திருப்பிரம்மபுரம்

 

௨ 

திருஞானசம்பந்த சுவாமிகள் அருளிச்செய்த
முதல் திருமுறை

தகவல் பலகை	விவரம்
தலம்	திருப்பிரமபுரம்
ஊர்	சீர்காழி
நாடு	காவிரி வடகரை
ॐசுவாமி	பிரம்மபுரீஸ்வரர்
ॐஅம்பிகை	பெரியநாயகி
பாடியவர்கள்	திருஞானசம்பந்தர்(66),     பிரமபுரம்          தோடுடைய செவியன் (1-1)         எம்பிரான் எனக்கு (2-40)         கறை அணி வேலிலர் (2-65)         கரமுனம் மலரால் (3-37)         இறையவன் ஈசன் (3-56)     திருவேணுபுரம்          வண்டார் குழல் இரிவை(1-09)         நிலவும் புனலும் (2-17)         பூதத்தின் படையினர் (2-81)     திருப்புகலி          மைம்மருபூங்குழல் (1-04)         விதியாய் விளைவாய் (1-30)         ஆடல் அரவு அசைத்தான் (1-104)         உகலியாழ் கட (2-25)         முன்னிய கலைப் பொருளும் (2-29)         உருவார்ந்த மெல்லியாலோர் (2-54)         விடை அது ஏறி வெறி (2-122)         இயலிசை எனும் (3-03)         கண்ணுதலானும் வெண் ( 3-07)              திருவெங்குரு          காலை நன் மாமலர் (1-75)         விண்ணவர் தொழுது எழு (3-94)     திருத்தோணிபுரம்         வண்டரங்கப் புனற்கமல  (1-60)         சங்கம் அருமுன் (3-81)         கரும்பமர் வில்லியை (3-100)     திருப்பூந்தராய்          செந்நெலங் கழனி (2-01)         பந்துசேர்விரலாள் (3-02)         தக்கன் வேள்வி (3-05)         மின்னன எயிறுடை (3-13)     திருச்சிரபுரம்          பல்லடைந்த வெண் தலை (1-47)         வாருறு வனமுலை (1-109)         அன்னம் மென் நடை(2-102)     திருப்புறவம்        பங்கமேறு மதிசேர்  (1-66)         நறவ நிறைவண்டறை (1-74)         எய்யா என்றித் தான் (1-97)         எந்தமது சிந்தை பிரியாத (3-75)     சீர்காழி         பூவார் கொன்றைப் (1-24)         அடலேற மருங்    (1-34)         நல்லார் தீமேவும் (1-81)         உரவார் கலையின் (1-102)         நல்லானை நான்மறை (2-11)         பண்ணின் நேர்மொழி (2-49)         நலம் கொள் முத்தும் (2-59)         விண்ணியங்கு மதி (2-75)         பொங்கு வெண் புரி (2-96)         நம்பொருள் நம் மக்கள் (2-97)         பொடி இலங்கும் திருமேனி (2-113)         சந்தமார் முலையாள் (3-43)         யாமாமா நீ யாமாமா (3-117)     திருகொச்சைவயம்          நீலாவணன் மாமிடற்றான்          அறையும் பூம்புனலோடும்         திருந்துமாகளிற்றி     திருக்கழுமலம்         பிறையணிபடர் சடை          அயில் உரு படையினர்         பந்தத்தால் வந்து          சேவுயரும் திண்கொடியான்          மண்ணில் நல்ல வண்ணம்         மடல் மலி கொன்றை      பல்பெயர்பத்து          எரியார் மழு ஒன்று ஏந்தி          அரனை உள்குவீர்         காடதணி கலங்கார         பிரம புறத்துறை          ஓருருவாயினை          பிரமனூர் வேணுபுரம்         விளங்கிய சீர்ப் பிரமனூர்          பூகனூர் புத்தேளு          சுரருலகு நரர்கள்          வரமதே  கொளா         உற்றுமை சேர்வது           திருநாவுக்கரசர்(3),         மாதியன்று மனைக்கிரு         பார்கொண்டு மூடிக்          படையார் மழு ஒன்று  சுந்தரர்(1)         சாதலும் பிறத்தலும்.
ஸ்தல மரம்	பாரிஜாதம்
தீர்த்தம்	பிரம தீர்த்தம்  உட்பட 22
பண்	நட்டபாடை
குறிப்புகள்	திருஞான சம்பந்தர் திரு அவதாரம் செய்த தலம்.  ஞானப்பால் அருந்தி பின் பாடியது. இதற்கு வழங்கும் வேறு பெயர்களாவன: பிரம்மன் வழிபட்டதால், "பிரம்மபுரம்", இறைவன் மூங்கில் வடிவில் தோன்றியதால் "வேணுபுரம்", தேவர்களின் புகலிடமாக விளங்கியதால், "புகலி", குருபகவான் வழிபட்டதால், "வெங்குரு", ஊழிக் காலத்தில் ஈசன் தோணியில் காட்சி தருதலால் "தோணிபுரம்", இரணியாகஷனை வதம் செய்த வராக மூர்த்தி வழிபட்டதால் "பூந்தராய்", இராகு கிரகம் பூசித்ததால், "சிரபுரம்", புறா வடிவத்தில் வந்த அக்கினியால் சிபி சக்கரவர்த்தி நற்கதி அடைந்ததால் "புறவம்",  சண்பை எனும் புல்லால் திருமால் வழிபட்டதால், "சண்பை", காளி வழிபட்டதால் "ஸ்ரீகாளி" (சீகாழி) பழிச்சொல் (கொச்சை சொல்) நீங்க பராசரர் வழிபட்டதால் "கொச்சை வயம் ".  மும்மலம் விலக ரோவமாசரர் வழிபட்டதால் "கழுமலம்"
பதிக பலன்	தொல்வினை தீரும்.
வரிசை எண்.	01

திருச்சிற்றம்பலம்

தோடுடைய செவியன் விடையேறி ஓர் தூவெண்மதிசூடிக்
காடுடையசுட லைப்பொடிபூசி என் உள்ளம் கவர் கள்வன்
ஏடுடையமல ரான்முனைநாட்பணிந்து ஏத்த அருள்செய்த
பீடுடைய பிர மாபுரமேவிய பெம்மான் இவன் அன்றே.          1.1.1

முற்றலாமையிள நாகமோடு ஏன முளைக்கொம்பு அவைபூண்டு
வற்றலோடுகலனாப் பலிதேர்ந்து எனது உள்ளம்  கவர்கள்வன்
கற்றல்கேட்டல் உடை யார் பெரியார் கழல் கையால் தொழுது ஏத்தப்
பெற்றம் ஊர்ந்தபிர மாபுரமேவிய பெம்மான் இவன் அன்றே.          1.1.2

நீர்பரந்தநிமிர் புன்சடைமேலோர் நிலாவெண் மதிசூடி
ஏர்பரந்தஇன வெள்வளைசோர என் உள்ளம் கவர் கள்வன்
ஊர்பரந்த உலகின் முதலாகிய ஓரூர் இது என்னப்
பேர்பரந்தபிர மாபுரமேவிய பெம்மான் இவன் அன்றே.          1.1.3

விண்மகிழ்ந்த மதில் எய்ததும் அன்றி விளங்கு தலையோட்டில்
உண்மகிழ்ந்துபலி தேரிய வந்து எனது உள்ளம் கவர் கள்வன்
மண்மகிழ்ந்தஅரவம் மலர்க்கொன்றை மலிந்தவரை மார்பில்
பெண்மகிழ்ந்தபிர மாபுரமேவிய பெம்மான் இவன் அன்றே.          1.1.4

ஒருமைபெண்மை உடையன் சடையன் விடை ஊரும் இவன் என்ன
அருமையாக உரை செய்யவமர்ந்து எனது உள்ளம் கவர் கள்வன்
கருமைபெற்றகடல் கொள்ள மிதந்ததோர் காலம் இது என்னப்
பெருமைபெற்றபிர மாபுரமேவிய பெம்மான் இவன் அன்றே.          1.1.5

மறைகலந்த ஒலி பாடலோடு ஆடலர் ஆகி மழு ஏந்தி
இறைகலந்த இன வெள்வளைசோர என் உள்ளம் கவர் கள்வன்
கறைகலந்தகடி யார்பொழில்நீடுயர் சோலைக்கதிர் சிந்தப்
பிறைகலந்தபிர மாபுரமேவிய பெம்மான் இவன் அன்றே.          1.1.6

சடைமுயங்கு புனலன் அனலன் எரி வீசிச்சதிர் வெய்த
உடைமுயங்கும் அரவோடு உழி தந்து எனது உள்ளம் கவர் கள்வன்
கடல்முயங்குகழி சூழ் குளிர் கானல் அம் பொன்னஞ்சிறகு அன்னம்
பெடை முயங்கு பிரமாபுரமேவிய பெம்மான் இவன் அன்றே.          1.1.7

வியர் இலங்குவரை யுந்தியதோள்களை வீரம்விளை வித்த
உயர் இலங்கை அரை யன்வலிசெற்று எனது உள்ளம் கவர் கள்வன்
துயர் இலங்கும் உலகில் பல ஊழிகள் தோன்றும் பொழுது எல்லாம்
பெயர் இ லங்குபிர மாபுரமேவிய பெம்மான் இவன் அன்றே..          1.1.8

தாள் நுதல்செய்து இறை காணிய மாலொடு தண் தாமரை யானும்
நீணுதல்செய்து ஒழிய நிமிர்ந்தான் எனது உள்ளம் கவர் கள்வன்
வாள் நுதல்செய் மகளிர் முதலாகிய வையத்தவர் ஏத்தப்
பேணுதல்செய்பிர மாபுரமேவிய பெம்மான் இவன் அன்றே.          1.1.9

புத்தரோடுபொறி யில்சமணும்புறங் கூறநெறி நில்லா
ஒத்தசொல்ல உலகம் பலிதேர்ந்து எனது உள்ளம் கவர் கள்வன்
மத்தயானை மறுக அவ் உரிபோர்த்ததோர் மாயம் இது என்னப்
பித்தர்போலும்பிர மாபுரமேவிய பெம்மான் இவன் அன்றே.          1.1.10

அருநெறியமறை வல்லமுனியகன் பொய்கையலர் மேய
பெருநெறியபிர மாபுரமேவிய பெம்மான் இவன் தன்னை
ஒருநெறிய மனம் வைத்து உணர்ஞானசம் பந்தன் உரை செய்த
திருநெறியதமிழ் வல்லவர்தொல்வினை தீர்தல் எளிதாமே.          1.1.11


திருச்சிற்றம்பலம்