திருமந்திரம் - 1.12 அந்தணர் ஒழுக்கம்

            

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	12
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	12. அந்தணர் ஒழுக்கம்
பிற குறிப்புகள்	ஒழுகும் முறை

திருச்சிற்றம்பலம்

அந்தணர் ஆவோர் அறுதொழில் பூண்டுளோர்

செந்தழல் ஓம்பிமுப் போதும் நியமஞ்செய்

தம் தவ நற்கரு மத்துநின்று ஆங்கு இட்டுச்

சந்தியும் ஓதிச் சடங்கு அறுப்போர்களே.  1  

வேதாந்தம் கேட்க விருப்பொடு முப்பதப்

போதாந்த மான பிரணவத் துள்புக்கு

நாதந்த வேதாந்த போதாந்த நாதனை

ஈதாந்தம் எனாதுகண்டு இன்புறு வோர்களே.  2  

காயத்திரியே கருதுசா வித்திரி

ஆய்தற்கு உவப்பர் மந்திரம் ஆங்கு உன்னி

நேயத் தே ஏறி நினைவுற்று நேயத்து ஆய்

மாயத்துள் தோயா மறையோர்கள் தாமே.  3  

பெருநெறி யான பிரணவம் ஓர்ந்து

குருநெறி யால் உரை கூடிநால் வேதத்

திருநெறி யான கிரியை இருந்து

சொரூபம் அது ஆனோர் துகளில்பார்ப் பாரே.  4  

சத்திய மும்தவம் தான் 'அவன்' ஆதலும்

எய்த்தரும் இந்தியம் ஈட்டியே வாட்டலும்

ஒத்த உயிர்கள் உண்டாய் உணர்வுற்று

பெத்தம் அறுத்தலும் ஆகும் பிரமமே.  5  

வேதாந்தம் கேட்க விரும்பிய வேதியர்

வேதாந்தம் கேட்டுந்தம் வேட்கை ஒழிந்திலர்

வேதாந்தம் ஆவது வேட்கை ஒழிந்திடம்

வேதாந்தம் கேட்டவர் வேட்கை விட்டாரே.  6  

நூலும் சிகையும் நுவலிற் பிரமமோ

நூலது கார்ப்பாசம் நுண்சிகை கேசமாம்

நூலது வேதாந்தம் நுண்சிகை ஞானமாம்

நூலுடை அந்தணர் காணும் நுவலிலே.  7  

சத்தியம் இன்றித் தனிஞானம் தான் இன்றி

ஒத்த விடயம்விட் டோரும் உணர்வு இன்றிப்

பத்தியும் இன்றிப் பரன் உண்மை இன்றிப்

பித்தேறும் மூடர் பிராமணர் தாம் அன்றே.  8  

திருநெறி யாகிய சித்து அசித்து இன்றிக்

குருநெறி யாலே குருபதம் சேர்ந்து

கரும நியமாதி கைவிட்டுக் காணும்

துரிய சமாதியாம் தூய்மறை யோர்க்கே.  9  

மறையோர் அவரே மறையவர் ஆனால்

மறையோர்தம் வேதாந்த வாய்மையில் தூய்மை

குறையோர் தன் மற்றுள்ள கோலா கலம் என்று

அறிவோர் மறைதெரிந்து அந்தணர் ஆமே.  10  

அந்தண்மை பூண்ட அருமறை அந்தத்துச்

சிந்தைசெய் அந்தணர் சேரும் செழும்புவி

நந்துதல் இல்லை நரபதி நன்றாகும்

அந்தியும் சந்தியும் ஆகுதி பண்ணுமே.  11  

வேதாந்த ஞானம் விளங்க விதியிலோர்

நாதாந்த போதம் நணுகிய போக்கது 

போதாந்த மாம்பரன் பாற்புகப் புக்கதால்

நாதாந்த முத்தியும் சித்தியும் நண்ணுமே.  12 

ஒன்றும் இரண்டும் ஒருங்கிய காலத்து 

நன்றும் இருந்தும்  நலம்பல  பேசினும் 

வென்று விளங்கும் விகிர்தனை நாடுவர் 

சென்று வணங்குத் திருவுடையோரே  13

தானே விடும் பற்று இரண்டும் தரித்திட

'நானே'  இடப்படும் ஏது  ஒன்றை நாடாது; 

பூ மேவு நான்முகன் புன்ன்யப் போகனாய்

'ஓம்' மேவும் ஓர் ஆகுதி ஆவி உண்ணவே 14 

திருச்சிற்றம்பலம்