திரு அரசிலி

             

௨ 

திருஞானசம்பந்தர் சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திரு அரசிலி
ஊர்	ஒழுந்தியாப் பட்டு
நாடு	தொண்டை நாடு
ॐசுவாமி	அரசிலி நாதர்
ॐஅம்பிகை	அழகிய நாயகி
பாடியவர்கள்	திருஞானசம்பந்தர் (1)         பாடல் வண்டறை (2-95)
ஸ்தல மரம்	அரச மரம்
தீர்த்தம்	அரசடி தீர்த்தம்
பண்	பியந்தைக் காந்தாரம்
குறிப்புகள்	வாம தேவ முனிவர் பூச்த்து பேறு பெற்ற தலம்
பதிக பலன்	சிவகதி பெறுவர்.
வரிசை எண்.	95                                                          31/32

திருச்சிற்றம்பலம்

            

பாடல் வண்டறை கொன்றை
          பால்மதி பாய் புனல்  கங்கை
கோடல் கூவிள மாலை
          மத்தமும் செஞ்சடைக் குலாவி
வாடல் வெண்தலை மாலை
          மருவிட வல்லியம் தோள்மேல்
ஆடல் மாசுணம் அசைத்த
          அடிகளுக்கு இடம் அரசிலியே.  1  

ஏறு பேணிய தேறி
          இளமதக் களிற்றினை எற்றி
வேறு செய்ததன் உரிவை
          வெண்புலால் கலக்கமெய் போர்த்த
ஊறு தேனவன் உம்பர்க்கு 
          ஒருவன்நல் ஒளி கொள் ஒண் சுடராம்
ஆறு சேர்தரு சென்னி
          அடிகளுக்கு இ டம்அர சிலியே.  2  

கங்கை நீர்சடை மேலே
          கதம்மிகக் கதிர் இள வனமென்
கொங்கையாள் ஒரு பாகம்
          மருவிய கொல்லை வெள் ஏற்றின்
சங்கை யாய்த்திரி யாமே
          தன்னடி யார்க்கு அருள் செய்து
அங்கை யால் அனல் ஏந்தும்
          அடிகளுக்கு இடம்அர சிலியே.  3  

மிக்க காலனை வீட்டி
          மெய்கடக் காமனை விழித்துப்
புக்க ஊரிடு பிச்சை
          உண்பது பொன் திகழ் கொன்றை
தக்க நூல்திகழ் மார்பில்
          தவளவெண் நீறு அணிந்து ஆமை
அக்கின் ஆரமும் பூண்ட
          அடிகளுக்கு இடம்அர சிலியே.  4  

மானம் சும்மட நோக்கி
          மலைமகள் பாகமு மருவித்
தானஞ் சா அரண் மூன்றும்
          தழல் எழச் சரமது துரந்து
வானஞ் சும்பெரு விடத்தை
          உண்டவன் மாமறை ஓதி
ஆன் அஞ்சு ஆடிய சென்னி
          அடிகளுக்கு இடம்அர சிலியே.  5  

பரிய மாசுணங் கயிறாப்
          பருப்பதம் அதற்குமத் தாகப்
பெரிய வேலையைக் கலங்கப்
          பேணிய வானவர் கடையக்
கரிய நஞ்சு அது தோன்றக்
          கலங்கிய அவர்தமைக் கண்டு
அரிய ஆர் அமுது ஆக்கும்
          அடிகளுக்கு இடம் அரசிலியே.  6  

இப்பதிகத்தில் 7-ம் பாடல் கிடைக்கப்பெறவில்லை.  7  

வண்ண மால்வரை தன்னை
          மறித்திடல் உற்ற வல்அரக்கன்
கண்ணும் தோளும் நல் வாயும்
          நெரிதரக் கால்விரல் ஊன்றிப்
பண்ணின் பாடல்கைந் நரம்பாற்
          பாடிய பாடலைக் கேட்டு
அண்ண லாய் அருள் செய்த
          அடிகளுக்கு இடம் அரசிலியே.  8  

குறிய மாணுரு வாகிக்
          குவலயம் அளந்தவன் தானும்
வெறிகொள் தாமரை மேலே
          விரும்பிய மெய்த்தவத் தோனும்
செறிவொ ணாவகை எங்கும்
          தேடியும் திருவடி காண
அறிவொ ணா உருவத்து எம்
          அடிகளுக்கு இ டம்அர சிலியே.  9  

குருளை எய்திய மடவார்
          நிற்பவே குஞ்சியைப் பறித்துத்
திரளை கையில் உண் வரும்
          தேரரும் சொல்லிய தேறேல்
பொருளைப் பொய்யிலி மெய் எம் நாதனைப்
          பொன் அடி வணங்கும்
அருளை ஆர்தரநல்கும் அடிகளுக்கு 
          இடம் அரசிலியே.  10  

அல்லி நீள்வயல் சூழ்ந்த
          அரசிலி அடிகளைக் காழி
நல்ல ஞானசம் பந்தன்
          நற்றமிழ் பத்து இவை நாளும்
சொல்ல வல்லவர் தம்மைச்
          சூழ்ந்த அமரர் தொழுது ஏத்த
வல்ல வான் உலகுக் எய்தி
          வைகலும் மகிழ்ந்து இருப் பாரே.

திருச்சிற்றம்பலம்