திருவிசைப்பா

 

௨ 

திருமாளிகைத் தேவர்  அருளிச்செய்த திருவிசைப்பா 
ஒன்பதாம் திருமுறை

தகவல் பலகை	விவரம்
தலம்	கோவில்
ஊர்	சிதம்பரம்
நாடு	காவிரி வடகரை
ॐசுவாமி	நடராசர், கனகசபாபதி
ॐஅம்பிகை	சிவகாம சுந்தரி
பாடியவர்கள்	திருஞானசம்பந்தர்(2), திருநாவுக்கரசர்(8), சுந்தரர்(1) மாணிக்கவாசகர் (26)
ஸ்தல மரம்	தில்லை, ஆல்
தீர்த்தம்	சிவகங்கை
பண்	பஞ்சமம்
குறிப்புகள்	சிவ பூசையின் போது ஓதப் பெறும் திருப் பாசுரங்க ளுள் இதுவும் ஒன்று.
பதிக பலன்	பஞ்சபுரானத்தில் பாடக் கூடியது
வரிசை எண்.	1

திருச்சிற்றம்பலம்

ஒளிவளர் விளக்கே உலப்பிலா ஒன்றே !

          உணர்வுசூழ் கடந்ததோர் உணர்வே !

தெளிவளர் பளிங்கின் திரள்மணிக் குன்றே !

          சித்தத்துள் தித்திக்கும் தேனே !

அளிவளர் உள்ளத்து ஆனந்தக் கனியே !

          அம்பலம் ஆடரங் காக

வெளிவளர் தெய்வக் கூத்து உகந் தாயைத்

          தொண்டனேன் விளம்புமா விளம்பே.  1  

இடர்கெடுத்து என்னை ஆண்டுகொண்டு என்னுள்

          இருட்பிழம்பு அறஎறிந்து எழுந்த

சுடர்மணி விளக்கின் உள்ளொளி விளங்கும்

          தூயநற் சோதியுள் சோதீ !

அடல்விடைப் பாகா ! அம்பலக் கூத்தா !

          அயனொடு மால் அறி யாமைப்

படர் ஒளிப் பரப்பிப் பரந்துநின் றாயைத்

          தொண்டனேன் பணியுமா பணியே.  2  

தற்பரம் பொருளே ! சசிகண்ட ! சிகண்டா !

          சாமகண்டா ! அண்ட வாணா !

நற்பெரும் பொருளாய் உரைகலந்து உன்னை

          என்னுடை நாவினால் நவில்வான்

அற்பன்என் உள்ளத்து அளவிலா உன்னைத்

          தந்தபொன் அம்பலத்து ஆடி !

கற்பமாய் உலகாய் அல்லைஆ னாயைத்

          தொண்டனேன் கருதுமா கருதே.  3  

பெருமையிற் சிறுமை பெண்ணொடுஆ ணாய்என்

          பிறப்புஇறப்பு அறுத்த பேரொளியே !

கருமையின் வெளியே கயற்கணாள் இமவான்

          மகள்உமை யவள்களை கண்ணே !

அருமையின் மறைநான் கோலமிட்டு அரற்றும்

          அப்பனே அம்பலத்து அமுதே

ஒருமையிற் பலபுக்கு உருவிநின் றாயைத்

          தொண்டனேன் உரைக்குமாறு உரையே.  4  

கோலமே மேலை வானவர் கோவே !

          குணங்குறி இறந்ததோர் குணமே !

காலமே கங்கை நாயகா எங்கள்

          காலகாலா! காம நாசா !

ஆலமே அமுது உண்டு அம்பலம் செம்பொற்

          கோயில்கொண்டு ஆடவல் லானே !

ஞாலமே தமியேன் நற்றவத் தாயைத்

          தொண்டனேன் நணுகுமா நணுகே.  5  

நீறணி பவளக் குன்றமே ! நின்ற

          நெற்றிக்கண் உடையதோர் நெருப்பே !

வேறணி புவன போகமே யோக

          வெள்ளமே மேருவில் வீரா !

ஆறணி சடை எம் அற்புதக் கூத்தா

          அம்பொன்செய் அம்பலத் தரசே !

ஏறணி கொடி எம் ஈசனே, உன்னைத்

          தொண்டனேன் இசையுமாறு இசையே.  6  

தனதன்நல் தோழா சங்கரா ! சூல

          பாணியே! தாணுவே சிவனே !

கனகநல் தூணே! கற்பகக் கொழுந்தே

          கண்கள்மூன் றுடையதோர் கரும்பே !

அனகனே குமர விநாயக சனக

          அம்பலத்து அமரசே கரனே !

நுனகழல் இணை என் நெஞ்சினுள் இனிதாத்

          தொண்டனேன் நுகருமா நுகரே.  7  

திறம்பிய பிறவிச் சிலதெய்வ நெறிக்கே

          திகைக்கின்றேன் தனைத்திகை யாமே

நிறம்பொன்னும் மின்னும் நிறைந்தசே வடிக்கீழ்

          நிகழ்வித்த நிகரிலா மணியே !

அறம்பல திறங்கண்டு அருந்தவர்க்கு அரசாய்

          ஆலின்கீழ் இருந்தஅம் பலவா !

புறஞ்சமண் புத்தர் பொய்கள்கண் டாயைத்

          தொண்டனேன் புணருமா புணரே.  8  

தக்கன்நல் தலையும் எச்சன்வன் தலையும்

          தாமரை நான்முகன் தலையும்

ஒக்கவிண்டு உருள ஒண்திருப் புருவம்

          நெறித்து அ ருளிய உருத் திரனே !

அக்கணி புலித்தோல் ஆடைமேல் ஆட

          ஆடப்பொன் னம்பலத்து ஆடும்

சொக்கனே எவர்க்கும் தொடர்வரி யாயைத்

          தொண்டனேன் தொடருமா தொடரே.  9  

மடங்கலாய்க் கனகன் மார்புகீண் டானுக்கு

          அருள்புரி வள்ளலே ! மருளார்

இடங்கொள்முப் புரம்வெந்து அவியவை திகத்தேர்

          ஏறிய ஏறுசே வகனே !

அடங்கவல் அரக்கன் அருள்திரு வரைக்கீழ்

          அடர்த்தபொன் னம்பலத்து அரசே !

விடங்கொள்கண் டத்துஎம் விடங்கனே ! உன்னைத்

          தொண்டனேன் விரும்புமா விரும்பே.  10  

மறைகளும் அமரர் கூட்டமும் மாட்டாது

          அயன்திரு மாலொடு மயங்கி

முறைமுறை முறையிட்டு ஓர்வரி யாயை

          மூர்க்கனேன் மொழிந்தபுன் மொழிகள்

அறைகழல் அரன்சீர் அறிவிலா வெறுமைச்

          சிறுமையில் பொறுக்கும்அம் பலத்துள்

நிறைதரு கருணா நிலயமே ! உன்னைத்

          தொண்டனேன் நினையுமா நினையே.

திருச்சிற்றம்பலம்