திருமந்திரம் - 1.11 அக்கினி காரியம்

           

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	11
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	11. அக்கினி காரியம்
பிற குறிப்புகள்	வேள்வி தீ ஓம்புதல்

திருச்சிற்றம்பலம்

வசையில் விழுப்பொருள் வானும் நிலனும்

திசையும் திசைபெறு தேவர் குழாமும்

விசையும் பெருகிய வேத முதலாம்

அசைவிலா அந்தணர் ஆகுதி வேட்கிலே.  1  

ஆகுதி வேட்கும் அருமறை அந்தணர்

போகதி நாடிப் புறம் கொடுத்து உண்ணுவர்

தாம்விதி வேண்டித் தலைப்படும் மெய்ந்நெறி

தாம் அறிவாலே தலைப்பட்ட வாறே.  2  

அந்தணர் அங்கியுள் அங்கி

அணைதுணை வைத்ததன் உட்பொருள் ஆன

இணைதுணை யாமத்து இயங்கும் பொழுது

துணையணை ஆயது ஓர் தூய்நெறி ஆமே.  3  

போது இரண்டு ஓதிப் புரிந்து அருள் செய்திட்டு

மாது இரண்டு ஆகி மகிழ்ந்து உடனேநிற்கும்

தாது இரண்டு ஆகிய தண்ணம் பறவைகள்

வேது இரண்டு ஆகி வெறிக்கின்ற வாறே.  4  

நெய்நின்று எரியும் நெடுஞ்சுட ரேசென்று

மைநின்று எரியும் வகை அறிவார்க்கட்கு

மைநின்று அவிழ்தரு மந்திரமும் என்றும்

செய்நின்ற செல்வமும் தீயது வாமே.  5  

பாழி அகலும் எரியும் திரிபோல் இட்டு

ஊழி அகலும் உறுவினை நோய்பல

வாழிசெய்து அங்கி உதிக்க அவைவிழும்

வீழிசெய்து அங்கி வினைசுடும் ஆமே.  6  

பெருஞ்செல்வம் கேடு என்று முன்னே படைத்த

அரும் செல்வம் தந்த தலைவனை நாடும்

வருஞ்செல்வத்து இன்பம் வரஇருந்து எண்ணி

அருஞ்செல்வத்து ஆகுதி வேட்கநின் றாரே.  7  

ஒண்சுட ரானை உலப்பிலி நாதனை

ஒண்சுடர் ஆகி என் உள்ளத்து இருக்கின்ற

கண்சுட ரோன் உலகு ஏழும் கடந்த அத்

தண்சுடர் ஓமத் தலைவனும் ஆமே.  8  

ஓமத்துள் அங்கியின் உள் உளன் எம் இறை

ஈமத்துள் அங்கி இரதம் கொள்வான் உளன்

வேமத்துள் அங்கி விளைவு வினைக்கடல்

கோமத்துள் அங்கி குரைகடல் தானே.  9  

அங்கி நிறுத்தும் அருந்தவர் ஆரணத்து

அங்கி இருக்கும் வகை அருள்செய்தவர்

எங்கும் நிறுத்தி இளைப்பப் பெரும்பதி

பொங்கி நிறுத்தும் புகழ் அது ஆமே.  10 

திருச்சிற்றம்பலம்