திருமந்திரம் - 1.2 யாக்கை நிலையாமை

     

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	யாக்கை நிலையாமை
தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	உடலின் நிலையாமை
பிற குறிப்புகள்

திருச்சிற்றம்பலம்

மண் ஒன்று கண்டீர் இருவகைப் பாத்திரம்

திண் ஒன்று இருந்தது தீவினைச் சேர்ந்தது

விண் நின்று நீர்விழின் மீண்டுமண் ணானாற்போல்

எண் நின்றி மாந்தர் இறக்கின்ற வாறே.  1 

 

பண்டம்பெய் கூரை பழகி விழுந்தக்கால்

உண்ட அப் பெண்டிரும் மக்களும் பின்செலார்

கொண்ட விரதமும் ஞானமும் அல்லது

மண்டி அவருடன் வழிநட வாதே.  2  

ஊர் எலாம் கூடி ஒலிக்க அழுதிட்டுப்

பேரினை நீக்கிப் பிணம் என்று பேரிட்டுச்

சூரையங் காட்டிடைக் கொண்டுபோய்ச் சுட்டிட்டு

நீரினில் மூழ்கி நினைப்பு ஒழிந் தார்களே.  3  

காலும் இரண்டு முகட்டு அலகு ஒன்று உள

பாலுள் பருங்கழி முப்பத் திரண்டு உள

மேல் உள கூரை பிரியும் பிரிந்தால்முன்

போல் உயிர் மீளப் புக அறி யாதே.  4  

சீக்கை விளைந்தது செய்வினை மூட்டிற்ற

ஆக்கை பிரிந்தது அலகு பழுத்தது

மூக்கினில்  கைவைத்து மூடிட்டுக் கொண்டுபோய்க்

காக்கைக் குப்பலி காட்டிய வாறே.  5  

அடப்பண்ணி வைத்தார் அடிசிலை உண்டார்

மடக்கொடி யாரொடு மந்தணங் கொண்டார்

இடப்பக்கமே இறை நொந்தது என்றார்

கிடக்கப் படுத்தார் கிடந்து ஒழிந் தாரே.  6  

மன்றத்தே நம்பி மாடம் எடுத்தது

மன்றத்தே நம்பி சிவிகைபெற்று ஏறினான்

மன்றத்தே நம்பி முக்கோடி வழங்கினான்

சென்று 'அத்தா' என்னத் திரிந்திலன் தானே.  7  

வாசந்தி பேசி மணம்புணர்ந்து அப்பதி

நேசந் தெவிட்டி நினைப்பு ஒழிவார் பின்னை

ஆசந்தி மேல்வைத்து அமைய அழுதிட்டுப்

பாசம் தீச் சுட்டுப் பலி அட்டி னார்களே.  8  

கைவிட்டு நாடிக் கருத்து அழிந்து அச்சு அற

நெய் அட்டிச்  சோறு உண்ணும் ஐவரும் போயினார்

மையிட்ட கண்ணாளும் மாடும் இருக்கவே

மெய்விட்டுப் போக விடைகொள்ளு மாறே.  9  

பந்தல் பிரிந்தது பண்டாரம் கட்டு அற்ற

ஒன்பது வாசலும் ஒக்க அடைத்தன

துன்புறு காலம் துரிசுவர மேன்மேல்

அன்பு உடையார்கள் அழுது அகன் றார்களே.  10  

நாட்டுக்கு நாயகன் நம் ஊர்த் தலைமகன்

காட்டுச் சிவிகை ஒன்று ஏறிக் கடைமுறை

நாட்டார்கள் பின்செல்ல முன்னே பறைகொட்ட

நாட்டுக்கு நம்பி நடக்கின்ற வாறே.  11  

முப்பதும் முப்பதும் முப்பத் து அறுவரும்

செப்ப மதிள் உடைக் கோட்டையுள் வாழ்பவர்

செப்ப மதிள் உடைக் கோட்டை சிதைந்தபின்

ஒப்ப அனைவரும் ஓட்டு எடுத் தார்களே.  12  

மதுவூர் குழலியும் மாடும் மனையும்

இதுவூர் ஒழிய இதணம்  தேறிப்

பொதுவூர் புறஞ்சுடு காடது நோக்கி

மதுவூர வாங்கியே வைத்து அகன் றார்களே.  13  

வைச்சு அகல்வு உற்றது கண்டு மனிதர்கள்

அச்சு அகலாது என நாடும் அரும்பொருள்

பிச்சு அது வாய்ப்பின் தொடர்வுறும் அற்றவர்

எச்சு அகலா நின்று இளைக்கின்ற வாறே.  14  

ஆர்த்து எழு சுற்றமும் பெண்டிரும் மக்களும்

ஊர்த்துறைக் காலே ஒழிவர் ஒழிந்தபின்

வேர்த்தலை போக்கி விறகு இட்டு எரிமூட்டி

நீர்த்தலை மூழ்குவர் நீதி இலோரே.  15  

வளத்து இடை முற்றத்து ஓர் மாநிலம் முற்றும்

குளத்தின் மண்கொண்டு குயவன் வனைந்தான்

குடம் உடைந் தால் அவை ஓடு என்று வைப்பர்

உடல் உடைந் தால் இறைப் போதும் வையாரே.  16  

ஐந்து தலைப்பறி ஆறு சடை உள

சந்து அவை முப்பது சார்வு பதினெட்டுப்

பந்தலும் ஒன்பது பந்தி பதினைந்து

வெந்து கிடந்தது மேல் அறி யோமே.  17  

அத்திப் பழமும் அறைக்கீரை நல்வித்தும்

கொத்தி உலைபெய்து கூழட்டு வைத்தனர்

அத்திப் பழத்தை அறைக்கீரை வித்து உண்ணக்

கத்தி எடுத்தவர் காடுபுக் காரே.  18  

மேலும் முகடு இல்லை கீழும் வடிம்பு இல்லை

காலும் இரண்டு முகட்டு அலகு  ஒன்று உண்டு

ஓலையால் மேய்ந்தவர் ஊடு வரியாமை

வேலையான் மேய்ந்தது ஓர் வெள்ளித் தளியே.  19  

கூடம் கிடந்தது கோலங்கள் இங்கு இல்லை

ஆடும் இலையமும் அற்றது அறுதலும்

பாடுகின்றார் சிலர் பண்ணில் அழுதிட்டுத்

தேடிய தீயினில் தீயவைத் தார்க்களே.  20  

முட்டை பிறந்தது முந்நூறு நாளினில்

இட்டது தான் இலை ஏதேனும் ஏழைகாள்

பட்டது பார்மணம் பன்னிரண்டு ஆண்டினில்

கெட்டது எழுபதில் கேடு அறி யீரே.  21  

இடிஞ்சில் இருக்க விளக்கு எரி கொண்டால்

முடிஞ்சது அறியார் முழங்குவர் மூடர்

விடிஞ்சுஇருள் ஆவது அறியா உலகம்

படிஞ்சு கிடந்து பதைக்கின்ற வாறே.  22  

மடல்விரி கொன்றையன் மாயன் படைத்த

உடலும் உயிரும் உருவம் தொழாமல்

இடர் படர்ந்து ஏழாம்  நரகில் கிடப்பர்

குடர்ப்பட வெந்தமர் கூப்பிடு மாறே.  23  

குடையும் குதிரையும் கொற்ற வாளும் கொண்டு

இடையும்அக் காலம் இருந்து நடுவே

புடையு மனிதனார் போகும்அப் போதே

அடையும் இடம்வலம் ஆருயி ராமே.  24  

காக்கை கவரில் என் கண்டார் பழிக்கில் என்

பால் துளி பெய்யில் என் பல்லோர் பழிச்சில் என்

தோல் பையுள் நின்று தொழில் அறச் செய்து ஊட்டும்

கூத்தன் புறப்பட்டுப் போன இக்கூட்டையே.  25 

திருச்சிற்றம்பலம்