கோவில்

 

௨ 

திருநாவுக்கரசு  சுவாமிகள் அருளிச்செய்த
ஐந்தாம்  திருமுறை

தகவல் பலகை	விவரம்
தலம்	கோவில்
ஊர்	சிதம்பரம்
நாடு	காவிரி வடகரை
ॐசுவாமி	நடராசர், கனகசபாபதி
ॐஅம்பிகை	சிவகாம சுந்தரி
பாடியவர்கள்	திருஞானசம்பந்தர்(2), திருநாவுக்கரசர்(8), சுந்தரர்(1) மாணிக்கவாசகர் (26)
ஸ்தல மரம்	தில்லை, ஆல்
தீர்த்தம்	சிவகங்கை
பண்	திருக்குறுந்தொகை
குறிப்புகள்	சிவ பூசையின் போது ஓதப் பெறும் திருப் பாசுரங்க ளுள் இதுவும் ஒன்று.
பதிக பலன்	திருவடி தொழுது வாழலாம்.
வரிசை எண்.	1

திருச்சிற்றம்பலம்

அன்னம் பாலிக்கும் தில்லைச்சிற்றம்பலம்
பொன்னம் பாலிக்கும் மேலும் இப் பூமிசை
என்னம் பாலிக்கு மாறு கண்டு இன்புற
இன்னம் பாலிக்குமோ இப் பிறவியே.  1 
 
அரும் பற்றப்பட ஆய்மலர் கொண்டுநீர்
சுரும் பற்றப் படத் தூவித் தொழுமினோ
கரும் பற்றச் சிலைக்காமனைக் காய்ந்தவன்
பெரும்பற்றப் புலியூர் எம் பிரானையே.  2 
 
அரிச்சுற்ற வினை யால்அடர்ப் புண்டுநீர்
எரிச்சுற் றக்கிடந் தார் என்று அயலவர்
சிரிச்சுற்றுப் பல பேசப்படாமுனம்
திருச்சிற் றம்பலம் சென்று அடைந்து உய்ம்மினே.  3 
 
அல்லல் என்செயும் அருவினை என்செயும்
தொல்லை வல்வினைத் தொந்தந்தான் என்செயும்
தில்லை மாநகர்ச் சிற்றம் பலவனார்க்கு
எல்லை இல்லதோர் அடிமைபூண் டேனுக்கே.  4 
 
ஊனில் ஆவி உயிர்க்கும் பொழுது எலாம்
நான் நிலாவி இருப்பன் என் நா\தனைத்
தேன் நிலாவிய சிற்றம்பலவனார்
வான் நிலாவி இ\ருக்கவும் வைப்பரே.  5 
 
சிட்டர் வானவர் சென்று வரங்கொளும்
சிட்டர் வாழ்தில்லைச் சிற்றம் பலத்துறை
சிட்டன் சேவடி கைதொழச் செல்லும் அச்
சிட்டர் பால் அணு கான்செறு காலனே.  6 
 
ஒருத்த னார்உல கங்கட் ஒருசுடர்
திருத்த னார்தில்லைச் சிற்றம் பலவனார்
விருத்த னார்இளையார் விடம் உண்ட எம்
அருத்த னார்அடியாரை அறிவரே.  7 
 
விண் நிறைந்ததோர் வெவ் அழலின் உரு
எண் நிறைந்த இருவர்க்கு அறிவொணாக்
கண் நிறைந்த கடிபொழில் அம்பலத்து 
உள் நிறைந்து நின்று ஆடும் ஒருவனே.  8 
 
வில்லைவட் டப்பட வாங்கி அவுணர்தம்
வல்லைவட் டம்மதின் மூன்றுடன் மாய்த்தவன்
தில்லைவட் டந்திசை கைதொழு வார்வினை
ஒல்லைவட் டங்கடந் தோடுதல் உண்மையே.  9 
 
நாடி நாரணன் நான்முக னென்றிவர்
தேடி யுந்திரிந் துங்காண வல்லரோ
மாட மாளிகை சூழ்தில்லை யம்பலத்
தாடி பாதமென் னெஞ்சுள் இருக்கவே.  10 
 
மதுர வாய்மொழி மங்கையோர் பங்கினன்
சதுரன் சிற்றம் பலவன் திருமலை
அதிர ஆர்த்தெடுத் தான்முடி பத்திற
மிதிகொள் சேவடி சென்றடைந் துய்ம்மினே.

திருச்சிற்றம்பலம்