திரு நானா

           

௨ 

திருஞானசம்பந்தர்சுவாமிகள் அருளிச்செய்த
இரண்டாம் திருமுறை

தகவல் பலகை	விவரம்
தலம்	திருநானா (பவானி)
ஊர் /வேறு பெயர்	பவானி, கூடுதுறை
நாடு	கொங்கு நாடு
ॐசுவாமி	சங்கமேஸ்வரர்
ॐஅம்பிகை	வேதநாயகி
பாடியவர்கள்	திருஞானசம்பந்தர்(1),         பந்தார் விரல்மடவாள் (2-72)
ஸ்தல மரம்	இலந்தை
தீர்த்தம்	பவானி, முக்கூடல்
பண்	காந்தாரம்
குறிப்புகள்	குபேரன், விசுவாமித்திரர் பராசர முனிவர் வழிபட்ட தலம்  முக்கூடல், கூடுதுறை என போற்றப்படுகிறது. காவிரி சங்கமம் அமைந்த இடம்.
பதிக பலன்	பழி இன்றி வாழலாம்.
வரிசை எண்.	72                                                                3/7

திருச்சிற்றம்பலம்

பந்தார் விரல்மடவாள் பாகமா
          நாகம்பூண்டு ஏறு அது ஏறி
அந்தார் அரவு அணிந்த அம்மானிடம்
          போலும் அந்தண்சாரல்
வந்தார் மடமந்தி கூத்தாட
          வார்பொழிலில் வண்டுபாடச்
செந்தேன் தெளி ஒளிரத் தேமாக்கனி
          உதிர்க்குந் திருநணாவே.  1  

நாட்டம் பொலிந்து இலங்கு நெற்றியினான்
          மற்றொருகை வீணை யேந்தி
ஈட்டுந் துயர் அறுக்கும் எம்மான்
          இடம்போலும் இலைசூழ் கானில்
ஓட்டந் தரும் அருவி வீழும்
          விசைகாட்ட முந்தூ ஓசைச்
சேட்டார் மணிகள் அணியும்
          திரைசேர்க்குந் திருநணாவே.  2  

நன்றாங்கு இசைமொழிந்து நன்னுதலாள்
          பாகமாய் ஞாலம் ஏத்த
மின்தாங்கு செஞ்சடை எம்
          விகிதர்க்கு இடம்போலும் விரைசூழ்வெற்பில்
குன்று ஓங்கி வன்திரைகள் மோத
          மயிலாலும் சாரற்செவ்வி
சென்று ஓங்கி வானவர்கள் ஏத்தி
          அடிபணியும் திருநணாவே.  3  

கையில் மழு ஏந்திக் காலில்
          சிலம்பு அணிந்து கரித்தோல் கொண்டு
மெய்யில் முழுது அணிந்த விகிர்தர்க்கு
          இடம்போலும் இடைந்து வானோர்
ஐயஅரனே பெருமான்
        அருள் என்று என்று ஆதரிக்கச்
செய்ய கமலம் பொழில்தேன்
        அளித்தியலுந் திருநணாவே.  4  

முத்தேர் நகையாள் இடமாகத்
          தம்மார்பில் வெண் நூல்பூண்டு
தொத்தேர் மலர்சடையில்
          வைத்தார் இடம்போலும் சோலைசூழ்ந்த
அத்தேன் அளியுண் களியால்
          இசைமுரல ஆலத்தும்பி
தெத்தே எனமுரலக் கேட்டார்
          வினைகெடுக்கும் திருநணாவே.  5  

வில்லார் வரையாக மாநாகம்
          நாணாக வேடம் கொண்டு
புல்லார் புரமூன்று எரித்தார்க்கு
          இடம்போலும் புலியும் மானும்
அல்லாத சாதிகளும் அங்கு அழல்மேல்
          கைகூப்ப அடியார்கூடிச்
செல்லா வருநெறிக்கே செல்ல
          அருள்புரியும் திருநணாவே.  6  

கானார் களிற்று உரிவை மேல்மூடி
          ஆடு அரவு ஒன்றரை மேல் சாத்தி
ஊனார் தலை ஓட்டில் ஊண் உகந்தான்
          தான் உகந்த கோயில் எங்கும்
நானா விதத்தால் விரதிகள்
          நல்நாமமே ஏத்தி வாழ்த்தத்
தேனார் மலர் கொண்டு அடியார்
          அடிவணங்கும் திருநணாவே.  7  

மன்னீர் இலங்கையர்தம்  கோமான்
          வலிதொலைய விரல் ஊன்றி
முந்நீர்க் கடல்நஞ்சை உண்டார்க்கு
        இடம்போலும் முனைசேர்சீயம்
அன்னீர் மைகுன்றி அழலால்
        விழிகுறைய வழியும் ஒன்றில்
செந்நீர் பரப்பச் சிறந்து
      கரி ஒளிக்கும் திருநணாவே.  8  

மையார் மணிமிடறன் மங்கையோர்
        பங்கு உடையான் மனைகள் தோறும்
கையார் பலி ஏற்ற கள்வன்
      இடம்போலும் கழல்கள் நேடிப்
பொய்யா மறையானும் பூமி அளந்தானும்
     போற்ற மன்னிச்
செய்யார் எரியாம் உருவம் உற
      வணங்கும் திருநணாவே.  9  

ஆடை ஒழித்து அங்கு அமணே
      திரிந்து உண்பார் அல்லல்பேசி
மூடும் உருவம்உகந் தார்உரை
      அகற்றும் மூர்த்திகோயில்
ஓடு நதிசேரும் நித்திலமும்
      மொய்த்த அகிலும்  கரையிற்சாரச்
சேடர் சிறந்து ஏத்தத் தோன்றிஒளி
      பெருகும் திருநணாவே.  10  

கல்வித் தகத்தால் திரைசூழ்
      கடற்காழிக் கவுணிசீரார் 
நல்வித் தகத்தால் இனிது உணரும்
      ஞானசம் பந்தன் எண்ணும்
சொல்வித் தகத்தால் இறைவன்
      திருநணா ஏத்து பாடல்
வல்வித் தகத்தான் மொழிவார்
      பழியிலர் இம் மண்ணின் மேலே.

        

திருச்சிற்றம்பலம்