திருக்கூடலையாற்றூர்

                         

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருக்கூடலையாற்றூர்
ஊர் /வேறு பெயர்
நாடு	நடு நாடு
ॐசுவாமி	நெறி காட்டும் நாயகர்
ॐஅம்பிகை	புரிகுழல் நாயகி
பாடியவர்கள்	சுந்தரர்  (1),         வடிவுடை மழுவேந்தி (7-85)
ஸ்தல மரம்	கல்லாலமரம்
தீர்த்தம்	மணிமுத்தாறு
பண்	புறநீர்மை
குறிப்புகள்	திரு முதுகுன்றத்திற்கு வழி காட்ட இறைவனே அந்தணராக வந்து இந்த தலத்தை காட்டியது.
பதிக பலன்	வினை நீங்கும்.,
வரிசை எண்.	85                                                                 3/22

திருச்சிற்றம்பலம்

வடிவுடை மழு ஏந்தி மதகரி உரிபோர்த்துப்
பொடி அணி திருமேனிப் புரிகுழல் உமையோடும்
கொடி அணி நெடுமாடக் கூடலை யாற்றூரில்
அடிகள் இவ்வழி போந்த அதிசயம் அறியேனே.  1  

வையகம் முழுது உண்ட மாலொடு நான்முகனும்
பையரவு அகல் அல்குல் பாவையொ டும் உடனே
கொய்யணி மலர்ச்சோலைக் கூடலை யாற்றூரில்
ஐயன்இவ் வழிபோந்த அதிசயம் அறியேனே.  2  

ஊர்தொறும் வெண் தலைகொண்டு உண்பலி இடும் என்று
வார்தரு மென்முலையாள் மங்கையொ டும் உடனே
கூர்நுனை மழுவேந்திக் கூடலை யாற்றூரில்
ஆர்வன்இவ் வழிபோந்த அதிசயம் அறியேனே.  3 

 சந்தணவும் புனலும் தாங்கிய தாழ்சடையன்
பந்தணவும் விரலாள் பாவையொடும் உடனே
கொந்தணவும் பொழில் சூழ் கூடலை யாற்றூரில்
அந்தணன் வழிபோந்த அதிசயம் அறியேனே.  4  

வேதியர் விண்ணவரும் மண்ண வரும்தொழநற்
சோதியது உருவாகிச்சுரிகுழல் உமையோடும்
கோதிய வண்டறையும்  கூடலை யாற்றூரில்
ஆதிஇவ் வழி போந்த அதிசயம் அறியேனே.  5  

வித்தக வீணையொடும் வெண்புரி நூல்பூண்டு
முத்தன வெண்முறுவல் மங்கையொ டும் உடனே
கொத்தல ரும்பொழில்சூழ் கூடலை யாற்றூரில்
அத்தன்இவ் வழிபோந்த அதிசயம் அறியேனே.  6  

மழைநுழை மதியமொடு வாளர வஞ்சடைமேல்
இழைநுழை துகில்அல்குல் ஏந்திழை யாளோடும்
குழையணி திகழ்சோலைக் கூடலை யாற்றூரில்
அழகன்இவ் வழிபோந்த அதிசயம் அறியேனே.  7  

மறைமுதல் வானவரும் மால் அயன் இந்திரனும்
பிறைநுதல் மங்கையொடும் பேய்க்கணமும் சூழக்
குறள்படை அதனோடும் கூடலை யாற்றூரில்
அறவன்இவ் வழிபோந்த அதிசயம் அறியேனே.  8  

வேலையின் நஞ்சுண்டு விடையது தான்ஏறிப்
பாலன மென்மொழியாள் பாவையொ டும் உடனே
கோலம உருவாகிக்கூடலை யாற்றூரில்
ஆலன்இவ் வழிபோந்த அதிசயம் அறியேனே.  9  

கூடலை யாற்றூரில் கொடியிடை யவளோடும்
ஆடலு உந்தானை அதிசயம் இது என்று
நாடிய இன் தமிழால் நாவல் ஊரன்சொல்
பாடல்கள் பத்தும்வல்லார் தம்வினை பற்று அறுமே.

திருச்சிற்றம்பலம்