திரு நாவலூர்

                      

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருநாவலூர்
ஊர் /வேறு பெயர்
நாடு	நடுநாடு
ॐசுவாமி	நாவலீஸ்வரர்
ॐஅம்பிகை	சுந்தராம்பிகை
பாடியவர்கள்	சுந்தரர்  (1)         கோவலன் நான்முகன் (7-17)
ஸ்தல மரம்	இலுப்பை
தீர்த்தம்	கெடில நதி
பண்	நட்டராகம்
குறிப்புகள்	இறைவனால் ஆட்கொள்ளப்பட்ட சுந்தரர், பித்தா பிறை சூடி பதிகம் பாடி  பின், நாவலூர் சென்று பாடிய திருப்பதிகம்  சுக்கிரன் வழிபட்ட தலம்
பதிக பலன்	வினைகள் அறவே ஒழியும்
வரிசை எண்.	17                                                        8/22

திருச்சிற்றம்பலம்

கோவலன் நான்முகன் வானவர்
          கோனும் குற்றேவல் செய்ய
மேவலர் முப்புரம் தீயெழு
          வித்தவன் ஓர் அம்பினால்
ஏவல னார்வெண்ணெய் நல்லூரில்
          வைத்து எனை ஆளுங்கொண்ட
நாவல னார்க்கு இடம் ஆவது
          நம் திரு நாவலூரே.  1  

தன்மையி னால் அடியேனைத்தாம்
          ஆட்கொண்ட நாட்சபைமுன்
வன்மைகள் பேசிட வன் தொண்டன்
          என்பதோர் வாழ்வுதந்தார்
புன்மைகள் பேசவும் பொன்னைத்தந்து 
          என்னைப்போ கம்புணர்த்த
நன்மையி னார்க்கு இடம் ஆவது
          நம் திரு நாவலூரே.  2  

வேகங்கொண் டோடு ஓடிய வெள்விடை
          ஏறியோர் மெல்லியலை
ஆகங்கொண் டார்வெண்ணெய் நல்லூரில்
          வைத்து எனை ஆளும் கொண்டார்
போகங்கொண் டார்கடற் கோடியின்
          மோடியைப் பூண்பதாக
நாகங்கொண் டார்க்கு இடம் ஆவது
          நம் திரு நாவலூரே.  3  

அஞ்சும் கொண்டு ஆடுவர் ஆவினிற்கே
          வினை ஆட்சிகொண்டார்
தஞ்சம் கொண்டார் அடிச் சண்டியைத்
          தாம் என வைத்து உகந்தார்
நெஞ்சம் கொண் டார்வெண்ணெய் நல்லூரில்
          வைத்து எனை ஆளும் கொண்டு
நஞ்சம் கொண் டார்க்கு இடம் ஆவது
          நம் திரு நாவலூரே.  4  

உம்பரார் கோனைத் திண்தோள் 
          முரித்தார் உரித்தார் களிற்றைச்
செம்பொனார் தீவண்ணர் தூவண்ண
          நீற்றர் ஓர் ஆவணத்தால்
எம்பிரா னார்வெண்ணெய் நல்லூரில்
          வைத்து எனை ஆளும் கொண்ட
நம்பிரா னார்க்கு இடம் ஆவது
          நம் திரு நாவலூரே.  5  

கோட்டங்கொண் டார்குட மூக்கிலும்
          கோவலும்  கோத்திட்டையும்
வேட்டங்கொண்டார்வெண்ணெய் நல்லூரில்
          வைத்து எனை ஆளும்கொண்டார்
ஆட்டங்கொண் டார்தில்லைச் சிற்றம்பலத்தே 
          அருக்கனைமுன்
நாட்டங்கொண் டார்க்கு இடம் ஆவது
          நம் திரு நாவலூரே.  6  

தாய் அவளாய்த் தந்தையாகிச்
          சாதல் பிறத்தல் இன்றிப்
போய் அகலாமைத் தன் பொன்னடிக்கு 
          என்னைப் பொருந்தவைத்த
வேய் அவ னார்வெண்ணெய் நல்லூரில்
          வைத்து எனை ஆளும் கொண்ட
நாயக னார்க்கு இடம் ஆவது
          நம் திரு நாவலூரே.  7  

வாயாடி மாமறை ஓதி ஓர்
          வேதியன் ஆகி வந்து
தீயாடியார் சினக் கேழலின்
          பின்சென்றோர் வேடுவனாய்
வேயாடி யார்வெண்ணெய் நல்லூரில்
          வைத்து எனை ஆளும்கொண்ட
நாயாடி யார்க்கு இடம் ஆவது
          நம்திரு நாவலூரே.  8  

படமாடு பாம்பணை யானுக்கும்
          பாவைநல் லாள்தனக்கும்
வடமாடு மால்விடை ஏற்றுக்கும்
          பாகனாய் வந்து ஒருநாள்
இடமாடி யார்வெண்ணெய் நல்லூரில்
          வைத்து எனை ஆளும் கொண்ட
நடமாடி யார்க்கு இடம் ஆவது
          நம் திரு நாவலூரே.  9  

மிடுக்கு உண்டு என்று ஒடி ஒர் வெற்பெடுத்
          தான்வலி யைநெரித்தார்
அடக்கங்கொண்டு ஆவணம் காட்டி நல்
          வெண்ணெயூர் ஆளுங்கொண்டார்
தடுக்கவொண் ணாததோர் வேழத்தினை
          உரித் திட்டுமையை
நடுக்கங்கண் டார்க்கு இடம் ஆவது
          நம் திரு நாவலூரே.  10  

நாதனுக் கூர்நமக் கூர்
          நரசிங்க முனையரையன்
ஆதரித்து ஈசனுக்கு ஆட்செயும்
          ஊர் அணி நாவலூர் என்று 
ஓத நற் றக்க வன்தொண்டன்
          ஆரூரன் உரைத்ததமிழ்
காதலித்தும் கற்றும் கேட்பவர்
          தம்வினை கட்டறுமே.

      

திருச்சிற்றம்பலம்