திருப்புறம்பயம்

       

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருப்புறம்பயம்
ஊர்/பிற பெயர்கள்	புன்னாக வனம், கல்யாண மாநகர்
நாடு	காவிரி வடகரை (சோழ நாடு)
ॐசுவாமி	சாட்சி நாதர், புன்னை வன நாதர்
ॐஅம்பிகை	கரும்ப்பன்னசொல்லி
பாடியவர்கள்	திருஞானசம்பந்தர் (1)          மறம்பய மலைந்தவர் (2:30) அப்பர்(1)         கொடிமாட நீள் தெருவு (7:13) சுந்தரர்(1)         அங்கம் ஓதியோர் ( 7:35)
ஸ்தல மரம்	புன்னை மரம்
தீர்த்தம்	பிரம தீர்த்தம்
பண்	திருத்தாண்டகம்
குறிப்புகள்	வெண்ணிற திருமேனி கொண்ட விநாயகர் ஒரு பெண்ணுக்காக இறைவன் சாட்சி சொன்னது.. அகத்தியர், சனகர், சனந்தனர் புலத்தியர், விசுவாமித்திரர்  வழிபட்ட தலம்
பதிக பலன்	ஆன்ம உருக்கத்தை காட்ட
வரிசை எண்.	13                                 காவிரி (வ) -46/63

திருச்சிற்றம்பலம்

கொடிமாட நீள் தெருவு கூடல் கோட்டூர்
கொடுங்கோளூர் தம்வளவி கண்டி யூரும்
நடமாடு நன்மருகல் வைகி நாளும் 
நலமாகும் ஒற்றியூர் ஒற்றி யாகப்
படுமாலை வண்டறையும் பழனம் பாசூர்
பழையாறும் பாற்குளமுங் கைவிட்டு இந்நாள்
பொடியேறு மேனியராய்ப் பூதஞ் சூழப்
புறம்பயம்நம் மூர் என்று போயி னாரே.  1  

முற்றொருவர் போல முழுநீறு ஆடி
முளைத்திங்கள் சூடிமுந் நூலும் பூண்டு
ஒற்றொருவர் போல உறங்கு வேன்கை 
ஒளிவளையை ஒன்று ஒன்றா எண்ணு கின்றார்
மற்றொருவர் இல்லைத் துணை எனக்கு
மால்கொண்டாற் போல மயங்கு வேற்குப்
புற்றரவக் கச்சார்த்துப் பூதஞ் சூழப்
புறம்பயம்நம் ஊர் என்று போயி னாரே.  2  

ஆகாத நஞ்சுண்ட அந்தி வண்ணர்
ஐந்தலைய மாசுணங்கொண் டம்பொற் றோள்மேல்
ஏகாச மாவிட்டோடு ஒன்று ஏந் திவந் 
திடுதிருவே பலியென்றார்க்க்கு இல்லே புக்கேன்
பாகேதுங் கொள்ளார் பலியுங் கொள்ளார்
பாவியேன் கண்ணுள்ளே பற்றி நோக்கிப்
போகாத வேடத்தர் பூதஞ் சூழப்
புறம்பயம்நம் ஊர் என்று போயி னாரே.   3  

பன்மலிந்த வெண் தலை கையில் ஏந்திப்
பனிமுகில் போல்மேனிப் பவந்த நாதர்
நென்மலிந்த நெய்த்தானம் சோற்றுத் துறை
நியமந் துருத்தியும் நீடூர் பாச்சில்
கன்மலிந்து ஒங்கு கழுநீர்க் குன்றம்
கடல் நாகைக் காரோணம் கைவிட்டு இந்நாள்
பொன்மலிந்த கோதையரும் தாமும் எல்லாம் 
புறம்பயம்நம் ஊர் என்று போயி னாரே.   4  

செத்தவர்தந் தலைமாலை கையில் ஏந்திச்
சிரமாலை சூடிச் சிவந்த மேனி
மத்தகத்த யானை உரிவை மூடி
மடவா ளவளோடு மான் ஒன்று ஏந்தி
அத்தவத்த தேவர் அறுப தின்மர் 
ஆறுநூ றாயிரவர்க் காடல் காட்டிப்
புத்தகம் கைக்கொண்டு புலித்தோல் வீக்கிப்
புறம்பயம்நம் ஊர் என்று போயி னாரே.  5  

நஞ்சடைந்த கண்டத்தர் வெண்ணீறு ஆடி
நல்ல புலியதள்மேல் நாகம் கட்டிப்
பஞ்சடைந்த மெல்விரலாள் பாக மாகப்
பராய்த்துறை யே என்று ஒர் பவள வண்ணர்
துஞ்சிடையே வந்து துடியுங் கொட்டத்
துண்ணென்று எழுந்திருந்தேன் சொல்ல மாட்டேன்
புன்சடையின் மேலோர் புனலும் சூடிப்
புறம்பயம்நம் ஊர் என்று போயி னாரே.   6  

மறியிலங்கு கையர் மழுவொன்று  ஏந்தி
மறைக்காட்டேன் என்று ஒர் மழலை பேசிச்
செறி இலங்கு திண் தோள் மேல் நீறு கொண்டு
திருமுண்ட மா இ ட்ட திலக நெற்றி
நெறியிலங்கு கூந்தலார் பின்பின் சென்று
நெடுங்கண் பனிசோர நின்று நோக்கிப்
பொறியிலங்கு பாம்பார்த்துப் பூதஞ் சூழப்
புறம்பயம்நம் ஊர் என்று போயி னாரே.   7  

நில்லாதே பல்லூரும் பலிகள் வேண்டி 
நிரைவளையார் பலிபெய்ய நிறையும் கொண்டு
கொல்லேறுங் கொக்கரையுங் கொடுகொட் டியும்
குடமூக்கில் அ ங்கு ஒழியக் குளிர்தண் பொய்கை
நல்லாளை நல்லூரே தவிரேன் என்று 
நறையூரிற் றாமுந் தவிர்வார் போலப்
பொல்லாத வேடத்தர் பூதஞ் சூழப்
புறம்பயம்நம் ஊர் என்று போயி னாரே.   8  

விரையேறு நீறணிந்து ஓர் ஆமை பூண்டு
வெண்தோடு பெய்திடங்கை வீணை ஏந்தித்
திரையேறு சென்னிமேல் திங்கள் தன்னைத் 
திசைவிளங்க வைத்து உகந்த செந்தீ வண்ணர்
அரையேறு மேகலையாள் பாக மாக 
ஆரிடத்தில் ஆடல் அமர்ந்த ஐயன்
புரையேறு தாமேறிப் பூதஞ் சூழப்
புறம்பயம்நம் ஊர் என்று போயி னாரே.   9  

கோவாய இந்திரனுள் ளிட்டா ராகக் 
குமரனும் விக்கின விநாய கனும்
பூவாய பீடத்து மேல யனும்
பூமி அளந்தானும் போற்றி சைப்பப்
பாவாய இன்னிசைகள் பாடி ஆடிப் 
பாரிடமும் தாமும் பரந்து பற்றிப்
பூவார்ந்த கொன்றை பொறிவண் டார்க்கப்
புறம்பயம்நம் ஊர் என்று போயி னாரே. 

திருச்சிற்றம்பலம்