திரு கழிப்பாலை

                                                                                       ௨ 

திருநாவுக்கரசர்  அருளிச்செய்த
நான்காம்  திருமுறை

தகவல் பலகை	விவரம்
தலம்	திருக்கழிப்பாலை
ஊர்/வேறு பெயர்
நாடு	சோழ (காவிரி வட)
ॐசுவாமி	பால் வண்ண நாதர்
ॐஅம்பிகை	வேத நாயகி
பாடியவர்கள்	சம்பந்தர் (2)     புனல் ஆடியபுன் (2-21)     வெந்த குங்குலியப் புகை (3-44)     அப்பர் (5)     வனபவள வாய் திறந்து (4-006)     நங்கையைப் பாகம் வைத்தார் (4-30)     நெய்தற் குருகுதன் பிள்ளை (4-106)     வண்ணமும் வடிவும் சென்று (5-40)     ஊன் உடுத்தி ஒன்பது வாசல் (6-12) சுந்தரர் (1)         செடியேன் தீவினையில் தடுமாற(7-23)
ஸ்தல மரம்	வில்வம்
தீர்த்தம்	கொள்ளிடம்
பண்	திருநேரிசை
குறிப்புகள்	வால்மீகி முனிவர் வழிபட்டு பேறு பெற்றது
பதிக பலன்	திருவருள் சித்திக்கும்.
வரிசை எண்.	30                                                                   4/63

திருச்சிற்றம்பலம்

நங்கையைப் பாகம் வைத்தார் 

          ஞானத்தை நவில வைத்தார்

அங்கையில் அனலும் வைத்தார் 

          ஆனையின் உரிவை வைத்தார்

தங்கையின் யாழும் வைத்தார் 

          தாமரை மலரும் வைத்தார்

கங்கையைச் சடையுள் வைத்தார் 

          கழிப்பாலைச் சேர்ப்ப னாரே.  1

    

விண்ணினை விரும்ப வைத்தார் 

          வேள்வியை வேட்க வைத்தார்

பண்ணினைப் பாட வைத்தார் 

          பத்தர்கள் பயில வைத்தார்

மண்ணினைத் தாவ நீண்ட 

          மாலினுக்கு அருளும் வைத்தார்

கண்ணினை நெற்றி வைத்தார் 

          கழிப்பாலைச் சேர்ப்ப னாரே.  2

வாமனை வணங்க வைத்தார் 

          வாயினை வாழ்த்த வைத்தார்

சோமனைச் சடைமேல் வைத்தார் 

          சோதியுள் சோதி வைத்தார்

ஆமநெய்யாட வைத்தார் 

          அன்பு எனும் பாசம் வைத்தார்

காமனைக் காய்ந்த கண்ணார் 

          கழிப்பாலைச் சேர்ப்ப னாரே.  3

அரியன அங்கம் வேதம் 

          அந்தணர்க்கு அருளும் வைத்தார்

பெரியன புரங்கள் மூன்றும் 

          பேரழல் உண்ண வைத்தார்

பரியதீ வண்ண ராகிப் 

          பவளம்போல் நிறத்தை வைத்தார்

கரியதோர் கண்டம் வைத்தார் 

          கழிப்பாலைச் சேர்ப்ப னாரே.  4

கூரிருள் கிழிய நின்ற 

          கொடுமழுக் கையில் வைத்தார்

பேரிருள் கழிய மல்கு 

          பிறைபுனல் சடையுள் வைத்தார்

ஆரிருள் அண்டம் வைத்தார் 

          அறுவகைச் சமயம் வைத்தார்

கார் இருள் கண்டம் வைத்தார் 

          கழிப்பாலைச் சேர்ப்ப னாரே.  5

உள் தங்கு சிந்தை வைத்தார் 

          உள்குவார்க்கு உள்ளம் வைத்தார்

விண் தங்கு வேள்வி வைத்தார் 

          வெந்துயர் தீர வைத்தார்

நள் தங்கு நடமும் வைத்தார் 

          ஞானமு நவில வைத்தார்

கட்டங்கம்  தோள் மேல் வைத்தார் 

          கழிப்பாலைச் சேர்ப்ப னாரே.  6

ஊனப்பேர் ஒழிய வைத்தார் 

          ஓதியே உணர வைத்தார்

ஞானப்பேர் நவில வைத்தார் 

          ஞானமும் நடுவும் வைத்தார்

வானப்பேர் ஆறு வைத்தார்

          வைகுந்தற்கு ஆழி வைத்தார்

கானப்பேர் காதல் வைத்தார் 

          கழிப்பாலைச் சேர்ப்ப னாரே  7

கொங்கினும் அரும்பு வைத்தார் 

          கூற்றங்கள் கெடுக்க வைத்தார்

சங்கினுள் முத்தம் வைத்தார் 

          சாம்பலும் பூச வைத்தார்

அங்கமும் வேதம் வைத்தார் 

          ஆலமும் உண்டு வைத்தார்

கங்குலும் பகலும் வைத்தார் 

          கழிப்பாலைச் சேர்ப்ப னாரே.  8

சதுர்முகன் தானும் மாலும் 

          தம்மிலே இகலக் கண்டு

எதிர்முகம் இன்றி நின்ற 

          எரியுரு  அதனை வைத்தார்

பிதிர்முகன் காலன் தன்னைக் 

          கால்தனில் பிதிர வைத்தார்

கதிர்முகம்  சடையில் வைத்தார் 

          கழிப்பாலைச் சேர்ப்ப னாரே.  9

மாலினாள் நங்கை அஞ்ச 

          மதில் இலங் கைக்கு மன்னன்

வேலினான் வெகுண்டு எடுக்கக் 

          காண்டலும் வேத நாவன்

நூலினான் நோக்கி நக்கு

          நொடிப்பதோ ரளவில் வீழக்

காலினால் ஊன்றி யிட்டார் 

          கழிப்பாலைச் சேர்ப்ப னாரே.  10

திருச்சிற்றம்பலம்