திருவலஞ்சுழி - திருகொட்டையூர்

  

௨ 

திருநாவுக்கரசர் சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு வலஞ்சுழி
ஊர்	சக்திவனம், தட்சிணாவர்த்தம்
நாடு	சோழ (காவிரி வட)
ॐசுவாமி	கபர்தீச்வரர், செஞ்சடை நாதர், வலஞ்சுழி நாதர்,
ॐஅம்பிகை	பிருகன்நாயகி, பெரியநாயகி
பாடியவர்கள்	திருஞானசம்பந்தர் (3)         விண்டலாம் (2-02)         என்ன புண்ணியம் செய்தனை(2-106)         பள்ளமதாய (3-106)          திருநாவுக்கரசர்(2)         ஓதமார் கடலின் (5-66)         அனையார் புனல் கங்கை (6-72)
ஸ்தல மரம்	வில்வம்
தீர்த்தம்	காவிரி தீர்த்தம், அரசலாறு, ஜடாதீர்த்தம்
பண்	திருத்தாண்டகம்
குறிப்புகள்	ஏராண்ட முனிவர் வழிபட்டது ஆதிசேஷன், உமாதேவியார், இந்திரன், திருமால், பிரம்மன் ஆகியோர் வழிபட்டது.
பதிக பலன்
வரிசை எண்.	73                                                             25/128

திருகொட்டையூர்

தகவல் பலகை	விவரம்
தலம்	திருகொட்டையூர்
ஊர்	கோடீச்சரம்
நாடு	சோழ (காவிரி வட)
ॐசுவாமி	கோடீஸ்வரர்
ॐஅம்பிகை	கந்துகிரீடாம்பாள் பந்தாடு நாயகி
பாடியவர்கள்	திருநாவுக்கரசர்(1)         கருமணிபோற் (6-73)
ஸ்தல மரம்	ஆமணக்கு (கொட்டை)
தீர்த்தம்	அமுத தீர்த்தம்
பண்	திருத்தாண்டகம்
குறிப்புகள்	மார்கண்டேயர் வழிபட்டது
பதிக பலன்
வரிசை எண்.	73                                                             44/63

திருச்சிற்றம்பலம்

கருமணிபோல் கண்டத்து அழகன் கண்டாய்
கல்லால் நிழல் கீழ் இருந்தான் கண்டாய்
பருமணி மாநாகம் பூண்டான் கண்டாய்
பவளக்குன்று அன்ன பரமன் கண்டாய்
வருமணிநீர்ப் பொன்னிவலஞ் சுழியான் கண்டாய்
மாதேவன் கண்டாய் வரதன் கண்டாய்
குருமணிபோல் அழகு அமரும் கொட்டையூரில்
கோடீச்சரத்து உறையும் கோமான் தானே.  1

கலைக்கன்று தங்கு கரத்தான் கண்டாய்
கலைபயில்வோர் ஞானக்கண் ஆனான் கண்டாய்
அலைக்கங்கை செஞ்சடைமேல் ஏற்றான் கண்டாய்
அண்ட கபாலத்தப் பாலான் கண்டாய்
மலைப்பண்டம்  கொண்டு வருநீர்ப் பொன்னி
வலஞ்சுழியின் மேவிய மைந்தன் கண்டாய்
குலைத்தெங்கம்  சோலைசூழ் கொட்டை யூரில்
கோடீச்சரத்து உறையும் கோமான் தானே.  2

செந்தாமரைப் போது அணிந்தான் கண்டாய்
சிவன்கண்டாய் தேவர் பெருமான் கண்டாய்
பந்தாடு மெல்விரலாள்¹ பாகன் கண்டாய்
பாலோடு நெய் தயிர் தேன் ஆடி கண்டாய்
மந்தார முந்தி வருநீர்ப் பொன்னி
வலஞ்சுழியின் மன்னு மணாளன் கண்டாய்
கொந்தார் பொழிற்புடைசூழ் கொட்டை யூரில்
கோடீச்சரத்து உறையும் கோமான் தானே.  3

பொடியாடு மேனிப் புனிதன் கண்டாய்
புட்பாகற் ² காழி கொடுத்தான் கண்டாய்
இடியார் கடுமுழக்கேறு ஊர்ந்தான் கண்டாய்
எண்திசைக்கும் விளக்காகி நின்றான் கண்டாய்
மடலார் திரை புரளும் காவிரிவாய்
வலஞ்சுழியின் மேவிய மைந்தன் கண்டாய்
கொடியாடு நெடுமாடக் கொட்டை யூரில்
கோடீச்சரத்து உறையும் கோமான் தானே.  4

அக்கு அரவம் அரைக்கு அசைத்த அம்மான் கண்டாய்
அருமறைகள்ஆறு அங்கம் ஆனான் கண்டாய்
தக்கனது பெருவேள்வி தகர்த்தான் கண்டாய்
சதாசிவன்காண் சலந்தரனைப் பிளந்தான் கண்டாய்
மைக்கொண் மயிற்றழைகொண்டு வருநீர்ப் பொன்னி
வலஞ்சுழியான் கண்டாய் மழுவன் கண்டாய்
கொக்கு ³ அமரும் வயற்புடைசூழ் கொட்டை யூரில்
கோடீச்சரத்து உறையும் கோமான் தானே.  5

சண்டனை நல்லண்டர்தொழச் செய்தான் கண்டாய்
சதாசிவன் கண்டாய்சங் கரன் தான் கண்டாய்
தொண்டர்பலர் தொழுது ஏதேத்துங் கழலான் கண்டாய்
சுடர் ஒளியாய்த் தொடர்வு அரிதாய் நின்றான் கண்டாய்
மண்டுபுனல் பொன்னிவலஞ் சுழியான் கண்டாய்
மாமுனிவர் தம்முடைய மருந்து கண்டாய்
கொண்டல் தவழ் கொடிமாடக் கொட்டை யூரில்
கோடீச்சரத்து உறையும்  கோமான் தானே.  6

அனவரியான் கண்டாய் அமலன் கண்டாய்
அவிநாசி கண்டாய் அண்டத்தான் கண்டாய்
பணமணிமா நாகம் உடையான் கண்டாய்
பண்டரங்கன் கண்டாய் பகவன் கண்டாய்
மணல்வருநீர்ப் பொன்னிவலஞ் சுழியான் கண்டாய்
மாதவற்கும் நான்முகற்கும் வரதன் கண்டாய்
குணமுடைநல் அடியார்வாழ் கொட்டை யூரில்
கோடீச்சரத்து உறையும் கோமான் தானே.  7

விரை கமழு மலர்க் கொன்றைத் தாரான் கண்டாய்
வேதங்கள் தொழநின்ற நாதன் கண்டாய்
அரை அதனில் புள்ளி அதள் உடையான் கண்டாய்
அழலாடி கண்டாய் அழகன் கண்டாய்
வருதிரைநீர்ப் பொன்னிவலஞ் சுழியான் கண்டாய்
வஞ்சமனத் தவர்க்கு அரிய மைந்தன் கண்டாய்
குரவமரும் பொழிற்புடைசூழ் கொட்டை யூரில்
கோடீச்சரத்து உறையும்  கோமான் தானே.  8

தளங்கிளரும்  தாமரையா தனத்தான் கண்டாய்
தசரதன் தன் மகன் அசைவு தவிர்த்தான் கண்டாய்
இளம்பிறையும் முதிர்சடைமேல் வைத்தான் கண்டாய்
எட்டு எட்டு இருங்கலையும் ஆனான் கண்டாய்
வளங்கிளர்நீர்ப் பொன்னிவலஞ் சுழியான் கண்டாய்
மாமுனிகள் தொழுது எழு பொற் கழலான் கண்டாய்
குளம்  குளிர் செங்குவளை கிளர் கொட்டை யூரில்
கோடீச்சரத்து உறையும்  கோமான் தானே.  9

விண்டார் புரமூன்று எரித்தான் கண்டாய்
விலங்கலி வல் அரக்கன் உடல் அடர்த்தான் கண்டாய்
தண்டாமரையானும் மாலும் தேடத்
தழற்பிழம்பாய் நீண்ட கழலான் கண்டாய்
வண்டார்பூஞ் சோலைவலஞ் சுழியான் கண்டாய்
மாதேவன் கண்டாய் மறையோடு அங்கம்
கொண்டாடு வேதியர்வாழ் கொட்டை யூரில்
கோடீச்சரத்து உறையும்  கோமான் தானே.

திருச்சிற்றம்பலம்

1. பந்தாடு நாயகி - திருக் கொட்டையூரில் மேவும் அம்பிகையின் திரு நாமம் 

2. புட்பாகர் - திருமால் 

3. கொக்கு - நாரை