திரு இடைச்சுரம்

                  

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு இடைச்சுரம்
ஊர்	திருவடிசூலம்
நாடு	தொண்டை நாடு
ॐசுவாமி	ஞானபுரீஸ்வரர்
ॐஅம்பிகை	இமய மடக்கொடி அம்மை
பாடியவர்கள்	திருஞானசம்பந்தர் (1)          வரிவளர் அவரி ஒளி(1-78)
ஸ்தல மரம்	வில்வம்
தீர்த்தம்	சங்கு தீர்த்தம்.
பண்	குறிஞ்சி
குறிப்புகள்	அம்பிகை பசு வடிவில் தோன்றி பால் சொரிந்து வழிபட்ட திருத்தலம்   கௌதமர், சனற்குமாரர், வழிபட்ட தலம்   சுவாமி மரகதலிங்க திருமேனி உடையவர்.
பதிக பலன்	பிறவிப்பிணி விலகும்
வரிசை எண்.	78                                                         26/32

திருச்சிற்றம்பலம்

            

வரிவளர் அவிர் ஒளி அரவு அரை தாழ
        வார்சடை முடிமிசை வளர்மதி சூடிக்
கரிவளர் தருகழல் கால்வலன் ஏந்திக் 
        கனல் எரி ஆடுவர் காடு அரங் காக
விரிவளர் தருபொழில் இளமயில் ஆல 
        வெண் நிறத்து அருவிகள் திண் என வீழும்
எரிவளர் இனமணி புனமணி சாரல் 
        இடைச்சுர மேவிய இவர்வணம் என்னே  1  

ஆற்றையும் ஏற்றதோர் அவிர்சடை உடையர் 
        அழகினை அருளுவர் குழகலது அறியார்
கூற்றுயிர் செகுப்பது ஒர் கொடுமையை உடையர்
        நடு இருள் ஆடுவர் கொன்றையந் தாரார்
சேற்றயல் மிளிர்வன கயல் இள வாளை
        செருச்செய ஓர்ப்பன செம்முக மந்தி
ஏற்றையொடு உழிதரும் எழில்திகழ் சாரல்
        இடைச்சுர மேவிய இவர்வணம் என்னே.  2  

கானமும்  சுடலையும் கற்படு நிலனும்
        காதலர் தீதிலர் கனல்மழுவாளர்
வானமும் நிலமையும் இருமையும் ஆனார் 
        வணங்கவும் இணங்கவும் வாழ்த்தவும் படுவார்
நானமும் புகை ஒளி விரையொடு கமழ
        நளிர்பொழில் இளமஞ்ஞை மன்னிய பாங்கர்
ஏனமும் பிணையலும் எழில்திகழ் சாரல்
        இடைச்சுர மேவிய இவர்வணம் என்னே.  3  

கடமணி மார்பினர் கடல்தனில் உறைவார்
        காதலர் தீதிலர் கனல்மழு வாளர்
விடமணி மிடறினர் மிளிர்வதோர் அரவர் 
        வேறுமோர் சரிதையர் வேடமும் உடையர்
வடமுலை அயலன கருங்குருந்து ஏறி
        வாழையின் தீங்கனி வார்ந்துதேன் அட்டும்
இடமுலை அரிவையர் எழில்திகழ் சாரல்
        இடைச்சுர மேவிய இவர்வணம் என்னே.  4  

கார்கொண்ட கடிகமழ் விரிமலர்க் கொன்றைக்
        கண்ணியர் வளர்மதி கதிர்விடக் கங்கை
நீர்கொண்ட சடையினர் விடை உயர் கொடியர் 
        நிழல்திகழ் மழுவினர் அழல்திகழ் நிறத்தர்
சீர்கொண்ட மென்சிறை வண்டுபண் செய்யும்
        செழும்புனல் அனையன செங்குலை வாழை
ஏர்கொண்ட பலவினொடு எழில்திகழ் சாரல்
        இடைச்சுர மேவிய இவர்வணம் என்னே.  5  

தோடு அணி குழையினர் சுண்ணவெண் ணீற்றர் 
        சுடலையின் ஆடுவர் தோல் உடை யாகப்
பீடு உயர் செய்ததோர் பெருமையை உடையர்

        பேயுடன் ஆடுவர் பெரியவர் பெருமான்
கோடல்கள் ஒழுகுவ முழுகுவ தும்பி
        குரவமும் மரவமும் மன்னிய பாங்கர்
ஏடு அவிழ் புதுமலர் கடிகமழ் சாரல்
        இடைச்சுர மேவிய இவர்வணம் என்னே.  6  

கழல்மல்கு காலினர் வேலினர் நூலர்
        கவர்தலை அரவொடு கண்டியும் பூண்பர்
அழல்மல்கும் எரியொடும் அணிமழு ஏந்தி 
        ஆடுவர் பாடுவர் ஆரணங்கு உடையர்
பொழில்மல்கு நீடிய அரவமு மரவம் 
        மன்னிய கவட்டிடைப் புணர்குயி லாலும்
எழில்மல்கு சோலையில் வண்டு இசை பாடும்
        இடைச்சுர மேவிய இவர்வணம் என்னே.  7  

தேன்கமழ் கொன்றையந் திருமலர் புனைவார்

        திகழ்தரு சடைமிசைத் திங்களும் சூடி
வீந்தவர் சுடலைவெண் நீறுமெய் பூசி
        வேறுமோர் சரிதையர் வேடமும் உடையர்
சாந்தமும் அகிலொடு முகில்பொதிந்து அலம்பித் 
        தவழ்கன மணியொடு மிகுபளிங்கு இடறி
ஏந்துவெள் அருவிகள் எழில்திகழ் சாரல்
        இடைச்சுர மேவிய இவர்வணம் என்னே.  8  

பலஇலம் இடுபலி கையில் ஒன்று ஏற்பர்
        பலபுகழ அல்லது பழியிலர் தாமும்
தலை இலங்கு அவிர் ஒளி நெடுமுடி அரக்கன் 
        தடக்கைகள் அடர்த்ததோர் தன்மையை உடையர்
மலை இலங்குக் அருவிகள் மணமுழவு அதிர
        மழைதவழ் இளமஞ்ஞை மல்கிய சாரல்
இலை இலவங்கமும் ஏலமும் கமழும்
        இடைச்சுர மேவிய இவர்வணம் என்னே.  9  

பெருமைகள் தருக்கியோர் பேதுறு கின்ற
        பெருங்கடல் வண்ணனும் பிரமனும் ஓரா
அருமையர் அடிநிழல் பரவிநின்று ஏத்தும்
        அன்புடை அடியவர்க்கு அணியரும் ஆவர்
கருமைகொள் வடிவொடு சுனைவளர் குவளைக் 
        கயல் இனம் வயல்இள வாளைகள்இரிய
எருமைகள் படிதர இளஅனம் ஆலும்
        இடைச்சுர மேவிய இவர்வணம் என்னே.  10  

மடைச்சுர மறிவன வாளையும் கயலும்
        மருவிய வயல்தனில் வருபுனல் காழிச்
சடைச்சுரத் துறைவதோர் பிறை உடை அண்ணல் 
        சரிதைகள் பரவி நின்று உருகு சம்பந்தன்
புடைச்சுரத் தருவரைப் பூக்கமழ் சாரல்
        புணர் மடநடையவர் புடை இடை ஆர்ந்த
இடைச்சுரம் ஏத்திய இசையொடு பாடல் 
        இடைச்சுர மேவிய இவர்வணம் என்னே.

திருச்சிற்றம்பலம்