2. திருவிசைப்பா - சேந்தானார் - திருவாவடுதுறை

  

௨ 

சேந்தனார் அருளிச்செய்த திருவிசைப்பா 
ஒன்பதாம் திருமுறை

தகவல் பலகை	விவரம்
தலம்	திருவாவடுதுறை
ஊர்/வேறுபெயர்	சாந்தை, சாந்தையூர், கோமுத்தி, கோகழி, நவகோடி
நாடு	காவிரி தென்கரை
ॐசுவாமி	மாசிலாமணி ஈசர். செம்பொற்றியாகர்
ॐஅம்பிகை	ஒப்பிலா முலையம்மை
பாடியவர்கள்	திருஞானசம்பந்தர்(1)          இடரினும் தளரினும் (3-4)          திருநாவுக்கரசர்(5)         மாயிறு ஞாலம் (4-56)         மஞ்சனே மணியும் (4-57)         நிறைக்க வாலியல் (5-29)         திருவே என் செல்வமே (6-47)          சுந்தரர்(2)         மறையவன் ஒரு (7-66)         கங்கை வார் சடையாய் (7-70)          திருமூலர்     திருமந்திரம் 3000 பாடல்கள்  சேந்தனார் (1)         திருவிசைப்பா (1)
ஸ்தல மரம்	அரச மரம்
தீர்த்தம்	கொமுத்தோ தீர்த்தம், பத்ம தீர்த்தம்
பண்	பஞ்சமம்
குறிப்புகள்	உமாதேவியார், பசு வடிவுடன் இத்தளத்தில் வழிபாட்டு பசு வடிவம் நீங்க பெற்றமையால் இது திரு ஆ வடு துறை  இந்த பதிக பாடல்கள் அந்தாதி அமைப்பில் அமைந்துள்ளது சிந்திக்க தக்கது.
பதிக பலன்	அறிவுத்திறன் வளரும்.
வரிசை எண்.	2                                     காவிரி (தெ) -36 /127

திருச்சிற்றம்பலம்

பொய்யாத வேதியர் சாந்தைமெய்ப் 
          புகழாளர் ஆயிரம் பூசுரர்
மெய்யே திருப்பணி செய்சீர் 
          மிகுகா விரிக்கரை மேய
ஐயா ! திருவா வடுதுறை அமுதே ! 
          என்று உன்னை அழைத்தக்கால்
மையார் தடங்கண் மடந்தைக்கு ஒன்று 
          அருளாது ஒழிவது மாதிமையே.  1  

மாதி மணங் கமழும்பொழில் 
          மணிமாட மாளிகை வீதிசூழ்
சோதி மதில் அணி சாந்தைமெய்ச் 
          சுருதி விதி வழியோர் தொழும்
ஆதி அமரர் புராணனாம் 
          அணிஆ வடுதுறை நம்பி நின்ற
நீதி அறிகிலள்  பொன்நெடும் 
          திண்தோள் புணர நினைக்குமே.  2  

நினைக்கும் நிரந்தர னே !என்னும்
          நிலாக்கோலச் செஞ்சடைக் கங்கைநீர்
நனைக்கும் நலங்கிளர் கொன்றைமேல்
          நயம்பேசும் நன்னுதல் நங்கைமீர் !
மனக்கு இன்ப வெள்ள மலைமகள்
          மணவாள நம்பிவண் சாந்தையூர்
தனக்கு இன்பன் ஆவடு தண்துறைத்
          தருண இந்து சேகரன் என்னுமே.  3  

தருண இந்து சேகரனே எனும்
          தடம்பொன்னித் தென்கரைச் சாந்தையூர்ப்
பொருள்நேர்ந்த சிந்தை அவர் தொழப்
          புகழ்செல்வம் மல்குபொற் கோயிலுள்
அருள்நேர்ந்து அமர் திரு வாவடுதுறை 
          ஆண்ட ஆண்டகை அம்மானே
தெருள்நேர்ந்த சித்தம் வலியவா
          திலக நுதலி திறத்திலே.  4  

திலக நுதல் உமை நங்கைக்கும்
          திருவா வடுதுறை நம்பிக்கும்
குலக அடியவர்க்கு என்னையாட்
          கொடுத்து ஆண்டு கொண்ட குணக்கடல்
அலதொன்று அறிகின்றிலேம் எனும்
          அணியும்வெண் நீறு அஞ்சு எழுத்தலால்
வலது ஒன்றிலள் இதற்கு என்செய்கேன்
          வயலந்தண் சாந்தையர் வேந்தனே !  5  

வேந்தன் வளைத்தது மேருவில்
          அரவுநாண் வெங்கணை செங்கண்மால்
போந்த மதிலணி முப்புரம்
          பொடியாட வேதப் புரவித்தேர்
சாந்தை முதல் அயன் சாரதி
          கதி அருள் என்னும் இத் தையலை 
ஆந்தண் திருவா வடுதுறையான்
          செய்கை யார் அறிகிற்பாரே  6  

கிற்போம் எனத்தக்கன் வேள்விபுக்கு
          எழுந்து ஓடிக் கெட்ட அத்தேவர்கள்
சொற்போலும் மெய்ப்பயன் பாவிகாள்என்
          சொல்லிச் சொல்லும் இத் தூமொழி
கற்போல் மனம் கனிவித்த எம்
          கருணாலயா வந்திடாய் என்றால்
பெற்போ பெருந்திரு வாவடுதுறை 
          ஆளி பேசாது ஒழிவதே.  7  

ஒழிவு ஒன்றிலா உண்மை வண்ணமும்
          உலப்பிலள் ஊறு இன்ப வெள்ளமும்
மொழி ஒன்றிலாப் பொன்னித் தீர்த்தமும்
          முனிகோடி கோடியா மூர்த்தியும்
அழிவு ஒன்றிலாச் செல்வச் சாந்தையூர்
          அணி ஆவடுதுறை ஆடினாள்
இழிவு ஒன்றிலாவகை எய்திநின்று
          இறுமாக்கும் என் இள மானனே.  8  

மானேர் கலைவளையும் கவர்ந்து உளம்
          கொள்ளை கொள்ளவழக்கு உண்டே !
தேனே ! அமுதே !என் சித்தமே !
          சிவலோக நாயகச் செல்வமே !
ஆனே அலம்பு புனற் பொன்னி
          அணி ஆவடுதுறை அன்பர்தம்
கோனே !நின் மெய் அடியார் மனக்
          கருத்தை முடித்திடும் குன்றமே !  9  

குன்று ஏந்தி கோகன கத்து அயன்
          அறியா நெறி என்னைக் கூட்டினாய்
என்று ஏங்கி ஏங்கி அழைக்கின்றாள்
          இளவல்லி எல்லை கடந்தனள்
அன்றே அலம்பு புனற்பொன்னி
          அணி ஆவடுதுறை ஆடினாள்
நன்றே இவள் நம் பரமல்லள்
          நவலோக நாயகன் பாலளே.  10  

பாலும் அமுதமும் தேனுமாய்
          ஆனந்தம் தந்துள்ளே பாலிப்பான்
போலும்என் ஆருயிர்ப் போகமாம்
          புரகால காமபு ராந்தகன்
சேலும் கயலும் திளைக்கு நீர்த்
          திருவா வடுதுறை வேந்தனோடு
ஆலும் அதற்கே முதலுமாம்
          அறிந்தோம் அரிவைபொய் யாததே.

திருச்சிற்றம்பலம்