3. திருவிசைப்பா - சேந்தனார் - திருவிடைக்கழி

   

௨ 

சேந்தனார் அருளிச்செய்த திருவிசைப்பா 
ஒன்பதாம் திருமுறை

தகவல் பலகை	விவரம்
தலம்	திருவிடைக்கழி
ஊர்/வேறுபெயர்	மகிழ வனம்
நாடு	காவிரி தென்கரை
ॐசுவாமி	திருக்காமேஸ்வரர்
ॐஅம்பிகை	திருக் காமேஸ்வரி
பாடியவர்கள்
ஸ்தல மரம்	மகிழ மரம்,  குரா மரம்
தீர்த்தம்	கொமுத்தோ தீர்த்தம், பத்ம தீர்த்தம்
பண்	பஞ்சமம்
குறிப்புகள்	இப்பதிகம் செவிலியர் கூற்றாக அமைந்தது.  இந்த பதிகம் அந்தாதி அமைப்பில் உள்ளதை சிந்தித்து நோக்குக .  இது முருகப் பெருமான் முதன்மையாக எழுந்து அருளிய திருத்தலம்.
பதிக பலன்	துன்பம் நீங்கும்.
வரிசை எண்.	2.3                                     காவிரி (தெ) -36/127

திருச்சிற்றம்பலம்

மாலுலா மனம்தந்து என்கையில் சங்கம்
          வவ்வினான் மலைமகள் மதலை
மேலுலாந் தேவர் குலமுழு தாளும்
          குமரவேள் வள்ளிதன் மணாளன்
சேலுலாங் கழனித் திருவிடைக் கழியில்
          திருக்குரா நீழற்கீழ் நின்ற
வேலுலாந் தடக்கை வேந்தன்என் சேந்தன்
          என்னும் என் மெல்லியல் இவளே.  1  

இவளை வாரிள மென் கொங்கைபீர் பொங்க
          எழில் கவர்ந் தான்இளங் காளை
கவளமா கரிமேல் கவரிசூழ் குடைக்கீழ்க்
          கனகக் குன்று எனவரும் கள்வன்
திவள மாளிகை சூழ் திருவிடைக் கழியில்
          திருக்குரா நீழற் கீழ் நின்ற
குவளைமா மலர்க்கண் நங்கையானைக்கும்*
          குழகன்நல் அழகன்நங் கோவே. 2  

கோவினைப் பவளக் குழமணக் கோலக்
          குழாங்கள் சூழ்கோழிவெல் கொடியோன்
காவல்நற் சேனை என்னக் காப் பவன் என்
          பொன்னை மேகலை கவர்வானே
தேவின் நற்றலைவன் திருவிடைக் கழியில்
          திருக்குரா நீழற்கீழ் நின்ற
தூவி நற்பீலி மாமயில் ஊரும்
          சுப்பிரமண்ணியன் தானே.  3  

தானமர் பொருது தானவர் சேனை
          மடியச்சூர் மார்பினைத் தடிந்தோன்
மானமர் தடக்கை வள்ளல்தன் பிள்ளை
          மறைநிறை சட்டறம் வளரத்
தேனமர் பொழில்சூழ் திருவிடைக் கழியில்
          திருக்குரா நீழற்கீழ் நின்ற
கோனமர் கூத்தன் குலவிளங்களிறு என்
          கொடிக்கிடர் பயப்பதுங் குணமே !  4  

குணமணிக் குருளைக் கொவ்வைவாய் மடந்தை
          படுமிடர் குறிக்கொளாதது அழகோ
மணமணி மறையோர் வானவர் வையம்
          உய்யமற்று அடியனேன் வாழத்
திணமணி மாடத் திருவிடைக் கழியில்
          திருக்குரா நீழற்கீழ் நின்ற
கணமணி பொருநீர்க் கங்கைதன் சிறுவன்
          கணபதி பின் இளம் கிளையே.  5  

கிளை இளம் சேயக் கிரிதனை கீண்ட
          ஆண்டகை கேடில்வேற் செல்வன்
வளை இளம் பிறைச்செஞ் சடைஅரன் மதலை
          கார்நிற மால் திரு மருகன்
திளை இளம் பொழில்சூழ் திருவிடைக் கழியில்
          திருக்குரா நீழற்கீழ் நின்ற
முளை இளம் களிறுஎன் மொய்குழற் சிறுமிக்கு
          அருளும் கொல் முருகவேள் பரிந்தே.  6  

பரிந்தசெஞ் சுடரோ பரிதியோ மின்னோ
          பவளத்தின் குழவியோ பசும்பொன்
சொரிந்த சிந் துரமோ தூமணித் திரளோ
          சுந்தரத்து அரசு இது என்னத்
தெரிந்தவை திகர்வாழ் திருவிடைக் கழியில்
          திருக்குரா நீழற்கீழ் நின்ற
வரிந்த வெஞ்சிலைக்கை மைந்தனை அம் சொல்
          மையல்கொண்டு  ஐயுறும் வகையே.  7  

வகைமிகும் அசுரர் மாளவந்து உழிஞை
          வானமர் விளைத்ததா ளாளன்
புகைமிகும் அனலிற் புரம்பொடி படுத்த
          பொன்மலை வில்லிதன் புதல்வன்
திகைமிகு கீர்த்தித் திருவிடைக் கழியில்
          திருக்குரா நீழற்கீழ் நின்ற
தொகைமிகு நாமத்தவன் திருவடிக்கு என்
          துடியிடை மடல்தொடங் கினளே.  8  

தொடங்கினள் மடல் என்று அணிமுடித் தொங்கல்
          புறஇதழ் ஆகிலும் அருளான்
இடம் கொளக் குறத்தி திறத்திலும் இறைவன்
          மறத்தொழில் வார்த்தையும் உடையன்
திடம் கொள்வை திகர்வாழ் திருவிடைக் கழியில்
          திருக்குரா நீழற்கீழ் நின்ற
மடம் கலை மலரும் பன்னிரு நயனத்து
          அறுமுகத்து அமுதினை மருண்டே.  9  

மருண்டுறை கோயில் மல்குநன் குன்றப்
          பொழில்வளர் மகிழ் திருப் பிடவூர்
வெருண்டமான் விழியார்க்கு அருள்செயா விடுமே
          விடலையே எவர்க்கும் மெய் அன்பர்
தெருண்டவை திகர்வாழ் திருவிடைக் கழியில்
          திருக்குரா நீழற்கீழ் நின்ற
குருண்ட பூங் குஞ்சிப் பிறைச்சடை முடிமுக்
          கண்ணுடைக் கோமளக் கொழுந்தே.  10  

கொழுந்திரள் வாயார் தாய்மொழி யாகத்
          தூய்மொழி அமரர்கோ மகனைச்
செழுந்திரள் சோதிச் செப்புறைச் சேந்தன்
          வாய்ந்தசொல் இவைசுவா மியையே
செழுந்தடம் பொழில்சூழ் திருவிடைக் கழியில்
          திருக்குரா நீழற்கீழ் நின்ற
எழுங்கதிர் ஒளியை ஏத்துவார் கேட்பார்
          இடர்கெடும் மாலுலா மனமே.

திருச்சிற்றம்பலம்