திரு வல்லம்

                                 

௨ 

திருஞானசம்பந்தர்   சுவாமிகள் அருளிச்செய்த
முதலாம் திருமுறை

தகவல் பலகை	விவரம்
தலம்	திருவல்லம்
ஊர்	திருவலம், வில்வாரண்யம்
நாடு	தொண்டை நாடு
ॐசுவாமி	வில்வநாதீஸ்வரர், வல்லநாதர்
ॐஅம்பிகை	வல்லாம்பிகை, தனுமத்யாம்பாள்
பாடியவர்கள்	ஞானசம்பந்தர்  (1)         எரித்தவன் முப்புரம் (1-113)
ஸ்தல மரம்	வில்வம்
தீர்த்தம்	கெளரி தீர்த்தம்,
பண்	வியாழக்குறிஞ்சி
குறிப்புகள்	கெளரி, திருமால், சனக முனிவர் நவக்கிரகங்கள், வல்லாளன் ஆகியோர் பூசித்து பேறு பெற்ற தலம்  தீக்காலி என்பவன் பூசித்ததால் தீக்காலி வல்லம் எனவும் பெயர்.
பதிக பலன்	பேரின்பம் உண்டாகும்.
வரிசை எண்.	113                                                        10/32

திருச்சிற்றம்பலம்          

எரித்தவன் முப்புரம் எரியில்மூழ்கத்

தரித்தவன் கங்கையைத் தாழ்சடைமேல்

விரித்தவன் வேதங்கள் வேறுவேறு

தெரித்தவன் உறைவிடந் திருவல்லமே.  1  

தாயவன் உலகுக்குத் தன் ஒப்பிலாத்

தூயவன் தூமதி சூடி எல்லாம்

ஆயவன் அமரர்க்கும் முனிவர்கட்கும்

சேயவன் உறைவிடம் திருவல்லமே.  2  

பார்த்தவன் காமனைப் பண்பழியப்

போர்த்தவன் போதகத்தின் உரிவை

ஆர்த்தவன் நான்முகன் தலையை அன்று

சேர்த்தவன் உறைவிடம் திருவல்லமே.  3  

கொய்த அம்மலரடி கூடுவார்தம்

மைதவழ் திருமகள் வணங்க வைத்துப்

பெய்தவன் பெருமழை உலகம் உய்யச்

செய்தவன் உறைவிடம்  திருவல்லமே.  4  

சார்ந்தவர்க்கு இன்பங்கள் தழைக்கும்வண்ணம்

நேர்ந்தவன் நேரிழை யோடும் கூடித்

தேர்ந்தவர் தேடுவார் தேடச்செய்தே

சேர்ந்தவன் உறைவிடம்  திருவல்லமே.  5  

பதைத்து எழு காலனைப் பாதம் ஒன்றால்

உதைத்து எழு மாமுனிக்கு உண்மைநின்று

விதிர்த்து எழு தக்கன் தன் வேள்வி அன்று

சிதைத்தவன் உறைவிடம் திருவல்லமே.  6  

இகழ்ந்தரு வரையினை எடுக்கல் உற்று ஆங்கு 

அகழ்ந்த வல் அரக்கனை அடர்த்தபாதம்

நிகழ்ந்தவர் நேடுவார் நேடச்செய்தே

திகழ்ந்தவன் உறைவிடம் திருவல்லமே.  8  

பெரியவன் சிறியவர் சிந்தைசெய்ய

அரியவன் அருமறைய அங்கம் ஆனான்

கரியவன் நான்முகன் காண ஒண்ணாத்

தெரியவன் உறைவிடம் திருவல்லமே.  9  

அன்றிய அமணர்கள் சாக்கியர்கள்

குன்றிய அறவுரை கூறாவண்ணம்

வென்றவன் புலன் ஐந்தும் விளங்க எங்கும்

சென்றவன் உறைவிடம் திருவல்லமே.  10  

கற்றவர் திருவல்லம் கண்டுசென்று

நற்றமிழ் ஞானசம் பந்தன்சொன்ன

குற்றமில் செந்தமிழ் கூறவல்லார்

பற்றுவர் ஈசன்பொற் பாதங்களே.

திருச்சிற்றம்பலம்

இப்பதிகத்தில் 7-ம் பாடல் கிடைக்கப்பெறவில்லை.