திரு சேய்ஞலூர்

     

௨ 

திருஞானசம்பந்தர் சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திரு சேய்ஞலூர்
ஊர்	சேங்கனூர்
நாடு	சோழ (காவிரி வட)
ॐசுவாமி	சத்திய கிரி நாதர்
ॐஅம்பிகை	சகிதேவி அம்மை
பாடியவர்கள்	திருஞானசம்பந்தர் 1)         நூல் அடைந்த கொள்கை (1-48)
ஸ்தல மரம்
தீர்த்தம்	மண்ணியாறு (சத்திய நதி)
பண்	பழந்தக்க ராகம்
குறிப்புகள்	முருகன் சூரசம்ஹாரம் நிகழ்த்த இறைவனை வழி 0 பட்டு பாசு பதிகாத்திரம் பெற்ற தலம் சண்டேச நாயனார் அவதார திருப்பதி
பதிக பலன்	வான் உலகு ஆள்வார்.
வரிசை எண்.	48                                                             41/63

திருச்சிற்றம்பலம்

நூல் அடைந்த கொள்கையாலே 
        நுன் அடி கூடுதற்கு
மால் ³அடைந்த நால்வர்கேட்க 
        நல்கிய நல் அறத்தை
ஆல் அடைந்த நீழல்மேவி 
        அருமறை சொன்னது என்னே
சேல் அடைந்த தண்கழனிச் 
        சேய்ஞலூர் மேயவனே.  1

நீறு அடைந்த மேனியின்கண் 
        நேரிழை யாளொருபால்
கூறு அடைந்த கொள்கை அன்றிக் 
        கோல வளர்சடைமேல்
ஆறு அடைந்த திங்கள்சூடி 
        அரவம் அணிந்தது என்னே
சேறு அடைந்த தண்கழனிச் 
        சேய்ஞலூர் மேயவனே.  2

ஊன் அடைந்த வெண் தலையின்
        ஓடு பலிதிரிந்து
கான்¹ அடைந்த பேய்களோடு 
        பூதம் கலந்துடனே
மான் அடைந்த நோக்கிகாண 
        மகிழ்ந்து எரியாடல் என்னே
தேன் அடைந்த சோலைமல்கு 
        சேய்ஞலூர் மேயவனே.  3

வீண் அடைந்த மும்மதிலும் 
        வில்மலையா அரவின்
நாண் அடைந்த வெஞ்சரத்தால் 
        நல் எரி ஊட்டல் என்னே
பாண் அடைந்த வண்டுபாடும் 
        பைம்பொழில் சூழ்ந்து அழகார்
சேண் அடைந்த மாடமல்கு 
        சேய்ஞலூர் மேயவனே.  4

பேய் அடைந்த காடு இடமாப் 
        பேணுவது அன்றியும்போய்
வேய் அடைந்த தோளி அஞ்ச 
        வேழம் உரித்தது என்னே
வாய் அடைந்த நான் மறை 
        ஆறு அங்கமோடு ஐவேள்வித்²
தீ அடைந்த செங்கையாளர் 
        சேய்ஞலூர் மேயவனே.  5

காடு அடைந்த ஏனம் ஒன்றின் 
        காரணம் ஆகிவந்து
வேடு அடைந்த வேடனாகி 
        விசயனொடு எய்தது என்னே
கோடு அடைந்த மால்³ களிற்றுக் 
        கோச் செங்கணாற்கு அருள்செய்
சேடு ⁴அடைந்த செல்வர்வாழும் 
        சேய்ஞலூர் மேயவனே.  6

பீரடைந்த பாலது ஆட்டப் 
        பேணா தவன்தாதை
வேரடைந்து பாய்ந்ததாளை 
        வேர்த்தடிந் தான் தனக்குத்
தாரடைந்த மாலைசூட்டித் 
        தலைமை வகுத்தது என்னே
சீர் அடைந்த கோயில்மல்கு 
        சேய்ஞலூர் மேயவனே.  7

மா⁵ அடைந்த தேர் அரக்கன் 
        வலிதொலை வித்தவன்தன்
நா அடைந்த பாடல்கேட்டு 
        நயந்து அருள் செய்தது என்னே
பூ அடைந்த நான்முகன்போல் 
        பூசுரர் போற்றிசெய்யும்
சே ⁶அடைந்த ஊர்தியானே 
        சேய்ஞலூர் மேயவனே.  8

கார்⁷ அடைந்த வண்ணனோடு 
        கனகம் அனையானும்
பார் அடைந்தும் விண்பறந்தும் 
        பாத முடிகாணார்
சீரடைந்து வந்துபோற்றச் 
        சென்று அருள் செய்தது என்னே
தேரடைந்த மாமறுகில் ⁸  
        சேய்ஞலூர் மேயவனே.  9

மாசு அடைந்த மேனியாரும் 
        மனந்திரி யாதகஞ்சி
நேசடைந்த ஊணினாரும் 
        நேசம் இலாதது என்னே
வீசு அடைந்த தோகையாட 
        விரைகம ழும்பொழில்வாய்த்
தேசு அடைந்த வண்டு பாடும் 
        சேய்ஞலூர் மேயவனே.  10

சேய⁹ டைந்த சேய்ஞலூரிற் 
        செல்வன சீர்பரவித்
தோயடைந்த தண்வயல்சூழ் 
        தோணி புரத்தலைவன்
சாய ¹⁰ டைந்த ஞானமல்கு 
        சம்பந்தன் இன் உரைகள்
வாயடைந்து பாடவல்லார் 
        வானுல காள்பவரே.  11

திருச்சிற்றம்பலம்

திரு பழனம்

 

௨ 

திருநாவுக்கரசு  சுவாமிகள்   அருளிச்செய்த
நான்காம் திருமுறை 

தகவல் பலகை	விவரம்
தலம்	திருப்பழனம்
பிற பெயர்கள்
நாடு	சோழ நாடு (வ)
ॐசுவாமி	ஆபத்சகாயர்
ॐஅம்பிகை	பெரியநாயகி
பாடியவர்கள்	சம்பந்தர் (1)         வேதம் ஓதி  (1-67) அப்பர் (5)         சொல் மாலை பயில்கின்ற (4-12)         ஆடினார் ஒருவர் (4-36)         மேவித்து நின்று (4-87)         அருவானாய் அத்தி (5-35)         அலையார் கடல் நஞ்சம் (6-36)
ஸ்தல மரம்	வாழை
தீர்த்தம்	காவிரி, மங்கள தீர்த்தம்
பண்	தக்கேசி
குறிப்புகள்	கதலி வனம் என பெயர் பெற்றது  திருவையாற்றை மையமாக கொண்ட ஏழூர் திருத்தலங்களில் ஒன்று. சந்திரன் வழிபட்ட தலம்.
பதிக பலன்	நல்லவராய் விளங்குவர்.
வரிசை எண்.	67                                                     50/63

திருச்சிற்றம்பலம் 

சொல் மாலை பயில்கின்ற
          குயிலினங்காள் சொல்லீரே!
பன்மாலை வரிவண்டு
          பண்மிழற்றும் பழனத்தான்
முன்மாலை நகுதிங்கள்
          முகிழ்விளங்கு முடிச்சென்னிப்
பொன்மாலை மார்பன்என்
          புது நலம் உண்டு இகழ்வானோ.  1

கண்டகங்காள் முண்டகங்காள்
          கைதைகாள் நெய்தல்காள்
பண்டரங்க வேடத்தான்
          பாட்டோ வாப் பழனத்தான்
வண்டுலாம்  தடமூழ்கி
          மற்றவனென் தளிர்வண்ணம் 
கொண்டநாள் தான் அறிவான்
          குறிக்கொள்ளாது ஒழிவானோ.  2

மனைக்காஞ்சி இளங்குருகே
          மறந்தாயோ மதமுகத்த
பனைக்கைமா உரிபோர்த்தான்
          பலர்பாடும் பழனத்தான்
நினைக்கின்ற நினைப்பெல்லாம்
          உரையாயோ நிகழ்வண்டே
சுனைக்குவளை மலர்க்கண்ணாள்
          சொல் தூதாய்ச் சோர்வாளோ.   3

புதியையாய் இனியையாம்
          பூந்தென்றால் புறங்காடு
பதியாவது இது என்று
          பலர்பாடும் பழனத்தான்
மதியாதார் வேள்விதனை
          மதித்திட்ட மதிகங்கை
விதியாளன் என்னுயிர்மேல்
          விளையாடல் விடுத்தானோ.  4

மண்பொருந்தி வாழ்பவர்க்கும்
          மாதீர்த்த வேதியர்க்கும்
விண்பொருந்து தேவர்க்கும்
          வீடுபேறாய் நின்றானைப்
பண்பொருந்த இசைபாடும்
          பழனம் சேர் அப்பனை என்
கண்பொருந்தும் போதத்தும்
          கைவிடநான் கடவேனோ.  5

பொங்கோத மால்கடலில்
          புறம்புறம்போய் இரைதேரும்
செங்கால்வெண் மடநாராய்
          செயற்படுவது அறியேன்நான்
அங்கோல வளைகவர்ந்தான்
          அணிபொழில்சூழ் பழனத்தான்
தங்கோல நறுங்கொன்றைத்
          தாரருளாது ஒழிவானோ.  6

துணையார முயங்கிப்போய்த்
          துறைசேரும் மடநாராய்
பணையார வாரத்தான்
          பாட்டோ வாப் பழனத்தான்
கணையார இருவிசும்பிற்
          கடியரணம் பொடிசெய்த
இணையார மார்பன்என்
          எழில்நலம் உண்டு  இகழ்வானோ.  7

கூவைவாய் மணிவரன்றிக்
          கொழித்தோடும்  காவிரிப்பூம்
பாவைவாய் முத்திலங்கப்
          பாய்ந்தாடும் பழனத்தான்
கோவைவாய் மலைமகள்கோன்
          கொல்லேற்றின் கொடியாடைப்
பூவைகாள் மழலைகாள்
          போகாத பொழுது உளதே.   8

புள்ளிமான் பொறி அரவம்
          புள்ளுயர்த்தான் மணிநாகப்
பள்ளியான் தொழுது ஏத்த
          இருக்கின்ற பழனத்தான்
உள்ளுவார் வினைதீர்க்கும்
          என்று உரைப்பர் உலகு எல்லாம்
கள்ளியேன் நான் இவற்கு என்
          கனவளையும் கடவேனோ.  9

வஞ்சித்து என் வளைகவர்ந்தான்
          வாரானே ஆயிடினும்
பஞ்சிக்காற் சிறகு அன்னம்
          பரந்தார்க்கும் பழனத்தான்
அஞ்சிப்போய்க் கலிமெலிய
          அழல் ஓம்பும் அப்பூதி
குஞ்சிப்பூ வாய்நின்ற
          சேவடியாய் கோடியையே.

திருச்சிற்றம்பலம்

திரு பாற்றுறை

  

௨ 

திருஞானசம்பந்தர்சுவாமிகள்   அருளிச்செய்த
முதலாம்   திருமுறை 

தகவல் பலகை	விவரம்
தலம்	திரு பாற்றுத்துறை
பிற பெயர்கள்	திரு பாலத்துறை
நாடு	சோழ நாடு (வ)
ॐசுவாமி	ஆதிமூலேஸ்வரர், திருமூல நாதர்
ॐஅம்பிகை	மேகலாம்பிகை, நித்ய கல்யாணி
பாடியவர்கள்	சம்பந்தர் (1)         காரார் கொன்றை (1-56)
ஸ்தல மரம்	வில்வம்
தீர்த்தம்	கொள்ளிடம்
பண்	பழந்தக்கராகம்
குறிப்புகள்	மார்கண்டேய முனிவர், சூரியன் வழிபட்டது  இத் திருப்பதிகம் நாயக நாயகி பாவனையில் சன்மார்க்க நெறிக்கண் அமைந்தது
பதிக பலன்	இறைவனை பாடி துதிக்க வேண்டிய பதிகம்
வரிசை எண்.	56                                                      59/63

திருச்சிற்றம்பலம்          

காரார் கொன்றை கலந்த முடியினர்
சீரார் சிந்தை செலச்செய்தார்
பாரார் நாளும் பரவிய பாற்றுறை
ஆரா ராதி முதல்வரே.  1  

நல்லாரும் அவர் தீயர் எனப்படும்
சொல்லார் நன்மலர் சூடினார்
பல்லார் வெண் தலைச் செல்வர் எம் பாற்றுறை
எல்லாரும் தொழும் ஈசரே.  2  

விண்ணார் திங்கள் விளங்கு நுதலினர்
எண்ணார் வந்து என் எழில்கொண்டார்
பண்ணார் வண்டு இனம் பாடல் செய் பாற்றுறை
உண்ணா ணாளும் உறைவரே.  3  

பூவும் திங்கள் புனைந்த முடியினர்
ஏவின் அல்லார் எயில் எய்தார்
பாவம் தீர்புனல் மல்கிய பாற்றுறை
ஓ என் சிந்தை ஒருவரே.  4  

மாகம் தோய்மதி சூடி மகிழ்ந்து எனது 
ஆகம் பொன்னிறம் ஆக்கினார்
பாகம் பெண்ணும் உடையவர் பாற்றுறை
நாகம் பூண்ட நயவரே.  5  

போது பொன்திகழ் கொன்றை புனைமுடி
நாதர் வந்து என் நலம் கொண்டார்
பாதம் தொண்டர் பரவிய பாற்றுறை
வேதம் ஓதும் விகிர்தரே.  6  

வாடல் வெண் தலை சூடினர் மால்விடை
கோடல் செய்த குறிப்பினார்
பாடல் வண்டு இனம் பண்செயும் பாற்றுறை
ஆடல் நாகம் அசைத்தாரே.  7  

வெவ்வ மேனிய ராய்வெள்ளை நீற்றினர்
எவ்வம் செய்து என் எழில்கொண்டார்
பவ்வம் நஞ்சடை கண்டர் எம் பாற்றுறை
மவ்வல் சூடிய மைந்தரே.  8  

ஏனம் அன்னமும் ஆனவருக்கு எரி
ஆன வண்ணத்து எம் அண்ணலார்
பானல் அம்மலர் விம்மிய பாற்றுறை
வான வெண்பிறை மைந்தரே.  9  

வெந்த நீற்றினர் வேலினர் நூலினர்
வந்து என் நன்னலம் வௌவினார்
பைந்தண் மாதவி சூழ்தரு பாற்றுறை
மைந்தர் தாம் ஓர் மணாளரே.  10  

பத்தர் மன்னிய பாற்றுறை மேவிய
பத்து நூறு பெயரனைப்
பத்தன் ஞானசம் பந்தன தின்தமிழ்
பத்தும் பாடிப் பரவுமே.

திருச்சிற்றம்பலம்

திருஓத்தூர்

                                  

௨ 

திருஞானசம்பந்தர்   சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திரு ஓத்தூர்
ஊர்	திருவந்திபுரம், செய்யாறு
நாடு	தொண்டை நாடு
ॐசுவாமி	வேதபுரீஸ்வரர்
ॐஅம்பிகை	பால குசலாம்பிகை
பாடியவர்கள்	ஞானசம்பந்தர்  (1)         பூத்தேர்ந்து ஆயன (1-54)
ஸ்தல மரம்	பனை
தீர்த்தம்	வேத தீர்த்தம்,  (சேயாறு
பண்	பழந்தாக்கராகம்
குறிப்புகள்	தேவர்களுக்கும், முனிவர்களுக்கும் இறைவன் வேதத்தின் பொருளை உபதேசித்த தலம்  ஆண் பனையை பெண் பனையாக மாற்றிய தலம்
பதிக பலன்	வினை நீக்கம் பெறலாம்
வரிசை எண்.	54                                                        8/32

திருச்சிற்றம்பலம்          

பூத்தேர்ந்து ஆயன கொண்டுநின் பொன்னடி

ஏத்தாதார் இல்லை எண்ணுங்கால்

ஓத்தூர் மேய ஒளி மழுவாள் அங்கைக்

கூத்தீர் உம்ம குணங்களே.  1  

இடையீர் போகா இளமுலையாளை ஓர்

புடையீரே புள்ளி மான் உரி

உடையீரே உம்மை  ஏத்துதும் ஓத்தூர்ச்

சடையீ ரே உம் தாளே.  2  

உள்வேர் போல நொடிமை யினார்திறம்

கொள்வீர் அல்குல் ஓர் கோவணம்

ஒள் வாழைக் கனி தேன்சொரி ஓத்தூர்க்

கள்வீரேயும காதலே.  3  

தோட்டீரே துத்தி ஐந்தலை நாகத்தை

ஆட்டீ ரே அடியார் வினை

ஓட்டீரே உம்மை ஏத்துதும் ஓத்தூர்

நாட்டீ ரே அருள் நல்குமே.  4  

குழையார் காதீர் கொடுமழு வாட்படை

உழையாள் வீர்திரு ஓத்தூர்

பிழையா வண்ணங்கள் பாடிநின்று ஆடுவார்

அழையாமே அருள் நல்குமே.  5  

மிக்கார் வந்து விரும்பிப் பலியிடத்

தக்கார் தம்மக்க ளீர் என்று 

உட்காதார் உளரோ திரு ஓத்தூர்

நக்கீரே அருள் நல்குமே.  6  

தாதார் கொன்றை தயங்கு முடியுடை

நாதா என்று நலம்புகழ்ந்து 

ஓதாதார் உளரோ திரு ஓத்தூர்

ஆதீரே அருள் நல்குமே.  7  

என்றான் இம்மலை என்ற அரக்கனை

வென்றார் போலும் விரலினால்

ஒன்றார் மும்மதில் எய்தவன் ஓத்தூர்

என்றார் மேல்வினை ஏகுமே.  8  

நன்றா நான்மறை யானொடு மாலுமாய்ச்

சென்றார் போலும் திசை எலாம்

ஒன்றாய் ஒள்ளெரியாய் மிக ஓத்தூர்

நின்றீ ரே உமை நேடியே.

கார மண்கலிங் கத்துவர் ஆடையர்

தேரர் சொல் அவை தேறன்மின்

ஓரம் பால் எயில் எய்தவன் ஓத்தூர்ச்

சீர வன்கழல் சேர்மினே.  10  

குரும்பை ஆண்பனை ஈன்குலை ஓத்தூர்

அரும்பு கொன்றை அடிகளைப்

பெரும்பு கலியுள் ஞானசம் பந்தன்சொல்

விரும்பு வார்வினை வீடே.

திருச்சிற்றம்பலம்

திருமால்பேறு

                              

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு மால்பேறு
ஊர்	திருமால்பூர்
நாடு	தொண்டை நாடு
ॐசுவாமி	மனிகண்டேஸ்வரர்
ॐஅம்பிகை	அஞ்சனாட்சி அம்மை, கருணை நாயகி
பாடியவர்கள்	ஞானசம்பந்தர்  (2)         ஊரியார் தரு (1-55)         குருந்தவன் குரு (1-114) அப்பர் (4)         மானிக்கு உயிர் (4-108)         பொருமாற் (5-59)         ஏதும் ஒன்று (5-60)         பாரானைப் பாரினது (6-80)
ஸ்தல மரம்	வில்வம்
தீர்த்தம்	சக்கர தீர்த்தம், பாலாறு
பண்	பழந்தக்க ராகம்
குறிப்புகள்	திருமால் ஈசனை வழிபட்டு சக்கராயுதம் பெற்ற தலம்  சந்திரன் வழிபட்டது.
பதிக பலன்	வினை நீக்கம் பெறலாம்
வரிசை எண்.	55                                                         11/32

திருச்சிற்றம்பலம்          

ஊறி யார்தரு நஞ்சினை உ ண்டு உமை

நீறு சேர்திரு மேனியர்

சேறு சேர்வயல் தென்திரு மாற்பேற்றின்

மாறிலா மணி கண்டரே.  1  

தொடையார் மாமலர் கொண்டு இருபோதும் உம்மை

அடைவாராம் அடிகள் என

மடையார் நீர்மல்கு மன்னிய மாற்பேறு 

உடையீரே உமை உள்கியே.  2  

பை ஆரும் அரவம் கொடு வாட்டிய

கையான் என்று வணங்குவர்

மையார் நஞ்சு உண்டு மாற்பேற்று இருக்கின்ற

ஐயா நின்னடி யார்களே.  3  

சால மாமலர் கொண்டு சரண் என்று

மேலை யார்கள் விரும்புவர்

மாலி னார்வழி பாடுசெய் மாற்பேற்று

நீல மார்கண்ட நின்னையே.  4  

மாறி லாமணியே என்று வானவர்

ஏறவே மிக ஏத்துவர்

கூறனே குலவும் திரு மாற்பேற்றின்

நீற னே என்று நின்னையே.  5  

உரையாதார் இல்லை ஒன்று நின் தன்மையைப்

பரவாதார் இல்லை நாள்களும்

திரை ஆர் பாலியின் தென்கரை மாற்பேற்று 

அரையானே அருள் நல்கிடே.  6  

அரசளிக்கும் அரக்கன் அவன் தனை

உரை கெடுத்தவன் ஒல்கிட

வர மிகுத்த  எம் மாற்பேற்று அடிகளைப்

பரவிடக் கெடும் பாவமே.  8  

இருவர் தேவரும் தேடித் திரிந்து இனி

ஒருவரால் அறி வொண்ணிலன்2

மருவு நீள்கழல் மாற்பேற்று அடிகளைப்

பரவு வார்வினை பாறுமே.  9  

தூசு போர்த்து உழல்வார் கையில் துற்றுணும்

நீசர் தம் உரை கொள்ளெலும்

தேச மல்கிய தென்திரு மாற்பேற்றின்

ஈசன் என்று எடுத்து ஏத்துமே.10  

மன்னி மாலொடு சோமன் பணிசெயும்

மன்னும் மாற்பேற்று அடிகளை

மன்னு காழியுள் ஞானசம் பந்தன்சொல்

பன்னவே வினை பாறுமே.

திருச்சிற்றம்பலம்

இப்பதிகத்தில் 7-ம் பாடல்கிடைக்கப்பெறவில்லை.  

திருவேற்காடு

                    

௨ 

திருஞானசம்பந்தர் சுவாமிகள் அருளிச்செய்த
முதலாம்    திருமுறை

தகவல் பலகை	விவரம்
தலம்	திரு வேற்காடு
ஊர்
நாடு	தொண்டை நாடு
ॐசுவாமி	வேதபுரீஸ்வரர்
ॐஅம்பிகை	பாலாம்பிகை, வேற்கண்ணி அம்மை
பாடியவர்கள்	திருஞானசம்பந்தர் (1)          ஒள்ளிது உள்ள (1-57)
ஸ்தல மரம்	வேல மரம்
தீர்த்தம்	வேலாயுத தீர்த்தம்
பண்	பழந்தக்க ராகம்
குறிப்புகள்	வேதம் வழிபட்ட தலம்  முருகப் பெருமான் பூசித்தது  அகத்தியருக்கு மணக்கோலம் காட்டிய தலம்  மூர்க்க நாயனார் அவதரித்த தலம்
பதிக பலன்	எல்லா நன்மைகளும் விளையும்.
வரிசை எண்.	57                                                         23/32

திருச்சிற்றம்பலம்

          

ஒள்ளிது உள்ளக் கதிக்காம் இவன் ஒளி

வெள்ளியான் உறை வேற்காடு

உள்ளி யார் உயர்ந்தார் இவ் உலகினில்

தெள்ளி யார் அவர் தேவரே.  1  

ஆடல் நாகம் அசைத்து அளவு இல்லதோர்

வேடம் கொண்டவன் வேற்காடு

பாடி யும்பணிந் தார் இவ் வுலகினில்

சேட ராகிய செல்வரே.  2  

பூதம் பாடப் புறங்காட்டு இடை ஆடி

வேத வித்தகன் வேற்காடு

போதும் சாந்தும் புகையும் கொடுத்தவர்க்கு

ஏதம் எய்துதல் இல்லையே.  3  

ஆழ்கடல் எனக் கங்கை கரந்தவன்

வீழ்ச டையினன் வேற்காடு

தாழ்வு உடை மனத்தால் பணிந்து ஏத்திடப்

பாழ் படும் அவர் பாவமே.  4  

காட்டி னாலும் அயர்த்திட அக் காலனை

வீட்டி னான் உறை வேற்காடு

பாட்டினால் பணிந்து ஏத்திட வல்லவர்

ஓட்டி னார்வினை ஒல்லையே.  5  

தோலினால் உடை மேவ வல்லான் சுடர்

வேலி னான் உறை வேற்காடு

நூலி னால் பணிந்து ஏத்திட வல்லவர்

மாலி னார்வினை மாயுமே.  6  

மல்லல் மும்மதில் மாய்தர எய்ததோர்

வில்லி னான்உறை வேற்காடு

சொல்ல வல்ல சுருங்கா மனத்தவர்

செல்ல வல்லவர் தீர்க்கமே.  7  

மூரல் வெண்மதி சூடும் முடியுடை

வீரன் மேவிய வேற்காடு

வார மாய்வழி பாடுநி னைந்தவர்

சேர்வர் செய்கழல் திண்ணமே.  8  

பரக்கி னார்படு வெண் தலையில் பலி

விரக்கி னான்உறை வேற்காட்டூர்

அரக்கன் ஆண்மை அடரப்பட் டான்இறை

நெருக்கி னானை நினைமினே.  9  

மாறிலா மலரானொடு மால் அவன்

வேற லான் உறை வேற்காடு

ஈறி லாமொழி யேமொழி யாஎழில்

கூறி னார்க்கு இல்லை குற்றமே.  10  

விண்ட மாம்பொழில் சூழ்திரு வேற்காடு

கண்டு நம்பன் கழல்பேணிச்

சண்பை ஞானசம் பந்தன செந்தமிழ்

கொண்டு பாடக் குணமாமே..

திருச்சிற்றம்பலம்

திருச் சோபுரம்

                     

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திருச் சோபுரம்
ஊர் /வேறு பெயர்	தியாகவல்லி
நாடு	நடுநாடு
ॐசுவாமி	சோபுர நாதர், மங்கள புரீஸ்வரர்
ॐஅம்பிகை	சோபுர நாயகி, வேல் நெடுங்கண்ணி
பாடியவர்கள்	திருஞான சம்பந்தர்  (1)         வெங்கண் ஆணை (1-51)
ஸ்தல மரம்	கொன்றை
தீர்த்தம்	பிரம தீர்த்தம்
பண்	பழந்தக்க ராகம்
குறிப்புகள்	மணல் மேடாக இருந்த இடத்தை சிவயோகி ஒருவர் தோண்ட, சிவ லிங்கம் வெளிப்பட்டதாக போற்றப் படுகிறது
பதிக பலன்	முத்திப் பேறு பெற
வரிசை எண்.	51                                                        6/22

திருச்சிற்றம்பலம்

வெங்கண் ஆனை ஈர் உரிவை 
          போர்த்துவிளங் குமொழி
மங்கைபாகம் வைத்து உகந்த 
          மாண்பு அது என்னைகொலாம்
கங்கையோடு திங்கள்சூடிக் 
          கடிகமழும் கொன்றைத்
தொங்கலானே தூயநீற்றாய் 
          சோபுரமே யவனே.  1  

விடை அமர்ந்து வெண்மழு ஒன்று  
          ஏந்தி விரிந்து இலங்கு
சடைஒடுங்கத் தண்புனலைத் 
          தாங்கியது என்னைகொலாம்
கடை உயர்ந்த மும்மதிலும்
          காய்ந்து அனலுள் அழுந்தத்
தொடைநெகிழ்ந்த  வெஞ்சிலையாய் 
          சோபுரமே யவனே.  2  

தீயராய வல் அரக்கர் 
          செந்தழலுள் ளழுந்தச்
சாயஎய்து வானவரைத் 
          தாங்கியது என்னைகொலாம்
பாயும்வெள்ளை ஏற்றை ஏறிப் 
          பாய் புலித்தோல் உடுத்த
தூயவெள்ளை நீற்றினானே 
          சோபுரமே யவனே.  3  

பல் இல் ஓடு கையில் ஏந்திப் 
          பல்கடையும் பலிதேர்ந்து 
அல்லல் வாழ்க்கை மேலதான 
          ஆதரவு என்னைகொலாம்
வில்லைவென்ற நுண்புருவ 
          வேல்நெடுங்கண் ணியொடும்
தொல்லை ஊழியாகி நின்றாய் 
          சோபுரமே யவனே.  4  

நாற்றமிக்க கொன்றைதுன்று 
          செஞ்சடைமேல் மதியம்
ஏற்றமாக வைத்து உகந்த 
          காரணம்என் னைகொலாம்
ஊற்றமிக்க காலன் தன்னை 
          ஒல்க உதைத்து அருளித்
தோற்றம் ஈறும் ஆகி நின்றாய் 
          சோபுரமே யவனே.  5  

கொன் நவின்ற மூவிலைவேல்
          கூர் மழுவாள் படையன்
பொன்னைவென்ற கொன்றைமாலை 
          சூடும்பொற்பு என்னை கொலாம்
அன்னம் அன்ன மென் நடையாள் 
          பாகம் அமர்ந்து அரைசேர்
துன்ன வண்ண ஆடையினாய் 
          சோபுரமே யவனே.  6  

குற்றம் இன்மை உண்மை நீ என்று 
          உன் அடியார் பணிவார்
கற்றகேள்வி ஞானமான 
          காரணம் என்னைகொலாம்
வற்றல் ஆமை வாளரவம் 
          பூண்டு அயன் வெண்தலையில்
துற்றல் ஆன கொள்கையானே 
          சோபுரமே யவனே.   7  

விலங்கல் ஒன்று வெஞ்சிலையாக் 
          கொண்டுவிறல் அரக்கர்
குலங்கள்வாழும் ஊர் எரித்த 
          கொள்கை இது என்னைகொலாம்
இலங்கைமன்னு வாள் அவுணர் 
          கோனை எழில் விரலால்
துலங்க ஊன்றி வைத்து உகந்தாய் 
          சோபுரமே யவனே.  8  

விடங்கொள்நாக மால்வரையைச் 
          சுற்றிவிரி திரைநீர்
கடைந்த நஞ்சை உண்டு உகந்த 
          காரணம் என்னைகொலாம்
இடந்து மண்ணை உண்டமாலும் 
          இன்மலர் மேல் அயனும்
தொடர்ந்து முன்னம் காணமாட்டாச் 
          சோபுரமே யவனே.  9  

புத்தரோடு புன்சமணர் 
          பொய் உரையே உரைத்துப்
பித்தராகக் கண்டு உகந்த 
          பெற்றிமை என்னை கொலாம்
மத்த யானை ஈர் உரிவை 
          போர்த்துவளர் சடைமேல்
துத்திநாகம் சூடினானே 
          சோபுரமே யவனே.  10  

சோலை மிக்க தண்வயல்சூழ் 
          சோபுரமே யவனைச்
சீலமிக்க தொல்புகழார் 
          சிரபுரக்கோன் நலத்தால்
ஞாலம்மிக்க தண் தமிழால் 
          ஞானசம் பந்தன்சொன்ன
கோலம்மிக்க மாலைவல்லார் 
          கூடுவர் வான் உலகே.

       

திருச்சிற்றம்பலம்

திருத்தூங்கானை மாடம்

                        

௨ 

திருஞானசம்பந்தர் சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திரு தூங்கானை மாடம்
ஊர் /வேறு பெயர்	பெண்ணாகடம், கடந்தை நகர் , தயராசபதி, மகேந்திரபுரி சிவவாசம்
நாடு	நடு நாடு
ॐசுவாமி	சுடர் கொழுந்து நாதர், பிரளய காலேஸ்வரர்
ॐஅம்பிகை	கடந்தை நாயகி
பாடியவர்கள்	திருஞானசம்பந்தர் (1),         ஒடுங்கும் பிணி  (1-59) அப்பர்(1)         பொன்னார் திருவடிக்கு (4-19)
ஸ்தல மரம்	சண்பகம்
தீர்த்தம்	கபிலை தீர்த்தம், இந்திரா தீர்த்தம், வெள்ளாறு
பண்	பழந்தக்கராகம்
குறிப்புகள்	அப்பர் சுவாமிகள் சூழ இடபக் குறி பொறிக்குமாறு வேண்டிப் பெற்ற தலம்  கலிக்கம்ப நாயனார் திரு அவதார தலம்  தேவ கன்னியர், காமதேனு, வெள்ளையானை வழிபட்ட தலம்
பதிக பலன்	வினை நீங்கும்.,
வரிசை எண்.	59                                                                 2/22

திருச்சிற்றம்பலம்

ஒடுங்கும் பிணிபிறவி கேடு என்று இவை
          உடைத்தாய வாழ்க்கை ஒழியத்தவம்
அடங்கும் இடம் கருதி நின்றீ ர் எல்லாம்
          அடிகள் அடி நிழற் கீழ் ஆளாம் வண்ணம்
கிடங்கும் மதிலும்  சுலாவி எங்கும்
          கெழுமனைகள் தோறும் மறையின் ஒலி
தொடங்கும் கடந்தைத் தடங்கோயில் சேர்
          தூங்கானை மாடம் தொழுமின்களே.  1  

பிணிநீர சாதல் பிறத்தல் இவை
          பிரியப் பிரியாத பேரின்பத்தோடு 
அணிநீர மேல் உலகம் எய்தல் உறில்
          அறிமின் குறைவில்லை ஆன் ஏறுடை
மணிநீல கண்டம் உடையபிரான்
          மலைமகளும் தானும் மகிழ்ந்துவாழும்
துணிநீர்க் கடந்தைத் தடங்கோயில்சேர்
          தூங்கானை மாடம் தொழுமின்களே.  2  

சாநாளும் வாழ்நாளும்  தோற்றம் இவை
          சலிப்பாய வாழ்க்கை ஒழியத்தவம்
ஆமாறு அறியாது அலமந்து நீர்
          அயர்ந்தும் குறைவில்லை ஆன் ஏறுடைப்
பூமாண் அலங்கல் இலங்குகொன்றை
          புனல்பொதிந்த புன்சடையி னான்உறையும்
தூமாண் கடந்தைத் தடங்கோயில்சேர்
          தூங்கானை மாடம் தொழுமின்களே.  3  

ஊன்றும் பிணிபிறவி கேடு என்று இவை
          உடைத்தாய வாழ்க்கை ஒழியத்தவம்
மான்று மனம்  கருதி நின்றீர் எல்லாம்
          மனம் திரிந்து மண்ணில் மயங்காது நீர்
மூன்று மதில் எய்த மூவாச்சிலை
          முதல்வர்க்கு இடம்போலும் முகில்தோய்கொடி
தோன்றும் கடந்தைத் தடங்கோயில்சேர்
          தூங்கானை மாடம் தொழுமின்களே.  4  

மயல்தீர்மை இல்லாத தோற்றம் இவை
          மரணத் தொடு ஒத்து அழியும் ஆறு ஆதலால்
வியல்தீர மேல் உலகம் எய்தல் உறின்
          மிக்கொன்றும் வேண்டா விமலனிடம்
உயர்தீர ஓங்கிய நாமங்களால்
          ஓவாது நாளும் அடிபரவல்செய்
துயர்தீர் கடந்தைத் தடங்கோயில்சேர்
          தூங்கானை மாடம் தொழுமின்களே.  5  

பல் நீர்மை குன்றிச் செவிகேட்பிலா
          படர்நோக்கில் கண் பவளம் நிற
நன்னீர்மை குன்றித் திரைதோலொடு
          நரைதோன்றும் காலம் நமக்கு ஆதல்முன்
பொன்னீர்மை துன்றப் புறந்தோன்று நல்
          புனல்பொதிந்த புன்சடையி னான்உறையும்
தொன்னீர்க் கடந்தைத் தடங்கோயில்சேர்
          தூங்கானை மாடம் தொழுமின்களே.  6  

இறையூண் துகளோடு இடுக்கண் எய்தி
          இழிப்பாய வாழ்க்கை ஒழியத்தவம்
நிறையூண் நெறிகருதி நின்றீர் எல்லாம்
          நீள் கழலே நாளும் நினைமின் சென்னிப்
பிறை சூழல் அலங்கல் இலங்குகொன்றை
          பிணையும் பெருமான் பிரியாத நீர்த்
துறைசூழ் கடந்தைத் தடங்கோயில்சேர்
          தூங்கானை மாடம் தொழுமின்களே.  7  

பல்வீழ்ந்து நாத்தளர்ந்து மெய்யில்வாடிப்
          பழிப்பாய வாழ்க்கை யொழியத்தவம்
இல்சூ ழிடங்கருதி நின்றீரெல்லாம்
          இறையே பிரியா தெழுந்து போதும்
கல்சூ ழரக்கன் கதறச்செய்தான்
          காதலி யுந்தானுங் கருதிவாழும்
தொல்சீர்க் கடந்தைத் தடங்கோயில்சேர்
          தூங்கானை மாடம் தொழுமின்களே.  8  

நோயும் பிணியும் அருந்துயரமும்
          நுகருடைய வாழ்க்கை ஒழியத்தவம்
வாயும் மனம் கருதி நின்றீர் எல்லாம்
          மலர்மிசைய நான்முகனும் மண்ணும் விண்ணும்
தாய அடி அளந்தான் காணமாட்டாத்
          தலைவர்க் இடம் போலும் தண்சோலைவிண்
தோயும் கடந்தைத் தடங்கோயில் சேர்
          தூங்கானை மாடம் தொழுமின்களே.  9  

பகடூர்பசி நலிய நோய்வருதலால்
          பழிப்பாய வாழ்க்கை ஒழியத்தவம்
முகடூர் மயிர்கடிந்த செய்கையாரும்
          மூடு துவர் ஆடையாரும் நாடிச்சொன்ன
திகழ்தீர்ந்த பொய்ம்மொழிகள் தேறவேண்டா
          திருந்திழை யும் தானும் பொருந்திவாழும்
துகள்தீர் கடந்தைத் தடங்கோயில்சேர்
          தூங்கானை மாடம் தொழுமின்களே.  10  

மண்ணார் முழவு அதிரும் மாடவீதி
          வயற்காழி ஞானசம் பந்தன்நல்ல
பெண்ணா கடத்துப் பெருங்கோயில்சேர்
          பிறை உரிஞ்சும் தூங்கானை மாடமேயான்
கண்ணார் கழல்பரவு பாடல் பத்தும்
          கருத்து உணரக் கற்றாரும் கேட்டாரும் போய்
விண்ணோர் உலகத்து மேவிவாழும்
          விதியதுவே ஆகும் வினைமாயுமே.

    திருச்சிற்றம்பலம்

திருநள்ளாறு

                 

௨ 

திருஞானசம்பந்தர்  சுவாமிகள் அருளிச்செய்த
முதல்   திருமுறை

தகவல் பலகை	விவரம்
தலம்	திருநள்ளாறு
ஊர்/வேறுபெயர்
நாடு	காவிரி தென்கரை
ॐசுவாமி	தர்ப்பாரண்யேஸ்வரர், நள்ளாற்று ஈசர்
ॐஅம்பிகை	போகமார்த்த பூண்முலையாள்
பாடியவர்கள்	திருஞானசம்பந்தர்(4)         பாடக மெல்லடி (1:07)         போகமார்த்த பூண் முலையாள் (1:49)         ஏடு மலி கொன்ற(2:33)         தளிரிள வளர் ஒளி  (3:87) திருநாவுக்கரசர்(2)         உள்ளாறாததோர் புண்டரிகத்திரள் (5:68)         ஆதிகண்ணான் முகத்தில் (6:20) சுந்தரர்(1)         செம்பொன் மேனி வெண்நீறு (7:68)
ஸ்தல மரம்	தருப்பை
தீர்த்தம்	நள தீர்த்தம்
பண்	பழந்தக்க ராகம்
குறிப்புகள்	நளச் சக்கரவர்த்திக்கு சனி பகவானால் வந்த துன்பம் நீக்கிய தலம் சப்த விடங்க தலங்களுள் ஒன்று  பச்சைப் பதிகம் பெற்ற சிறப்புடையது
பதிகப் பலன்	ஆன்மாக்களுக்கு உரிய இன்பத்தை தரும்.
வரிசை எண்.	49                                                                    52/127

திருச்சிற்றம்பலம்

போகமார்த்த பூண்முலையாள்  தன்னோடும் பொன்னகலம்
பாகம் ஆர்த்த பைங்கண் வெள்ளேற்று அண்ணல் பரமேட்டி
ஆகம் ஆர்த்த தோல் உடையன் கோவண ஆடையின்மேல்
நாகம் ஆர்த்த நம்பெருமான்  மேயது நள்ளாறே.  1    

தோடுடைய காதுடையன்  தோல் உடை யன்தொலையாப்
பீடுடைய போர்விடையன்  பெண்ணும் ஓர் பால் உடையன்
ஏடுடைய மேல் உலகோடு ஏழ்கட லும் சூழ்ந்த
நாடுடைய நம்பெருமான் மேயது நள்ளாறே.  2   

ஆன்முறையால் ஆற்ற வெண்ணீறு ஆடி அணியிழையோர்
பான்முறையால் வைத்த பாதம்  பத்தர் பணிந்து ஏத்த
மான்மறியும் வெண்மழுவும்  சூலமும் பற்றியகை
நான்மறையான்  நம்பெருமான் மேயது நள்ளாறே.  3  

புல்க வல்ல வார் சடைமேற் பூம்புனல் பெய்தயலே
மல்கவல்ல கொன்றை மாலை  மதியோ டு உடன்சூடிப்
பல்கவல்ல தொண்டர்தம் பொற்பாத நிழற்சேர
நல்கவல்ல நம்பெருமான் மேயது நள்ளாறே.  4   

ஏறுதாங்கி ஊர்திபேணி ஏர்கொள் இளமதியம்
ஆறுதாங்கும் சென்னிமேல் ஓர் ஆடர வம் சூடி
நீறுதாங்கி நூல்கிடந்த மார்பில் நிரைகொன்றை
நாறுதாங்கு நம்பெருமான் மேயது நள்ளாறே.  5   

திங்கள் உச்சி மேல்விளங்கும் தேவன் இமையோர்கள்
எங்கள் உச்சி எம் இறைவன் என்று அடி யே இறைஞ்சத்
தங்கள் உச்சி யால் வணங்கும்  தன் அடியார்கட்கு எல்லாம்
நங்கள் உச்சி நம்பெருமான்  மேயது நள்ளாறே.  6   

வெஞ்சுடர்த்தீ அங்கை ஏந்தி விண்கொள் முழவு அதிர
அஞ்சிடத்தோர் ஆடல்பாடல் பேணுவது அன்றியும்போய்ச்
செஞ்சடைக்கு ஓர் திங்கள்சூடித் திகழ்தரு கண்டத்துள்ளே
நஞ்சடைத்த நம்பெருமான் மேயது நள்ளாறே.  7   

சிட்டம் ஆர்ந்த மும்மதிலும் சிலைவரைத் தீ அம்பினால்
சுட்டுமாட்டிச் சுண்ண வெண் நீறு ஆடுவது அன்றியும்போய்ப்
பட்டம் ஆர்ந்த சென்னிமேல் ஓர் பால்ம தியம் சூடி
நட்டம் ஆடும் நம்பெருமான் மேயது நள்ளாறே.  8   

உண்ணல் ஆகா நஞ்சுகண்டத்து உண்டு உட னே ஒடுக்கி
அண்ணலாகா அண்ணல்நீழல் ஆர்அழல் போல் உருவம்
எண்ணல் ஆகா உள்வினை என்று எள்க வலித்து இருவர்
நண்ணல் ஆகா நம்பெருமான் மேயது நள்ளாறே.  9   

மாசுமெய்யர் மண்டைத்தேரர் குண்டர் குணம்இலிகள்
பேசும்பேச்சை மெய்  என்று எண்ணி அந்நெறி செல்லன்மின்
மூசுவண்டார் கொன்றைசூடி மும்மதி ளும் உடனே
நாசம் செய்த நம்பெருமான்  மேயது நள்ளாறே.  10   

தண்புனலும் வெண்பிறையும் தாங்கிய தாழ்சடையன்
நண்புநல்லார் மல்குகாழி ஞானசம் பந்தன்நல்ல
பண்புநள்ளாறு ஏத்துபாடல் பத்தும் இவைவல்லார்
உண்புநீங்கி வானவரோடு உலகில் உறைவாரே.

திருச்சிற்றம்பலம்