திருமந்திரம் - 1-19 அன்பு செய்வாரை அறிவன் சிவன்

              

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	19
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	19. அன்பு செய்வாரை அறியும் ஈசன்
பிற குறிப்புகள்

திருச்சிற்றம்பலம்

இகழ்ந்ததும் பெற்றதும் ஈசன் அறியும்

உகந்து அருள் செய்திடும் உத்தம நாதன்

கொழுந்து அன்பு செய்து அருள் கூரவல் லார்க்கு

மகிழ்ந்து அன்பு செய்யும் அருள் அது ஆமே.  1  

இன்பப் பிறவிக்கு இயல்வது செய்தவன்

துன்பப் பிறவித் தொழில்பல என்னினும்

அன்பிற் கலவிசெய்து ஆதிப் பிரான்வைத்த

முன்பிப் பிறவி முடிவது தானே.  2  

அன்பு உறு சிந்தையின் மேல் எழும் அவ் ஒளி

இன்புறு கண்ணியொடு ஏற்க இசைந்தன

துன்புறு கண்ணி ஐந்து ஆடும் துடக்கற்று

நண்புறு சிந்தையை நாடுமின் நீரே.  3  

புணர்ச்சியுள் ஆயிழை மேல்அன்பு போல

உணர்ச்சியுள் ஆங்கே ஒடுங்கவல் லாருக்கு

உணர்ச்சியில் லாது குலாவி உலாவி

அணைத்தலும் இன்பம் அதுவிது வாமே.  4  

உற்றுநின் றாரொடும் அத்தகு சோதியைச்

சித்தர்கள் என்றும் தெரிந்து அறிவார் இல்லை

பத்திமை யாலே பணிந்து அடியார் தொழ

முத்தி கொடுத்தவர் முன்பு நின்றானே.  5  

கண்டேன் கமழ்தரு கொன்றையினான் அடி

கண்டேன் கரி உரியான்தன் கழலிணை

கண்டேன் கமல மலர்உறை வானடி 

கண்டேன் கழலது என் அன்பினுள் யானே.  6  

நம்பனை நானா விதப்பொரு ளாகும் என்று

உம்பரில் வானவர் ஓதும் தலைவனை

இன்பனை இன்பத் திடைநின்று இரதிக்கும்

அன்பனை யாரும் அறியகி லாரே.  7  

முன்பு பிறப்பும் இறப்பும் அறியாதார்

அன்பில் இறைவனை யாம்அறி வோம்என்பர்

இன்பப் பிறப்பும் இறப்பும் இலான்நந்தி

அன்பில் அவனை அறியகி லாரே.  8  

ஈசன் அறியும் இராப் பகலும்  தன்னைப்

பாசத்துள் வைத்துப் பரிவு செய் வார்களைத்

தேசுற்று இருந்து செயலற்று இருந்திடில்

ஈசன்வந்து எம்மிடை ஈட்டிநின் றானே.  9  

விட்டுப் பிடிப்பது என் மேதகு சோதியைத்

தொட்டுத் தொடர்வன் தொலையாப் பெருமையை

எட்டும் என் ஆருயி ராய்நின்ற ஈசனை

மட்டுக் கலப்பது மஞ்சனம் ஆமே.  10 

திருச்சிற்றம்பலம்

திருச்சிற்றம்பலம்