திரு மயேந்திர பள்ளி

                                                                                      ௨ 

திருஞான சம்பந்த  சுவாமிகள்  அருளிச்செய்த
மூன்றாம் திருமுறை

தகவல் பலகை	விவரம்
தலம்	திரு மயேந்திர பள்ளி
ஊர்/வேறு பெயர்
நாடு	சோழ (காவிரி வட)
ॐசுவாமி	திருமேனி அழகர் சோம சுந்தரர்
ॐஅம்பிகை	வடிவாம்பாள்
பாடியவர்கள்	சம்பந்தர்   (1)         திரை தரு பவளமும் (3-31)
ஸ்தல மரம்	கண்ட மரம், தாழை
தீர்த்தம்	மயேந்திர தீர்த்தம்
பண்	கொல்லி
குறிப்புகள்	இந்திரன் சந்திரன் வழிபட்டது.  ஆண்டு தோறும் பங்குனி மாதத்தில் ஒரு வார காலம் சூரியனுடைய ஒளி சுவாமி மீது பரவுவது சிறப்பு.
பதிக பலன்	துன்பம் விலகும்.
வரிசை எண்.	31                                                           6/63

திருச்சிற்றம்பலம்

திரைதரு பவளமும்சீர்திகழ் வயிரமும்

கரைதரும் அகிலொடு கனவளை புகுதரும்

வரைவிலால் எயில் எய்த மயேந்திரப் பள்ளியுள்

அரவரை அழகனை அடியிணை பணிமினே.  1

கொண்டல்சேர் கோபுரம் கோலமார் மாளிகை

கண்டலும் கைதையும் கமலமார் வாவியும்

வண்டுலாம் பொழில் அணி மயேந்திரப் பள்ளியிற்

செண்டுசேர் விடையினான் திருந்தடி பணிமினே.  2

கோங்கு இள வேங்கையும் கொழுமலர்ப் புன்னையும்

தாங்குதேன் கொன்றையும் தகுமலர்க் குரவமும்

ஆங்கரும் பும்வயல் மயேந்திரப் பள்ளியுள்

ஆங்கு இருந்தவன் கழல் அடியிணை பணிமினே.  3

வங்கமார் சேணுயர்வருகுறி யான்மிகு

சங்கமார் ஒலிஅகில்தருபுகை கமழ்தரும்

மங்கை ஓர் பங்கினன்  மயேந்திரப் பள்ளியுள்

எங்கள்நா யகன் தனது இணையடி பணிமினே.  4

நித்திலத் தொகைபல நிரைதரு மலர் எனச்

சித்திரப் புணரிசேர்த்திடத் திகழ்ந்து இருந்தவன்

மைத்திகழ் கண்டன் நன்மயேந்திரப் பள்ளியுள்

கைத்தல மழுவனைக்கண்டு அடி பணிமினே.  5

சந்திரன் கதிரவன் தகுபுகழ் அயனொடும்

இந்திரன் வழிபட இருந்தஎம் இறையவன்

மந்திர மறைவளர் மயேந்திரப் பள்ளியுள்

அந்தமில் அழகனை அடிபணிந்து உய்ம்மினே.  6

சடைமுடி முனிவர்கள் சமைவொடும் வழிபட

நடம்நவில் புரிவினன் நறவணி மலரொடு

படர்சடை மதியினன் மயேந்திரப் பள்ளியுள்

அடல்விடை உடையவன் அடிபணிந்து உய்ம்மினே.  7

சிரம் ஒரு பதுமுடைச்செருவலி அரக்கனைக்

கரம் இருபதும் இறக்கனவரை அடர்த்தவன்

மரவமர் பூம்பொழில் மயேந்திரப் பள்ளியுள்

அரவமர் சடையனைஅடிபணிந்து உய்ம்மினே.  8

நாகணைத் துயில்பவன் நலமிகு மலரவன்

ஆகணைந்து அவர்கழல் அணையவும் பெறுகிலர்

மாகணைந்து அலர்பொழில் மயேந்திரப் பள்ளியுள்

யோகணைந்து அவன்கழல் உணர்ந்திருந்து உய்ம்மினே.  9

உடைதுறந் தவர்களும் உடைதுவர் உடையரும்

படுபழி உடையவர்பகர்வன விடுமின்நீர்

மடைவளர் வயலணிமயேந்திரப் பள்ளியுள்

இடமுடை ஈசனை இணையடி பணிமினே.  10

வம்புலாம் பொழிலணி மயேந்திரப் பள்ளியுள்

நம்பனார் கழலடி ஞானசம் பந்தன்சொல்

நம்பரம் இது எனநாவினால் நவில்பவர்

உம்பரார் எதிர்கொள உயர்பதி அணைவரே.  11

திருச்சிற்றம்பலம்