கோவில்

 

௨ 

திருஞானசம்பந்த சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	கோவில்
ஊர்	சிதம்பரம்
நாடு	காவிரி வடகரை
ॐசுவாமி	நடராசர், கனகசபாபதி
ॐஅம்பிகை	சிவகாம சுந்தரி
பாடியவர்கள்	திருஞானசம்பந்தர்(2), திருநாவுக்கரசர்(8), சுந்தரர்(1) மாணிக்கவாசகர் (26)
ஸ்தல மரம்	தில்லை, ஆல்
தீர்த்தம்	சிவகங்கை
பண்	காந்தார பஞ்சமம்
குறிப்புகள்	சிவ பூசையின் போது ஓதப் பெறும் திருப் பாசுரங்க ளுள் இதுவும் ஒன்று.
பதிக பலன்	உயர்ந்த மக்களுடன் சேர்ந்து வாழ்வார்கள்
வரிசை எண்.	259

திருச்சிற்றம்பலம்

ஆடினாய்நறு நெய்யொடு பால், தயிர்
  அந்தணர்பிரி யாதசிற் றம்பலம்  
நாடினாய் இடமா நறுங்கொன்றை நயந்தவனே   
பாடினாய்மறை யோடுபல் கீதமும் 
   பல்சடைப்பனி கால்கதிர் வெண்திங்கள்
சூடினாய் அருளாய் சுருங்கஎம தொல்வினையே.  1 
 
கொட்டமே கமழும் குழ லாளொடு  
  கூடினாய் எருது ஏறி னாய்நுதல்   
பட்டமேபுனைவாய் இசைபாடுவ பாரிடமா
நட்டமேநவில் வாய்மறை யோர்தில்லை 
  நல்லவர்பிரி யாதசிற் றம்பலம்   
இட்டமா உறைவாய் இவைமேவியது என்னைகொலோ.  2 
 
நீலத்தார்கரி யமிடற் றார்நல்ல     
  நெற்றிமேல் உற்ற கண்ணினார்பற்று    
சூலத்தார் சுடலைப்பொடி நீறு அணிவார் சடையார்
சீலத்தார்தொழுது ஏத்துசிற் றம்பலம்    
  சேர்தலாற்கழற் சேவடி கைதொழக்    
கோலத்தாய் அருளாய் உனகாரணங் கூறுதுமே.  3 
 
கொம்பலைத்தழகு எய்திய நுண்ணிடைக் 
  கோலவாண்மதி போல முகத்திரண்டு    
அம்பு அலைத்த கண் ணாள்முலை மேவிய வார்சடையான்     
கம்பலைத்து எழு காமுறு காளையர்
  காதலால் கழற் சேவடி கைதொழ 
அம்பலத்துறை வான்அடியார்க்கு அடையாவினையே.  4 
 
தொல்லை ஆரமுது உண்ணநஞ் சு உண்டதோர்
  தூமணி மிடறாபகு வாயதோர்   
பல்லையார் தலையிற் பலியேற்று உழல் பண்டரங்கா    
தில்லையார்தொழுது ஏத்துசிற் றம்பலஞ்  
  சேர்தலால் கழற் சேவடி கைதொழ
இல்லையாம்வினை தான் எரியம்மதில் எய்தவனே.  5 
 
ஆகந்தோய் அணி கொன்றை யாய்அனல்   
  அங்கையாய்அம ரர்க்கம ராஉமை
பாகந்தோய் பகவா பலியேற்று உழல் பண்டரங்கா  
மாகந்தோய்பொழில் மல்குசிற் றம்பலம்  
  மன்னினாய்மழு வாளி னாய் அழல்    
நாகந்தோய் அரையாய் அடியாரை நண்ணாவினையே.  6 
 
சாதியார்பளிங் கின்னொடு வெள்ளிய     
  சங்கவார்குழை யாய்திக ழப்படும்
வேதியாவிகிர்தா விழவார் அணி தில்லைதன்னுள்
ஆதியாய்க்கு இடம் ஆய சிற் றம்பலம்  
 அங்கையால்தொழ வல்லடி யார்களை  
வாதியாதகலும் நலியாமலி தீவினையே.  7 
 
வேயினாற்பணைத் தோளியொடு ஆடலை 
  வேண்டினாய்விகிர் தாஉயிர் கட்கு அமுது    
ஆயினாய்இடு காட்டு எரியாடல் அமர்ந்தவனே    
தீயினார்கணை யால் புரம் மூன்று எய்த
  செம்மையாய்திகழ் கின்றசிற் றம்பலம் 
மேயினாய்கழ லேதொழுது எய்துதும் மேல் உலகே.  8 
 
தாரினாற்விரி கொன்றை யாய்மதி 
  தாங்குநீள் சடையாய் "தலைவா" நல்ல   
தேரினார்மறுகின் திருவாரணி தில்லைதன்னுள்
சீரினால் வழிபாடு ஒழியாத தோர்  
  செம்மையால் அழகாயசிற் றம்பலம்     
ஏரினால் அமர்ந்தாய் உனசீரடி ஏத்துதுமே.  9 
 
வெற்று உரை உழல் வார் துவர் ஆடைய 
  வேடத்தார் அவர்கள் உரை கொள்ளன்மின்
மற்றவர் உலகின் அவலம் அவை மாற்றகில்லார்  
கற்றவர்தொழுது ஏத்து சிற்றம்பலம்
  காதலால் கழற் சேவடிகைதொழ 
உற்றவர் உலகின் உறுதிகொள வல்லவரே.  10 
 
  நாறுபூம்பொழில் நண்ணிய காழியுள்     
  நான்மறைவல்ல ஞான சம்பந்தன்
ஊறும்இன் தமிழால் உயர்ந்தார் உறை தில்லைதன்னுள் 
ஏறுதொல் புகழ் ஏந்து சிற்றம்பலத்து   
  ஈசனை இசை யால் சொன்ன பத்து இவை  
கூறு மாறு வல்லார் உயர்ந்தாரொடும் கூடுவரே.

திருச்சிற்றம்பலம்