திரு புக்கொளியூர் அவினாசி

            

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திரு புக்கொளியூர் அவினாசி
ஊர் /வேறு பெயர்	அவினாசி
நாடு	கொங்கு நாடு
ॐசுவாமி	அவிநாசியப்பர்
ॐஅம்பிகை	பெருங்கருணை நாயகி
பாடியவர்கள்	சுந்தரர் (1),         என்றான் மறக்கேன்  (7-92)
ஸ்தல மரம்	பாதிரி
தீர்த்தம்	நாக கன்னிகை தீர்த்தம்
பண்	குறிஞ்சி
குறிப்புகள்	முதலை விழுங்கிய பாலகனை மீட்டு தந்த பதி.
பதிக பலன்	துன்பம்  இன்றி வாழலாம்.
வரிசை எண்.	92                                                                4/7

திருச்சிற்றம்பலம்

எற்றான் மறக்கேன் எழுமைக்கும் எம்பெரு மானையே
உற்றாய் என்று உன்னையே உள்குகின்றேன்உணர்ந்து உள்ளத்தால்
புற்று ஆடு அரவா புக்கொளியூர் அவிநாசியே
பற்றாக வாழ்வேன் பசுபதியேபர மேட்டியே.  1  

வழிபோவார் தம்மோடும் வந்துடன் கூடிய மாணிநீ
ஒழிவது அழகோ சொல்லாய் அருளோங்கு சடையானே
பொழிலாரும்  சோலைப் புக்கொளியூரிற் குளத்திடை
இழியாக் குளித்த மாணிஎன்னைக்கிறி செய்ததே.  2  

எங்கேனும் போகினும் எம்பெருமானை நினைந்தக்கால்
கொங்கே புகினும் கூறைகொண்டு ஆறலைப் பார்இலை
பொங்காடு அரவா புக்கொளியூர் அவி நாசியே
எங்கோ னேஉனை வேண்டிக்கொள் வேன்பிற வாமையே.  3  

உரைப்பார் உரைஉகந் து உள்க வல்லார்தங்கள் உச்சியாய்
அரைக்கு ஆடு அரவா ஆதியும் அந்தமும் ஆயினாய்
புரைக்காடு சோலைப் புக்கொளியூர் அவிநாசியே
கரைக்கால் முதலையைப் பிள்ளை தரச்சொல்லு காலனையே.  4  

அரங்கு ஆவது எல்லாம் மாய் இடு காடது அன்றியும்
சரங்கோலை வாங்கி வரிசிலை நாணியிற் சந்தித்துப்
புரங்கோடு  எய்தாய் புக்கொளியூர் அவி நாசியே
குரங்காடு சோலைக் கோயில்கொண்டகுழைக் காதனே.  5  

நாத்தா னும்உனைப் பாடல்அன்றிநவி லாது எனச்
சோத்தென்று தேவர் தொழநின்ற சுந்தரச் சோதியாய்
பூத்தாழ் சடையாய் புக்கொளியூர் அவி நாசியே
கூத்தா உனக்குநான் ஆட்பட்ட குற்றமும் குற்றமே.  6  

மந்தி கடுவனுக்கு ஊண்பழம்நாடி மலைப்புறம்
சந்திகள் தோறும் சலபுட்பம் இட்டு வழிபடப்
புந்தி உறைவாய் புக்கொளியூர் அவிநாசியே
நந்தி உனைவேண்டிக் கொள்வேன்நரகம் புகாமையே.  7  

பேணாது ஒழிந்தேன் உன்னைஅல்லாற்பிற தேவரைக்
காணாது ஒழிந்தேன் காட்டுதியேல் இன்னங் காண்பன்நான்
பூணாண் அரவா புக்கொளியூரர் அவி நாசியே
காணாத கண்கள் காட்டவல்லகறைக் கண்டனே.  8  

நள்ளாறு தெள்ளாறு அரத்துறை வாய்எங்கள் நம்பனே
வெள்ளாடை வேண்டாய் வேங்கையின் தோலை விரும்பினாய்
புள்ளேறு சோலைப் புக்கொளி யூரில் குளத்திடை
உள்ளாடப் புக்க மாணி என்னைக்கிறி செய்ததே.  9  

நீறு ஏற ஏறுநிமிர் புன்சடைநின்மல மூர்த்தியைப்
போர் ஏறு அது ஏறியைப் புக்கொளியூர் அவி நாசியைக்
கார் ஏறு கண்டனைத் தொண்டன் ஆரூரன் கருதிய
சீர் ஏறு பாடல்கள் செப்பவல்லார்க்கு இல்லை துன்பமே.

        

திருச்சிற்றம்பலம்