திரு இராமேஸ்வரம்

                     

௨ 

திருஞானசம்பந்தர்சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திருஇராமேஸ்வரம்
ஊர் /வேறு பெயர்
நாடு	பாண்டிய நாடு
ॐசுவாமி	இராமநாதசுவாமி
ॐஅம்பிகை	பர்வத வர்த்தனி, மலைவளர் காதலி
பாடியவர்கள்	திருஞானசம்பந்தர் (2),         அலை வளர் தண் மதி  (3-10)         திரிதரு மாமணி (3-101) அப்பர்(1)         பாசமும் கழிக்க (4-61)
ஸ்தல மரம்	மகிழம்
தீர்த்தம்	அக்னி  தீர்த்தம் , உட்பட 22 தீர்த்தங்கள்
பண்	காந்தார பஞ்சமம்
குறிப்புகள்	இராவணனை கொன்ற பழி தீர இராமபிரான் பூசித்த தலம்  அனுமான் கொண்டு வந்த லிங்கம் விசுவலிங்கம் என தனியாக உள்ளது.  பன்னிரு ஜோதிர்லிங்க தலத்தில் தமிழகத்தில் உள்ள ஒரே தலம்
பதிக பலன்	மனத் துயரம் நீங்கும்.
வரிசை எண்.	10                                                                8/14

திருச்சிற்றம்பலம்

அலைவளர் தண்மதி யோடயலே அடக்கி உமை
முலைவளர் பாக முயங்கவல்ல முதல்வன் முனி
இலைவளர் தாழைகள் விம்முகானல் இராமேச்சுரம்
தலைவளர் கோலநன் மாலையன்தானிருந்து ஆட்சியே.  1  

தேவியை வவ்விய தென் இலங்கைத் தசமாமுகன்
பூவிய லும் முடி பொன்றுவித்த பழி போய் அற
ஏவியலும் சிலை அண்ணல் செய்த இராமேச்சுரம்
மேவிய சிந்தையினார்கள் தம் மேல் வினை வீடுமே.  2  

மானன நோக்கி வைதேகி தன்னை ஒரு மாயையால்
கானதில் வவ்விய கார் அரக்கன் உயிர் செற்றவன்
ஈனமிலாப் புகழ அண்ணல் செய்த இரா மேச்சுரம்
ஞானமும் நன் பொருளாகி நின்றது ஒரு நன்மையே.  3  

உரை உணராதவன் காமம் என்னும் முறு வேட்கையான்
வரைபொரு தோளிறச் செற்ற வில்லி மகிழ்ந்து ஏத்திய
விரைமரு வும் கடல் ஓதமல்கும் இராமேச்சுரத்து 
அரையர வாடநின்று ஆடல் பேணும்அம்மான் அல்லனே.  4  

ஊறுடை வெண்தலை கையில் ஏந்திப்பல ஊர்தொறும்
வீறுடை மங்கையர் ஐயம்பெய்ய விறல் ஆர்ந்ததோர்
ஏறுடை வெல்கொடி எந்தைமேய இராமேச்சுரம்
பேறுடை யான்பெயர் ஏத்தும் மாந்தர் பிணி பேருமே.  5  

அணையலை சூழ்கடல் அன்று அடைத்து வழி செய்தவன்
பணையிலங்கும் முடி பத்து இறுத்த பழி போக்கிய
இணையிலி என்றும் இருந்த கோயில் இராமேச்சுரம்
துணையிலி தூமலர்ப் பாதம் ஏத்தத் துயர் நீங்குமே.  6  

சனி புதன் ஞாயிறு வெள்ளி திங்கள் பல தீயன
முனிவது செய்து உகந்தானை வென்ற அவ்வினை மூடிட
இனி அருள் நல்கிடு என்று அண்ணல் செய்த இராமேச்சுரம்
பனிமதி சூடிநின்று ஆடவல்ல பரமேட்டியே.  7  

பெருவரை அன்று எடுத்து ஏந்தினான் தன்பெயர் சாய்கெட
அருவரை யால் அடர்த்த அன்று நல்கிய அயன் மால் எனும்
இருவரும் நாடி நின்று ஏத்து கோயில் இராமேச்சுரத்து 
ஒருவனுமே பலவாகி நின்றதொரு வண்ணமே.  8  

இப்பதிகத்தில் 9-ம் பாடல் கிடைக்கப்பெறவில்லை.  9  

சாக்கியர் வன்சமண் கையர்மெய்யில் தடுமாற்றத்தார்
வாக்கியலும் உரை பற்று விட்டுமதி ஒண்மையால்
ஏக்கிய லும் சிலை அண்ணல் செய்த இராமேச்சுரம்
ஆக்கிய செல்வனை ஏத்தி வாழ்மின்னரு ளாகவே.  10  

பகலவன் மீது இயங்காமைக் காத்த பதியோன்தனை
இகலழி வித்தவன் ஏத்து கோயில் இராமேச்சுரம்
புகலியுள் ஞானசம் பந்தன் சொன்ன தமிழ் புந்தியால்
அகலிடம் எங்கும் நின்று ஏத்த வல்லார்க்கு இல்லை அல்லலே.

        

திருச்சிற்றம்பலம்