திருவிடைமருதூர்

          

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருவிடைமருதூர்
ஊர்/வேறுபெயர்	இடைமருது மத்தியார்சுனம்
நாடு	காவிரி தென்கரை
ॐசுவாமி	மகாலிங்கம், மருதவாணர்
ॐஅம்பிகை	பிரகத் சுந்தர குஜாம்பிகை, நன்முலை நாயகி
பாடியவர்கள்	திருஞானசம்பந்தர்(6)          ஓடேகலன் உண்பதும் (1:032)         தோடு ஓர் காதினன் (1:095)         மருந்தவன் வானவர் (1:110)         நடை மரு திருபுரம் (1:!21)         விரிதரு புலியுரி (1:122)         பொங்கு நூல் மார்பினீர் (2:56)          திருநாவுக்கரசர்(5)         காடுடைச் சுடலை (4:35)         பாசம் ஒன்றிலராய் (5:14)         சூலப் படையுடையார்  (6:17)         ஆறு சடைக்கு அணிவர் (6:18)          சுந்தரர்(1)         கழுதை குங்குமம்  ( 7:60)
ஸ்தல மரம்	மருது (அர்சுனம்)
தீர்த்தம்	காவிரி
பண்	திருத்தாண்டகம்
குறிப்புகள்	தலைமருது - ஸ்ரீ சைலம் மல்லிகார்ஜுனம்  கடை மருது - திருப்புடைமருதூர்  இது இடை மருது
பதிக பலன்	வினை தீர்க்கும் - தோஷ நிவர்த்தி தலம்
வரிசை எண்.	16                                        காவிரி (தெ) -30/127

திருச்சிற்றம்பலம்

சூலப் படையுடையார் தாமே போலும்
சுடர்த்திங்கட் கண்ணி உடையார் போலும்
மாலை மகிழ்ந்து ஒருபால் வைத்தார் போலும்
மந்திரமும்  தந்திரமும் ஆனார் போலும்
வேலைக் கடல்நஞ்சம் உண்டார் போலும்
மேல்வினைகள் தீர்க்கும் விகிர்தர் போலும்
ஏலக் கமழ்குழலாள் பாகர் போலும்
இடைமருது மேவிய ஈச னாரே.  1  

காரார் கமழ்கொன்றைக் கண்ணி போலும்
காரானை ஈருரிவை போர்த்தார் போலும்
பாரார் பரவப் படுவார் போலும்
பத்துப் பல்ஊழி பரந்தார் போலும்
சீரால் வணங்கப் படுவார் போலும்
திசை அனைத்து மாய்மற்றும் ஆனார் போலும்
ஏரார் கமழ்குழலாள் பாகர் போலும்
இடைமருது மேவிய ஈச னாரே.  2  

வேதங்கள் வேள்வி பயந்தார் போலும்
விண்ணுலகு மண்ணுலகும் ஆனார் போலும்
பூதங்க ளாய புராணர் போலும்
புகழ வளர் ஒளியாய் நின்றார் போலும்
பாதம் பரவப் படுவார் போலும்
பத்தர் களுக்கு இன்பம் பயந்தார் போலும்
ஏதங்க ளான கடிவார் போலும்
இடைமருது மேவிய ஈச னாரே.  3  

திண்குணத்தார் தேவர் கணங்கள் ஏத்தித் 
திசைவணங்கச் சேவடியை வைத்தார் போலும்
விண்குணத்தார் வேள்வி சிதைய நூறி
வியன்கொண்டல் மேற்செல் விகிர்தர் போலும்
பண்குணத்தார் பாடலோடு ஆடலோவாப்
பரங்குன்ற மேய பரமர் போலும்
எண்குணத்தார் எண்ணா யிரவர் போலும்
இடைமருது மேவிய ஈச னாரே.  4  

ஊக முகிலுரிஞ்சு சோலை சூழ்ந்த 
உயர்பொழில் அண்ணாவில் உறைகின்றாரும்
பாகம் பணிமொழியாள் பாங்க ராகிப்
படுவெண் தலையிற் பலிகொள் வாரும்
மாகமடை மும்மதிலும் எய்தார் தாமு
மணிபொழில் சூழாரூர் உறைகின் றாரும்
ஏகம்ப மேயாரும் எல்லாம் ஆவார்
இடைமருது மேவிய ஈச னாரே.  5  

ஐயிரண்டும் ஆஆறு ஒன்றும் ஆமானார் போலும்
அறுமூன்றும் நான்மூன்றும் ஆனார் போலும்
செய்வினைகள் நல்வினைகள் ஆனார் போலும்
திசை அனைத்து மாய்நிறைந்த செல்வர் போலும்
கொய்மலரங் கொன்றைச் சடையார் போலும்
கூத்தாட வல்ல குழகர் போலும்
எய்யவந்த காமனையும் காய்ந்தார் போலும்
இடைமருது மேவிய ஈச னாரே.  6  

பிரியாத குணம் உயிர்கட்கு  அஞ்சோடு அஞ்சாய்ப்
பிரிவுடைய குணம்பேசிற் பத்தோடு ஒன்றாய்
விரியாத குணம் ஒருகால் நான்கே என்பர்
விரிவிலாக் குணநாட்டத்து  ஆறே என்பர்
தெரிவாய குணம் அஞ்சும் சமிதை அஞ்சும் 
பதம் அஞ்சும்  கதிஅஞ்சும் செப்பி னாரும்
எரியாய தாமரைமேல் இயங்கி னாரும்
இடைமருது மேவிய ஈச னாரே.  7  

தோலில் பொலிந்த உடையார் போலும்
சுடர்வாய் அரவசைத்த சோதி போலும்
ஆலம் அமுதாக உண்டார் போலும்
அடியார்கட்கு ஆரமுதம் ஆனார் போலும்
காலனையும் காய்ந்த கழலார் போலும்
கயிலாயம் தம் இடமாகக் கொண்டார் போலும்
ஏலங் கமழ்குழலாள் பாகர் போலும்
இடைமருது மேவிய ஈச னாரே.  8  

பைந்தளிர்க் கொன்றையந் தாரார் போலும்
படைக்கணாள் பாகம் உடையார் போலும்
அந்திவாய் வண்ணத்து அழகர் போலும்
மணிநீல கண்டம் உடையார் போலும்
வந்த வரவும் செலவும் ஆகி
மாறாது என் உள்ளத்து இருந்தார் போலும்
எந்தம் இடர்தீர்க்க வல்லார் போலும்
இடைமருது மேவிய ஈச னாரே.  9  

கொன்றையங் கூவிள மாலை தன்னைக் 
குளிர்சடைமேல் வைத்து உகந்த கொள்கை யாரும்
நின்ற அனங்கனை நீறா நோக்கி 
நெருப்பு உருவ மாய் நின்ற நிமல னாரும்
அன்ற அவ் அரக்கன் அலறி வீழ 
அருவரையைக் காலால் அழுத்தி னாரும்
என்றும் இடுபிச்சை ஏற்று உண்பாரும்
இடைமருது மேவிய ஈச னாரே.

திருச்சிற்றம்பலம்