திருநள்ளாறு

               

௨ 

திருநாவுக்கரசு  சுவாமிகள் அருளிச்செய்த
ஐந்தாம்   திருமுறை

தகவல் பலகை	விவரம்
தலம்	திருநள்ளாறு
ஊர்/வேறுபெயர்
நாடு	காவிரி தென்கரை
ॐசுவாமி	தர்ப்பாரண்யேஸ்வரர், நள்ளாற்று ஈசர்
ॐஅம்பிகை	போகமார்த்த பூண்முலையாள்
பாடியவர்கள்	திருஞானசம்பந்தர்(4)         பாடக மெல்லடி (1:07)         போகமார்த்த பூண் முலையாள் (1:49)         ஏடு மலி கொன்ற(2:33)         தளிரிள வளர் ஒளி  (3:87) திருநாவுக்கரசர்(2)         உள்ளாறாததோர் புண்டரிகத்திரள் (5:68)         ஆதிகண்ணான் முகத்தில் (6:20) சுந்தரர்(1)         செம்பொன் மேனி வெண்நீறு (7:68)
ஸ்தல மரம்	தருப்பை
தீர்த்தம்	நள தீர்த்தம்
பண்	திதிருக்குறுந்தொகை
குறிப்புகள்	நளச் சக்கரவர்த்திக்கு சனி பகவானால் வந்த துன்பம் நீக்கிய தலம் சப்த விடங்க தலங்களுள் ஒன்று  பச்சைப் பதிகம் பெற்ற சிறப்புடையது
பதிகப் பலன்	வினை தீர்க்கும் தலம்
வரிசை எண்.	68                                                                    52/127

திருச்சிற்றம்பலம்

உள்ளா றாததோர் புண்டரி கத்திரள்
தெள்ளா றாச்சிவ சோதித் திரளினைக்
கள்ளா றாதபொற் கொன்றை கமழ்சடை
நள்ளாறு என நம்வினை நாசமே.  1  

ஆர ணப்பொருளாம் அரு ளாளனார்
வார ணத்து உரி போர்த்த மணாளனார்
நார ணன்நண்ணி யேத்துநள் ளாறனார்
கார ணக்கலை ஞானக் கடவுளே.  2  

மேகம் பூண்டதோர் மேருவிற் கொண்ட எயில்
சோகம் பூண்டழல் சோரத்தொட் டான் அவன்
பாகம் பூண்டமால் பங்கயத் தானொடு
நாகம் பூண்டுகூத் தாடுநள் ளாறனே.  3  

மலியுஞ் செஞ்சடை வாளர வம்மொடு
பொலியும் பூம்புனல் வைத்த புனிதனார்
நலியுங் கூற்றை நலிந்தநள் ளாறர்தம்
வலியுங் கண்டு இறு மாந்து மகிழ்வனே.  4  

உறவ னாய்நிறைந்து உள்ளம் குளிர்ப்பவன்
இறைவ னாகிநின்று எண்ணிறைந் தான் அவன்
நறவ நாறும் பொழில் திரு நள்ளாறன்
மறவ னாய்ப்பன்றிப் பின்சென்ற மாயமே.  5  

செக்க ரங்கழி செஞ்சுடர்ச் சோதியார்
நக்கர் அங்கு அரவார்த்த நள்ளாறனார்
வக்க ரன் உயிர் வவ்விய மாயற்குச்
சக்க ரம் அருள் செய்த சதுரரே.  6  

வஞ்ச நஞ்சிற் பொலிகின்ற கண்டத்தர்
விஞ்சை யிற்செல்வப் பாவைக்கு வேந்தனார்
வஞ்ச நெஞ்சத் தவர்க்கு வழிகொடார்
நஞ்ச நெஞ்சர்க்கு அருளுநள் ளாறரே.  7  

அல்லன் என்றும் அலர்க்கு அரு ளாயின
சொல்லன் என்றுசொல் லாமறைச் சோதியான்
வல்லன் என்றும்வல் லார்வளம் மிக்கவர்
நல்லன் என்றும்நல் லார்க்குநள் ளாறனே.  8  

பாம்ப ணைப்பள்ளி கொண்ட பரமனும்
பூம்ப ணைப்பொலிகின்ற புராணனும்
தாம்ப ணிந்தளப் பொண்ணாத் தனித்தழல்
நாம்ப ணிந்து அடி போற்றுநள் ளாறனே.  9  

இலங்கை மன்னன் இருபது தோளிற
மலங்க மால்வரை மேல்விரல் வைத்தவர்
நலங்கொள் நீற்றர்நள்ளாறரை நாள் தொறும்
வலங்கொள் வார்வினை யாயின மாயுமே.

திருச்சிற்றம்பலம்