திருமந்திரம் - 1.17 அறம் செய்யான் திறம்

                 

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	17
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	17. அறம் செய்யான் திறம்
பிற குறிப்புகள்	அறம் செய்யாதவரின் இயல்பு

திருச்சிற்றம்பலம்

எட்டி பழுத்த இருங்கனி வீழ்ந்தன

ஒட்டிய நல்லறம் செய்யா தவர்செல்வம்

வட்டிகொண்டு ஈட்டியே மண்ணில் முகந்திடும்

பட்டிப் பதகர் பயன்அறி யாரே.  1  

ஒழிந்தன காலங்கள் ஊழியும் போயின

கழிந்தன கற்பனை நாளும் குறுகிப்

பிழிந்தன போலத்தம் பேரிடர் ஆக்கை

அழிந்தன கண்டும் அறம்அறி யாரே.  2  

அறம் அறி யார்அண்ணல் பாதம் நினையும்

திறம்அறி யார்சிவ லோக நகர்க்குப்

புறம்அறி யார்பலர் பொய்மொழி கேட்டு

மறம்அறி வார்பகை மன்னிநின் றாரே.  3  

இருமலும் சோகையும் ஈளையும் வெப்பும்

தருமம் செய் யாதவர் தம்பாலது ஆகும்

உரும் இடி நாகம் உரோணி கழலை

தருமம்செய் வார்பக்கல் தாழகி லாவே.  4  

பரவப் படுவான் பரமனை ஏத்தார்

இரவலர்க்கு ஈதலை ஆயினும் ஈயார்

கரகத்தால் நீர் அட்டிக் காவை வளர்க்கார்

நரகத்தில் நிற்றிரோ நல்நெஞ்சி னீரே.  5  

வழிநடப் பார் இன்றி வானோர் உலகம்

கழிநடப் பார் நடந் தார் கரும்பாரும்

அழி நடக்கும் வினை ஆசு அற ஓட்டிட்டு

ஒழி நடப்பார் வினை ஓங்கி நின்றாரே.  6  

கனிந்தவர் ஈசன் கழலடி காண்பர்

துணிந்தவர் ஈசன் துறக்கம் அது ஆள்வர்

மலிந்தவர் மாளும் துணையும் ஒன்று இன்றி

மெலிந்த சினத்தினுள் வீழ்ந்து ஒழிந்தாரே.  7  

இன்பம் இடர் என்று இரண்டுற வைத்தது

முன்பு அவர் செய்கையி னாலே முடிந்ததும்

இன்பம் அதுகண்டும் ஈகிலாப் பேதைகள்

அன்பு இலார் சிந்தை அறம் அறியாரே.  8  

கெடுவதும் ஆவதும் கேடு இல் புகழோன்

நடு அல்ல செய்து இன்பம் நாடவும் ஒட்டான்

இடுவதும் ஈவதும் எண்ணுமின் இன்பம்

படுவது செய்யின் பசுவது ஆமே.  9  

செல்வம் கருதிச் சிலர்பலர் வாழ்வு எனும்

புல்லறி வாளரைப் போற்றிப் புலராமல்

இல்லம் கருதி இறைவனை ஏத்துமின்

வில்லி இலக்கு எய்த விற்குறி யாமே.  10 

திருச்சிற்றம்பலம்