திருமந்திரம் - 1.24 கள்ளுண்ணாமை

                       

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	24
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	24. கள் உண்ணாமை
பிற குறிப்புகள்	கள் உண்பதை தவிர்க்க

திருச்சிற்றம்பலம்

                  

கழுநீர்ப் பசுப்பெறில் கயந்தொறும் தேரா

கழுநீர் விடாய்த்துத் தம் காயம்சுருக்கும்

முழுநீர்க் கள் உண்போர் முறைமை அகன்றோர்

செழுநீர்ச் சிவன்தன் சிவானந்தத் தேறலே.  1  

சித்தம் உருக்கிச் சிவமாம் சமாதியில்

ஒத்த சிவானந்தம் ஓவாத தேறலைச்

சுத்த மது உண்ணச் சிவானந்தம் விட்டிடா

நித்தல் இருத்தல் கிடத்தல் கீழ்க் காலே.  2  

காமமும் கள்ளும் கலதிகட்கே ஆகும்

மாமல மும்சம யத்துள் மயல் உறும்

போமதி ஆகும் புனிதன் இணையடி

ஓமய ஆனந்தத் தேறல் உணர்வு உண்டே.  3  

வாமத்தோர் தாமும் மது உண்டும் ஆள்பவர்

காமத்தோர் காமக் கள் உண்டே கலங்குவர்

ஓமத்தோர் உள் ஒளிக்கு உள்ளே உணர்வர்கள்

நாமத்தோர் அன்றே நணுகுவர் தாமே.  4  

உள் உண்மை ஓரார் உணரார் பசுபாசம்

வள்ளன்மை நாதன் அருளினின் வாழ்வுறார்

தெள் உண்மை ஞானச் சிவயோகம் சேர்வுறார்

கள் உண்ணும் மாந்தர் கருத்து அறியாரே.  5  

மயக்கும் சமய மலம் மன்னும்  மூடர்

மயக்கு மது உண்ணும் மாமூடர் தேரார்

மயக்குறு மாமாயை மாயையின் வீடு

மயக்கில் தெளியின் மயக்குறும் அன்றே.  6  

மயங்கும் தியங்கும் கள்வாய்மை அழிக்கும்

இயங்கும் மடவார்தம் இன்பமே எய்தி

முயங்கும் நயம் கொண்ட ஞானத்து முந்தார்

இயங்கும் இடையறா ஆனந்தம் எய்துமே.  7  

இராப்பகல் அற்ற இடத்தே இருந்து 

ப்ராக்குற அற ஆனந்தத் தேறல் பருகார் 

இராப்பகல்  அற்ற இறையடி இன்பத்து 

இராப்பகல் மாயை இரண்டு இடத்தேனே. 8

சத்தியை வேண்டிச் சமயத்தோர் கள் உண்பர்

சத்தி அழிந்தது தம்மை மறத்தலால்

சத்தி சிவஞானம் தன்னில் தலைப்பட்டுச்

சத்திய ஞான ஆனந்தத்தில் சார்தலே.  9  

சத்தன் அருள்தரின் சத்தி அருளுண்டாம்

சத்தி அருள்தரின் சத்தன் அருளுண்டாம்

சத்தி சிவமாம் இரண்டும் தன் உள்வைக்கச்

சத்தியம் எண்சித்தித் தன்மையு மாமே.  10  

தத்துவம் நீக்கி மருள்நீக்கித் தான் ஆகிப்

பொய்த்தவம் நீக்கி, மெய்ப் போகத்துள் போக்கியே

மெய்த்த சகம் உண்டு விட்டுப் பரானந்தச்

சித் அது  ஆக்கும் சிவானந்தத் தேறலே.  11  

யோகிகள் கால்கட்டி ஒண்மதி ஆனந்தப்

போத அமுதைப் பொசித்தவர் எண்சித்தி

மோகியர் கள் உண்டு மூடராய் மோகம் உற்று

ஆகும் மதத்தால் அறிவழிந் தாரே.  12 

உண்ணீர் அமுதம் உறும் ஊரளைத் திறந்து 

எண்ணீர் குரவன் இணையடித் தாமரை 

நண்ணீர்  சமாதியின் நாடி நீரால் நலம் 

கண் ஆற்றொடே சென்று கால் வழி காணுமே  13

திருச்சிற்றம்பலம்