திருத்தினை நகர்

                    

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருத்தினை நகர்
ஊர் /வேறு பெயர்	தீர்த்தனகிரி
நாடு	நடுநாடு
ॐசுவாமி	சிவகொழுந்தீசர், திரு நந்தீசுவரர்
ॐஅம்பிகை	இலங்கொம்பன்னாள்
பாடியவர்கள்	சுந்தரர் (1)         நீறு தாங்கிய  (7-64)
ஸ்தல மரம்	கொன்றை
தீர்த்தம்	ஜாம்பவ தீர்த்தம், கௌரி தீர்த்தம்
பண்	தக்கேசி
குறிப்புகள்	சுந்தரர் தொழுது பாராட்டியது
பதிக பலன்	சிவ பதவி கிடைக்கும்.
வரிசை எண்.	64                                                       5/22

திருச்சிற்றம்பலம்

நீறு தாங்கிய திருநுத லானை
      நெற்றிக் கண்ணனை நிரைவளை மடந்தை
கூறு தாங்கிய கொள்கையி னானைக்
      குற்றம் இல்லியைக் கற்றையம் சடைமேல்
ஆறு தாங்கிய அழகனை அமரர்க்கு 
      அரிய சோதியை வரிவரால் உகளும்
சேறு தாங்கிய திருத்தினை நகருள்
      சிவக்கொ ழுந்தினைச் சென்றடை மனனே.  1  

பிணிகொள் ஆக்கை பிறப்பு இறப்பு என்னும்
      இதனைநீக்கி ஈசன் திருவடி இணைக்கு ஆள்
துணிய வேண்டிடில் சொல்லுவன் கேள்நீ
      அஞ்சல் நெஞ்சமே வஞ்சர்வாழ் மதில் மூன்று 
அணி கொள் வெஞ்சிலையால் உகச் சீறும்
      ஐயன் வையகம் பரவி நின்று ஏத்தும்
திணியும் வார்பொழில் திருத்தினை நகருள்
      சிவக்கொ ழுந்தினைச் சென்றடை மனனே.  2  

வடிகொள் கண்ணிணை மடந்தையர் தம்பால்
      மயலது உற்றுவஞ் சனைக்கு இடம் ஆகி
முடியு மாகரு தேல் எருது ஏறும்
      மூர்த்தியை முதலாயபி ரானை
அடிகள் என்றடி யார்தொழுது ஏத்தும்
      அப்பன் ஒப்பிலா முலைஉமை கோனைச்
செடிகொள் கான்மலி திருத்தினை நகருள்
      சிவக்கொ ழுந்தினைச் சென்றடை மனனே.  3  

பாவ மே புரிந்த அகலிடம் தன்னில்
      பலப கர்ந்து அலமந் உயிர் வாழ்க்கைக்கு 
ஆவ என்றுழந்து அயர்ந்து வீழாதே
      அண்ணல் தன் திறம் அறிவினாற் கருதி
மாவின் ஈருரி உடைபுனைந் தானை
      மணியை மைந்தனை வானவர்க்கு அமுதைத்
தேவ தேவனைத் திருத்தினை நகருள்
      சிவக்கொ ழுந்தினைச் சென்றடை மனனே.  4  

ஒன்றலா உயிர் வாழ்க்கையை நினைந்திட்டு 
      உடல் தளர்ந்தரு மாநிதி இயற்றி
என்றும் வாழலாம் எமக்கு எனப் பேசும்
      இதுவும் பொய் எனவே நினை உளமே
குன்று லாவிய புயமுடை யானைக்
      கூத்தனைக்குலா விக்குவ லயத்தோர்
சென்றெ லாம்பயில் திருத்தினை நகருள்
      சிவக்கொ ழுந்தினைச் சென்றடை மனனே.  5  

வேந்த ராய் உலகாண்ட அறம் புரிந்து
      வீற்றி ருந்தஇவ் உடல் இது தன்னைத்
தேய்ந்து இறந்து வெந்துயர் உழந்திடும் இப்
      பொக்க வாழ்வினை விட்டிடு நெஞ்சே
பாந்த ளங்கையில் ஆட்டு உகந் தானைப்
      பரமனைக் கடற் சூர்தடிந் திட்ட
சேந்தர் தாதையைத் திருத்தினை நகருள்
      சிவக்கொ ழுந்தினைச் சென்றடை மனனே.  6  

தன்னில் ஆசறு சித்தமும் இன்றித்
      தவ முயன்றவம் ஆயின பேசிப்
பின்ன லார்சடை கட்டி என் பணிந்தால்
      பெரிதும் நீந்துவது அரித அது நிற்க
முன் எனலாம் முழு முதல் என்று வானோர்
      மூர்த்தி யாகிய முதல்வன் தன்னைச்
செந்நெ லார்வயல் திருத்தினை நகருள்
      சிவக்கொ ழுந்தினைச் சென்றடை மனனே.  7  

பரிந்த சுற்றமும் மற்றுவன் துணையும்
      பலரும் கண்டு அழுது எழ உயிர் உடலைப்
பிரிந்து போம் இது நிச்சயம் அறிந்தால்
      பேதை வாழ்வு எனும் பிணக்கினைத் தவிர்த்து
கருந்தடங்கண்ணி பங்கனை உயிரைக்
      கால காலனைக் கடவுளை விரும்பிச்
செருந்தி பொன்மலர் திருத்தினை நகருள்
      சிவக்கொ ழுந்தினைச் சென்றடை மனனே.  8  

நமை எலாம் பலர் இகழ்ந்து உரைப்பதன்முன்
      நன்மை ஒன்றிலாத் தேரர்புன் சமணாம்
சமய மாகிய தவத்தினார் அவத்தத்
      தன்மை விட்டு ஒழி நன்மையை வேண்டில்
உமையோர் கூறனை ஏறு உகந் தானை
      உம்பர் ஆதியை எம்பெரு மானைச்
சிமய மார்பொழில் திருத்தினை நகருள்
      சிவக்கொ ழுந்தினைச் சென்றடை மனனே.  9  

நீடு பொக்கையிற் பிறவியைப் பழித்து
      நீங்க லாம் என்று மனத்தினைத் தெருட்டிச்
சேடு லாம்பொழில் திருத்தினை நகருள்
      சிவக்கொ ழுந்தினைத் திருவடி இணைதான்
நாடு எலாம்புகழ் நாவலூ ராளி
      நம்பி வன்தொண்டன் ஊரன் உரைத்த
பாட லாம் தமிழ் பத்து இவை வல்லார்
      முத்தி யாவது பரகதிப் பயனே.

       

திருச்சிற்றம்பலம்