திரு பாச்சூர்

                        

௨ 

திருநாவுக்கரசு  சுவாமிகள் அருளிச்செய்த
ஐந்தாம் திருமுறை

தகவல் பலகை	விவரம்
தலம்	திரு பாச்சூர்
ஊர்
நாடு	தொண்டை நாடு
ॐசுவாமி	வாசீச்வரர், பாசூர் நாதர்
ॐஅம்பிகை	மோகனாம்பாள் பனை முலை நாச்சியார்
பாடியவர்கள்	சுந்தரர் (1)          சிந்தை இடையார் (2-60) அப்பர் (2)         முந்தி மூ எயில் எய்த (5-25)         விண் ஆகி நிலன் ஆகி (6-83)
ஸ்தல மரம்	மூங்கில்
தீர்த்தம்	சோம தீர்த்தம், மங்கள தீர்த்தம்
பண்	காந்தாரம்
குறிப்புகள்	அம்பிகை, திருமால், சந்திரன் வழிபட்ட தலம்
பதிக பலன்	இம்மைப் பயனும் மறுமைப் பயனும் கிட்டும்.
வரிசை எண்.	60                                                         16/32

திருச்சிற்றம்பலம்

          

முந்தி மூ எயில் எய்த முதல்வனார்

சிந்திப்பார் வினை தீர்த்திடும் செல்வனார்

அந்திக் கோன் தனக்கே அருள் செய்தவர்

பந்திச் செஞ்சடைப் பாசூர் அடிகளே.  1  

மடந்தை பாகம் மகிழ்ந்த மணாளனார்

தொடர்ந்த வல்வினை போக்கிடும் சோதியார்

கடந்த காலனைக் கால்கொடு பாய்ந்தவர்

படர்ந்த நாகத்தர் பாசூர் அடிகளே..  2  

நாறு கொன்றையும் நாகமும் திங்களும்

ஆறும் செஞ்சடை வைத்த அழகனார்

காறு கண்டத்தர் கையதோர் சூலத்தர்

பாறின் ஓட்டினர் பாசூர் அடிகளே..  3  

வெற்றி யூர் உறை வேதியர் ஆவர்நல்

ஒற்றி ஏறு உகந்து ஏறும் ஒருவனார்

நெற்றிக் கண்ணினர் நீள் அரவம் தனைப்

பற்றி யாட்டுவர் பாசூர் அடிகளே..  4  

மட்ட விழ்ந்த மலர்நெடுங் கண்ணிபால்

இட்ட வேட்கையர் ஆகி இருப்பவர்

துட்டரேல் அறியேன் இவர் சூழ்ச்சிமை

பட்ட நெற்றியர் பாசூர் அடிகளே..  5  

பல்லில் ஓடுகை ஏந்திப் பகல் எலாம்

எல்லி நின்று இடு பெய் பலி ஏற்பவர்

சொல்லிப் போய்ப்புகும் ஊர் அறியேன் சொலீர்

பல்கு நீற்றினர் பாசூர் அடிகளே..  6  

கட்டி விட்ட சடையர் கபாலியர்

எட்டி நோக்கி வந்து இல் புகுந்து அவ்வவர்

இட்ட மா அறியேன் இவர் செய்வன

பட்ட நெற்றியர்  பாசூ ரடிகளே.  7  

வேதம் ஓதி வந்து இல் புகுந்தார் அவர்

காதில் வெண்குழை வைத்த கபாலியார்

நீதி ஒன்று அறியார் நிறை கொண்டனர்

பாதி வெண்பிறைப் பாசூர் அடிகளே..  8  

சாம்பல் பூசுவர் தாழ்சடை கட்டுவர்

ஓம்பல் மூதெரு ஏறும் ஒருவனார்

தேம்பல் வெண்மதி சூடுவர் தீயதோர்

பாம்பு மாட்டுவர் பாசூர் அடிகளே.  9  

மாலி னோடு மறையவன் றானுமாய்

மேலும் கீழும் அளப்பரி தாயவர்

ஆலின் நீழல் அறம் பகர்ந்தார் மிகப்

பால் வெண்ணீற்றினர் பாசூர் அடிகளே..  10  

திரியும் மூ எவெயில் செங்கணை ஒன்றினால்

எரிய எய்தனரேனும் இலங்கைக்கோன்

நெரிய ஊன்றி இட்டார் விரல் ஒன்றினால்

பரியர் நுண்ணியர் பாசூர் அடிகளே.

திருச்சிற்றம்பலம்