திருமந்திரம் - 2-2 பதிவலியில் வீரட்டம் எட்டு

                        

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	2
தந்திரம்	இரண்டாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	2. பதிவலியில் வீரட்டம் எட்டு
பிற குறிப்புகள்

திருச்சிற்றம்பலம்

                  

கருத்து உறை அந்தகன் தன்போல் அசுரன்

வரத்தின் உலகத்து உயிர்களை எல்லாம்

வருத்தம் செய்தான் என்று வானவர் வேண்டக்

குருத்து உயர் சூலம் கைக் கொண்டுகொன் றானே.  1  

கொலையின் பிழைத்த பிரசா பதியைத்

தலையைத் தடிந்திட்டுத் தான் அங்கி யிட்டு

நிலையுல குக்கு இவன் வேண்டும் என்று எண்ணித்

தலையை அரிந்து இட்டுச் சந்தி செய் தானே.  2  

எங்கும் பரந்தும் இருநிலம் தாங்கியும்

தங்கும் படித்து அவன் தாள் உணர் தேவர்கள்

பொங்கும் சினத்துள் அயன்தலை முன் அற

அங்குஅச் சுதனை உதிரம் கொண் டானே.  3  

எங்கும் கலந்துமென் உள்ளத்து எழுகின்ற

அங்க முதல்வன் அருமறை ஓதிபால்

பொங்கும் சலந்தரன் போர்செய்ய நீர்மையின்

அங்கு விரல் குறித்து ஆழிசெய் தானே. 4  

அப்பணி செஞ்சடை ஆதி புராதனன்

முப்புரம் செற்றனன் என்பர்கள் மூடர்கள்

முப்புரம் ஆவது மும்மல காரியம்

அப்புரம் எய்தமை யார் அறிவாரே.  5  

முத்தீ கொளுவி முழங்கு எரி வேள்வியுள்

அத்தி உரி அரன் ஆவது அறிகிலர்

சத்தி கருதியது ஆம் பல தேவரும்

அத்தீயின் உள் எழுந் தன்று கொலையே.  6  

மூலத் துவாரத்து மூளும் ஒருவனை

மேலைத் துவாரத்தின் மேல் உற நோக்கி முற்

கால் உற்றுக் காலனைக் காய்ந்து அங்கி யோகமாய்

ஞாலக் கடவூர் நலமாய் இருந்ததே.  7  

இருந்த மனத்தை இசைய இருத்திப்

பொருந்தி இலிங்க வழி அது போக்கித்

திருந்திய காமன் செயல் அழித்து அங்கண்

அருந்தவ யோகம் கொறுக்கை அமர்ந்ததே.  8 

திருச்சிற்றம்பலம்