வாயிலார் நாயனார் புராணம்

         

௨ 

சேக்கிழார் பெருமான்  அருளிச்செய்த
திருத்தொண்டர் தொகை 

12ம்  திருமுறை

 

தகவல் பலகை	விவரம்
காண்டம்	9ம்  காண்டம்
சருக்கம்	கறைக்கண்டன் சருக்கம்
அடியார் புராணம்	வாயிலார் நாயனார் புராணம்
திருத்தொண்டர் தொகை	துறைக்கொண்ட செம்பவளம் இருளகற்றுஞ் சோதித் தொன் மயிலை வாயிலான் அடியார்க்கும் அடியேன்
அடியார் வேறுபெயர்
பிற அடியார் குறிப்புகள்	விவரம் இல்லை
குலம்	வேளாளர்
அவதாரத் தலம்	திருமயிலாப்பூர்
முத்தி தலம்	திருமயிலாப்பூர்
இந்த புராணத்தில் இடம்பெற்றுள்ள திருத்தலம்	மயிலாப்பூர்
பகுதி	57

திருச்சிற்றம்பலம்

சொல் விளங்கு சீர்த் தொண்டைநன்னாட்டிடை
மல்லல் நீடிய வாய்மை வளம்பதி
பல்பெருங்குடி நீடு பரம்பரைச்
செல்வ மல்கு திருமயிலா புரி.  1  

நீடு வேலை தன் பால் நிதி வைத்திடத்
தேடும் அப்பெருஞ் சேம வைப்பாம் என
ஆடு பூங்கொடி மாளிகை அப்பதி
மாடு தள்ளும் மரக்கலச் செப்பினால்.  2  

கலம் சொரிந்த கரிக்கருங்கன்று முத்து
அலம்பு முந்நீர் படிந்து அணை மேகமும்
நலங் கொள் மேதி நன்னாகும் தெரிக்க ஒணா
சிலம்பு தெண்திரைக் கானலின் சேண் எலாம்.  3  

தவள மாளிகைச் சாலை மருங்கிறைத்
துவள் பதாகை நுழைந்து அணை தூமதி
பவள வாய் மடவார் முகம் பார்த்து அஞ்சி
உவளகம் சேர்ந்து ஒதுங்குவது ஒக்குமால்.  4  

வீதி எங்கும் விழா அணிக் காளையர்
தூது இயங்கும் சுரும்பு அணி தோகையர்
ஓதி எங்கும் ஒழியா அணிநிதி
பூதி எங்கும் புனை மணிமாடங்கள்.  5  

மன்னு சீர் மயிலைத் திரு மாநகர்த்
தொன்மை நீடிய சூத்திரத் தொல் குல
நன்மை சான்ற நலம் பெறத் தோன்றினார்
தன்மை வாயிலார் என்னும் தபோதனர்.  6  

வாயிலார் என நீடிய மாக்குடித்
தூய மா மரபின் முதல் தோன்றியே
நாயனார் திருத்தொண்டின் நயப்புறு
மேய காதல் விருப்பின் விளங்குவார்.  7  

மறவாமையான் அமைத்த  மனக்கோயிலுள் இருத்தி
உறவாதிதனை உணரும் ஒளி விளக்குச் சுடர் ஏற்றி
இறவாத ஆனந்தம் எனும் திருமஞ்சனம் ஆட்டி
அறவாணர்க்கு அன்பென்னும் அமுதமைத்து   அர்ச்சனை செய்வார்.  8  

அகம் மலர்ந்த அர்ச்சனையில்  அண்ணலார் தமை நாளும்
நிகழ வரும் அன்பினால் நிறை வழிபாடு ஒழியாமே
திகழ நெடுநாள் செய்து சிவபெருமான் அடிநிழல் கீழ்ப்
புகல் அமைத்துத் தொழுது இருந்தார் புண்ணிய மெய்த் தொண்டனார்.  9  

நீராருஞ் சடையாரை  நீடுமன ஆலயத்துள்
ஆராத அன்பினால் அருச்சனை செய்து அடியவர்பால்
பேராத நெறி பெற்ற பெருந் தகையார் தமைப்போற்றிச்
சீர் ஆரும் திரு நீடூர்  முனையடுவார் திறம் உரைப்பாம்.  10

வாயிலார் நாயனார் புராணம்    நிறைவடைந்தது

திருச்சிற்றம்பலம்