பொது - பஞ்சாக்கர திருப்பதிகம்

                                                                                        ௨ 

ஞானசம்பந்த மூர்த்தி சுவாமிகள்  அருளிச்செய்த
மூன்றாம்  திருமுறை

தகவல் பலகை	விவரம்
தலம்	பொது
ஊர்/வேறு பெயர்
நாடு	பொது
ॐசுவாமி	சுந்தரேஸ்வரர்
ॐஅம்பிகை	அங்கயற்கண்ணி
பாடியவர்கள்	சம்பந்தர்  (1)         துஞ்சலும் துஞ்சல்  (3-22)
பண்	காந்தார பஞ்சமம்
குறிப்புகள்	இது பஞ்சாக்கர பதிகம் என போற்றப் படுகிறது.  தினசரி வழிபாட்டில் ஓத வேண்டிய பதிகம்
பதிக பலன்	தேவர் ஆவர்
வரிசை எண்.	22

திருச்சிற்றம்பலம்

துஞ்சலும் துஞ்சல் இலாத போழ்தினும்
நெஞ்சகம்  நைந்து நினைமின் நாள்தொறும்
வஞ்சகம் அற்று அடி வாழ்த்த வந்தகூற்று
அஞ்ச உதைத்தன அஞ்செழுத்துமே.  1

மந்திரம்  நான்மறையாகி வானவர்
சிந்தையுள் நின்று அவர் தம்மை ஆள்வன
செந்தழல் ஓம்பிய செம்மை வேதியர்க்கு 
அந்தியுள் மந்திரம் அஞ்செ ழுத்துமே.  2

ஊனில் உயிர்ப்பை ஒடுக்கி ஒண்சுடர்
ஞானவி ளக்கினை ஏற்றி நன்புலத்து 
ஏனை வழி திறந்து ஏத்து வார்க்கு இடர்
ஆன கெடுப்பன அஞ்செ ழுத்துமே.  3

நல்லவர் தீயர் எனாது நச்சினர்
செல்லல் கெடச்சிவ முத்தி காட்டுவ
கொல்லந மன்தமர் கொண்டுபோம் இடத்து 
அல்லல்கெ டுப்பன அஞ்செ ழுத்துமே.  4

கொங்கு அலர் வன்மதன் வாளி ஐந்து அகத்து
அங்குள பூதமும் அஞ்ச ஐம்பொழில்
தங்கு அரவின் படம் அஞ்சும் தம்முடை
அங்கையில் ஐவிரல் அஞ்செ ழுத்துமே.  5

தும்மல் இருமல் தொடர்ந்த போழ்தினும்
வெம்மை நரகம் விளைந்த போழ்தினும்
இம்மை வினை அடர்த்து எய்தும் போழ்தினும்
அம்மையி னும் துணை அஞ்செ ழுத்துமே.  6

வீடு பிறப்பை அறுத்து மெச்சினர்
பீடை கெடுப்பன பின்னை நாள்தொறும்
மாடு கொடுப்பன மன்னு மாநடம்
ஆடி உகப்பன அஞ்செ ழுத்துமே.  7

வண்டு அமர் ஓதிமடந்தை பேணின
பண்டை இராவணன் பாடி உய்ந்தன
தொண்டர்கள் கொண்டு துதித்த பின் அவர்க்கு
அண்டம் அளிப்பன  அஞ்செ ழுத்துமே.  8

கார்வணன் நான்முகன் காணுதற்கு ஒணாச்
சீர்வணச் சேவடி செவ்வி நாள் தொறும்
பேர்வணம் பேசிப் பிதற்றும் பித்தர்கட்கு
ஆர்வணம் ஆவன அஞ்செ ழுத்துமே.  9

புத்தர் சமண்கழுக்கையர் பொய்கொளாச்
சித்தத் தவர்கள் தெளிந்து தேறின
வித்தக நீறு அணிவார் வினைப்பகைக்கு 
அத்திரம் ஆவன  அஞ்செ ழுத்துமே.  10

நற்றமிழ் ஞானசம்பந்தன் நான்மறை
கற்றவன் காழியர் மன்னன் உன்னிய
அற்றமில் மாலை ஈர் ஐந்தும் அஞ்செழுத்து
உற்றன வல்லவர் உம்பர் ஆவரே.  11

திருச்சிற்றம்பலம்