திருமந்திரம் - 1.16 அறம் செய்வான் திறம்

                

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	16
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	16. அறம் செய்வான் திறம்
பிற குறிப்புகள்	அறம் செய்தல்

திருச்சிற்றம்பலம்

தாம் அறிவார்அண்ணல் தாள்பணி வார்அவர்

தாம் அறிவார் அறம் தாங்கி நின்றார் அவர்

தாம் அறிவார் சில தத்துவர் ஆவர்கள்

தாம் அறிவார்க்குத் தமர் பரன் ஆமே.  1  

யாவர்க்கும் ஆமாம் இறைவற்கு ஒரு பச்சிலை

யாவர்க்கும் ஆம் பசுவுக்கு ஒரு வாயுறை

யாவர்க்கும் ஆம் உண்ணும் போது ஒரு கைப்பிடி

யாவர்க்கும் ஆம் பிறர்க்கு இன்னுரை தானே.  2  

அற்றுநின் றார்உண்ணும் ஊணே அறன் என்னும்

கற்றன போதம் கமழ்பவர் மானிடர்

உற்று நின்று ஆங்கு ஒரு கூவல் குளத்தினில்

பற்றி வந்து உண்ணும் பயன் அறியாரே.  3  

அழுக்கினை ஓட்டி அறிவை நிறையீர்

தழுக்கிய நாளில் தருமமும்செய்யீர்

விழித்து இருந்து என்செய்வீர் வெம்மை பரந்து

விழிக்கஅன்று என்செய்வீர் ஏழைநெஞ்சீரே.  4  

தன்னை அறியாது தான்நலன் என்னாதுஇங்கு

இன்மை அறியாது இளையர்என்று ஓராது

வன்மையில் வந்திடும்கூற்றம் வருமுன்னம்

தன்மையில் நல்ல தவம் செய்யும் நீரே.  5  

துறந்தான் வழிமுதல் சுற்றமும் இல்லை

இறந்தான் வழிமுதல் இன்பமும் இல்லை

மறந்தான் வழிமுதல் வந்திலன் ஈசன்

அறந்தான் அறியும் அளவு அறிவாரே.  6  

தான்தவம் செய்வதாம் செய்தவத்து அவ்வழி

மான் தெய்வ மாக மதிக்கும் மனிதர்கள்

ஊன் தெய்வ மாக உயிர்க்கின்ற பல்லுயிர்

நான்தெய்வம் என்று நமன்வரு வானே.  7  

திளைக்கும் வினைக்கடல் தீர்வுறு தோணி

இளைப்பினை நீக்கும் இருவழி உண்டு

கிளைக்கும் தனக்கும் அக் கேடில் புகழோன்

விளைக்கும் தவம்அறம் மேல் துணை ஆமே.  8  

பற்றது வாய்நின்ற பற்றினைப் பார்மிசை

அற்றம் உரையான் அறநெறிக்குக் அல்லது

உற்று உங்களால் ஒன்றும் ஈந்ததுவே துணை

மற்றண்ணல் வைத்த வழிகொள்ளு மாறே.  9 

திருச்சிற்றம்பலம்