திரு இராமேஸ்வரம்

                      

௨ 

திருநாவுக்கரசர் சுவாமிகள் அருளிச்செய்த
நான்காம் திருமுறை

தகவல் பலகை	விவரம்
தலம்	திருஇராமேஸ்வரம்
ஊர் /வேறு பெயர்
நாடு	பாண்டிய நாடு
ॐசுவாமி	இராமநாதசுவாமி
ॐஅம்பிகை	பர்வத வர்த்தனி, மலைவளர் காதலி
பாடியவர்கள்	திருஞானசம்பந்தர் (2),         அலை வளர் தண் மதி  (3-10)         திரிதரு மாமணி (3-101) அப்பர்(1)         பாசமும் கழிக்க (4-61)
ஸ்தல மரம்	மகிழம்
தீர்த்தம்	அக்னி  தீர்த்தம் , உட்பட 22 தீர்த்தங்கள்
பண்	காந்தார பஞ்சமம்
குறிப்புகள்	இராவணனை கொன்ற பழி தீர இராமபிரான் பூசித்த தலம்  அனுமான் கொண்டு வந்த லிங்கம் விசுவலிங்கம் என தனியாக உள்ளது.  பன்னிரு ஜோதிர்லிங்க தலத்தில் தமிழகத்தில் உள்ள ஒரே தலம்
பதிக பலன்	மனதில் அன்பு நிறைந்து விளங்குவர்
வரிசை எண்.	61                                                                8/14

திருச்சிற்றம்பலம்

பாசமும் கழிக்க கில்லா 
          அரக்கரைப் படுத்துத் தக்க
வாசமிக் கலர்கள் கொண்டு 
          மதியினால் மால்செய் கோயில்
நேசமிக்க அன்பினாலே 
          நினைமின்நீர் நின்று நாளும்
தேசமிக் கான் இருந்த 
          திருஇராமேச்சு ரமே.  1  

முற்றின நாள்கள் என்று 
          முடிப்பதே கார ணமாய்
உற்றவன் போர்க ளாலே 
          உணர்விலா அரக்கர் தம்மைச்
செற்ற மால் செய்த கோயில் 
          திருஇரா மேச்சு ரத்தைப்
பற்றி நீ பரவு நெஞ்சே 
        படர்சடை ஈசன் பாலே.  2  

கடலிடை மலைகள் தம்மால் 
          அடைத்துமால் கருமம் முற்றித்
திடலிடைச் செய்த கோயில் 
          திருஇரா மேச்சு ரத்தைத்
தொடலிடை வைத்து நாவிற் 
          சுழல்கின்றேன் தூய்மை இன்றி
உடலிடை நின்றும் பேரா 
          ஐவர்ஆட்டு உண்டு நானே.  3  

குன்றுபோல் தோளு டைய 
          குணமிலா அரக்கர் தம்மைக்
கொன்று போர் ஆழி அம் மால் 
          வேட்கையாற் செய்த கோயில்
நன்றுபோல் நெஞ்ச மேநீ 
          நன்மையை அறிதி யாயில்
சென்றுநீ தொழுதுய் கண்டாய் 
          திருஇரா மேச்சு ரமே.  4  

வீரமிக்க எயிறு காட்டி 
          விண்ணுற நீண்ட அரக்கன்
கூரமிக் அவனைச் சென்று 
          கொன்றுடன் கடற் படுத்துத்
தீரமிக் கான் இருந்த 
          திரு இராமேச்சுரத்தைக்
கோரமிக் கார்த வத்தாற் 
          கூடுவார் குறிப்பு ளாரே.  5  

ஆர்வலம் நம்மின் மிக்கார் 
          என்ற அவ் அரக்கர் கூடிப்
போர்வலம் செய்து மிக்குப் 
          பொருதவர் தம்மை வீட்டித்
தேர்வலம் செற்ற மால் செய் 
          திருஇரா மேச்சு ரத்தைச்
சேர்மட நெஞ்ச மே நீ 
          செஞ்சடை எந்தை பாலே.  6  

வாக்கினால் இன்பு உரைத்து 
          வாழ்கிலார் தம்மை எல்லாம்
போக்கினாற் புடைத்த வர்கள் 
          உயிர்தனை உண்டு மால் தான்
தேக்குநீர் செய்த கோயில் 
          திரு இராமேச்சுரத்தை
நோக்கினால் வணங்கு வார்க்கு 
          நோய்வினை நுணுகும் அன்றே.  7  

பலவுநாள் தீமை செய்து 
          பார்தன்மேல் குழுமி வந்து
கொலைவிலார் கொடிய ராய 
          அரக்கரைக் கொன்று வீழ்த்த
சிலையினான் செய்த கோயில் 
          திருஇரா மேச்சு ரத்தைத்
தலையினால் வணங்கு வார்கள் 
          தாழ்வராம் தவம தாமே.  8  

கோடிமா தவங்கள் செய்து 
          குன்றினார் தம்மை எல்லாம்
வீடவே சக்க ரத்தால் 
          எறிந்துபின் அன்பு கொண்டு
தேடிமால் செய்த கோயில் 
          திருஇராமேச்சு ரத்தை
நாடிவாழ் நெஞ்ச மேநீ 
          நன்னெறி ஆகும் அன்றே.  9  

வன்கண்ணர் வாள் அரக்கர் 
          வாழ்வினை ஒன்று அறியார்
புன்கண்ணர் ஆகி நின்று 
          போர்கள்செய் தாரை மாட்டிச்
செங்கண்மால் செய்த கோயில் 
          திருஇரா மேச்சு ரத்தைத்
தங்கணால் எய்த வல்லார் 
          தாழ்வராம் தலைவன் பாலே.  10  

வரைகள் ஒத்தே உயர்ந்த 
          மணிமுடி அரக்கர் கோனை
விரைய முற்றும் அற ஒடுக்கி 
          மீண்டுமால் செய்த கோயில்
திரைகள்முத் தால்வ ணங்கும் 
          திருஇரா மேச்சு ரத்தை
உரைகள்பத் தால் உரைப்பார் 
          உள்குவார் அன்பி னாலே.

    

திருச்சிற்றம்பலம்