திரு பாச்சூர்

                         

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு பாச்சூர்
ஊர்
நாடு	தொண்டை நாடு
ॐசுவாமி	வாசீச்வரர், பாசூர் நாதர்
ॐஅம்பிகை	மோகனாம்பாள் பனை முலை நாச்சியார்
பாடியவர்கள்	சுந்தரர் (1)          சிந்தை இடையார் (2-60) அப்பர் (2)         முந்தி மூ எயில் எய்த (5-25)         விண் ஆகி நிலன் ஆகி (6-83)
ஸ்தல மரம்	மூங்கில்
தீர்த்தம்	சோம தீர்த்தம், மங்கள தீர்த்தம்
பண்	காந்தாரம்
குறிப்புகள்	அம்பிகை, திருமால், சந்திரன் வழிபட்ட தலம்
பதிக பலன்	இம்மைப் பயனும் மறுமைப் பயனும் கிட்டும்.
வரிசை எண்.	83                                                         16/32

திருச்சிற்றம்பலம்

          

விண் ஆகி நிலன் ஆகி விசும்பும் ஆகி

வேலை சூழ் ஞாலத்தார் விரும்பு கின்ற

எண் ஆகி எழுத்து ஆகி இயல்பும் ஆகி

ஏழ் உலகும்  தொழுது ஏத்திக் காண நின்ற

கண்ணாகி மணியாகிக் காட்சி யாகிக்

காதலித்து அங்கு அடியார்கள் பரவ நின்ற

பண் ஆகி இன் அமுதாம் பாசூர் மேய

பரஞ்சுடரைக் கண்டு அடியேன் உய்ந்த வாறே.  1  

வேதம் ஓர் நான்கு ஆறு அங்கம் ஆகி

விரிக்கின்ற பொருட்கு எல்லாம் வித்தும் ஆகிக்

கூதலாய்ப் பொழிகின்ற மாரி  ஆகிக்

குவலயங்கள் முழுதுமாய்க் கொண்டல் ஆகிக்

காதலால் வானவர்கள் போற்றி என்று

கடிமலர்கள் அவைதூவி ஏத்த நின்ற

பாதியோர் மாதினனைப் பாசூர் மேய

பரஞ்சுடரைக் கண்டு அடியேன்உய்ந்த வாறே.  2  

தடவரைகள் ஏழும் ஆய்க் காற்றாய்த் தீயாய்த்

தண்விசும்பாய்த் தண்விசும்பின் உச்சி ஆகிக்

கடல்வலயம் சூழ்ந்த ஒரு ஞாலம் ஆகிக்

காண்கின்ற கதிரவனும் மதியும் ஆகிக்

குடமுழவச் சதிவழியே அனல்கை ஏந்திக்

கூத்தாட வல்ல குழகன் ஆகிப்

படவரவொன்று அது வாட்டிப் பாசூர் மேய

பரஞ்சுடரைக் கண்டு அடியேன் உய்ந்த வாறே.  3  

நீராரும் செஞ்சடைமேல் அரவம் கொன்றை

நிறைமதியம் உடன்சூடி நீதி யாலே

சீராரும் மறை ஓதி உலகம் உய்யச்

செழுங்கடலைக் கடைந்தகடல் நஞ்சம் உண்ட

காராரும் கண்டனைக் கச்சி மேய

கண்ணுதலைக் கடல் ஒற்றி கருதி னானைப்

பாரோரும் விண்ணோரும் பரசும் பாசூர்ப்

பரஞ்சுடரைக் கண்டு அடியேன் உய்ந்த வாறே.  4  

வேடனாய் விசயன் தன் வியப்பைக் காண்பான்

வில்பிடித்துக் கொம்பு உடைய ஏனத் தின்பின்

கூடினார் உமையவளும் கோலம் கொள்ளக்

கொலைப்பகழி யுடன்கோத்துக் கோரப் பூசல்

ஆடினார் பெருங்கூத்துக் காளி காண

அருமறையோடு ஆறு அங்கம் ஆய்ந்து கொண்டு

பாடினார் நால்வேதம் பாசூர் மேய

பரஞ்சுடரைக் கண்டு அடியேன் உய்ந்த வாறே.  5  

புத்தியினால் சிலந்தியும் தன் வாயின் நூலாற்

பொதுப்பந்தர் அதுவிழைத்துச் சருகால் மேய்ந்த

சித்தியினால் அரசு ஆண்டு சிறப்புச் செய்யச்

சிவகணத்துப் புகப்பு எய்தார் திறலான் மிக்க

வித்தகத்தால் வெள்ளானை விள்ளா அன்பு

விரவியவா கண்டதற்கு வீடு காட்டிப்

பத்தர்களுக்கு இன் அமுதாம் பாசூர் மேய

பரஞ்சுடரைக் கண்டு அடியேன் உய்ந்த வாறே.  6  

இணை ஒருவர் தாம் அல்லால் யாரும் இல்லார்

இடைமருதோ டு ஏகம்பத்து என்றும் நீங்கார்

அணைவரியர் யாவர்க்கும் ஆதி தேவர்

அருமந்த நன்மை எலாம் அடியார்க்கு ஈவர்

தணல்முழுகு பொடியாடும் செக்கர் மேனித்

தத்துவனைச் சாந்து அகில் அளறு தோய்ந்த

பணைமுலையாள் பாகனை எம் பாசூர் மேய

பரஞ்சுடரைக் கண்டு அடியேன் உய்ந்த வாறே.  7  

அண்டவர்கள் கடல்கடைய அதனுல் தோன்றி

அதிர்ந்து எழுந்த ஆலாலம் வேலை ஞாலம்

எண் திசையும் சுடுகின்ற ஆற்றைக் கண்டும்

இமைப்பளவில் உண்டிருண்ட கண்டர் தொண்டர்

வண்டுபடு மதுமலர்கள் தூவி நின்று

வானவர்கள் தானவர்கள் வணங்கி ஏத்தும்

பண்டரங்க வேடனை எம் பாசூர் மேய

பரஞ்சுடரைக் கண்டு அடியேன் உய்ந்த வாறே.  8  

ஞாலத்தை உண்டதிரு மாலும் மற்றை

நான்முகனும் அறியாத நெறியான் கையில்

சூலத்தால் அந்தகனைச் சுருளக் கோத்துத்

தொல் உலகில் பல் உயிரைக் கொல்லும் கூற்றைக்

காலத்தால் உதை செய்து காதல் செய்த

அந்தணனைக் கைக்கொண்ட செவ்வான் வண்ணர்

பால் ஒத்த வெண்ணீற்றர் பாசூர் மேய

பரஞ்சுடரைக் கண்டு அடியேன் உய்ந்த வாறே.  9  

வேந்தன்நெடு முடியுடைய அரக்கர் கோமான்

மெல்லியலாள் உமை வெருவ விரைந்திட்டு ஓடிச்

சாந்தமென நீறு அணிந்தான் கயிலை வெற்பைத்

தடக்கைகளால் எடுத்திடலும் தாளால் ஊன்றி

ஏந்துதிரள் திண் தோளும் தலைகள் பத்தும் 

இறுத்தவன் தன் இசைகேட்டு இரக்கம் கொண்ட

பாந்தளணி சடை முடி எம் பாசூர் மேய

பரஞ்சுடரைக் கண்டு அடியேன் உய்ந்த வாறே

திருச்சிற்றம்பலம்