திருநல்லூர்

        

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு நல்லூர்
ஊர்
நாடு	காவிரி தென்கரை
ॐசுவாமி	பஞ்சவர்வர்னேஸ்வரர்
ॐஅம்பிகை	பர்வத சுந்தரி
பாடியவர்கள்	திருஞானசம்பந்தர்(3)         கொட்டும் பறை சீராற் (1:86)         வண்டிரிய விண்டமலர் (3:83) திருநாவுக்கரசர்(2)         அட்டுமின் இல்பலி (4:97)         நினைந்து உருகும் அடியாரை  (6:14)
ஸ்தல மரம்	வில்வம்
தீர்த்தம்	சப்த சாகர தீர்த்தம்
பண்	திருத்தாண்டகம்
குறிப்புகள்	ஏழு கடலில் நீராடும் புண்ணியம் உடையது  திருநாவுக்கரசு நாயனாருக்கு திருவடி சூட்டிய திருத்தலம்  அமர் நீதி நாயனாரை ஆட்கொண்ட திருப்பதி  செங்கட் சோழனால் கட்டப்பட்ட மாடக் கோயில்  தென் கயிலாயம் என்னும் பெயர் பெற்றது.
பதிக பலன்	இறையருள்  பெற
வரிசை எண்.	14                                            காவிரி (தெ) -20/127

திருச்சிற்றம்பலம்

நினைந்து உருகும் அடியாரை நைய வைத்தார்
நில்லாமே தீவினைகள் நீங்க வைத்தார்
சினந்திருகு களிற்று உரிவைப் போர்வை வைத்தார்
செழுமதியின் தளிர்வைத்தார் சிறந்து வானோர்
இனந்துருவி மணிமகுடத் தேறத் துற்ற
இனமலர்கள் போது அவிழ்ந்து மதுவாய்ப் பில்கி
நனைந்தனைய திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  1  

பொன் நலத்த நறுங்கொன்றை சடைமேல் வைத்தார்
புலியுரியின் அதள்வைத்தார் புனலும் வைத்தார்
மன் நலத்த திரள்தோள்மேல் மழுவாள் வைத்தார்
வார்காதிற் குழைவைத்தார் மதியும் வைத்தார்
மின் நலத்த நுண்ணிடையாள் பாகம் வைத்தார்
வேழத்தின் உரிவைத்தார் வெண்ணூல் வைத்தார்
நன் நலத்த திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  2  

தோடேறும் மலர்க்கொன்றை சடைமேல் வைத்தார்
துன் எருக்கின் வடம்வைத்தார் துவலை சிந்தப்
பாடேறு படுதிரைகள் எறிய வைத்தார்
பனிமத்த மலர்வைத்தார் பாம்பும் வைத்தார்
சேடேறு திருநுதன்மேல் நாட்டம் வைத்தார்
சிலைவைத்தார் மலைபெற்ற மகளை வைத்தார்
நாடேறு திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  3  

வில்லருளி வருபுருவத்து ஒருத்தி பாகம் 
பொருத்தாகி விரிசடைமேல் அருவி வைத்தார்
கல்லருளி வரிசிலையா வைத்தார் ஊராக் 
கயிலாய மலைவைத்தார் கடவூர் வைத்தார்
சொல்லருளி யறநால்வர்க்கு அறிய வைத்தார்
சுடுசுடலைப் பொடிவைத்தார் துறவி வைத்தார்
நல்லருளால் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  4  

விண்ணிரியுந் திரிபுரங்க ள் எரிய வைத்தார்
வினைதொழுவார்க்கு அறவைத்தார் துறவி வைத்தார்
கண்ணெரியால் காமனையும் பொடியா வைத்தார்
கடிக்கமல மலர்வைத்தார் கயிலை வைத்தார்
திண்ணெரியும் தண்புனலும் உடனே வைத்தார்
திசைதொழுது மிசையமரர் திகழ்ந்து வாழ்த்தி
நண்ணரிய திருவடி என் றலைமேல் வைத்தார்
நல்லூர் எம் பெருமானார் நல்ல வாறே.  5  

உற்றுலவு பிணி உலகத்து எழுமை வைத்தார்
உயிர்வைத்தார் உயிர்செல்லுங் கதிகள் வைத்தார்
மற்று  அமரர் கணம்வைத்தார் அமரர் காணா
மறைவைத்தார் குறைமதியம் வளர வைத்தார்
செற்றமலி யார்வமொடு காம லோபஞ் 
சிறவாத நெறிவைத்தார் துறவி வைத்தார்
நற்றவர்சேர் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  6  

மாறுமலைந் தாரரணம் எரிய வைத்தார்
மணிமுடிமேல் அரவைத்தார் அணிகொள் மேனி
நீறுமலிந் தெரியாடல் நிலவ வைத்தார் 
நெற்றிமேற் கண்வைத்தார் நிலையம் வைத்தார்
ஆறுமலைந் தறுதிரைகள் அறிய வைத்தார்
ஆர்வத்தால் அடியமரர் பரவ வைத்தார்
நாறுமலர்த் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  7  

குலங்கள்மிகும் அலைகடல்கள் ஞாலம் வைத்தார்
குருமணிசே ரரவைத்தார் கோலம் வைத்தார்
உலங்கிளரும் அரவத்தின் உச்சி வைத்தார் 
உண்டு அருளி விடம்வைத்தார் எண் தோள் வைத்தார்
நிலங்கிளரும் புனல்கனலுள் அனிலம் வைத்தார்
நிமிர்விசும்பின் மிசைவைத்தார் நினைந்தார் இந்நாள்
நலங்கிளருந் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  8  

சென்று உருளும் கதிர் இரண்டும் விசும்பில் வைத்தார்
திசைபத்தும் இருநிலத்தில் திருந்த வைத்தார்
நின்று அருளி அடியமரர் வணங்க வைத்தார்
நிறைதவமும் மறைபொருளும் நிலவ வைத்தார்
கொன்று அருளிக் கொடுங்கூற்றம் நடுங்கி ஓடக் 
குரைகழற்சே வடிவைத்தார் விடையும் வைத்தார்
நன்று அருளும் திருவடிஎன் தலைமேல் வைத்தார்
நல்லூர் எம் பெருமானார் நல்ல வாறே.  9  

பாம்புரிஞ்சி மதிகிடந்து திரைகள் ஏங்கப்
பனிக்கொன்றை சடைவைத்தார் பணிசெய் வானோர்
ஆம்பரிசு தமக்கு எல்லாம் அருளும் வைத்தார்
அடுசுடலைப் பொடிவைத்தார் அழகும் வைத்தார்
ஓம்பரிய வல்வினைநோய் தீர வைத்தார்
உமையையொரு பால்வைத்தார் உகந்து வானோர்
நாம்பரவுந் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.  10  

குலங்கிளரும் வருதிரைகள் ஏழும் வைத்தார்
குருமணிசேர் மலைவைத்தார் மலையைக் கையால்
உலங்கிளர எடுத்தவன் தோள் முடியும் நோவ 
ஒருவிரலால் உறவைத்தார் இறைவா என்று
புலம்புதலும் அருளொடுபோர் வாளும் வைத்தார்
புகழ்வைத்தார் புரிந்தாளாக் கொள்ள வைத்தார்
நலங்கிளருந் திருவடி என் தலைமேல் வைத்தார்
நல்லூர் எம் பெருமானார் நல்ல வாறே.

திருச்சிற்றம்பலம்