திரு வன்பார்த்தான் பணங்காட்டூர்

                                  

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	வன் பார்த்தான் பனங்காட்டூர்
ஊர்	திருப்பனங்காடு
நாடு	தொண்டை நாடு
ॐசுவாமி	பனங்காட்டு நாதர்
ॐஅம்பிகை	அமிர்தாவல்லி
பாடியவர்கள்	சுந்தரர்  (1)         விடையின் மேல் (7-86)
ஸ்தல மரம்	பனைமரம்
தீர்த்தம்
பண்	சீகாமரம்
குறிப்புகள்
பதிக பலன்	உயர்வு பெற்று வாழ்வார்
வரிசை எண்.	86                                                        9/32

திருச்சிற்றம்பலம்          

விடையின்மேல் வருவானை

          வேதத்தின் பொருளானை

அடையில் அன்புடையானை

          யாவர்க்கும் அறியொண்ணா

மடையில் வாளைகள்பாயும்

          வன்பார்த்தான் பனங்காட்டூர்ச்

சடையிற்கங்கை தரித்தானைச்

          சாராதார் சார்பு என்னே.     1  

அறையும் பைங்கழல் ஆர்ப்ப

          அரவு ஆட அனல் ஏந்திப்

பிறையும் கங்கையும் சூடிப்

          பெயர்ந்தாடும் பெருமானார்

பறையும் சங்கொலி ஓவாப்

          படிறன்றன் பனங்காட்டூர்

உறையும் எங்கள் பிரானாரை

          உணராதார் உணர்வு என்னே.     2  

தண்ணார் மாமதி சூடித்

          தழல்போலும் திருமேனிக்கு

எண்ணார்நாண் மலர்கொண்டு அங்கு 

          இசைந்து ஏத்தும் அடியார்கள்

பண்ணார்பா டல்அறாத

          படிறன்றன் பனங்காட்டூர்ப்

பெண் ஆணாய பிரானைப்

          பேசாதார் பேச்சு என்னே.     3  

நெற்றிக்கண் உடையானை

          நீறு ஏறும் திருமேனிக்

குற்றமில் குணத்தானைக்

          கோணாதார் மனத்தானைப்

பற்றிப் பாம்பு அரை ஆர்த்த

          படிறன்றன் பனங்காட்டூர்ப்

பெற்றொன்று ஏறும்பிரானைப்

          பேசாதார் பேச்சு என்னே.     4  

உரம் என்னும் பொருளானை

          உருகில் உள்ளுறை வானைச்

சிரமென்னும் கலனானைச்

          செங்கண்மால் விடையானை

வரம்முன்னம் அருள்செய்வான்

          வன்பார்த்தான் பனங்காட்டூர்ப்

பரமன்எங் கள்பிரானைப்

          பரவாதார் பரவென்னே.     5  

எயிலார் பொக்கம் எரித்த

          எண்தோள் முக்கண் இறைவன்

வெயிலாய்க் காற்று எனவீசி

          மின்னாய்த்தீ எனநின்றான்

மயிலார்சோ லைகள்சூழ்ந்த

          வன்பார்த்தான் பனங்காட்டூர்ப்

பயில்வானுக்கு அடிமைக்கன்

          பயிலாதார் பயில் என்னே.     6  

மெய்யன் வெண்பொடி பூசும்

          விகிர்தன் வேத முதல்வன்

கையில்மான் மழுவேந்திக்

          காலன்கா லம்அறுத்தான்

பைகொள் பாம்பு அரை ஆர்த்த

          படிறன்றன் பனங்காட்டூர்

ஐயன்எங் கள்பிரானை

          அறியாதார் அறிவு என்னே.     7  

வஞ்சமற்ற மனத்தாரை

          மறவாத பிறப்பிலியைப்

பஞ்சிச் சீறடியாளைப்

          பாகம் வைத்து உகந்தானை

மஞ்சுற்ற மணிமாட

          வன்பார்த்தான் பனங்காட்டூர்

நெஞ்சத்து எங்கள் பிரானை

          நினையாதார் நினைவு என்னே.    8  

மழையானும் திகழ்கின்ற

          மலரோன் என்று இருவர்தாம்

உழையாநின்று  அவர் உள்க

          உயர்வானத்து உயர்வானைப்

பழையானைப் பனங்காட்டூர்

          பதியாகத் திகழ்கின்ற

குழைகாதற்கு அடிமைக்கட்கு

          குழையாதார் குழைவு என்னே.    9  

பாரூரும் பனங்காட்டூர்ப்

          பவளத்தின் படியானைச்

சீரூரும் திருவாரூர்ச்

          சிவன்பேர் சென்னியில் வைத்த

ஆரூரன் அடித்தொண்டன்

          அடியன்சொல் அடிநாய்சொல்

ஊரூரன் உரைசெய்வார்

          உயர்வானத்து உயர்வாரே. 

திருச்சிற்றம்பலம்