திருவாலங்காட்டு மூத்த திருப்பதிகம்.

 

௨ 

காரைக்கால் அம்மையார்  அருளிச்செய்த 
பதினொராம் திருமுறை

திருச்சிற்றம்பலம்

எட்டி இலவம் ஈகை 

    சூறை காரை படந்து எங்கும்

சுட்ட சுடலை சூழ்ந்த 

    கள்ளி சேர்ந்த குடர் கெளவப்

பட்ட பிணங்கள் பரந்த 

    காற்றி பறை போல் விழிகட் பேய் 

கொட்ட முழவம் கூளி

    பாடக் குழகன் ஆடுமே.   1

 கொங்கை திரங்கி நரம்பு எழுந்து 

  குண்டுகண் வெண்பற் குழிவயிற்றுப்

பங்கி சிவந்திரு பற்கள்நீண்டு பரடுயர் 

  நீள்கணைக் காலோர்பெண்பேய்

தங்கி அலறி உலறுகாட்டில் 

  தாழ்சடை எட்டுத் திசையும்வீசி

அங்கங் குளிர்ந்த அனல் ஆடும்எங்கள் 

  அப்பன் இடம் திரு ஆலங்காடே.  2  

கள்ளிக் கவட்டிடைக் காலைநீட்டிக் 

  கடைக்கொள்ளி வாங்கி மசித்துமையை

விள்ள எழுதி வெடுவெடென்ன 

  நக்கு வெருண்டு விலங்குபார்த்துத்

துள்ளிச் சுடலைச் சுடுபிணத்தீச் 

  சுட்டிட முற்றுஞ் சுளிந்துபூழ்தி

அள்ளி அவிக்கநின்று ஆடும்எங்கள் 

  அப்பன் இடம் திரு ஆலங்காடே.  3  

வாகை விரிந்துவெண் ணெற்றொலிப்ப 

  மயங்கிருள் கூர்நடு நாளையாங்கே

கூகையோஆண்டலை பாடஆந்தை 

  கோடதன் மேற்குதித்து ஓடவீசி

ஈகை படர்தொடர் கள்ளிநீழல் 

  ஈமம் இடுசுடு காட்டகத்தே

ஆகம்  குளிர்ந்தனல் ஆடும் எங்கள் 

  அப்பன் இடந்திரு ஆலங்காடே.  4  

குண்டில் ஓமக்குழிச் சோற்றைவாங்கிக் 

  குறுநரி தின்ன அதனைமுன்னே

கண்டிலம் என்று கனன்று பேய்கள் 

  கையடித்து ஓடிடு காடு அரங்கா

மண்டலம் நின்றங்கு உளாளம்இட்டு 

  வாதித்து வீசி எடுத்தபாதம்

அண்டம் உறநிமிர்ந்து ஆடும்எங்கள் 

  அப்பன் இடம் திரு ஆலங்காடே.  5  

விழுது நிணத்தை விழுங்கியிட்டு 

  வெண்தலை மாலை விரவப்பூட்டிக்

கழுதுதன் பிள்ளையைக் காளியென்று 

  பேரிட்டுச் சீருடைத் தாவளர்த்துப்

புழுதி துடைத்து முலைகொடுத்துப் 

  போயின தாயை வரவுகாணாது 

அழுதுறங் கும்புறங் காட்டில்ஆடும் 

  அப்பன் இடம் திரு ஆலங்காடே.  6  

பட்டடி நெட்டுகிர்ப் பாறுகாற்பேய் 

  பருந்தொடு கூகை பகண்டைஆந்தை

குட்டி யிடமுட்டை கூகைபேய்கள் 

  குறுநரி சென்றணங்கு  ஆடுகாட்டில்

பிட்டடித் துப்புறங் காட்டில்இட்ட 

  பிணத்தினைப் பேரப் புரட்டிஆங்கே

அட்டமே பாயநின்று ஆடும்எங்கள் 

  அப்பன் இடம் திரு ஆலங்காடே.  7  

சுழலும் அழல்விழிக் கொள்ளிவாய்ப்பேய் 

  சூழ்ந்து துணங்கையிட்டு ஓடிஆடித்

தழலுள் எரியும் பிணத்தைவாங்கித் 

  தான்தடி தின்றணங்கு ஆடுகாட்டிற்

கழல்ஒலி ஓசைச் சிலம்பொலிப்பக் 

  காலுயர் வட்டணை இட்டுநட்டம்

அழல்உமிழ்ந்து ஓரி கதிக்கஆடும் 

  அப்பன் இடம் திரு ஆலங்காடே.  8  

நாடும் நகரும் திரிந்துசென்று 

  நன்னெறி நாடி நயந்தவரை

மூடி முதுபிணத்து இட்டமாடே 

  முன்னிய பேய்க்கணம் சூழச்சூழக்

காடுங் கடலும் மலையும் மண்ணும் 

  விண்ணும்  சுழல அனல்கை ஏந்தி

ஆடும் அரவப் புயங்கன்எங்கள் 

  அப்பன் இடம் திரு ஆலங்காடே.  9  

துத்தங் கைக்கிள்ளை விளரிதாரம் 

  உழைஇளி ஓசைபண் கெழுமப்பாடிச்

சச்சரி கொக்கரை தக்கையோடு 

  தகுணிதம் துந்துபி தாளம்வீணை

மத்தளம்  கரடிகை வன்கை மென்தோல் 

    தமருகங்  குடமுழா மொந்தை வாசித்து 

அத்தனை விரவினோடு ஆடும்எங்கள் 

  அப்பன் இடம் திரு ஆலங்காடே.  10  

புந்தி கலங்கி மதிமயங்கி 

  இறந்தவ ரைப்புறங் காட்டில்இட்டுச்

சந்தியில் வைத்துக் கடமைசெய்து 

  தக்கவர் இட்டசெந் தீவிளக்கா

முந்தி அமரர் முழவின்ஓசை 

  திசைகது வச்சிலம்பு ஆர்க்கஆர்க்க

அந்தியில் மாநடம் ஆடும்எங்கள் 

  அப்பன் இடம் திரு ஆலங்காடே.  11  

ஒப்பினை இல்லவன் பேய்கள்கூடி 

  ஒன்றினை ஒன்றடித்து ஒக்கலித்துப்

பப்பினை யிட்டுப் பகண்டை யாடப் 

  பாடிருந்து அந்நரி யாழ்அமைப்ப

அப்பனை அணிதிரு ஆலங்காட்டுள் 

  அடிகளைச் செடிதலைக் காரைக்காற்பேய்

செப்பிய செந்தமிழ் பத்தும்வல்லார் 

  சிவகதி சேர்ந்தின்பம் எய்துவாரே.  12 

திருச்சிற்றம்பலம்