திருவெண்ணெய்நல்லூர்

 

௨ 

சுந்தரமூர்த்தி   சுவாமிகள் அருளிச்செய்த
ஏழாம்  திருமுறை

தகவல் பலகை	விவரம்
தலம்	அருட்துறை
ஊர்	திருவெண்ணெய் நல்லூர்
நாடு	நடு நாடு
ॐசுவாமி	தடுத்தாட் கொண்ட நாதர்
ॐஅம்பிகை	வேற்கண்மங்கையம்மை, மங்களாம்பிகை
பாடியவர்கள்	சுந்தரர்(1)
ஸ்தல மரம்	மூங்கில்
தீர்த்தம்	தண்ட தீர்த்தம்
பண்	இந்தளம்
குறிப்புகள்	சிவ பெருமான் தடுத்து ஆட்கொண்டு, முதலடியை எடுத்துக் கொடுத்ததிருத்தலம்
பதிக பலன்	இறையருள் பெறலாம்.
வரிசை எண்.	1

திருச்சிற்றம்பலம்

பித்தாபிறை சூடீபெருமானே அருளாளா
எத்தான்மற வாதேநினைக் கின்றேன்மனத்து உன்னை
வைத்தாய்பெண்ணைத் தென்பால் வெண்ணெய் நல்லூர் அருட்டுறையுள்
அத்தாஉனக்கு ஆளாய் இனி அல்லேன்எனல் ஆமே.  1
 
நாயேன்பல நாளும்நினைப்பு இன்றிமனத்து உன்னைப்   
பேயாய்த்திரிந்து எய்த்தேன்பெறலாகா அருள் பெற்றேன்   
வேயார்பெண்ணைத் தென்பால்வெண்ணெய் நல்லூர் அருட்டுறையுள்   
ஆயாஉனக்கு ஆளாய் இனி அல்லேன்எனல் ஆமே.  2 
 
மன்னேமற வாதே நினைக்கின்றேன் மனத்து உன்னைப்   
பொன்னேமணி தானேவயிரம்மேபொரு துந்தி   
மின்னார்பெண்ணைத் தென்பால்வெண்ணெய் நல்லூர் அருட்டுறையுள்   
அன்னே உனக்கு ஆளாய் இனி அல்லேன்எனல் ஆமே.  3 
 
முடியேன்இனிப் பிறவேன்பெறின் மூவேன்பெற்றம் ஊர்தீ   
கொடியேன்பல பொய்யேஉரைப் பேனைக்குறிக் கொள்நீ   
செடியார்பெண்ணைத் தென்பால்வெண்ணெய் நல்லூர் அருட்டுறையுள்   
அடிகேள் உனக்கு ஆளாய் இனி அல்லேன்எனல் ஆமே.  4 
 
பாதம்பணி வார்கள்பெறும் பண்டம் அது பணியாய்   
ஆதன்பொருள் ஆனேன்அறிவில்லேன் அருளாளா   
தாதார்பெண்ணைத் தென்பால்வெண்ணெய் நல்லூர் அருட்டுறையுள்   
ஆதீ உனக்கு ஆளாய் இனி அல்லேன்எனல் ஆமே  5 

தண்ணார்மதி சூடீதழல் போலும்திரு மேனீ   
எண்ணார்புரம் மூன்றும்எரி உண்ணநகை செய்தாய்   
மண்ணார்பெண்ணைத் தென்பால்வெண்ணெய் நல்லூர் அருட்டுறையுள்  அண்ணா உனக்கு ஆளாய் இனி அல்லேன்எனல் ஆமே  6 

 ஊனாய்உயிர் ஆனாய்உடல் ஆனாய் உலகு ஆனாய்   
வானாய்நிலன் ஆனாய்கடல் ஆனாய்மலை ஆனாய்   
தேனார்பெண்ணைத் தென்பால்வெண்ணெய் நல்லூர் அருட்டுறையுள்   
ஆனாய் உனக்கு ஆளாய் இனி அல்லேன்எனல் ஆமே.  7 
 
ஏற்றார்புரம் மூன்றும்எரி உண்ணச்சிலை தொட்டாய்   
தேற்றாதன சொல்லித்திரி வேனோசெக்கர் வானீர்   
ஏற்றாய்பெண்ணைத் தென்பால்வெண்ணெய் நல்லூர் அருட்டுறையுள்   
ஆற்றாய் உனக்கு ஆளாய் இனி அல்லேன்எனல் ஆமே.  8 
 
மழுவாள்வலன் ஏந்தீமறை ஓதீமங்கை பங்கா   
தொழுவார்அவர் துயர்ஆயின தீர்த்தல்உன தொழிலே   
செழுவார்பெண்ணைத் தென்பால்வெண்ணெய் நல்லூர் அருட்டுறையுள்   அழகா உனக்கு ஆளாய் இனி அல்லேன்எனல் ஆமே.  9 
 
காரூர்புனல் எய்திக்கரை கல்லித்திரைக் கையால்   
பாரூர்புகழ் எய்தித்திகழ் பன்மாமணி உந்திச்   
சீரூர்பெண்ணைத் தென்பால்வெண்ணெய் நல்லூர் அருட்டுறையுள்   
ஆரூரன்எம் பெருமாற்கு ஆள் அல்லேன் எனல் ஆமே.
 

திருச்சிற்றம்பலம்