாய்
வானோர்கள் முடிக்கணியாய் நின்றான் கண்டாய்
இலையார்ந்த திரிசூலப் படையான் கண்டாய்
ஏழ் உலகுமாய் நின்ற எந்தை கண்டாய்
கொலையார்ந்த குஞ்சரத்தோல் போர்த்தான் கண்டாய்
கோடிகா அமர்ந்து உறையும் குழகன் தானே.  3

மற்றாருந் தன் ஒப்பார் இல்லான் கண்டாய்
மயிலாடு துறை இடமா மகிழ்ந்தான் கண்டாய்
புற்றாடு அரவம் அணிந்த புனிதன் கண்டாய்
பூந்துருத்திப் பொய்யிலியாய் நின்றான் கண்டாய்
அற்றார்கட் கற்றானாய் நின்றான் கண்டாய்
ஐயாறு அகலாத ஐயன் கண்டாய்
குற்றாலத்து அமர்ந்து உறையும் கூத்தன் கண்டாய்
கோடிகா அமர்ந்துறையும் குழகன் தானே.  4

வாரார்ந்த வனமுலையாள் பங்கன் கண்டாய்
மாற்பேறு காப்பா மகிழ்ந்தான் கண்டாய்
போரார்ந்த மால்விடை ஒன்று ஊர்வான் கண்டாய்
புகலூரை அகலாத புனிதன் கண்டாய்
நீரார்ந்த நிமிர்சடை ஒன்று உடையான் கண்டாய்
நினைப்பார்தம் வினைப்பாரம் இழிப்பான் கண்டாய்
கூரார்ந்த மூவிலைவேல் படையான் கண்டாய்
கோடிகா அமர்ந்து உறையும் குழகன் தானே.  5

கடிமலிந்த மலர்க்கொன்றைச் சடையான் கண்டாய்
கண்ணப்ப விண்ணப்புக் கொடுத்தான் கண்டாய்
படிமலிந்த பல்பிறவி அறுப்பான் கண்டாய்
பற்றற்றார் பற்றவனாய் நின்றான் கண்டாய்
அடிமலிந்த சிலம்பலம்பத் திரிவான் கண்டாய்
அமரர்கணம் தொழுது ஏத்தும் அம்மான் கண்டாய்
கொடிமலிந்த மதில்தில்லைக் கூத்தன் கண்டாய்
கோடிகா அமர்ந்து உறையும் குழகன் தானே.  6

உழையாடு கரதலமொன்றுடையான் கண்டாய்
ஒற்றியூர் ஒற்றியா உடையான் கண்டாய்
கழையாடு கழுக்குன்றம் அமர்ந்தான் கண்டாய்
காளத்திக் கற்பகமாய் நின்றான் கண்டாய்
இழையாடு மெண்புயத்த இறைவன் கண்டாய்
என் நெஞ்சத்துள் நீங்கா எம்மான் கண்டாய்
குழையாட நடமாடும் கூத்தன் கண்டாய்
கோடிகா அமர்ந்து உறையும் குழகன் தானே.  7

படமாடு பன்னகக்கச்சு அசைத்தான் கண்டாய்
பராய்த்துறையும் பாசூரும் மேயான் கண்டாய்
நடமாடி ஏழ் உலகும் திரிவான் கண்டாய்
நான்மறையின் பொருள்கண்டாய் நாதன் கண்டாய்
கடமாடு களிறு உரித்த கண்டன் கண்டாய்
கயிலாயம் மேவி இருந்தான் கண்டாய்
குடமாடி இடமாகக் கொண்டான் கண்டாய்
கோடிகா அமர்ந்து உறையும் குழகன் தானே.  8

திருச்சிற்றம்பலம்

இப்பதிகத்தில் 9 & 10-ம் பாடல் கிடைக்கப்பெறவில்லை.