திருவெண்காடு

                                                                                            ௨ 

திருஞானசம்பந்தர்  சுவாமிகள்  அருளிச்செய்த
மூன்றாம்  திருமுறை

தகவல் பலகை	விவரம்
தலம்	திருவெண்காடு
ஊர்/வேறு பெயர்
நாடு	சோழ (காவிரி வட)
ॐசுவாமி	சுவேதாரண்யேஸ்வரர்
ॐஅம்பிகை	பிரம்ம வித்யா நாயகி
பாடியவர்கள்	சம்பந்தர்   (3)         கண் காட்டும் நுதலானும்(2-48)         உண்டாய் நஞ்சை (2-61)         மந்திர மறையவை (3-15) அப்பர் (2)         பண் காட்டிப்படி (5-49)         தூண்டு சுடர்மேனி(6-35) சுந்தரர் (1)         படம் கொள் நாகம் (7-06)
ஸ்தல மரம்	வட ஆலமரம்
தீர்த்தம்	முகுளம்
பண்	காந்தார பஞ்சமம்
குறிப்புகள்	இந்திரன், ஐராவதம் வழிபட்டது  தீர்த்தம் மகிமை உடையது  பிள்ளைப் பேறு வாய்க்கும் தலம் என்று பெயர் பெற்றது
பதிக பலன்	வினை நீங்கும்,
வரிசை எண்.	61                                                          11/63

திருச்சிற்றம்பலம்

மந்திர மறை அவை வான வரொடும்

இந்திரன் வழிபட நின்ற எம் இறை

வெந்தவெண் ணீற்றர் வெண்காடு மேவிய

அந்தமு முதலுடை அடிகள் அல்லரே.  1

படையுடை மழுவினர் பாய்புலித் தோலின்

உடைவிரி கோவணம் உகந்த கொள்கையர்

விடையுடைக் கொடியர்வெண்காடு மேவிய

சடையிடைப் புனல்வைத்த சதுரர் அல்லரே.  2

பாலொடு நெய்தயிர் பலவும் ஆடுவர்

தோலொடு நூலிழை துதைந்த மார்பினர்

மேலவர் பரவுவெண்காடு மேவிய

ஆலம் அது அமர்ந்தஎம் அடிகள் அல்லரே.  3

ஞாழலும் செருந்தியும் நறுமலர்ப் புன்னையும்

தாழைவெண் குருகயல் தயங்கு கானலில்

வேழமது உரித்தவெண்காடு மேவிய

யாழினது இசையுடை இறைவர் அல்லரே.  4

பூதங்கள் பலவுடைப்புனிதர் புண்ணியர்

ஏதங்கள் பலஇடர் தீர்க்கும் எம் இறை

வேதங்கள் முதல்வர்வெண்காடு மேவிய

பாதங்கள் தொழநின்ற பரமர் அல்லரே.  5

மண்ணவர் விண்ணவர் வணங்க வைகலும்

எண்ணிய தேவர்கள் இறைஞ்சும் எம்மிறை

விண்ணமர் பொழில்கொள்வெண்காடு மேவிய

அண்ணலை அடிதொழ அல்லல் இல்லையே.  6

நயந்தவர்க்கு அருள்பல நல்கி இந்திரன்

கயந்திரம் வழிபட நின்ற கண்ணுதல்

வியந்தவர் பரவுவெண்காடு மேவிய

பயந்தரு மழுவுடைப்பரமர் அல்லரே.  7

மலையுடன் எடுத்தவல்லரக்கன் நீள்முடி

தலையுடன் நெரித்து அருள் செய்த சங்கரர்

விலையுடை நீற்றர்வெண்காடு மேவிய

அலையுடைப் புனல்வைத்த அடிகள்  அல்லரே.  8

ஏடவிழ் நறுமலர் அயனும் மாலுமாய்த்

தேடவுந் தெரிந்தவர் தேர கிற்கிலார்

வேடம் அதுடையவெண்காடு மேவிய

ஆடலை அமர்ந்தஎம் அடிகள் அல்லரே.  9

போதியர் பிண்டியர் பொருத்தம் இல்லிகள்

நீதிகள் சொல்லியும் நினைய கிற்கிலார்

வேதியர் பரவுவெண்காடு மேவிய

ஆதியை அடிதொழ அல்லல் இல்லையே.  10

நல்லவர் புகலியுள் ஞான சம்பந்தன்

செல்வன் எம்  சிவனுறை திருவெண் காட்டின்மேல் 

சொல்லிய அருந்தமிழ் பத்தும் வல்லவர்

அல்லலோடு  அருவினை அறுதல் ஆணையே.  11

திருச்சிற்றம்பலம்