திரு வலிதாயம்

                      

௨ 

திருஞான சமபந்த  சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திரு வலிதாயம்
ஊர்	பாடி
நாடு	தொண்டை நாடு
ॐசுவாமி	வலிதாய நாதர், வல்லீஸ்வரர்
ॐஅம்பிகை	தாயம்மை, ஜகதாம்பாள்
பாடியவர்கள்	திருஞானசம்பந்தர் (1)          பத்தரோடு பலரும் (1-3)
ஸ்தல மரம்	பாதிரி
தீர்த்தம்	பாரத்வாசர்
பண்	நட்டபாடை
குறிப்புகள்	சென்னைக்கு அருகில் உள்ளது  இப்போது பாடி என அழைக்கப்படுகிறது.  பரத்வாசர், அனுமான், இந்திரன் முதலியோர் வழிபட்டது  வலியன்(கரிக்குருவி) வழிபட்டதால்  வலிதாயம்
பதிக பலன்	தேவலோக வாசம் கிட்டும்.
வரிசை எண்.	3                                                         20/32

திருச்சிற்றம்பலம்

          

பத்தரோடுபல ரும்பொலியம்மலர் 
    அங்கைப் புனல்தூவி
ஒத்தசொல்லி உலகத்தவர் தாம் தொழுது 
           ஏத்த உயர்சென்னி
மத்தம் வைத்த பெருமான் பிரியாது 
    உறைகின்ற வலிதாயம்
சித்தம் வைத்த அடியார் அவர் மேல் 
    அடையாமற்று இடர்நோயே.  1  

படை இலங்குகரம் எட்டு 
    உடையான் படிறு ஆகக் கனல் ஏந்திக்
கடை இலங்குமனை யிற்பலிகொண்டு உணும் 
    கள்வன் உறை கோயில்
மடை இலங்குபொழி லின்நிழல்வாய்மது 
    வீசும் வலிதாயம்
அடைய நின்ற அடியார்க்கு அடையாவினை 
    அல்லல் துயர்தானே.  2  

ஐயன் நொய்யன் அணியன் பிணியில்லவர் 
    என்றும் தொழுது ஏத்தச்
செய்யன்வெய்யபடை ஏந்தவல்லான்திரு 
    மாதோடு உறை கோயில்
வையம் வந்து பணியப் பிணி தீர்த்து  
    உயர்கின்ற வலிதாயம்
உய்யும் வண்ணம் நினைமின் நினைந்தால் 
    வினை தீரும் நலமாமே.  3  

ஒற்றை ஏறு அது உடையான் நடமாடி 
    ஓர் பூதப்படை சூழப்
புற்றில் நாகம் அரையார்த்து உழல்கின்ற 
    எம்பெம்மான் மடவாளோ
உற்ற கோயில் உலகத்து ஒளிமல்கிட 
    உள்கும் வலிதாயம்
பற்றி வாழும் அதுவே சரணாவது 
    பாடும் அடியார்க்கே.  4  

புந்தி ஒன்றி நினைவார் வினையாயின 
    தீரப் பொருளாய
அந்தியன்னதொரு பேரொளியான் 
    அமர்கோயில் அயல் எங்கும்
மந்திவந்துகடுவன்னொடும் கூடி 
    வணங்கும் வலிதாயம்
சிந்தியாதஅவர் தம் அடும் 
    வெந்துயர் தீர்தல் எளிதன்றே.  5  

ஊன் இயன்ற தலையில் பலிகொண்டு 
    உலகத்து உள்ளவர் ஏத்தக்
கான் இயன்ற கரியின் உரி போர்த்து உழல் 
    கள்வன் சடைதன்மேல்
வான் இயன்ற பிறை வைத்த எம் 
    ஆதி மகிழும் வலிதாயம்
தேன் இயன்ற நறு மாமலர் கொண்டு 
    நின்று ஏத்தத் தெளிவு ஆமே.  6  

கண் நிறைந்த விழியின் அழலால் 
         வருகாமன் உயிர்வீட்டிப்
பெண் நிறைந்த ஒரு பால் மகிழ்வு எய்திய 
    பெம்மான் உறைகோயில்
மண் நிறைந்த புகழ் கொண்டு அடியார்கள் 
    வணங்கும் வலிதாயத்து 
உள் நிறைந்த பெருமான் கழல் ஏத்த 
    நம் உண்மைக் கதி ஆமே.  7  

கடலில்நஞ்சு அமுது உண்டு இமையோர் 
    தொழுது ஏத்த நடமாடி
அடல் இலங்கை அரையன் வலிசெற்று அருள் 
    அம்மான் அமர்கோயில்
மடல் இலங்கு கமுகின் பலவின் 
   மதுவிம்மும் வலிதாயம்
உடல் இலங்கும் உயிர் உள்ளளவும்
            தொழ உள்ளத்து உயர்போமே.  8  

பெரியமேருவரை யேசிலையா 
    மலை உற்றார்  எயில்மூன்றும்
எரிய எய்த ஒருவன் இருவர்க்கு 
    அறிவொண்ணா வடிவாகும்
எரியதாகியுற ஓங்கியவன் 
    வலிதாயம்  தொழுது ஏத்த
உரியர் ஆக உடையார் பெரியார்
    என உள்கும் உலகோரே.  9  

ஆசியார மொழியார் அமண் 
    சாக்கியர் அல்லாதவர் கூடி
ஏசி ஈரம் இலராய் மொழி செய்தவர் 
        சொல்லைப் பொருள் என்னேல்
வாசிதீர அடியார்க்கு அருள்செய்து 
    வளர்ந்தான் வலிதாயம்
பேசும்ஆர்வம் உடையார் 
    அடியார் எனப்பேணும் பெரியோரே.  10  

வண்டு வைகும் மணம் மல்கிய சோலை 
        வளரும் வலிதாயத்து 
அண்டவாணன் அடி உள்குதலால் அருள் 
மாலைத் தமிழாகக்
கண்டல்வைகும் கடல் காழியுள் ஞான 
சம்பந்தன் தமிழ்பத்தும்
கொண்டுவைகியிசை பாடவல்லார் 
குளிர் வானத்து உயர்வாரே.

திருச்சிற்றம்பலம்