1. திருவிசைப்பா - சேந்தனார் - திரு வீழிமிழை

 

௨ 

சேந்தனார் அருளிச்செய்த திருவிசைப்பா 
ஒன்பதாம் திருமுறை

தகவல் பலகை	விவரம்
தலம்	திரு வீழிமிழலை
ஊர்
நாடு	காவிரி தென்கரை
ॐசுவாமி	வீழி அழகர்
ॐஅம்பிகை	சுந்தரகுஜாம்பிகை
பாடியவர்கள்	திருஞானசம்பந்தர்(14),         சடையார் புனல்          தடநில வியமலை          அறையார் விரிகோவண         இரும்பொன் மலைவில்லா          வாசி தீரவே காசு          அலர் மகள் மலிதர          ஏரிசையும் வாடவாளின்          கேள்வியர் நாள்தொறும்         சீர் மருவு தேசினோடு          மட்டொளி விரிதரு          வெண் மதி தவழ்         வெளிநேர் தரு கண்ணி         துன்று கொன்றை          புள்ளித் தோலாடை  திருநாவுக்கரசர்(8),         பூதத்தின் படையர்        வான் சொட்ட சொட்ட          கரைந்து  கைதொழு         என்பொனே இமையோர்         பேரானை ஈர் உரிவை          கயிலாய மலை உள்ளார்         கண்ணவன் காண் கண்ணொளி          மானேறு கரம் உடைய    சுந்தரர்(1)         நம்பினருக்கு அருள் செய்யும்.
ஸ்தல மரம்	வீழிச் செடி
தீர்த்தம்	விஷ்ணுதீர்த்தம்,
பண்	பஞ்சமம்
குறிப்புகள்	ஈசன் திருமணக் கோலத்துடன் வீற்றிருக்கும் தலம் திருமால் ஆழிப்படை பெற்ற தாம் சம்பந்தரும், அப்பரும் பஞ்சத்தின் போது படிக்காசு பெற்ற தலம் சீர்காழி பதியில் உள்ள காட்சியை சம்பந்தருக்கு காட்டி அருளிய சிறப்பு உடையது இங்கு திருமால் பெருமானை வழிபட்டு சக்கரம் பெற்றார் என்பது வரலாறு.
பதிக பலன்	தன்னம்பிக்கை பெருக
வரிசை எண்.	2                                                                                               61/127

திருச்சிற்றம்பலம்

ஏகநா யகனை இமையவர்க்கு அரசை
          என் உயிர்க்கு அமுதினை எதிரில்
போகநா யகனைப் புயல்வணற்கு அருளிப்
          பொன்னெடுஞ் சிவிகையா ஊர்ந்த
மேகநா யகனை மிகுதிரு வீழி
          மிழலைவிண் ணிழிசெழுங் கோயில்
யோகநா யகனை அன்றிமற் றொன்றும்
          உண்டு என உணர்கிலேன் யானே.  1  

கற்றவர் விழுங்கும் கற்பகக் கனியைக்
          கரையிலாக் கருணைமா கடலை
மற்றவர் அறியா மாணிக்க மலையை
          மதிப்பவர் மனமணி விளக்கைச்
செற்றவர் புரங்கள் செற்ற எம் சிவனைத்
          திருவீழி மிழலைவீற் றிருந்த
கொற்றவன் தன்னைக் கண்டுகண்டு உள்ளம்
          குளிரஎன் கண்குளிர்ந் தனவே.  2  

மண்டலத்து ஒளியை விலக்கியான் நுகர்ந்த
          மருந்தைஎன் மாறிலா மணியைப்
பண்டலர் அயன்மாற்கு அரிதுமாய் அடியார்க்கு
          எளியதோர் பவளமால் வரையை
விண்டலர் மலர்வாய் வேரிவார் பொழில்சூழ்
          திருவீழி மிழலையூர் ஆளும்
கொண்டலங் கண்டத்து எம்குரு மணியைக்
          குறுகவல் வினைகுறு காவே.  3  

தன்னடி நிழற்கீழ் என்னையும் தகைத்த
          சசிகுலா மவுலியைத் தானே
என்னிடைக் கமலம் மூன்றினுள் தோன்றி
          எழுஞ்செழுஞ் சுடரினை அருள்சேர்
மின்னெடுங் கடலுள் வெள்ளத்தை வீழி
          மிழலையுள் விளங்குவெண் பளிங்கின்
பொன்னடிக்கு அடிமை புக்கினிப் போக
          விடுவனோ பூண்டுகொண் டேனே.  4  

இத்தெய்வ நெறிநன்று என்று இருள் மாயப்
          பிறப்பறா இந்திர சாலப்
பொய்த்தெய்வ நெறிநான் புகாவகை புரிந்த
          புராணசிந்தா மணி வைத்த
மெய்த் தெய்வ நெறி நான் மறையவர் வீழி
          மிழலை விண்ணிழி செழுங் கோயில்
அத்தெய்வ நெறியிற் சிவமலாது அவமும்
          அறிவரோ அறிவுடை யோரே.  5  

அக்கனா அனைய செல்வமே சிந்தித்து
          ஐவரோடு அழுந்தியான் அவமே
புக்கிடா வண்ணம் காத்து எனை ஆண்ட
          புனிதனை வனிதைபா கனைஎண்
திக்கு எலாம் குலவும் புகழ்த்திரு வீழி
          மிழலையான் திருவடி நிழற்கீழ்ப்
புக்குநிற் பவர்தம் பொன்னடிக் கமலப்
          பொடி அணிந்து அடிமைபூண் டேனே.  6  

கங்கைநீர் அரிசிற் கரை இரு மருங்கும்
          கமழ்பொழில் தழுவிய கழனித்
திங்கள்நேர் தீண்ட நீண்டமா ளிகைசூழ்
          மாடநீ டுயர்திரு வீழித்
தங்குசீர்ச் செல்வத் தெய்வத்தான் தோன்றி
          நம்பியைத் தன்பெருஞ் சோதி
மங்கையோர் பாகத்து என் அரு மருந்தை
          வருந்திநான் மறப்பனோ இனியே.  7  

ஆயிரம் கமலம் ஞாயிறு ஆயிரம் முக்
          கண்முக கரசர ணத்தோன்
பாயிருங் கங்கை பனிநிலாக் கரந்த
          படர்சடை மின்னு பொன் முடியோன்
வேயிருந் தோளி உமை மணவாளன்
          விரும்பிய மிழலைசூழ் பொழிலைப்
போயிருந் தேயும் போற்றுவார் கழல்கள்
          போற்றுவார் புரந்தரா திகளே.  8  

எண்ணில்பல் கோடி சேவடி முடிகள்
          எண்ணில்பல் கோடிதிண் தோள்கள்
எண்ணில்பல் கோடி திருவுரு நாமம்
          ஏர்கொள்முக் கண்முகம் இயல்பும்
எண்ணில்பல் கோடி எல்லைக்கு அப் பாலாய்
          நின்று ஐஞ்ஞூற்று அந்தணர் ஏத்தும்
எண்ணில்பல் கோடி குணத்தர்ஏர் வீழி
          இவர்நம்மை ஆளுடை யாரே.  9  

தக்கன்வெங் கதிரோன் சலந்தரன் பிரமன்
          சந்திரன் இந்திரன் எச்சன்
மிக்கநெஞ்சு அரக்கன் புரம்கரி கருடன்
          மறலிவேள் இவர்மிகை செகுத்தோன்
திக்கு எலாம் நிறைந்த புகழ்த்திரு வீழி
          மிழலையான் திருவடி நிழற்கீழ்ப்
புக்கிருந் தவர்தம் பொன்னடிக் கமலப்
          பொடியணிந்து அடிமைபூண் டேனே.  10  

உளம் கொள மதுரக் கதிர்விரித்து உயிர்மேல்
          அருள்சொரி தரும்உமா பதியை
வளங்கிளர் நதியும் மதியமும் சூடி
          மழவிடை மேல்வரு வானை
விளங்கொளி வீழி மிழலை வேந்தே என்று
          ஆந்தனைச் சேந்தன்தா தையையான்
களங்கொள அழைத்தால் பிழைக்குமோ அடியேன்
          கைக்கொண்ட கனககற் பகமே.  11  

பாடலங் காரப் பரிசில்காசு அருளிப்
          பழுத்தசெந் தமிழ்மலர் சூடி
நீடலங் காரத்து எம்பெரு மக்கள்
          நெஞ்சினுள் நிறைந்துநின் றானை
வேடலங் காரக் கோலத்தின் அமுதைத்
          திருவீழி மிழலையூர் ஆளும்
கேடிலங் கீர்த்திக் கனககற் பகத்தைக்
          கெழுமுதற்கு எவ்விடத் தேனே. 

திருச்சிற்றம்பலம்